ಜನವರಿ 28, 2026 ರಂದು ಮಹಾರಾಷ್ಟ್ರದ ಬಾರಾಮತಿ ಬಳಿ ನಡೆದ ವಿಮಾನ ಅಪಘಾತದಲ್ಲಿ ಉಪಮುಖ್ಯಮಂತ್ರಿ ಮತ್ತು ಎನ್‌ಸಿಪಿ ನಾಯಕ ಅಜಿತ್ ಪವಾರ್ ಅವರ ಹಠಾತ್ ಸಾವು ಸಾಕಷ್ಟು ಅನುಮಾನಗಳನ್ನು ಹುಟ್ಟುಹಾಕಿದೆ. ರಾಜಕೀಯ ವಲಯದಿಂದ ಸಂಪೂರ್ಣ ತನಿಖೆಗೆ ಒತ್ತಾಯ ಕೇಳಿಬಂದಿದೆ.
ಗ್ಲೋಬಲ್ ಏರ್ ಎಲ್‌ಜೆ45 ವಿಮಾನ ಇಳಿಯಲು ಪ್ರಯತ್ನಿಸುವಾಗ ಅಪಘಾತಕ್ಕೀಡಾಗಿ 66 ವರ್ಷದ ಪವಾರ್ ತಮ್ಮ ಅಂಗರಕ್ಷಕ, ಇಬ್ಬರು ಪೈಲಟ್‌ಗಳು ಮತ್ತು ಒಬ್ಬ ವಿಮಾನ ಸಿಬ್ಬಂದಿಯೊಂದಿಗೆ ಸಾವನ್ನಪ್ಪಿದರು. ಆರಂಭಿಕ ವರದಿಗಳು ವಿಮಾನದಲ್ಲಿ ಆರು ಜನರಿದ್ದರು ಎಂದು ಸೂಚಿಸಿದ್ದು, ಕಾಣೆಯಾದ ಶವದ ಬಗ್ಗೆ ಪ್ರಶ್ನೆಗಳನ್ನು ಎತ್ತಿದೆ.
ಶಿವಸೇನೆ (ಯುಬಿಟಿ) ರಾಜ್ಯಸಭಾ ಸಂಸದ ಸಂಜಯ್ ರಾವತ್ ಅಪಘಾತದ ಬಗ್ಗೆ ಗಂಭೀರ ಅನುಮಾನಗಳನ್ನು ವ್ಯಕ್ತಪಡಿಸುತ್ತಾ, “ಅಜಿತ್ ಪವಾರ್ ಅವರ ಅಪಘಾತದ ಬಗ್ಗೆ ಪ್ರಶ್ನೆಗಳನ್ನು ಎತ್ತಬೇಕು. ಈ ಪ್ರಶ್ನೆಗಳನ್ನು ಅವರ ಸ್ವಂತ ಪಕ್ಷದೊಳಗೆ ಎತ್ತಲಾಗುತ್ತಿದೆ. ಇದರ ಬಗ್ಗೆ ಏನೋ ಅನುಮಾನಾಸ್ಪದವಾಗಿದೆ. ತೆರೆಮರೆಯಲ್ಲಿ ಏನೋ ನಡೆದಿರಬೇಕು” ಎಂದು ಹೇಳಿದ್ದಾರೆ.
ನೀರಾವರಿ ಯೋಜನೆಗಳ ಕಡತಗಳ ಕುರಿತು ಬಿಜೆಪಿ ತನಗೆ ಬೆದರಿಕೆ ಹಾಕುತ್ತಿದೆ ಎಂಬ ಕಳವಳ ವ್ಯಕ್ತಪಡಿಸಿದ ನಂತರ ಪವಾರ್ ಶರದ್ ಪವಾರ್ ಜೊತೆಗೆ ಮರಳಲು ಯೋಜಿಸಿದ್ದರು ಎಂದು ರಾವತ್ ಆರೋಪಿಸಿದ್ದಾರೆ.
“ಅಜಿತ್ ದಾದಾ ಅವರು ‘ಮನೆಗೆ ಮರಳಲು’ ಬಯಸಿದ್ದರು ಎಂದು ಹೇಳಿದ್ದರು, ನಂತರ ಬಿಜೆಪಿಯ ಜನರು ಸಿಂಚನ್ ಹಗರಣದ ಕಡತಗಳನ್ನು ನೀಡಿ ಅವರನ್ನು ಬೆದರಿಸಿದರು. ಅವರು ಅದೇ ಕಡತಗಳ ಕುರಿತು ಪ್ರತಿಕ್ರಿಯಿಸಿ ಹತ್ತು ದಿನಗಳಲ್ಲಿ ನಿಗೂಢವಾಗಿ ನಿಧನರಾದರು. ಇದರಿಂದ ನಮಗೆ ಏನು ಅರ್ಥವಾಗಬೇಕು? ಇದು ನ್ಯಾಯಮೂರ್ತಿ ಲೋಯಾ ಅವರನ್ನು ನೆನಪಿಸುತ್ತದೆ. ಇಲ್ಲಿ ಯಾರಾದರೂ ಏನಾದರೂ ಮಾಡಿದ್ದಾರೆಯೇ” ಎಂದು ಅವರು ಪ್ರಶ್ನಿಸಿದ್ದಾರೆ.
ಎನ್‌ಸಿಪಿಯೊಳಗಿನ ರಾಜಕೀಯ ಬೆಳವಣಿಗೆಗಳ ಸಮಯವನ್ನು ಸಹ ರಾವತ್ ಪ್ರಶ್ನಿಸಿದರು. “ಪವಾರ್ ಅವರ ಸಾವು ಅಧಿಕಾರದ ತ್ವರಿತ ಪುನರ್‌ರಚನೆಗೆ ಅವಕಾಶ ಮಾಡಿಕೊಟ್ಟಿದೆ. ಮಹಾರಾಷ್ಟ್ರ ರಾಜಕೀಯದಲ್ಲಿ ಮರಾಠಾ ಗುರುತನ್ನು ದುರ್ಬಲಗೊಳಿಸುತ್ತಿದೆ. ಎನ್‌ಸಿಪಿ ನಿಜವಾದ ಮರಾಠಾ ಮತ್ತು ಮರಾಠಿ ಜನರ ಪಕ್ಷವಾಗಿದೆ. ಆ ಗುರುತನ್ನು ಬಿಜೆಪಿ ಬಲವಂತವಾಗಿ ಕಸಿದುಕೊಂಡಿದೆ. ಪವಾರ್ ಮತ್ತು ಪಾಟೀಲ್‌ನಂತಹ ಮಹಾರಾಷ್ಟ್ರ ರಾಜಕೀಯಕ್ಕೆ ಸಂಬಂಧಿಸಿದ ಉಪನಾಮಗಳನ್ನು ಗೋಯಲ್, ಪಟೇಲ್ ಮತ್ತು ಷಾ ಬದಲಾಯಿಸುತ್ತಿದ್ದಾರೆ. ಇದು ರಾಜಕೀಯ ತಂತ್ರವಾಗಿದೆ” ಎಂದು ಹೇಳಿದರು.
ಕಾಂಗ್ರೆಸ್ ನಾಯಕ ವಿಜಯ್ ವಡೆಟ್ಟಿವಾರ್ ಮತ್ತು ಎನ್‌ಸಿಪಿ-ಎಸ್‌ಸಿಪಿ ನಾಯಕ ಅನಿಲ್ ದೇಶಮುಖ್ ಅವರು ತನಿಖೆಗೆ ಕರೆ ನೀಡಿದ್ದಾರೆ. “ಸಂಪೂರ್ಣ ತನಿಖೆ ನಡೆಯಬೇಕು, ಸತ್ಯವು ಆದಷ್ಟು ಬೇಗ ಹೊರಬರಬೇಕು” ಎಂದು ದೇಶಮುಖ್ ಹೇಳಿದರು.
ಅಪಘಾತಕ್ಕೆ ಕಳಪೆ ಗೋಚರತೆಯೇ ಕಾರಣ ಎಂಬ ಅಧಿಕೃತ ಹೇಳಿಕೆಯ ಬಗ್ಗೆಯೂ ಅವರು ಅನುಮಾನಗಳನ್ನು ವ್ಯಕ್ತಪಡಿಸಿದರು, “ವಿಮಾನವು ಹಾರುತ್ತಿರುವುದು ಮತ್ತು ಲ್ಯಾಂಡಿಂಗ್ ಸಮಯದಲ್ಲಿ ಓರೆಯಾಗುತ್ತಿರುವುದು ವೀಡಿಯೊಗಳಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತಿದೆ. ಗೋಚರತೆಯನ್ನು ಕಾರಣವೆಂದು ಉಲ್ಲೇಖಿಸಿರುವ ಬಗ್ಗೆ ಜನರು ಅನುಮಾನ ವ್ಯಕ್ತಪಡಿಸಿದ್ದಾರೆ. ಬ್ಲಾಕ್‌ ಬಾಕ್ಸ್‌ ಪತ್ತೆಹಚ್ಚಲಾಗಿದೆ, ಪರೀಕ್ಷೆಯ ನಂತರ ಎಲ್ಲವೂ ಸ್ಪಷ್ಟವಾಗುತ್ತದೆ” ಎಂದು ಹೇಳಿದರು.
ಉಜ್ವಲ್ ನಿಕಮ್ ಸೇರಿದಂತೆ ಬಿಜೆಪಿ ನಾಯಕರು ಆರೋಪಗಳನ್ನು ತಳ್ಳಿಹಾಕಿದರು. ಆರೋಪಗಳನ್ನು ಆಧಾರರಹಿತ ಮತ್ತು ರಾಜಕೀಯ ಪ್ರೇರಿತ ಎಂದು ಕರೆದರು. “ಮೃತ ಆತ್ಮದ ಮೇಲೆ ರಾಜಕೀಯ ಮಾಡುತ್ತಿರುವುದು ನಾಚಿಕೆಗೇಡಿನ ಸಂಗತಿ. ಇದು ಅಪಘಾತ ಎಂದು ನಮಗೆಲ್ಲರಿಗೂ ತಿಳಿದಿದೆ. ಯಾವುದೇ ಪಿತೂರಿ ಇಲ್ಲ” ಎಂದು ಅವರು ಹೇಳಿದರು.
ಅಪಘಾತದ ತನಿಖೆಗಳು ನಡೆಯುತ್ತಿವೆ. ದೆಹಲಿಯಲ್ಲಿರುವ ವಿಮಾನ ಅಪಘಾತ ತನಿಖಾ ಬ್ಲಾಕ್‌ ಬಾಕ್ಸ್‌ ಪಡೆದುಕೊಂಡಿದೆ. ವಿವರವಾದ ತನಿಖೆಯನ್ನು ನಡೆಸುತ್ತಿದೆ, ಆದರೆ ಮಹಾರಾಷ್ಟ್ರ ಸಿಐಡಿ ಹೆಚ್ಚುವರಿ ತನಿಖೆಯನ್ನು ಪ್ರಾರಂಭಿಸಿದೆ. ಈ ಘಟನೆಯು ನಿರ್ಣಾಯಕ ಸಮಯದಲ್ಲಿ ಎನ್‌ಸಿಪಿಯಲ್ಲಿ ನಿರ್ವಾತವನ್ನು ಉಂಟುಮಾಡಿದೆ. ಪಕ್ಷದ ಬಣಗಳ ನಡುವಿನ ಪುನರೇಕೀಕರಣದ ಮಾತುಕತೆಗಳು ಮತ್ತು ಉತ್ತರಾಧಿಕಾರದ ಬಗ್ಗೆ ಊಹಾಪೋಹಗಳು ಮಹಾರಾಷ್ಟ್ರ ರಾಜಕೀಯದಲ್ಲಿ ಪ್ರಾಬಲ್ಯ ಮುಂದುವರಿಸಿವೆ.
