ಪಶ್ಚಿಮ ಬಂಗಾಳದಲ್ಲಿ ಎಸ್ಐಆರ್ ಬಳಿಕ ಪ್ರಕಟಗೊಂಡ ಮತದಾರರ ಪೂರಕ ಪಟ್ಟಿಯಲ್ಲಿ, ಒಂದೇ ಬೂತ್‌ನ 340 ಜನರ ಹೆಸರುಗಳನ್ನು ತೆಗೆದು ಹಾಕಿರುವುದು ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಬಸಿರ್ಹತ್ ಉತ್ತರ ವಿಧಾನಸಭಾ ಕ್ಷೇತ್ರದಲ್ಲಿ ಈ ಬೆಳವಣಿಗೆ ನಡೆದಿದೆ.
ಮತದಾನದ ಹಕ್ಕು ಕಳೆದುಕೊಂಡ ಎಲ್ಲರೂ ಮುಸ್ಲಿಮರು. ಬಸಿರ್ಹತ್ ಉತ್ತರ ಕ್ಷೇತ್ರದ ಬೊರೊ ಗೋಬ್ರಾ ಗ್ರಾಮದ 5ನೇ ಬೂತ್‌ನ ಮತದಾರರು. ಎಸ್ಐಆರ್ ಬಳಿಕ ಪ್ರಕಟಗೊಂಡ ಮತದಾರರ ಕರಡು ಪಟ್ಟಿಯಲ್ಲಿ ಇವರೆಲ್ಲರನ್ನೂ ‘ತೀರ್ಪಿನ ಹಂತದಲ್ಲಿದ್ದಾರೆ’ ಎಂದು ಗುರುತಿಸಲಾಗಿತ್ತು. ಸೋಮವಾರ (23) ಮೊದಲ ಪೂರಕ ಪಟ್ಟಿಯಲ್ಲಿ ಇವರ ಹೆಸರು ಡಿಲೀಟ್ ಮಾಡಲಾಗಿದೆ ಎಂದು indiatoday.in ವರದಿ ಮಾಡಿದೆ.
ಬೂತ್ ಮಟ್ಟದ ಅಧಿಕಾರಿ ಮುಹಮ್ಮದ್ ಶಫಿಯುಲ್ ಅಲಂ ಅವರ ಹೆಸರನ್ನು ಮತದಾರರ ಪಟ್ಟಿಯಿಂದ ತೆಗೆದು ಹಾಕಿರುವುದು ಜನರ ಆಕ್ರೋಶವನ್ನು ತೀವ್ರಗೊಳಿಸಿದೆ. ಚುನಾವಣಾ ಆಯೋಗದ ಕ್ರಮದ ವಿರುದ್ದ ಅಧಿಕಾರಿಗಳ ಮನೆಗಳು ಮತ್ತು ಸ್ಥಳೀಯ ಬೀದಿಯಲ್ಲಿ ಪ್ರತಿಭಟನೆ ನಡೆಸಿರುವ ಗ್ರಾಮಸ್ಥರು, ‘ಒಂದು ಸಮುದಾಯವನ್ನು ಗುರಿಯಾಗಿಸಿ ಹೆಸರು ಅಳಿಸಲಾಗಿದೆ’ ಎಂದು ಆರೋಪಿಸಿದ್ದಾರೆ.
ಮತದಾನದ ಹಕ್ಕು ಕಳೆದುಕೊಂಡವರು ಮತ್ತು ಸ್ಥಳೀಯ ಅಧಿಕಾರಿಗಳು ಚುನಾವಣಾ ಅಧಿಕಾರಿಗಳ ಪಾರದರ್ಶಕತೆಯ ಕೊರತೆಯ ಬಗ್ಗೆ ತೀವ್ರ ನಿರಾಶೆ ವ್ಯಕ್ತಪಡಿಸಿದ್ದಾರೆ.
“ಹೆಸರು ಡಿಲಿಟ್ ಆದ ಬಗ್ಗೆ ನಾನು ಬಸಿರ್ಹತ್ ಬ್ಲಾಕ್ IIರ ಬ್ಲಾಕ್ ಅಭಿವೃದ್ಧಿ ಅಧಿಕಾರಿಯಿಂದ ಪರಿಹಾರವನ್ನು ಪಡೆಯಲು ಪ್ರಯತ್ನಿಸಿದಾಗ ಮುಂದಿನ ಕ್ರಮ ಕೈಗೊಳ್ಳಲು ಸಾಧ್ಯವಿಲ್ಲ ಎಂಬ ಪ್ರತಿಕ್ರಿಯೆ ಬಂದಿದೆ. ಚುನಾವಣಾ ನೋಂದಣಿ ಅಧಿಕಾರಿಯನ್ನು ಸಂಪರ್ಕಿಸಲು ಸಾಧ್ಯವಾಗಿಲ್ಲ ಎಂದು ಬಿಎಲ್‌ಒ ಆಲಂ ಹೇಳಿದ್ದಾರೆ.
ಚುನಾವಣಾ ಆಯೋಗ ಹನ್ನೊಂದು ಮಾನ್ಯ ದಾಖಲೆಗಳಲ್ಲಿ ಒಂದನ್ನು ಮಾತ್ರ ಬಯಸುತ್ತದೆಯಾದರೂ, ಅನೇಕರು ಮೂರು ಅಥವಾ ನಾಲ್ಕು ದಾಖಲೆಗಳನ್ನು ಸಲ್ಲಿಸಿದ್ದಾರೆ. ಆದರೂ, ಅವರ ಹೆಸರುಗಳನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿದೆ ಎಂದು ಹಕ್ಕು ಕಳೆದುಕೊಂಡ ಮತದಾರರಲ್ಲಿ ಒಬ್ಬರಾದ ಕಾಝಿರುಲ್ ಮಂಡಲ್ ಹೇಳಿದ್ದಾರೆ. ನಿರ್ದಿಷ್ಟ ಪಕ್ಷಪಾತದ ಬೇಡಿಕೆಗಳನ್ನು ಪೂರೈಸಲು ಆಯೋಗವು ರಾಜಕೀಯ ಪ್ರಭಾವದಿಂದ ಕಾರ್ಯನಿರ್ವಹಿಸಿದೆ ಎಂದು ಪ್ರತಿಭಟನಾಕಾರರು ಆರೋಪಿಸಿದ್ದಾರೆ.
ಕಾನೂನು ಪರಿಹಾರಕ್ಕಾಗಿ ಈ ವಿಷಯವನ್ನು ನ್ಯಾಯಮಂಡಳಿಗೆ ಕೊಂಡೊಯ್ಯುವುದಾಗಿ ಬಿಎಲ್‌ಒ ಆಲಂ ತಿಳಿಸಿದ್ದಾರೆ.
ಬಸಿರ್ಹತ್ ಬ್ಲಾಕ್ IIರ ಅಡಿಯಲ್ಲಿ ಬರುವ ಬೇಗಂಪುರ್ ಬಿಬಿಪುರ್ ಗ್ರಾಮ ಪಂಚಾಯತ್‌ನ 5ನೇ ಸಂಖ್ಯೆಯ ಬೂತ್ ಈ ವಿವಾದದ ಕೇಂದ್ರಬಿಂದುವಾಗಿದೆ. ಇಲ್ಲಿ ಒಟ್ಟು 992 ನೋಂದಾಯಿತ ಮತದಾರರಿದ್ದಾರೆ. ಇವರಲ್ಲಿ ಸಾವು ಅಥವಾ ಸ್ಥಳಾಂತರದ ಕಾರಣದಿಂದಾಗಿ 38 ಹೆಸರುಗಳನ್ನು ಸಾಮಾನ್ಯ ನಿಯಮದಂತೆ ಪಟ್ಟಿಯಿಂದ ತೆಗೆದುಹಾಕಲಾಗಿತ್ತು. ಉಳಿದಂತೆ ಒಟ್ಟು 358 ಮತದಾರರ ಅರ್ಹತೆಗೆ ಸಂಬಂಧಿಸಿದಂತೆ ವಿಚಾರಣೆಗೆ ಹಾಜರಾಗುವಂತೆ ಅವರಿಗೆ ಸಮನ್ಸ್ ನೀಡಲಾಗಿತ್ತು.
ಕರಡು ಪಟ್ಟಿಯಲ್ಲಿ ಈ ಪೈಕಿ 18 ಪ್ರಕರಣಗಳು ಇತ್ಯರ್ಥಗೊಂಡಿದ್ದರೂ, ಉಳಿದ 340 ಮತದಾರರ ಹೆಸರನ್ನು ಅಂತಿಮ ತೀರ್ಮಾನ ಬಾಕಿ ಇರುವ ಪಟ್ಟಿಯಲ್ಲಿ ಇರಿಸಲಾಗಿತ್ತು. ಜವನರಿ 23ರಂದು ಪೂರಕ ಪಟ್ಟಿ ಪ್ರಕಟವಾಗುವವರೆಗೂ ಇದು ಮುಂದುವರಿದಿದ್ದು, ಅಂತಿಮವಾಗಿ ಆ ಎಲ್ಲಾ ಹೆಸರುಗಳನ್ನು ಮತದಾರರ ಪಟ್ಟಿಯಿಂದ ಕೈಬಿಡಲಾಗಿದೆ.
ಆಲಂ ಅವರು ಮಾತನಾಡಿ, ಈ ಮತದಾರರು ಅರ್ಜಿಗಳನ್ನು ಭರ್ತಿ ಮಾಡಲು ತಾವು ವೈಯಕ್ತಿಕವಾಗಿ ಸಹಾಯ ಮಾಡಿದ್ದಾಗಿ ಮತ್ತು ಚುನಾವಣಾ ಆಯೋಗದ ನಿಯಮಗಳ ಪ್ರಕಾರ ಎಲ್ಲಾ ದಾಖಲೆಗಳನ್ನು ಅಪ್‌ಲೋಡ್ ಮಾಡುವುದನ್ನು ಖಚಿತಪಡಿಸಿಕೊಂಡಿದ್ದಾಗಿ ತಿಳಿಸಿದ್ದಾರೆ. ಆದರೂ, ಸಹ, ಆ ಹೆಸರುಗಳನ್ನು ಆಯ್ದು ಮತದಾರರ ಪಟ್ಟಿಯಿಂದ ತೆಗೆದುಹಾಕಲಾಗಿದೆ ಎಂದು ಅವರು ಹೇಳಿದ್ದಾರೆ.
