ಕನ್ಯಾಕುಮಾರಿಯಲ್ಲಿ ನಡೆದ ದೇವಸ್ಥಾನದ ಉತ್ಸವದಲ್ಲಿ ಗುಂಪೊಂದು ವಿನಾಯಕ ದಾಮೋದರ್ ಸಾವರ್ಕರ್ ಅವರ ಪರ ಘೋಷಣೆ ಕೂಗಿದ್ದು, ಅವರ ಮೇಲೆ ತಮಿಳುನಾಡು ಹಿಂದೂ ಧಾರ್ಮಿಕ ದತ್ತಿ ಸಚಿವ ಶೇಖರ್ ಬಾಬು ಅವರು ಕೆರಳಿದ್ದಾರೆ.
ಡಿಸೆಂಬರ್ 25 ರಂದು ಸುಚೀಂದ್ರಂನ ತಾನುಮಲಯ ಸ್ವಾಮಿ ದೇವಸ್ಥಾನದಲ್ಲಿ ಪ್ರಾರಂಭವಾದ ಮಾರ್ಗಜಿ ಪೆರುಂತಿರುವಿಳ ಉತ್ಸವದ ಸಂದರ್ಭದಲ್ಲಿ ಈ ಘಟನೆ ಸಂಭವಿಸಿದೆ, ಅಲ್ಲಿ ದೇವಾಲಯದ ವಿಗ್ರಹಗಳನ್ನು ಸಾಂಪ್ರದಾಯಿಕವಾಗಿ ವಿವಿಧ ರಥಗಳಲ್ಲಿ ಹೊರಗೆ ಕರೆದೊಯ್ಯಲಾಗುತ್ತದೆ. ಶುಕ್ರವಾರ, ತಿರು ಥೇರೋಟ್ಟಂ (ರಥ ಮೆರವಣಿಗೆ) ಸಮಯದಲ್ಲಿ, ಶೇಖರ್ ಬಾಬು ಸಮಾರಂಭದಲ್ಲಿ ಭಾಗವಹಿಸಿ ರಥವನ್ನು ಎಳೆಯುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.
ಮೆರವಣಿಗೆ ಪ್ರಾರಂಭವಾಗುತ್ತಿದ್ದಂತೆ, ಜನರ ಗುಂಪೊಂದು ಭಾರತ್ ಮಾತಾ ಕಿ ಜೈ ಜೊತೆಗೆ ಸಾವರ್ಕರ್ ಅವರ ಪರ ಘೋಷಣೆ ಕೂಗಲು ಪ್ರಾರಂಭಿಸಿತು. ಇದರಿಂದ ಅಸಮಾಧಾನಗೊಂಡ ಸಚಿವರು, ಗುಂಪಿಗೆ ತಾಕೀತು ಮಾಡುತ್ತಿರುವುದು ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ವಿರೋಧ ಪಕ್ಷವಾದ ಅಖಿಲ ಭಾರತ ಅಣ್ಣಾ ದ್ರಾವಿಡ ಮುನ್ನೇತ್ರ ಕಳಗಂ ಸಚಿವರ ಈ ವರ್ತನೆಯನ್ನು ಖಂಡಿಸಿದೆ. ಎಕ್ಸ್‌ನಲ್ಲಿ ಪೋಸ್ಟ್‌ ಮಾಡಿರುವ ಪಕ್ಷವು, “ಧರ್ಮವನ್ನು ಉತ್ತೇಜಿಸಬೇಕಾದ ಇಲಾಖೆಯ ಸಚಿವರು ‘ಅಸಭ್ಯವಾಗಿ’ ವರ್ತಿಸುವುದು ಅಸಭ್ಯತೆಯ ಪರಮಾವಧಿ” ಎಂದು ಹೇಳಿದೆ.
ಭಾರತೀಯ ಜನತಾ ಪಕ್ಷದ ನಾಯಕ ವಿನೋಜ್ ಪಿ ಸೆಲ್ವಂ ಕೂಡ ಸಚಿವರನ್ನು ಟೀಕಿಸಿ, ರಾಜ್ಯದಲ್ಲಿ ಕಾನೂನು ಮತ್ತು ಸುವ್ಯವಸ್ಥೆ ಹದಗೆಟ್ಟಿದೆ ಎಂದು ಆರೋಪಿಸಿದರು. ಡಿಎಂಕೆ ಸರ್ಕಾರದ ಸಚಿವರು ಭಕ್ತರನ್ನು ಅವಮಾನಿಸುತ್ತಿದ್ದಾರೆ. ಸಾರ್ವಜನಿಕರನ್ನು ಬೆದರಿಸುವುದು ಪಕ್ಷದ ರಾಜಕೀಯವಾಗಿದೆ ಎಂದು ಅವರು ಹೇಳಿದ್ದಾರೆ.
ವಿವಾದಕ್ಕೆ ಪ್ರತಿಕ್ರಿಯಿಸಿದ ಹಾಲು ಮತ್ತು ಡೈರಿ ಅಭಿವೃದ್ಧಿ ಸಚಿವ ಮನೋ ತಂಗರಾಜ್, ಈ ವಿಷಯವನ್ನು ಭಾರತೀಯ ಜನತಾ ಪಕ್ಷ ಮತ್ತು ಕೆಲವು ಧಾರ್ಮಿಕ ಗುಂಪುಗಳು ಉದ್ದೇಶಪೂರ್ವಕವಾಗಿ ಸೃಷ್ಟಿಸಿವೆ ಎಂದು ಹೇಳಿದರು. ರಥಯಾತ್ರೆ ಪ್ರಾರಂಭವಾಗುವ ಸ್ವಲ್ಪ ಮೊದಲು, ಈ ಗುಂಪುಗಳ ಸದಸ್ಯರು ಸಾವರ್ಕರ್ ಅವರನ್ನು ಹೊಗಳುವ ಘೋಷಣೆಗಳನ್ನು ಕೂಗಿದರು, ಇದು ದೇವಾಲಯದಲ್ಲಿ ಭಕ್ತರ ಭಾವನೆಗಳಿಗೆ ನೋವುಂಟು ಮಾಡಿದೆ ಎಂದು ಅವರು ಹೇಳಿದರು.
ಮಹಾತ್ಮ ಗಾಂಧಿಯವರ ಹತ್ಯೆಯಲ್ಲಿ ಸಾವರ್ಕರ್ ಅವರನ್ನು ಆರೋಪಿ ಎಂದು ಮನೋ ತಂಗರಾಜ್ ಹೇಳಿದ್ದಾರೆ. ತಾನುಮಲಯ ಸ್ವಾಮಿ ದೇವಾಲಯದೊಳಗೆ ಅಂತಹ ಘೋಷಣೆಗಳನ್ನು ಕೂಗುವ ಪ್ರಸ್ತುತತೆಯನ್ನು ಪ್ರಶ್ನಿಸಿದ್ದಾರೆ. ಬಿಜೆಪಿ ಮತ್ತು ಅದರ ಅಂಗಸಂಸ್ಥೆ ಧಾರ್ಮಿಕ ಸಂಘಟನೆಗಳು ದೇವಾಲಯಗಳಿಗೆ ಪ್ರವೇಶಿಸಿ ತಪ್ಪು ಮಾಹಿತಿ ಹರಡಲು ಪ್ರಯತ್ನಿಸುತ್ತಿವೆ ಎಂದು ಅವರು ಆರೋಪಿಸಿದರು.
