ಪಶ್ಚಿಮ ಬಂಗಾಳವನ್ನು ಜಾಗತಿಕ ಪ್ರವಾಸೋದ್ಯಮ ಭೂಪಟದಲ್ಲಿ ಮುನ್ನೆಲೆಗೆ ತರುವ ಉದ್ದೇಶದಿಂದ ಬಿಡುಗಡೆ ಮಾಡಲಾದ ರಾಜ್ಯದ ಹೊಸ ಪ್ರವಾಸೋದ್ಯಮ ಜಾಹೀರಾತು ಈಗ ತೀವ್ರ ಟೀಕೆ ಹಾಗೂ ಅಪಹಾಸ್ಯಕ್ಕೆ ಈಡಾಗಿದೆ. ಈ ಜಾಹೀರಾತನ್ನು ಒಮ್ಮೆ ಗಮನಿಸಿದರೆ ರಷ್ಯಾದ ಸೆಂಟ್ ಬಾಸಿಲ್ಸ್ ಕ್ಯಾಥೆಡ್ರಲ್, ಈಜಿಪ್ಟ್‌ನ ಪಿರಮಿಡ್‌ಗಳು, ಪ್ಯಾರಿಸ್‌ನ ಐಫೆಲ್ ಟವರ್ ಹಾಗೂ ರಿಯೋ ಡಿ ಜನೇರೋದ ‘ಕ್ರೈಸ್ಟ್ ದ ರಿಡೀಮರ್’ ಪ್ರತಿಮೆಗಳು ಎದ್ದು ಕಾಣಿಸುತ್ತವೆ.
ಆದರೆ, ಅದರಲ್ಲಿ ಬಂಗಾಳದ ಸಂಸ್ಕೃತಿ ಅಥವಾ ತಾಣಗಳು ಎಲ್ಲೂ ಕಾಣಿಸುವುದಿಲ್ಲ. ಕೇವಲ ಕೋಲ್ಕತ್ತಾದ ಐಕಾನಿಕ್ ‘ಹೌರಾ ಸೇತುವೆ’ ಮಾತ್ರ ಕಣ್ಣು ಮುಚ್ಚಿ ತೆರೆಯುವುದರೊಳಗೆ ಬಂದು ಹೋಗುತ್ತದೆ. ಇದನ್ನು ನೋಡಿರುವ ನೆಟ್ಟಿಗರು, “ಅಷ್ಟಕ್ಕೂ ಈ ಜಾಹೀರಾತಿನಲ್ಲಿ ಬಂಗಾಳ ಎಲ್ಲಿದೆ?” ಎಂದು ಪ್ರಶ್ನಿಸುತ್ತಿದ್ದಾರೆ.
ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ಬಂಗಾಳ ಪ್ರವಾಸೋದ್ಯಮದ ನೂತನ ಲೋಗೋ ಮತ್ತು ಹೊಸ ಬ್ರ್ಯಾಂಡ್ ಗುರುತನ್ನು ಅನಾವರಣಗೊಳಿಸಿದ ಸಂದರ್ಭದಲ್ಲಿ ಈ ಜಾಹೀರಾತನ್ನು ಬಿಡುಗಡೆ ಮಾಡಲಾಗಿತ್ತು. ಜೊತೆಗೆ ಸುಂದರ ಮ್ಯಾಂಗ್ರೋವ್ ಕಾಡುಗಳಿಂದ ಹಿಡಿದು ಹಿಮಾಲಯದ ಶಿಖರಗಳವರೆಗಿನ ಪ್ರವಾಸಿ ತಾಣಗಳನ್ನು ಅಭಿವೃದ್ಧಿಪಡಿಸಲು 500 ಕೋಟಿ ರೂಪಾಯಿಗಳ ಹೊಸ ಯೋಜನೆಯನ್ನೂ ಅವರು ಘೋಷಿಸಿದ್ದರು.
ಮಮತಾ ಬ್ಯಾನರ್ಜಿ ಬ್ರ್ಯಾಂಡಿಂಗ್‌ಗೆ ಪರ್ಯಾಯ ಯತ್ನ: ಎಡವಿದ ಜಾಹೀರಾತು!
ಪಶ್ಚಿಮ ಬಂಗಾಳದಲ್ಲಿ ಪ್ರವಾಸೋದ್ಯಮ ಕ್ಷೇತ್ರವನ್ನು ಬಲಪಡಿಸಲು ಮತ್ತು ಮೂಲಸೌಕರ್ಯ, ಸಂಪರ್ಕ ಹಾಗೂ ಪ್ರವಾಸಿ ಸೌಲಭ್ಯಗಳನ್ನು ಮೇಲ್ದರ್ಜೆಗೇರಿಸಲು ಸರ್ಕಾರ ಸುಮಾರು 500 ಕೋಟಿ ರೂಪಾಯಿ ಹೂಡಿಕೆ ಮಾಡಲಿದೆ ಎಂದು ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಶುಕ್ರವಾರ ಪ್ರಕಟಿಸಿದ್ದಾರೆ. ಇದೇ ವೇಳೆ ಅವರು ರಾಜ್ಯ ಪ್ರವಾಸೋದ್ಯಮದ ನೂತನ ಲೋಗೋ ಹಾಗೂ ಬ್ರ್ಯಾಂಡ್ ಗುರುತನ್ನು ಅನಾವರಣಗೊಳಿಸಿದರು.
‘ವೆಸ್ಟ್ ಬೆಂಗಾಲ್: ವೇರ್ ಇಂಡಿಯಾ ಫೀಲ್ಸ್ ಡಿಫರೆಂಟ್’ (ಪಶ್ಚಿಮ ಬಂಗಾಳ: ಇಲ್ಲಿ ಭಾರತ ಭಿನ್ನವಾಗಿ ಅನುಭವಕ್ಕೆ ಸಿಗುತ್ತದೆ) ಎಂಬ ಹೊಸ ಟ್ಯಾಗ್‌ಲೈನ್ ಹೊಂದಿರುವ ಲೋಗೋವನ್ನು ಧನ ಧಾನ್ಯ ಸಭಾಂಗಣದಲ್ಲಿ ವೈಭವದಿಂದ ಬಿಡುಗಡೆ ಮಾಡಲಾಯಿತು. ಈ ಹಿಂದೆ ಮಮತಾ ಬ್ಯಾನರ್ಜಿ ಸರ್ಕಾರದ ಅವಧಿಯಲ್ಲಿದ್ದ ಪ್ರಸಿದ್ಧ ‘ಬಿಸ್ವ ಬಾಂಗ್ಲಾ’ ಬ್ರ್ಯಾಂಡಿಂಗ್‌ ಅನ್ನು ಬದಲಿಸಿ, ಬಿಜೆಪಿ ಸರ್ಕಾರವು ಹೊಸ ಇಮೇಜ್ ನೀಡಲು ಈ ಹೆಜ್ಜೆ ಇಟ್ಟಿತ್ತು.
ಜಾಹೀರಾತಿನ ಆರಂಭದಲ್ಲಿ ಹೌರಾ ಸೇತುವೆಯನ್ನು ತೋರಿಸುವ ಮೂಲಕ ಭರವಸೆಯಿಂದ ಆರಂಭವಾಗುವ ಈ ವಿಡಿಯೋ, ನಂತರ ತಟ್ಟನೆ ರಾಜ್ಯದ ಗಡಿಯನ್ನೇ ದಾಟಿ ದೂರದ ಮರುಭೂಮಿ, ಪಿರಮಿಡ್ ಹಾಗೂ ಬಂಗಾಳಕ್ಕೆ ಯಾವುದೇ ಸಂಬಂಧವಿಲ್ಲದ ವಿದೇಶಿ ಹೆಗ್ಗುರುತುಗಳನ್ನು ಪ್ರದರ್ಶಿಸುತ್ತದೆ. ಬಂಗಾಳದ ಹೆಮ್ಮೆಯ ವಿಕ್ಟೋರಿಯಾ ಮೆಮೋರಿಯಲ್, ಬಿಷ್ಣುಪುರದ ಟೆರಾಕೋಟಾ ದೇವಸ್ಥಾನಗಳು ಹಾಗೂ ಡಾರ್ಜಿಲಿಂಗ್‌ನ ಪ್ರಸಿದ್ಧ ಟಾಯ್ ಟ್ರೈನ್ ಜಾಹೀರಾತಿನಿಂದ ಸಂಪೂರ್ಣವಾಗಿ ಕಣ್ಮರೆಯಾಗಿವೆ.
ವಿಪಕ್ಷಗಳು ಹಾಗೂ ರಾಜಕೀಯ ವಿಶ್ಲೇಷಕರ ತೀವ್ರ ಆಕ್ರೋಶ
ಈ ಜಾಹೀರಾತಿನ ವಿಪರ್ಯಾಸವನ್ನು ಕಂಡು ಸಾಮಾಜಿಕ ಮಾಧ್ಯಮಗಳಲ್ಲಿ ಆಕ್ರೋಶ ವ್ಯಕ್ತವಾಗಿದೆ. ಟಿಎಂಸಿ ಸಂಸದ ಡೆರೆಕ್ ಒಬ್ರೇನ್, “ಈ ಜಾಹೀರಾತನ್ನು ‘ಕಸ’ ಎಂದು ಕರೆಯುವುದು ಕೂಡ ತೀರಾ ಸಣ್ಣ ಮಾತು” ಎಂದು ಟ್ವೀಟ್ ಮಾಡಿದ್ದಾರೆ.
ತ್ರಿಪುರ ಮತ್ತು ಮೇಘಾಲಯದ ಮಾಜಿ ರಾಜ್ಯಪಾಲ ತಥಾಗತ ರಾಯ್ ಈ ವಿಡಿಯೋವನ್ನು ‘ದಡ್ಡತನದಿಂದ ಕೂಡಿದ ಅಮಲ್ಚೂರ್ ಪ್ರಯತ್ನ’ ಎಂದು ಕಿಡಿಕಾರಿದ್ದಾರೆ. ಪಶ್ಚಿಮ ಬಂಗಾಳದ ಪ್ರವಾಸೋದ್ಯಮ ವಿಡಿಯೋದಲ್ಲಿ ಮೊಸ್ಕೋ, ಈಜಿಪ್ಟ್ ಮತ್ತು ರಿಯೋ ಡಿ ಜನೇರೋ ದೃಶ್ಯಗಳು ಏಕಿರಬೇಕು? ಇದು ಬಿಜೆಪಿ ಸರ್ಕಾರದ ಸಾಧನೆಗಳಿಗೆ ತಂದ ಅಪಚಾರ. ಈ ವಿಡಿಯೋವನ್ನು ತಕ್ಷಣವೇ ಹಿಂಪಡೆಯಬೇಕು ಮತ್ತು ಇದನ್ನು ವಿನ್ಯಾಸಗೊಳಿಸಿದ ವ್ಯಕ್ತಿಯನ್ನು ಮೀನುಗಾರಿಕೆ ಅಥವಾ ಬೇರಾವುದಾದರೂ ಇಲಾಖೆಗೆ ವರ್ಗಾಯಿಸಬೇಕು ಎಂದು ತೀವ್ರವಾಗಿ ವಾಗ್ದಾಳಿ ನಡೆಸಿದ್ದಾರೆ.
ಸಾಮಾಜಿಕ ಮಾಧ್ಯಮಗಳಲ್ಲಿ ಬಳಕೆದಾರರೊಬ್ಬರು ‘ಈ ಜಾಹೀರಾತಿನ ಗುತ್ತಿಗೆಯನ್ನು ಯಾವುದಾದರೂ ಗುಜರಾತ್ ಮೂಲದ ಏಜೆನ್ಸಿಗೆ ನೀಡಲಾಗಿದೆಯೇ?’ ಎಂದು ವ್ಯಂಗ್ಯವಾಡಿದ್ದರೆ, ರಾಜಕೀಯ ವಿಶ್ಲೇಷಕ ಮಯೂಖ್ ರಂಜನ್ ಘೋಷ್, “ಬಂಗಾಳದಲ್ಲಿ ಬೆಟ್ಟಗಳಿಂದ ಹಿಡಿದು ಸಮುದ್ರದವರೆಗೆ, ಕಾಡುಗಳಿಂದ ಹಿಡಿದು ನಗರಗಳವರೆಗೆ ಎಲ್ಲವೂ ಇರುವಾಗ, ಐಫೆಲ್ ಟವರ್ ಮತ್ತು ಸೇಂಟ್ ಪೀಟರ್ಸ್‌ಬರ್ಗ್‌ಗೆ ಉಚಿತ ಪ್ರಚಾರ ನೀಡುವ ಅಗತ್ಯವೇನಿತ್ತು?” ಎಂದು ಪ್ರಶ್ನಿಸಿದ್ದಾರೆ.
ಹಾಗೆಯೇ, ಕೇರಳ ಪ್ರವಾಸೋದ್ಯಮದ ‘ಗಾಡ್ಸ್ ಓನ್ ಕಂಟ್ರಿ’ ಅಥವಾ ರಾಜಸ್ಥಾನದ ‘ಪಧಾರೊ ಮ್ಹಾರೆ ದೇಶ್’ ಎಂಬ ಆತ್ಮೀಯ ಟ್ಯಾಗ್‌ಲೈನ್‌ಗಳಿಗೆ ಹೋಲಿಸಿದರೆ, ಬಂಗಾಳದ ಹೊಸ ಟ್ಯಾಗ್‌ಲೈನ್ ತೀರಾ ನೀರಸವಾಗಿದೆ ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ. ಒಟ್ಟಿನಲ್ಲಿ, ಬಂಗಾಳದ ಪ್ರವಾಸೋದ್ಯಮವನ್ನು ಉತ್ತೇಜಿಸಲು ಹೊರಟ ಈ ಜಾಹೀರಾತು ’80 ಸೆಕೆಂಡುಗಳಲ್ಲಿ ಪ್ರಪಂಚ ಸುತ್ತಿ’ ಎಂಬ ಚಲನಚಿತ್ರದ ಟ್ರೇಲರ್‌ನಂತೆ ಕಾಣುತ್ತಿರುವುದು ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದೆ.
