ರಂಗಭೂಮಿ ಕಲಾವಿದರೊಬ್ಬರು ಕಪ್ಪು ಕುರ್ತಾ-ಪೈಜಾಮ ಧರಿಸಿದ್ದಕ್ಕಾಗಿ ಮುಸ್ಲಿಂ ಎಂದು ಶಂಕಿಸಿ ಹಿಂದುತ್ವ ಯುವಕರ ಗುಂಪೊಂದು ಅವರನ್ನು ಕ್ರೂರವಾಗಿ ಥಳಿಸಿರುವ ಘಟನೆ ಪಶ್ಚಿಮ ಬಂಗಾಳದ ಉತ್ತರ 24 ಪರಗಣ ಜಿಲ್ಲೆಯಲ್ಲಿ ನಡೆದಿದೆ.
ಶುಭಂಕರ್ ದಾಸ್ ಶರ್ಮಾ ಅವರು ಜುಲೈ 28 ರ ರಾತ್ರಿ ಅಗರ್ಪಾರ ರೈಲು ನಿಲ್ದಾಣದ ಬಳಿ, ತಮ್ಮ ಸಹ ರಂಗಭೂಮಿ ಕಲಾವಿದ ಕಾರ್ಯಕ್ರಮ ಮುಗಿಸಿ ಮನೆಗೆ ಹಿಂತಿರುಗುತ್ತಿದ್ದಾಗ ಈ ದಾಳಿ ನಡೆದಿದೆ ಎಂದು ಹೇಳಿದ್ದಾರೆ.
ಶರ್ಮಾ ಪ್ರಕಾರ, ನಾಲ್ವರು ಯುವಕರು ದಾರಿಯಲ್ಲಿ ಅವರನ್ನು ತಡೆದು ಬಟ್ಟೆಗಳನ್ನು ಗಮನಿಸಿ ಅವರ ಧರ್ಮದ ಬಗ್ಗೆ ಪ್ರಶ್ನಿಸಲು ಪ್ರಾರಂಭಿಸಿದರು. ದಾಳಿಕೋರರು ಅವರನ್ನು ನೀವು ಮುಸ್ಲಿಂ ಎಂದು ಕೇಳಿದರು ಎಂದು ಅವರು ಹೇಳಿದರು.
“ನಾನು ಮುಸ್ಲಿಂ ಆದರೆ ನಿಮಗೇನು?” ಎಂದು ಅವರು ಪ್ರತಿಕ್ರಿಯಿಸಿದೆ ಎಂದು ಶರ್ಮಾ ಹೇಳಿದರು.
“ನಾನು ಸ್ವತಂತ್ರ ದೇಶದಲ್ಲಿ ವಾಸಿಸುತ್ತಿದ್ದೇನೆ, ಅಪರಿಚಿತರಿಗೆ ನನ್ನ ಧರ್ಮದ ಕುರಿತು ಬಹಿರಂಗಪಡಿಸಲು ಸಾಧ್ಯವಿಲ್ಲ” ಎಂದು ಅವರು ದಾಳಿಕೋರರಿಗೆ ಹೇಳಿದರು.
ರಂಗಭೂಮಿ ಕಲಾವಿದ ಶರ್ಮಾ ಅವರ ಪ್ರಕಾರ, ಅವರ ಪ್ರತಿಕ್ರಿಯೆಯು ಹಿಂದುತ್ವ ಗುಂಪನ್ನು ಕೆರಳಿಸಿದೆ. ನಂತರ ಗುಂಪು ಶರ್ಮಾ ಅವರನ್ನು ಪದೇ ಪದೇ ಹೊಡೆಯಲು ಪ್ರಾರಂಭಿಸಿದೆ.
ಶರ್ಮಾ ಅವರು ತಮ್ಮ ಮುಖ, ಕಣ್ಣು, ಕಿವಿ ಮತ್ತು ಎದೆಯ ಸುತ್ತಲೂ ಗುದ್ದಿ, ಒದ್ದು, ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಿದ್ದಾರೆ. ಅಂತಿಮವಾಗಿ ಅವರನ್ನು ನೆಲಕ್ಕೆ ಕೆಡವಿದ್ದು, ಹಲ್ಲೆಯ ಸಮಯದಲ್ಲಿ ದಾಳಿಕೋರರು ಅವರ ಕುರ್ತಾವನ್ನು ಹರಿದು ಹಾಕಿದರು ಎಂದು ಹೇಳಿದ್ದಾರೆ.
ದಾಳಿಕೋರರು ತಮ್ಮನ್ನು ಹೊಡೆಯುವಾಗ ಹಿಂದೂ ಧಾರ್ಮಿಕ ಘೋಷಣೆಗಳನ್ನು ಕೂಗಿದರು ಎಂದು ಅವರು ಆರೋಪಿಸಿದ್ದಾರೆ..
ದಾಳಿಯ ಸಮಯದಲ್ಲಿ ಸ್ವಲ್ಪ ಸಮಯದವರೆಗೆ ಪ್ರಜ್ಞೆ ಕಳೆದುಕೊಂಡಿದ್ದಾಗಿ ಶರ್ಮಾ ಹೇಳಿದರು. ಪ್ರಜ್ಞೆ ಮರಳಿದ ನಂತರ, ಕಷ್ಟಪಟ್ಟು ಮನೆಗೆ ತಲುಪುವಲ್ಲಿ ಯಶಸ್ವಿಯಾದೆ ಎಂದು ಹೇಳಿದರು.
ತೀವ್ರವಾದ ದೈಹಿಕ ಗಾಯಗಳ ನಂತರ ಗಣನೀಯ ಮಾನಸಿಕ ಯಾತನೆ ಮತ್ತು ಭಯ ಉಂಟಾಗಿದೆ ಎಂದು ಅವರು ಹೇಳಿದರು. ಆರಂಭದಲ್ಲಿ, ನಾನು ಭಯಭೀತರಾಗಿದ್ದೆ. ದೊಡ್ಡ ವಿವಾದವಾಗದೆ ಸ್ಥಳೀಯವಾಗಿ ವಿಷಯವನ್ನು ಪರಿಹರಿಸಬಹುದೆಂದು ಆಶಿಸಿದ್ದರಿಂದ ನಾನು ಘಟನೆಯನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಲಿಲ್ಲ ಎಂದಿದ್ದಾರೆ.
“ಈ ವಿಷಯವನ್ನು ಸ್ಥಳೀಯ ಮಟ್ಟದಲ್ಲಿ ಪರಿಹರಿಸಬೇಕೆಂದು ನಾನು ಬಯಸಿದ್ದೆ, ಅದು ದೊಡ್ಡದಾಗಲು ಬಯಸಲಿಲ್ಲ” ಎಂದು ಶರ್ಮಾ ಅವರು ಆರಂಭದಲ್ಲಿ ಘಟನೆಯ ಬಗ್ಗೆ ಮೌನವಾಗಿದ್ದಿದ್ದು ಏಕೆ ಎಂಬುದನ್ನು ವಿವರಿಸುತ್ತಾ ಹೇಳಿದರು.
ನಂತರ ಅವರು ಘಟನೆಯ ಬಗ್ಗೆ ತಮ್ಮ ಸಾಮಾಜಿಕ ಮಾಧ್ಯಮ ಖಾತೆಯಲ್ಲಿ ಹಂಚಿಕೊಂಡರು. ಜೊತೆಗೆ, ಅವರ ಎಡಗಣ್ಣಿನ ಸುತ್ತ ಊತ ಮತ್ತು ಗಾಯಗೊಂಡ ಮುಖದ ಛಾಯಾಚಿತ್ರಗಳನ್ನು ಹಂಚಿಕೊಂಡರು.
ಶರ್ಮಾ ಅವರು ಆರಂಭದಲ್ಲಿ ದೂರವಾಣಿ ಮೂಲಕ ವೈದ್ಯಕೀಯ ಸಲಹೆ ಪಡೆದರು. ಸ್ಥಿತಿ ಸುಧಾರಿಸುತ್ತದೆ ಎಂದು ಆಶಿಸಿ ನೋವು ನಿವಾರಕಗಳನ್ನು ತೆಗೆದುಕೊಂಡೆ ಎಂದು ಹೇಳಿದರು.
ಆದರೆ ಅವರ ಸ್ಥಿತಿ ಸುಧಾರಿಸದಿದ್ದಾಗ, ಸ್ಥಳೀಯ ಆಸ್ಪತ್ರೆಯ ತುರ್ತು ವಿಭಾಗವನ್ನು ಸಂಪರ್ಕಿಸಿದೆ ಎಂದು ಹೇಳಿದ್ದಾರೆ.
ವೈದ್ಯರು ಅವರ ಕಣ್ಣು, ಕಿವಿ ಮತ್ತು ಪಕ್ಕೆಲುಬುಗಳಿಗೆ ಸಂಬಂಧಿಸಿದ ಗಾಯಗಳಾಗಿರುವ ಬಗ್ಗೆ ತಿಳಿಸಿದ್ದಾರೆ. ಹೆಚ್ಚಿನ ತಜ್ಞರ ಪರೀಕ್ಷೆಗಳಿಗೆ ಅವರನ್ನು ರೆಫರ್ ಮಾಡಿದ್ದಾರೆ.
ಆಗಸ್ಟ್ 3 ರಂದು, ಅವರ ಕಣ್ಣುಗಳು, ಮೂಳೆಗಳು ಮತ್ತು ಕಿವಿ, ಮೂಗು ಮತ್ತು ಗಂಟಲಿಗೆ ಸಂಬಂಧಿಸಿದ ಮೂರು ಪ್ರತ್ಯೇಕ ವಿಭಾಗಗಳಲ್ಲಿ ಪರೀಕ್ಷಿಸಲಾಯಿತು ಎಂದು ಶರ್ಮಾ ಹೇಳಿದರು.
ಶರ್ಮಾ ಅವರಿಗೆ ಕಿವಿಯ ಗಾಯವು ಗಂಭೀರವಾಗಿದೆ. ಹಲ್ಲೆ ಸಮಯದಲ್ಲಿ ಗಮಭೀರ ಗಾಯವಾಗಿದ್ದು, ವಿಶೇಷ ವೈದ್ಯಕೀಯ ಆರೈಕೆಯ ಅಗತ್ಯವಿದೆ ಎಂದು ಹೇಳಿಕೊಂಡಿದ್ದಾರೆ.
ನಾನು ಮುಸ್ಲಿಂ ಆದರೆ ನಿಮಗೇನು?
ದಾಳಿಕೋರರು ಮೊದಲು ಮುಸ್ಲಿಂ ಎಂದು ಪ್ರಶ್ನಿಸುವ ಮೊದಲು ಬಟ್ಟೆಯ ಮೇಲೆ ಕೇಂದ್ರೀಕರಿಸಿದರು ಎಂದು ಶರ್ಮಾ ಹೇಳುತ್ತಾರೆ. ಅಪರಿಚಿತರು ನಮ್ಮ ಧಾರ್ಮಿಕ ಗುರುತನ್ನು ಕೇಳುವ ಹಕ್ಕನ್ನು ಹೊಂದಿದ್ದಾರೆಯೇ ಎಂದು ಅವರು ಪ್ರಶ್ನಿಸಿದ್ದಾರೆ. ನನ್ನ ಪ್ರತಿಕ್ರಿಯೆಯ ನಂತರ ಹಿಂಸಾಚಾರ ನಡೆಯಿತು ಎಂದು ಅವರು ಆರೋಪಿಸಿದ್ದಾರೆ.
ಯುವಕರ ಗುಂಪು ನನ್ನನ್ನು ಪ್ರಶ್ನಿಸುವುದನ್ನು ಮುಂದುವರಿಸಿದ ನಂತರವೂ ನಾನು ನನ್ನ ನಿಲುವನ್ನು ಬದಲಾಯಿಸಲು ನಿರಾಕರಿಸಿದೆ ಎಂದು ಶರ್ಮಾ ಹೇಳಿದರು.
