ಟೆಹ್ರಾನ್, ತಬ್ರಿಜ್ ಮತ್ತು ಇಸ್ಫಹಾನ್‌ ಮೇಲಿನ ದಾಲಿಗಳಿಗೆ ಪ್ರತೀಕಾರವಾಗಿ, ಇರಾನ್ ಸೇನೆಯು ಇಸ್ರೇಲ್ ಮೇಲೆ ಎರಡನೇ ತರಂಗದ ಕ್ಷಿಪಣಿಗಳನ್ನು ಹಾರಿಸಿದೆ. ದೇಶಾದ್ಯಂತ ಸೈರನ್‌ಗಳು ಮೊಳಗುತ್ತಿವೆ ಎಂದು ಇಸ್ರೇಲ್ ಮಿಲಿಟರಿ ಹೇಳಿದೆ ಎಂದು ಅಂತರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ಇಸ್ರೇಲ್ ಭಾನುವಾರ ಬೈರುತ್‌ನ ದಕ್ಷಿಣ ಉಪನಗರಗಳ ಮೇಲೆ ದಾಳಿ ಮಾಡಿದ ನಂತರ ಉದ್ವಿಗ್ನತೆ ಹೆಚ್ಚಾಗಿದೆ. ಈ ದಾಳಿಯಲ್ಲಿ ಕನಿಷ್ಠ ಇಬ್ಬರು ಸಾವನ್ನಪ್ಪಿ, 20 ಜನರು ಗಾಯಗೊಂಡರು.
ಬೈರುತ್ ಮೇಲಿನ ದಾಳಿಯ ನಂತರ ಇರಾನ್ ಉತ್ತರ ಇಸ್ರೇಲ್ ಮೇಲೆ ಕ್ಷಿಪಣಿಗಳನ್ನು ಹಾರಿಸಿದೆ. ಇಸ್ರೇಲ್ ಕದನ ವಿರಾಮ ಒಪ್ಪಂದಗಳನ್ನು ಪದೇ ಪದೇ ಉಲ್ಲಂಘಿಸುತ್ತಿದೆ ಎಂದು ಆರೋಪಿಸಿತ್ತು.
ಎರಡು ತಿಂಗಳ ಹಿಂದೆ ಕದನ ವಿರಾಮ ಜಾರಿಗೆ ಬಂದ ನಂತರ ಇರಾನ್ ಮತ್ತು ಇಸ್ರೇಲ್ ಪರಸ್ಪರ ಪ್ರದೇಶದ ಮೇಲೆ ದಾಳಿ ನಡೆಸುತ್ತಿರುವುದು ಇದೇ ಮೊದಲು.
ಇರಾನ್‌ನಿಂದ ನಡೆದ ಹೊಸ ಕ್ಷಿಪಣಿ ದಾಳಿಯನ್ನು ಪತ್ತೆಹಚ್ಚಿದ್ದೇವೆ ಎಂದು ಇಸ್ರೇಲ್ ಸೇನೆ ಸೋಮವಾರ ಹೇಳಿದೆ. ಇದು ಹೋರಾಟ ಪ್ರಾರಂಭವಾದ ನಂತರದ ಆರನೇ ದಾಳಿಯಾಗಿದೆ.
“ಸ್ವಲ್ಪ ಸಮಯದ ಹಿಂದೆ, ಇರಾನ್‌ನಿಂದ ಇಸ್ರೇಲ್ ಕಡೆಗೆ ಹಾರಿಸಲಾದ ಕ್ಷಿಪಣಿಗಳನ್ನು ಐಡಿಎಫ್ ಗುರುತಿಸಿದೆ. ಬೆದರಿಕೆಯನ್ನು ತಡೆಯಲು ರಕ್ಷಣಾತ್ಮಕ ವ್ಯವಸ್ಥೆಗಳು ಕಾರ್ಯನಿರ್ವಹಿಸುತ್ತಿವೆ” ಎಂದು ಮಿಲಿಟರಿ ಹೇಳಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ಇತ್ತೀಚಿನ ಕದನ ವಿರಾಮ ಉಲ್ಲಂಘನೆಗಳಿಗೆ ಅಮೆರಿಕ ನೇರ ಹೊಣೆಗಾರಿಕೆಯನ್ನು ಹೊಂದಿದೆ ಎಂದು ಇರಾನ್‌ನ ವಿದೇಶಾಂಗ ಸಚಿವಾಲಯದ ವಕ್ತಾರ ಎಸ್ಮಾಯಿಲ್ ಬಘೈ ಹೇಳಿದ್ದಾರೆ. ಇಸ್ರೇಲ್‌ನ ಮಿಲಿಟರಿ ಕ್ರಮಗಳನ್ನು ಅಮೆರಿಕದ ನೀತಿಗಳಿಂದ ಬೇರ್ಪಡಿಸಲು ಸಾಧ್ಯವಿಲ್ಲ ಎಂದು ಹೇಳಿದರು.
“ಈ ಪ್ರದೇಶದೊಳಗಿನ ಝಿಯೋನಿಸ್ಟ್ ಘಟಕದ ಕ್ರಮಗಳನ್ನು ಅಮೆರಿಕದಿಂದ ಪ್ರತ್ಯೇಕವಾಗಿ ನೋಡಲಾಗುವುದಿಲ್ಲ” ಎಂದು ಬಘೈ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ ಎಂದು ಉಲ್ಲೇಖಿಸಲಾಗಿದೆ.
“ಇಸ್ರೇಲ್ ಆಡಳಿತವು ಅಮೆರಿಕದೊಂದಿಗೆ ಸಮನ್ವಯವಿಲ್ಲದೆ ಯಾವುದೇ ಕ್ರಮ ತೆಗೆದುಕೊಳ್ಳುತ್ತದೆ ಎಂದು ಯಾರೂ ನಂಬುವುದಿಲ್ಲ. ಇಸ್ರೇಲ್ ಆಡಳಿತದ ಆಕ್ರಮಣಕ್ಕೆ ಅಮೆರಿಕ ಜವಾಬ್ದಾರವಾಗಿದೆ, ಯಾವುದೇ ಉದ್ವಿಗ್ನತೆಯ ಉಲ್ಬಣದ ಪರಿಣಾಮಗಳಿಗೆ ಅದು ಸಹ ಜವಾಬ್ದಾರವಾಗಿರುತ್ತದೆ” ಎಂದು ಹೇಳಿದ್ದಾರೆ.
ಇಷ್ಟೆಲ್ಲಾ ಬೆಳವಣಿಗೆಗಳ ನಡುವೆ, ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರೊಂದಿಗಿನ ದೂರವಾಣಿ ಸಂಭಾಷಣೆಯ ಸಮಯದಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಂಯಮದಿಂದ ವರ್ತಿಸದುವಂತೆ ಕೋರಿದ್ದಾರೆ ಎಂದು ವರದಿಯಾಗಿದೆ.
ಉದ್ವಿಗ್ನ ಸ್ಥಿತಿಯಲ್ಲಿ ಅಮೆರಿಕ-ಇಸ್ರೇಲ್ ಸಂಬಂಧ
ಇತ್ತೀಚಿನ ಘಟನೆಗಳು ಇರಾನ್ ದಾಳಿಗಳಿಗೆ ಪ್ರತಿಕ್ರಿಯಿಸದಂತೆ ಟ್ರಂಪ್ ಅವರ ಕರೆಯನ್ನು ನೆತನ್ಯಾಹು ನಿರ್ಲಕ್ಷಿಸಿದ ನಂತರ ಉದ್ವಿಗ್ನ ಸ್ಥಿತಿಯಲ್ಲಿರುವ ಅಮೆರಿಕ-ಇಸ್ರೇಲ್ ಸಂಬಂಧಗಳ ಮೇಲೆ ಶಾಶ್ವತ ಪರಿಣಾಮ ಬೀರುತ್ತವೆ ಎಂದು ಇಸ್ರೇಲ್ ವಿಶ್ಲೇಷಕ ಮತ್ತು ನಿರೂಪಕ ಒರಿ ಗೋಲ್ಡ್‌ಬರ್ಗ್ ಹೇಳುತ್ತಾರೆ.
ಲೆಬನಾನ್ ರಾಜಧಾನಿ ಬೈರುತ್‌ನಲ್ಲಿ ಹೆಚ್ಚಿನ ವಾಯುದಾಳಿಗಳ ಯೋಜನೆಗಳ ಕುರಿತು ಟ್ರಂಪ್ ಇಸ್ರೇಲ್ ನಾಯಕನೊಂದಿಗೆ ನಡೆಸಿದ ಫೋನ್ ಕರೆ ಮಾತುಕತೆಗಳ ಕೆಲವು ದಿನಗಳ ನಂತರ ಅವರ ವಿನಂತಿ ಬಂದಿದೆ ಎಂಬುದನ್ನು ಅವರು ಗಮನಿಸಿದ್ದಾರೆ. ಈ ಕರೆಯನ್ನು ಆರಂಭದಲ್ಲಿ ಮಾಧ್ಯಮಗಳಿಗೆ ಸೋರಿಕೆ ಮಾಡಲಾಯಿತು, ಮೊದಲು ಅಮೆರಿಕ ಅಧ್ಯಕ್ಷರು ಅದನ್ನು ದೃಢಪಡಿಸಿದರು.
“ಜೋ ಬಿಡೆನ್ ಅಧ್ಯಕ್ಷರಾಗಿದ್ದಾಗ ನೆತನ್ಯಾಹು ತಪ್ಪಿಸಿಕೊಳ್ಳಬಹುದಾದ ವಿಷಯಗಳು ಟ್ರಂಪ್ ಅಧ್ಯಕ್ಷತೆಯಲ್ಲಿ ಅವರು ತಪ್ಪಿಸಿಕೊಳ್ಳಬಹುದಾದ ವಿಷಯಗಳಲ್ಲ” ಎಂದು ಗೋಲ್ಡ್‌ಬರ್ಗ್ ತಿಳಿಸಿದ್ದಾರೆ ಎಂದು ಅಲ್ ಜಜೀರಾ ವರದಿ ಮಾಡಿದೆ.
ವಿಶೇಷವಾಗಿ ಅಮೆರಿಕದ ಬೆಂಬಲವಿಲ್ಲದೆ, ಇಸ್ರೇಲ್ ಸಂಪೂರ್ಣ ಯುದ್ಧವನ್ನು ಪುನರಾರಂಭಿಸುವಷ್ಟು ಪ್ರಬಲವಾಗಿದೆ ಎಂದು ಅವರು ನಂಬುವುದಿಲ್ಲ ಎಂದು ಗೋಲ್ಡ್‌ಬರ್ಗ್ ಹೇಳಿದರು.
“ಇಸ್ರೇಲ್ ರಾಜಕೀಯವಾಗಿ ತುಂಬಾ ದುರ್ಬಲವಾಗಿದೆ, ಅಂತರರಾಷ್ಟ್ರೀಯವಾಗಿ ಮತ್ತು ದೇಶೀಯವಾಗಿ ತನ್ನದೇ ಬಲದ ಮೇಲೆ ಬೃಹತ್ ದಾಳಿ ನಡೆಸಲು ಸಾಧ್ಯವಿಲ್ಲ” ಎಂದು ಅವರು ಹೇಳಿದರು.
