ವಾಟ್ಸಾಪ್, ಫೇಸ್‌ಬುಕ್ ಮತ್ತು ಟ್ವಿಟರಿನಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾದ ವೈರಲ್ ಸಂದೇಶವು ಕರ್ಪೂರ, ಲವಂಗ, ಅಜಿವಾನ ಮತ್ತು ನೀಲಗಿರಿ ಎಣ್ಣೆಯ ಆವಿಯನ್ನು ಉಸಿರಾಡುವುದರಿಂದ ರಕ್ತದ ಆಮ್ಲಜನಕದ ಮಟ್ಟವನ್ನು ಹೆಚ್ಚಿಸುತ್ತದೆ ಮತ್ತು ಉಸಿರಾಟದ ತೊಂದರೆಯನ್ನು ನಿವಾರಿಸುತ್ತದೆ ಎಂದು ಸೂಚಿಸುತ್ತದೆ. ಈ ವಾದವನ್ನು ಬೆಂಬಲಿಸಲು ಯಾವುದೇ ವೈಜ್ಞಾನಿಕ ಆಧಾರಗಳಿಲ್ಲ ಎಂದು ಆಲ್ಟ್ ನ್ಯೂಸ್ ಫ್ಯಾಕ್ಟ್‌ಚೆಕ್ ನಡೆಸಿದೆ. ಬದಲಾಗಿ, ಮಿಶ್ರಣವನ್ನು ಉಸಿರಾಟದ ಮೂಲಕ ಒಳಗೆ ತೆಗೆದುಕೊಳ್ಳುವುದರಿಂದ (ಸ್ನಿಫ್ಫಿಂಗ್) ಕರ್ಪೂರ ವಿಷಕ್ಕೆ ಕಾರಣವಾಗಬಹುದು, ಇದು ಕೆಲವು ಸಂದರ್ಭಗಳಲ್ಲಿ ಮಾರಣಾಂತಿಕವಾಗಿದೆ.
ಹೆಚ್ಚುತ್ತಿರುವ ಕೋವಿಡ್ ಪ್ರಕರಣಗಳ ಮಧ್ಯೆ ಕೇಂದ್ರ ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವ ಮುಖ್ತಾರ್ ಅಬ್ಬಾಸ್ ನಖ್ವಿ ಫೇಸ್‌ಬುಕ್‌ನಲ್ಲಿ ಈ ವೈರಲ್ ಅಸತ್ಯವನ್ನು ಹಂಚಿಕೊಂಡಿದ್ದರು.
ವೈರಲ್ ಆದ ಸಂದೇಶದಲ್ಲಿ “ಕರ್ಪೂರ, ಲವಂಗ, ಅಜಿವಾನ ಮತ್ತು ಕೆಲವು ಹನಿಗಳು ನೀಲಗಿರಿ ಎಣ್ಣೆ ಸೇರಿಸಿ ಅರೆದ ಮಿಶ್ರಣ ತಯಾರಿಸಬೇಕು. ದಿನವಿಡೀ ಅದನ್ನು ವಾಸನೆ ಮಾಡುವುದು ಅಂದರೆ ಉಸಿರಿನ ಮೂಲಕ ಒಳಕ್ಕೆ ತೆಗೆದುಕೊಳ್ಳುವುದು. ಇದರಿಂದ ರಕ್ತದಲ್ಲಿನ ಆಮ್ಲಜನಕದ ಮಟ್ಟ ಹೆಚ್ಚುತ್ತದೆ. ಆಮ್ಲಜನಕದ ಮಟ್ಟ ಕಡಿಮೆಯಾದಾಗ ಲಡಾಖ್‌ನ ಪ್ರವಾಸಿಗರಿಗೆ ಈ ಪೊಟ್ಲಿಯನ್ನು (ಮಿಶ್ರಣವನ್ನು) ನೀಡಲಾಗುತ್ತದೆ. ಇದು ಮನೆಮದ್ದು…..
ಫ್ಯಾಕ್ಟ್‌ಚೆಕ್
1. ಕರ್ಪೂರ
ಕರ್ಪೂರವು ಸುಡುವ ಬಿಳಿ ಸ್ಫಟಿಕದ ವಸ್ತುವಾಗಿದ್ದು ಅದು ಬಲವಾದ ಆರೊಮ್ಯಾಟಿಕ್ ವಾಸನೆಯನ್ನು ಹೊಂದಿರುತ್ತದೆ. ನೋವು ಮತ್ತು ತುರಿಕೆ ಕಡಿಮೆ ಮಾಡಲು ಇದನ್ನು ಕೆಲವೊಮ್ಮೆ ಚರ್ಮದ ಮೇಲೆ ಉಜ್ಜಲಾಗುತ್ತದೆ.
ಇದನ್ನು ವಿಕ್ಸ್ ವೆಪೊರಬ್‌ನಂತಹ ಸಾಮೂಹಿಕ ಮೂಗಿನ ಡಿಕೊಂಜೆಸ್ಟೆಂಟ್ ಜೆಲ್‌ಗಳಲ್ಲಿ ಸಣ್ಣ ಪ್ರಮಾಣದಲ್ಲಿ (4-5%) ಬಳಸಲಾಗುತ್ತದೆ. ಆದರೆ ಅದರ ಪರಿಣಾಮಕಾರಿತ್ವದ ಬಗ್ಗೆ ಪುರಾವೆಗಳು ಗೊಂದಲಮಯವಾಗಿವೆ. ಕೆಲವು ಹಳೆಯ ಅಧ್ಯಯನಗಳು ಕರ್ಪೂರ ಮತ್ತು ನೀಲಗಿರಿ ಮೂಗಿನ ಅನಾರೋಗ್ಯದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಕಂಡುಹಿಡಿದಿವೆ.
ಔಷಧೀಯವಲ್ಲದ ಕರ್ಪೂರವನ್ನು ಅಳೆಯದ ಪ್ರಮಾಣದಲ್ಲಿ ಉಸಿರಾಡುವುದು ಅಥವಾ ಸೇವಿಸುವುದರಿಂದ ಒಡ್ಡಿಕೊಂಡ ಕೆಲವೇ ನಿಮಿಷಗಳಲ್ಲಿ, ವಿಶೇಷವಾಗಿ ಮಕ್ಕಳಲ್ಲಿ ತೀವ್ರ ವಿಷತ್ವಕ್ಕೆ ಕಾರಣವಾಗಬಹುದು.
ಅಮೇರಿಕನ್ ಅಸೋಸಿಯೇಷನ್ ಆಫ್ ಪಾಯ್ಸನ್ ಕಂಟ್ರೋಲ್ ಸೆಂಟರ್ ವರದಿಯ ಪ್ರಕಾರ, 2018 ರಲ್ಲಿ, ಅಮೆರಿಕದಲ್ಲಿ ಸುಮಾರು 9,500 ಕರ್ಪೂರ ವಿಷದ ಪ್ರಕರಣಗಳು ನಡೆದಿವೆ. ಅವುಗಳಲ್ಲಿ 10 ಜೀವಕ್ಕೆ ಅಪಾಯಕಾರಿಯಾದ ಪ್ರಕರಣಗಳಿದ್ದವು ಮತ್ತು ನೂರಾರು ಪ್ರಕರಣಗಳು ಗಮನಾರ್ಹ ಅಂಗವೈಕಲ್ಯಕ್ಕೆ ಕಾರಣವಾಗಿವೆ.
ಯುಎಸ್ ಸೆಂಟರ್ ಫಾರ್ ಡಿಸೀಸ್ ಕಂಟ್ರೋಲ್ (ಸಿಡಿಸಿ) ಮಾರ್ಗಸೂಚಿಗಳ ಪ್ರಕಾರ, ಕರ್ಪೂರ ಆವಿಗಳನ್ನು ಉಸಿರಾಡುವುದರಿಂದ ಮೂಗು, ಗಂಟಲು ಮತ್ತು ಕಣ್ಣಿನಲ್ಲಿ ಕೆರಳಿಕೆ, ತುರುಸುವಿಕೆ ಉಂಟಾಗುತ್ತದೆ. ಇದು ರೋಗಗ್ರಸ್ಥತನಕ್ಕೆ, ಮಾನಸಿಕ ಗೊಂದಲ, ಹೊಟ್ಟೆ ನೋವಿಗೆ ಕಾರಣವಾಗಬಹುದು. ಹೆಚ್ಚಿನ ಪ್ರಮಾಣದಲ್ಲಿ ಸೆವಿಸಿದಾಗ ಇದು ಕೆಲವು ಸಂದರ್ಭಗಳಲ್ಲಿ ಸಾವಿಗೆ ಕಾರಣವಾಗಬಹುದು. ಕರ್ಪೂರ ಆವಿ ಇನ್ಹಲೇಷನ್ ನಿಂದ ಉಂಟಾದ ವಿಷದ ಬಗ್ಗೆ ಭಾರತದಲ್ಲಿ ಹಲವಾರು ಪ್ರಕರಣಗಳು ವರದಿಯಾಗಿವೆ.
2. ಲವಂಗ
ಲವಂಗ ಆವಿ ಕೂಡ ವಿಷಕಾರಿಯಾಗಬಹುದು ಎಂದು ವೈಜ್ಞಾನಿಕ ವರದಿಗಳು ಹೇಳಿವೆ. ಆದರೆ ಇದು ರಕ್ತದ ಆಮ್ಲಜನಕವನ್ನು ಹೆಚ್ಚಿಸುತ್ತದೆ ಅಥವಾ ಉಸಿರಾಟದ ತೊಂದರೆಯನ್ನು ನಿವಾರಿಸುತ್ತದೆ ಎಂದು ಸೂಚಿಸಲು ಯಾವುದೇ ಸಂಶೋಧನೆಗಳಿಲ್ಲ.
3. ಅಜಿವಾನ ಮತ್ತು ನೀಲಗಿರಿ ಎಣ್ಣೆ
ಮೇಲಿನ ಎರಡೂ ಪದಾರ್ಥಗಳಿಗೆ, ಅವು ರಕ್ತದ ಆಮ್ಲಜನಕವನ್ನು ಹೆಚ್ಚಿಸುತ್ತವೆ ಅಥವಾ ಉಸಿರಾಟದ ತೊಂದರೆಯನ್ನು ನಿವಾರಿಸುತ್ತವೆ ಎಂದು ಸೂಚಿಸಲು ಯಾವುದೇ ಸಂಶೋಧನೆ ಅಥವಾ ಪುರಾವೆಗಳಿಲ್ಲ.
ವಾಟ್ಸಾಪ್ ಫಾರ್ವರ್ಡ್‌ ಸಂದೇಶದ ಇತರ ಆವೃತ್ತಿಗಳು ಆಯುರ್ವೇದ ವೈದ್ಯ ಪ್ರಜಗ್ರಾಜ್ ದಾಬಿ ಸಂಶೋಧನೆ ಮಾಡಿದ್ದಾರೆ ಎಂದು ಉಲ್ಲೇಖಿಸುತ್ತವೆ. ಅವರು ಹಲವು ಕೋವಿಡ್ ರೋಗಿಗಳಿಗೆ ಸೂತ್ರೀಕರಣದೊಂದಿಗೆ ಚಿಕಿತ್ಸೆ ನೀಡಿದ್ದಾರೆಂದು ಭಾವಿಸಲಾಗಿದೆ. ಆದರೆ ಈ ಹಕ್ಕನ್ನು ದಾಬಿ ತಿರಸ್ಕರಿಸಿದ್ದಾರೆ.
ಕೋವಿಡ್ ರೋಗಿಗಳ ಮೇಲೆ ಆಂಬ್ಯುಲೆನ್ಸ್‌ಗಳು ಈ ಸೂತ್ರೀಕರಣವನ್ನು ಬಳಸುತ್ತಿವೆ ಎಂದು ಇತರ ಆವೃತ್ತಿಗಳು ಹೇಳುತ್ತವೆ. ಆದರೆ ಕೋವಿಡ್ ಆಂಬುಲೆನ್ಸ್‌ಗಳಿಗಾಗಿ ಆರೋಗ್ಯ ಸಚಿವಾಲಯದ ಪ್ರೋಟೋಕಾಲ್‌ನಲ್ಲಿ ಅಂತಹ ಯಾವುದೇ ಚಿಕಿತ್ಸಾ ಮಾರ್ಗಸೂಚಿಗಳನ್ನು ಉಲ್ಲೇಖಿಸಲಾಗಿಲ್ಲ.
ಕರ್ಪೂರ, ಲವಂಗ ಅಥವಾ ಅಜಿವಾನ ಬೀಜಗಳು ರಕ್ತದ ಆಮ್ಲಜನಕವನ್ನು ಹೆಚ್ಚಿಸುತ್ತವೆ ಅಥವಾ ಉಸಿರಾಟದ ತೊಂದರೆಯ ಸಮಯದಲ್ಲಿ ಪರಿಹಾರವನ್ನು ನೀಡುತ್ತವೆ ಎಂಬುದಕ್ಕೆ ಯಾವುದೇ ಪುರಾವೆಗಳಿಲ್ಲ. ಸೌಮ್ಯ ಉಸಿರಾಟದ ಸೋಂಕುಗಳು ಅಥವಾ ಉರಿಯೂತದ ಸೈನುಟಿಸ್ ಸಮಯದಲ್ಲಿ ಇವುಗಳು ‘ಉತ್ತಮ ಅನುಭವ’ ಚಿಕಿತ್ಸೆಯಾಗಿ ಕಾರ್ಯನಿರ್ವಹಿಸಬಹುದು. ಕೋವಿಡ್ ರೋಗಿಗಳಲ್ಲಿ ಇವು ರಕ್ತದ ಆಮ್ಲಜನಕದ ಮಟ್ಟವನ್ನು ಹೆಚ್ಚಿಸಬಹುದು ಎಂದು ಸೂಚಿಸುವುದರಿಂದ ಜನರು ಮನೆಮದ್ದುಗಳನ್ನು ಅವಲಂಬಿಸಬಹುದು ಮತ್ತು ವೈದ್ಯಕೀಯ ಸಹಾಯವನ್ನು ತೆಗೆದುಕೊಳ್ಳುವುದಿಲ್ಲ. ಮಿಶ್ರಣವನ್ನು ಸ್ನಿಫ್ ಮಾಡುವುದರಿಂದ ಕರ್ಪೂರ ವಿಷವೂ ಆಗಿ ಪರಿಣಮಿಸಬಹುದು, ಇದು ಕೆಲವು ಸಂದರ್ಭಗಳಲ್ಲಿ ಮಾರಣಾಂತಿಕವಾಗಬಹುದು.
(ಕೃಪೆ: ಅಲ್ಟ್‌ನ್ಯೂಸ್)
ಇದನ್ನೂ ಓದಿ: ದೇಶದೆಲ್ಲೆಡೆ ಆಮ್ಲಜನಕ ಕೊರತೆ: ಒಂದು ವರ್ಷದಲ್ಲಿ ಭಾರತದ ಆಮ್ಲಜನಕ ರಫ್ತು 700% ಕ್ಕಿಂತ ಹೆಚ್ಚಾಗಿದೆ!
