ಉಪ ಪೊಲೀಸ್ ವರಿಷ್ಠಾಧಿಕಾರಿಯಾಗಿ ಸೇವೆ ಸಲ್ಲಿಸುತ್ತಿರುವ ಅನುಜ್ ಚೌಧರಿ ಇತ್ತೀಚೆಗೆ, ಹೋಳಿ ಆಚರಣೆಯಲ್ಲಿ ಮುಸ್ಲಿಮರಿಗೆ ಸಮಸ್ಯೆಗಳಿದ್ದರೆ ಅವರು ಮನೆಯೊಳಗೆ ಇರಬೇಕು ಎಂದು ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯೆಯಾಗಿ, ಸಮಾಜವಾದಿ ಪಕ್ಷದ (ಎಸ್‌ಪಿ) ವಕ್ತಾರ ಶರ್ವೇಂದ್ರ ಬಿಕ್ರಮ್ ಸಿಂಗ್ ಅವರು “ಬಿಜೆಪಿ ಏಜೆಂಟ್” ನಂತೆ ವರ್ತಿಸುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.
ಉತ್ತರ ಪ್ರದೇಶದ ಸಂಭಾಲ್ ಜಿಲ್ಲೆಯ ವೃತ್ತ ಅಧಿಕಾರಿ (CO) ಚೌಧರಿ, ತಮ್ಮ ಕಾರ್ಯಗಳು ಮತ್ತು ಹೇಳಿಕೆಗಳಿಂದಾಗಿ ಆಗಾಗ್ಗೆ ವಿವಾದದ ಕೇಂದ್ರಬಿಂದುವಾಗಿದ್ದಾರೆ. ಸಂಭಾಲ್ ಹಿಂಸಾಚಾರವನ್ನು ಅವರು ನಿಭಾಯಿಸುವುದರಿಂದ ಹಿಡಿದು ಹೋಳಿ ಹಬ್ಬದ ಸಮಯದಲ್ಲಿ ಮುಸ್ಲಿಮರಿಗೆ ಅವರು ನೀಡಿದ ಎಚ್ಚರಿಕೆಯವರೆಗೆ, ಅವರ ಹೇಳಿಕೆಗಳು ವಿರೋಧ ಪಕ್ಷಗಳಿಂದ ಟೀಕೆಗೆ ಗುರಿಯಾಗಿವೆ.
ಚೌಧರಿ ಭಾರತೀಯ ಜನತಾ ಪಕ್ಷ (ಬಿಜೆಪಿ) ಮತ್ತು ಸಂಘ ಪರಿವಾರದೊಂದಿಗೆ ಕುಟುಂಬ ಮತ್ತು ಸೈದ್ಧಾಂತಿಕ ಸಂಬಂಧಗಳನ್ನು ಹೊಂದಿದ್ದಾರೆ ಎಂದು ವರದಿಯಾಗಿದೆ.
ಚೌಧರಿಯವರ ಕುಟುಂಬವು ಮುಜಫರ್ ನಗರ ಜಿಲ್ಲೆಯ ಬಹೇದಿ ಗ್ರಾಮದವರು. ಅವರ ಸಹೋದರ ಅಮಿತ್ ಚೌಧರಿ, ಮುಜಫರ್‌ನಗರದಲ್ಲಿ ಬಿಜೆಪಿಯ ಉಪ ಜಿಲ್ಲಾ ಅಧ್ಯಕ್ಷ ಸ್ಥಾನವನ್ನು ಹೊಂದಿದ್ದಾರೆ ಮತ್ತು ಈ ಹಿಂದೆ ಕುಕ್ರಾದಲ್ಲಿ ಬ್ಲಾಕ್ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸಿದ್ದರು. ಅಮಿತ್ ಅವರ ಪತ್ನಿ ಕೂಡ ರಾಜಕೀಯದಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದು, ಮುಜಫರ್ ನಗರದಲ್ಲಿ ಬ್ಲಾಕ್ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಇದರ ಜೊತೆಗೆ, ಅಮಿತ್ ಬಿಜೆಪಿ ನಾಯಕ ಮತ್ತು ಮಾಜಿ ಕೇಂದ್ರ ಸಚಿವ ಸಂಜೀವ್ ಬಲ್ಯಾನ್ ಅವರ ಆಪ್ತರು ಎಂದು ಆಜ್ ತಕ್ ವರದಿ ಮಾಡಿದೆ.
ಚೌಧರಿಯವರ ಮನೆಯ ಒಂದು ಛಾಯಾಚಿತ್ರವು ಕಾಣಿಸಿಕೊಂಡಿದ್ದು, ಅದರಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್‌ಎಸ್‌ಎಸ್) ನಾಯಕರ ಭಾವಚಿತ್ರಗಳು ಕೋಣೆಯೊಂದರಲ್ಲಿ ನೇತಾಡುತ್ತಿರುವುದನ್ನು ತೋರಿಸಲಾಗಿದೆ. ಪತ್ರಕರ್ತ ಪುನೀತ್ ಕುಮಾರ್ ಸಿಂಗ್ ಅವರು ಸಾಮಾಜಿಕ ಮಾಧ್ಯಮದಲ್ಲಿ ಈ ಚಿತ್ರವನ್ನು ಹಂಚಿಕೊಂಡಿದ್ದು, ಆರ್‌ಎಸ್‌ಎಸ್ ನ ಹೆಡ್ಗೆವಾರ್ ಮತ್ತು ಮಾಜಿ ಆರ್‌ಎಸ್‌ಎಸ್ ಮುಖ್ಯಸ್ಥ ಎಂ.ಎಸ್. ಗೋಲ್ವಾಲ್ಕರ್ ಅವರ ಭಾವಚಿತ್ರಗಳ ಉಪಸ್ಥಿತಿಯನ್ನು ಎತ್ತಿ ತೋರಿಸಿದ್ದಾರೆ.
“ಅನುಜ್ ಚೌಧರಿ ಅವರ ಮನೆಯಲ್ಲಿರುವ ಚಿತ್ರಗಳನ್ನು ಎಚ್ಚರಿಕೆಯಿಂದ ನೋಡಿ. ಮೊದಲ ಛಾಯಾಚಿತ್ರ – ಕೇಶವ್ ಬಲಿರಾಮ್ ಹೆಡ್ಗೆವಾರ್ (ಆರ್‌ಎಸ್‌ಎಸ್ ಸ್ಥಾಪಕ), ಎರಡನೇ ಛಾಯಾಚಿತ್ರ – ಮಾಧವ ಸದಾಶಿವ ರಾವ್ ಗೋಲ್ವಾಲ್ಕರ್ (ಆರ್‌ಎಸ್‌ಎಸ್‌ನ ಎರಡನೇ ಸರಸಂಘಚಾಲಕ್). ನಾನು ನಿಮಗೆ ಇನ್ನೂ ಏನಾದರೂ ಹೇಳಬೇಕಾಗಿದೆಯೇ? ” ಎಂದು ಸಿಂಗ್ X ನಲ್ಲಿ ಬರೆದಿದ್ದಾರೆ.
ಈ ಬಹಿರಂಗಪಡಿಸುವಿಕೆಗಳು ಗಮನ ಸೆಳೆಯುತ್ತಿದ್ದಂತೆ, ಉತ್ತರ ಪ್ರದೇಶದಲ್ಲಿ ಸೂಕ್ಷ್ಮ ಕಾನೂನು ಜಾರಿ ವಿಷಯಗಳನ್ನು ನಿರ್ವಹಿಸುವಲ್ಲಿ ಚೌಧರಿ ಅವರ ನಿಷ್ಪಕ್ಷಪಾತತೆಯ ಬಗ್ಗೆ ಪ್ರಶ್ನೆಗಳು ಏಳುತ್ತಿವೆ. ಅನುಜ್ ಚೌಧರಿ ಪ್ರಮಾಣಿತ ನೇಮಕಾತಿ ಪ್ರಕ್ರಿಯೆಯ ಮೂಲಕ ಪೊಲೀಸ್ ಸೇವೆಗೆ ಪ್ರವೇಶಿಸಲಿಲ್ಲ. ಬದಲಾಗಿ, ಅವರನ್ನು ಕ್ರೀಡಾ ಕೋಟಾದ ಮೂಲಕ ಪೊಲೀಸ್ ಅಧಿಕಾರಿಯಾಗಿ ನೇಮಿಸಲಾಗಿದೆ.
ಪೊಲೀಸ್ ಪಡೆಗೆ ಸೇರುವ ಮೊದಲು, ಚೌಧರಿ ಒಬ್ಬ ಕುಸ್ತಿಪಟುವಾಗಿದ್ದು, ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದರು. 1997 ಮತ್ತು 2014ರ ನಡುವೆ ಅವರು ರಾಷ್ಟ್ರೀಯ ಚಾಂಪಿಯನ್ ಆಗಿದ್ದರು ಮತ್ತು ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ (2002೨, 2010) ಎರಡು ಬೆಳ್ಳಿ ಪದಕಗಳನ್ನು ಮತ್ತು ಏಷ್ಯನ್ ಚಾಂಪಿಯನ್‌ಶಿಪ್‌ನಲ್ಲಿ ಎರಡು ಕಂಚಿನ ಪದಕಗಳನ್ನು ಗೆದ್ದರು. ಅವರ ಸಾಧನೆಗಳನ್ನು ಗುರುತಿಸಿ, ಅವರು 2001ರಲ್ಲಿ ಲಕ್ಷ್ಮಣ್ ಪ್ರಶಸ್ತಿ ಮತ್ತು 2005 ರಲ್ಲಿ ಪ್ರತಿಷ್ಠಿತ ಅರ್ಜುನ ಪ್ರಶಸ್ತಿಯನ್ನು ಪಡೆದರು.
ಕ್ರೀಡಾ ಕೋಟಾದ ಮೂಲಕ, ಅವರನ್ನು ಉತ್ತರ ಪ್ರದೇಶ ಪೊಲೀಸ್ ಇಲಾಖೆಗೆ ಸೇರಿಸಲಾಯಿತು ಮತ್ತು 2012ರ ಬ್ಯಾಚ್‌ನಲ್ಲಿ ಉಪಪೊಲೀಸ್ ವರಿಷ್ಠಾಧಿಕಾರಿ (ಡಿಎಸ್‌ಪಿ) ಆಗಿದ್ದಾರೆ. ಚೌಧರಿ ಅವರು ರಾಂಪುರದಲ್ಲಿ ಸೇವೆ ಸಲ್ಲಿಸುತ್ತಿದ್ದಾಗ ಸಮಾಜವಾದಿ ಪಕ್ಷದ ನಾಯಕ ಅಜಮ್ ಖಾನ್ ಅವರೊಂದಿಗೆ ನಡೆದ ವಾಗ್ವಾದ ಸೇರಿದಂತೆ ಹಲವಾರು ವಿವಾದಗಳಲ್ಲಿ ಸಿಲುಕಿದ್ದಾರೆ.
ಇತ್ತೀಚೆಗೆ, ಸಂಭಾಲ್ ಹಿಂಸಾಚಾರದ ಸಂದರ್ಭದಲ್ಲಿ ಐದು ಮುಸ್ಲಿಮರ ಹತ್ಯೆಯ ನಂತರ ಅವರು ತಮ್ಮ ಹೇಳಿಕೆಗಳಿಗಾಗಿ ಟೀಕೆಗಳನ್ನು ಎದುರಿಸಿದರು. ಕಳೆದ ವರ್ಷ ನವೆಂಬರ್‌ನಲ್ಲಿ ಸಂಭಾಲ್ ಜಾಮಾ ಮಸೀದಿಯ ಸಮೀಕ್ಷೆಯ ಸಂದರ್ಭದಲ್ಲಿ ಭದ್ರತಾ ಪಡೆಗಳೊಂದಿಗೆ ಘರ್ಷಣೆ ನಡೆಸಿದ ಪ್ರತಿಭಟನಾಕಾರರ ಮೇಲೆ ಪೊಲೀಸರು ಗುಂಡು ಹಾರಿಸಿದಾಗ ಈ ಸಾವುಗಳು ಸಂಭವಿಸಿದ್ದವು.
ನಾಗರಿಕರ ಸಾವುನೋವುಗಳ ಬಗ್ಗೆ ವರದಿಗಾರರು ಪ್ರಶ್ನಿಸಿದಾಗ ಹಿಂಸಾಚಾರದ ನಡುವೆ, ಚೌಧರಿ ವಿವಾದಾತ್ಮಕ ಹೇಳಿಕೆಯೊಂದಿಗೆ ಪ್ರತಿಕ್ರಿಯಿಸಿದರು: “ಏಕ್ ಪಧೇ ಲಿಖೆ ಆದ್ಮಿ ಕೋ, ಇಸ್ ತರಹ್ ಕೆ ಜಾಹಿಲ್ ಮಾರ್ ದೇಂಗೆ?” “ಹಮ್ ಕೋಯಿ ಮರ್ನೇ ಕೆ ಲಿಯೇ ಥೋಡೆ ಹಿ ಭರ್ತಿ ಹೇ ಹೈ ಪೊಲೀಸ್ ಮಿ” (ಇಂತಹ ಅನಾಗರಿಕ ಜನರಿಂದ ವಿದ್ಯಾವಂತ ವ್ಯಕ್ತಿ ಕೊಲ್ಲಲ್ಪಡುತ್ತಾನಾ? ನಾವು ಹೀಗೆ ಸಾಯಲು ಪೊಲೀಸ್ ಪಡೆಗೆ ಸೇರಲಿಲ್ಲ) ಎಂದು ಪ್ರತಿಕ್ರಿಯಿಸಿದ್ದಾರೆ.
ಈ ವರ್ಷದ ಜನವರಿಯಲ್ಲಿ ಅನುಜ್ ಕುಮಾರ್ ಚೌಧರಿ ಅವರು ಸಮವಸ್ತ್ರದಲ್ಲಿ ಹಿಂದೂ ಯಾತ್ರೆಯಲ್ಲಿ (ಮೆರವಣಿಗೆ) ಭಾಗವಹಿಸಿದಾಗ ಸಮವಸ್ತ್ರ ನಿಯಮಗಳು ಮತ್ತು ನೀತಿಸಂಹಿತೆಯನ್ನು ಉಲ್ಲಂಘಿಸಿದ ಆರೋಪದ ಮೇಲೆ ಅಧಿಕೃತ ತನಿಖೆಯನ್ನು ಪ್ರಾರಂಭಿಸಲಾಯಿತು.
ಆಜಾದ್ ಅಧಿಕಾರ್ ಸೇನೆಯ ರಾಷ್ಟ್ರೀಯ ಅಧ್ಯಕ್ಷ ಅಮಿತಾಭ್ ಠಾಕೂರ್ ಅವರು ಪೊಲೀಸ್ ಮಹಾನಿರ್ದೇಶಕರಿಗೆ (ಡಿಜಿಪಿ) ವರದಿ ಮಾಡಿದ ಔಪಚಾರಿಕ ದೂರಿನ ಮೇರೆಗೆ ತನಿಖೆ ನಡೆಸಲಾಗಿದೆ.
