ಒಳಮೀಸಲಾತಿ ಜಾರಿ ಸರ್ಕಾರದ ಹೊಸ ಸೂತ್ರ

ಕರ್ನಾಟಕದಲ್ಲಿ ಒಳಮೀಸಲಾತಿಯ ’ಸದ್ದು-ಗುದ್ದು’ ಅವಿಭಜಿತ ಆಂಧ್ರಪ್ರದೇಶಕ್ಕಿಂತಲೂ ಹೆಚ್ಚಾಗಿದೆ. ಇದಕ್ಕೆ ಕಾರಣ ಪರಿಶಿಷ್ಟ ಜಾತಿಗಳೊಳಗಿನ ಮೇಲಾಟವೂ ಹೌದು, ಸರ್ಕಾರದ ಬೇಜವಾಬ್ದಾರಿ ನಡೆಗಳೂ ಹೌದು. ಆದರೆ ದಿನಾಂಕ: 24.04.2026ರಂದು ನಡೆದ ಸಚಿವ ಸಂಪುಟ ಸಭೆಯು ಒಳಮೀಸಲಾತಿ ಜಾರಿಗೊಳಿಸುವಲ್ಲಿ ಒಂದು ಸಮಾಧಾನಕರ ಸೂತ್ರವನ್ನು ಕಂಡುಕೊಂಡಿದೆ.

2023ರಲ್ಲಿ ವಿಧಾನಸಭೆ ಚುನಾವಣೆಗೂ ಮುನ್ನ ಕಾಂಗ್ರೆಸ್ ಪಕ್ಷವು ದಲಿತರ ಮನಗೆಲ್ಲುವಲ್ಲಿ ಯಶಸ್ವಿಯಾಯಿತು. ಇದಕ್ಕೆ ಮುಖ್ಯ ಕಾರಣ ಒಳಮೀಸಲಾತಿ ಜಾರಿಗೊಳಿಸುತ್ತೇವೆ ಎಂದು ಭರವಸೆ ನೀಡಿದ್ದು ಹಾಗೂ ಪ್ರಣಾಳಿಕೆಯಲ್ಲಿ ಘೋಷಣೆ ಮಾಡಿದ್ದಾಗಿತ್ತು. ಬಿಜೆಪಿ ಆತುರಾತುರವಾಗಿ ಕಡೆಯ ಕ್ಷಣದಲ್ಲಿ ಒಳಮೀಸಲಾತಿ ಕುರಿತು ಕೈಗೊಂಡ ನಾಟಕವನ್ನು ಅರಿತ ದಲಿತರು 2024 ರಲ್ಲಿ ಕಾಂಗ್ರೆಸ್ ಪಕ್ಷವನ್ನು ಗೆಲ್ಲಿಸಿದರು. ಸುಮಾರು ಶೇ.60ರಷ್ಟು ದಲಿತರು ಕಾಂಗ್ರೆಸ್ ಪಕ್ಷವನ್ನು ಆಯ್ಕೆ ಮಾಡಿಕೊಂಡಿರುವುದು ಚುನಾವಣಾ ಮತ ವಿಶ್ಲೇಷಣೆಯಿಂದ ತಿಳಿದುಬರುತ್ತದೆ. ಹೀಗೆ ಮತ್ತೆ ಅಧಿಕಾರಕ್ಕೆ ಬಂದ ಸಿದ್ಧರಾಮಯ್ಯ 2.0 ಸರ್ಕಾರವು ತನ್ನ ಮೂರು ವರ್ಷದ ಅವಧಿಯಲ್ಲಿ ಒಳಮೀಸಲಾತಿ ಜಾರಿಗೊಳಿಸಲು ಕ್ರಮ ಕೈಗೊಂಡಿತು. ಹೀಗೆ ಮಾಡಲು ಒಳಮೀಸಲಾತಿ ಹೋರಾಟಗಾರರು ಮತ್ತೆ ಬೀದಿಗಿಳಿಯಬೇಕಾದ್ದೇ ವಿಪರ್ಯಾಸ. ಆದರೂ ಸರ್ಕಾರ ಜಸ್ಟೀಸ್ ನಾಗಮೋಹನ್ ದಾಸ್ ಸಮಿತಿಯನ್ನು ರಚಿಸಿ, ಹಿಂದೆಂದೂ ಆ ಮಟ್ಟಕ್ಕೆ ಆಗಿರದ ಸಮೀಕ್ಷೆ ಕೈಗೊಂಡು ಪರಿಶಿಷ್ಟ ಜಾತಿಗಳ ಸಾಮಾಜಿಕ-ಆರ್ಥಿಕ-ಶೈಕ್ಷಣಿಕ ಹಿಂದುಳಿದಿರುವಿಕೆಯನ್ನು ದತ್ತಾಂಶದ ಆಧಾರದ ಮೇಲೆ ಅಂದಾಜಿಸಿತು. ಜೊತೆಗೆ ಶೇ.17 ಮೀಸಲಾತಿ ಪ್ರಮಾಣದಲ್ಲಿ ನಾಲ್ಕು ಗುಂಪುಗಳನ್ನಾಗಿ ಮಾಡಿ ಒಳಮೀಸಲಾತಿಗೆ ಶಿಫಾರಸು ಮಾಡಿತು. ಆದರೆ ಬಲಗೈ ಸಮುದಾಯವು ತನ್ನ ಜನಸಂಖ್ಯೆಯನ್ನು ತಪ್ಪು ಅಂದಾಜು ಮಾಡಿದ್ದು, ಮೀಸಲಾತಿ ಪ್ರಮಾಣ ಸರಿಯಾಗಿ ನಿಗದಿಪಡಿಸಿಲ್ಲವೆಂದು ಪುನರ್ ಪರಿಶೀಲಿಸಬೇಕೆಂದು ಹೋರಾಟ ಮಾಡಿದ ಪರಿಣಾಮವಾಗಿ ಸರ್ಕಾರವು ಎಡಗೈ ಪ್ರವರ್ಗ ‘ಎ’ಗೆ ಶೇ.6, ಬಲಗೈ ಪ್ರವರ್ಗ ‘ಬಿ’ಗೆ ಶೇ.6 ಹಾಗೂ ಸ್ಪೃಶ್ಯ-ಅಲೆಮಾರಿಗಳಿಗೆ ಶೇ.5 ಒಳಮೀಸಲಾತಿ ನೀಡಿ ಬಲಗೈ ಸಮುದಾಯವನ್ನು ಸಮಾಧಾನಪಡಿಸಿತಾದರೂ, ಅಲೆಮಾರಿ ಸಮುದಾಯಗಳನ್ನು ಅನಾಥರನ್ನಾಗಿ ಮಾಡಿದ್ದಕ್ಕೆ ಅಲೆಮಾರಿ ಸಮುದಾಯದ ಜೊತೆಗೆ ಎಡಗೈ ಸಮುದಾಯದ ಹೋರಾಟ ಮುಂದುವರಿಯಿತು. ಅಲೆಮಾರಿಗಳ ಹೋರಾಟಕ್ಕೆ ಮಾದಿಗ ಸಂಘಟನೆಗಳು ಬೆಂಬಲ ನೀಡಿದವು. ಅಲೆಮಾರಿಗಳು ದೆಹಲಿಗೆ ಹೋಗಿ ಬಂದರೂ ಯಾವುದೇ ಪ್ರಯೋಜನವಾಗಲಿಲ್ಲ. ನಂತರ ಅನಿವಾರ್ಯವಾಗಿ ನ್ಯಾಯಾಲಯದ ಮೆಟ್ಟಿಲು ಹತ್ತಬೇಕಾಯಿತು. ಈಗಿನ್ನೂ ಒಳಮೀಸಲಾತಿ ವಿಚಾರ ನ್ಯಾಯಾಲಯದಲ್ಲಿಯೇ ಇದೆ.

ಈ ನಡುವೆ ಎಲ್ಲವೂ ಸರಿಹೋಯಿತೇನೋ ಅಂದುಕೊಳ್ಳುವಷ್ಟರಲ್ಲಿ ರೋಸ್ಟರ್ ಬಿಂದು ಸಮಸ್ಯೆ ಉದ್ಭವಿಸಿತು. ರೋಸ್ಟರ್ 100 ಬಿಂದುಗಳಲ್ಲಿ ಮೊದಲನೆಯ ಹುದ್ದೆ ಎಸ್ಸಿ ಪ್ರವರ್ಗ ಎ ಗೆ, ಒಂಬತ್ತನೇ ಬಿಂದು ಎಸ್ಸಿ ಪ್ರವರ್ಗ ಬಿ ಹಾಗೂ ಹದಿನೈದನೆಯ ಬಿಂದು ಎಸ್ಸಿ ಪ್ರವರ್ಗ ಸಿ ಗೆ ಹಂಚಿಕೆ ಮಾಡಲಾಯಿತು. ಇದು ಹೊಸದಲ್ಲದಿದ್ದರೂ ಈ ಹಿಂದಿನಿಂದಲೂ ನಡೆದುಕೊಂಡು ಬಂದ ಪರಿಪಾಠವೇ ಆಗಿತ್ತು ಹಾಗೂ ನ್ಯಾಯಾಲಯಗಳ ತೀರ್ಪು ಸಹ ‘ವೃಂದ ಮತ್ತು ವಿಷಯ’ ಆಧಾರಿತವಾಗಿ ಮೀಸಲು ರೋಸ್ಟರ್ ಬಿಂದು ನಿಗದಿಪಡಿಸಲು ತೀರ್ಪು ನೀಡಿದ್ದರಿಂದ ಅದನ್ನೇ ನ್ಯಾಯೋಚಿತವೆಂದು ಪರಿಗಣಿಸಲಾಗಿತ್ತು. ಆದರೆ ಈ ರೋಸ್ಟರ್ ಬಿಂದು ಅಳವಡಿಸಿದಾಗ 15 ಕ್ಕಿಂತ ಕಡಿಮೆ ಹುದ್ದೆಗಳ ನೇಮಕಾತಿ (ಈ ಹುದ್ದೆಗಳು ಹೆಚ್ಚಾಗಿ ಕ್ಲಾಸ್ 1 ರ ಹುದ್ದೆಗಳಾಗಿರುತ್ತವೆ) ಯಲ್ಲಿ ಎಲ್ಲಾ ಹುದ್ದೆಗಳೂ ಪ್ರವರ್ಗ ಎ ಗೆ ಹೋಗುತ್ತದೆ. ಇನ್ನೆರಡು ಪ್ರವರ್ಗಗಳಿಗೆ ಮುಂದಿನ 30 ವರ್ಷಗಳವರೆಗೆ ಯಾವುದೇ ನೇಮಕಾತಿ ಆಗುವುದಿಲ್ಲ. ನೇಮಕಾತಿ ಆಗಲು ಆ ಹುದ್ದೆಯಲ್ಲಿನ ವ್ಯಕ್ತಿ ನಿವೃತ್ತಿಯೇ ಆಗಬೇಕೆಂಬ ವಾದವನ್ನು ತೂರಿಬಿಡಲಾಯಿತು. ಇದು ಮೇಲ್ನೋಟಕ್ಕೆ ಸತ್ಯವಾದ ಸಂಗತಿಯೂ ಆಗಿತ್ತು. ಅದಷ್ಟೇ ಅಲ್ಲದೇ ಈ ಒಂದು ವಿಚಾರವನ್ನು ತನ್ನ ರಾಜಕೀಯಕ್ಕೆ ಬಳಸಿಕೊಂಡ ಆರೆಸ್ಸೆಸ್ ಮನುವಾದಿ ವಾದಿರಾಜ, ಅತ್ತಕಡೆ ಬಲಗೈ ಬಿಜೆಪಿ ಶಾಸಕರನ್ನೂ ಇತ್ತಕಡೆ ಎಡಗೈನ ಕೆಲವು ಅತಿರೇಕದ ‘ಮಾತುಗಾರರನ್ನು’ ಎದುರುಬದಿರಾಗಿಸುವಲ್ಲಿ ಯಶಸ್ವಿಯಾದನು. ಇದಕ್ಕೆ ತಕ್ಕಂತೆ ಸಮಾಜ ಕಲ್ಯಾಣ ಸಚಿವರಾದ ಹೆಚ್.ಸಿ.ಮಹದೇವಪ್ಪ ಸಹ ಅತ್ಯಂತ ಅಸೂಕ್ಷ್ಮವಾಗಿ ನಡೆದುಕೊಂಡರು. ಎರಡೂ ಸಮುದಾಯಗಳನ್ನು ಒಗ್ಗೂಡಿಸಿ ಮಾತುಕತೆಗೆ ಮುಂದಾಗಲಿಲ್ಲ. ಸಮಾಜ ಕಲ್ಯಾಣ ಇಲಾಖೆಯ ಅಧಿಕಾರಿಗಳು ಒಳಗಿನ ‘ಪಟ್ಟು’ಗಳನ್ನೆಲ್ಲಾ ಹೊರಹಾಕುತ್ತಾ ಎಡಗೈ ಮತ್ತು ಬಲಗೈ ಸಮುದಾಯದ ಅತಿರೇಕಿಗಳಿಗೆ ಇಲ್ಲಸಲ್ಲದ ‘ಆಹಾರ’ ಒದಗಿಸಿದರು. ಇದರಿಂದಾಗಿ ಬಲಗೈ ಸಮುದಾಯದ ‘ಮಾತುಗಾರರು’ ಈ ರೋಸ್ಟರ್ ಪದ್ಧತಿಯಿಂದ ತಮಗೆ ಅನ್ಯಾಯವಾಗುತ್ತದೆ ಎಂದು ಗಟ್ಟಿಯಾದ ವಾದ ಮಂಡಿಸಿದರೆ, ಎಡಗೈ ಸಮುದಾಯದವರು ಇಷ್ಟು ದಿನ ‘ನೀವೇ’ ತಿಂದಿದ್ದೀರಿ, ಇನ್ನು 30 ವರ್ಷ ನಮಗೆ ತಿನ್ನಲು ಬಿಡಿ ಎಂಬ ವಾದ ಮುಂದಿಟ್ಟರು. ಈ ಇಬ್ಬರೂ ಬಹಿರಂಗವಾಗಿಯೇ ಅತಿರೇಕದ ವಾದ ಮಾಡುತ್ತಿದ್ದರು. ಸ್ವತಃ ನಾಗಮೋಹನ ದಾಸ್ ವರದಿಯೇ ಹೇಳುವಂತೆ ಬಲಗೈ ಸಮುದಾಯ ಇದ್ದಬದ್ದ ಎಲ್ಲಾ ಮೀಸಲಾತಿಯನ್ನೂ ಪಡೆದುಕೊಂಡಿರಲಿಲ್ಲ, ಅದರಲ್ಲಿ ಎಡಗೈ ಸಮುದಾಯವೂ ಪಡೆದುಕೊಂಡಿತ್ತು. ಎಡಗೈ ಸಮುದಾಯದ ‘ಖಾಲಿ ತಟ್ಟೆ’ ರೂಪಕ ಕೇವಲ ‘ತಪ್ಪಾಗಿತ್ತು’. ಇದೇ ಸಮಯದಲ್ಲಿ ಬಲಗೈ ಸಮುದಾಯದ ಅತಿರೇಕಿಗಳು ಎಡಗೈ ಸಮುದಾಯದವರು ಬೇಕಾದರೆ ‘ಪ್ರತಿಭೆ’ಯ ಮೂಲಕ ಸ್ಪರ್ಧಾತ್ಮಕವಾಗಿ ನಮ್ಮೊಂದಿಗೆ ಸ್ಪರ್ಧಿಸಲಿ ಎಂದು ‘ಬ್ರಾಹ್ಮಣ’ವಾದಿ ವಾದ ಮಾಡಿದರು. ಇದನ್ನು ಹಿಡಿದುಕೊಂಡು ಬಲಗೈ ಸಮುದಾಯದವರು ‘ಅಂಬೇಡ್ಕರ್ ವಾದಿಗಳೆಂದು’ ಕರೆದುಕೊಳ್ಳುತ್ತಾರೆ. ಇದೇ ಅಂಬೇಡ್ಕರ್ ವಾದ ಎಂದು ಎಡಗೈ ಸಮುದಾಯದ ಅತಿರೇಕಿಗಳು ವಾದಿಸಿದರು. ಮತ್ತೊಂದೆಡೆ ಅಂಬೇಡ್ಕರ್ ಮೀಸಲಾತಿ ಸಾಕು-ಒಳಮೀಸಲಾತಿ ಬಿಸಾಕು ಎಂಬ ಅಪ್ರಬುದ್ಧ ಮಾತುಗಳೂ ಬಂದವು. ಈ ಎರಡೂ ಕಡೆಯ ಅತಿರೇಕಿಗಳು ಪರಸ್ಪರ ‘ಅಂಬೇಡ್ಕರ್ ವಿರೋಧಿ’ ನಡೆಯನ್ನು ಆಚರಿಸುತ್ತಾ ಕೆಸರೆರಚಿಕೊಳ್ಳುತ್ತಿದ್ದರು. ದಲಿತೇತರ ಸಮಾಜ ನಮ್ಮನ್ನು ಹೇಗೆ ನೋಡುತ್ತಿರಬಹುದು ಎಂಬ ಕಿಂಚಿತ್ತು ಅಂಜಿಕೆಯೂ ಇಲ್ಲದಂತೆ ಸಾಮಾಜಿಕ ಜಾಲತಾಣದಲ್ಲಿ ಗುದ್ದಾಡುತ್ತಿತ್ತು.

ಈ ನಡುವೆ ಕರ್ನಾಟಕ ಹೈಕೋರ್ಟ್ ಶೇ. 50 ಮೀಸಲಾತಿಯನ್ನು ಮೀರದಂತೆ ಹುದ್ದೆಗಳನ್ನು ನೇಮಕ ಮಾಡಿಕೊಳ್ಳಬೇಕೆಂದು ನಿರ್ದೇಶನ ನೀಡಿದ್ದರಿಂದ ಶೇ. 17ಕ್ಕೆ ನಿಗದಿಗೊಳಿಸಿದ್ದ ಮೀಸಲಾತಿ ಪ್ರಮಾಣವು ಶೇ. 15ಕ್ಕೆ ಇಳಿಕೆಯಾಗಬೇಕಾಗಿತ್ತು. ಈ ತೀರ್ಪನ್ನೇ ಮುಂದುಮಾಡಿಕೊಂಡ ಕರ್ನಾಟಕ ಸರ್ಕಾರದ ಸಚಿವ ಸಂಪುಟವು, 56,000 ಹುದ್ದೆಗಳ ನೇಮಕಾತಿಗೆ ಚಾಲನೆ ನೀಡಿತಾದರೂ ಅದರಲ್ಲಿ ಒಳಮೀಸಲಾತಿ ನೀತಿಯನ್ನು ಅಳವಡಿಸುವುದಿಲ್ಲ, ಹೈಕೋರ್ಟ್ ತೀರ್ಪು ಇದಕ್ಕೆ ವ್ಯತಿರಿಕ್ತವಾಗಿದೆ ಎಂಬ ತೀರ್ಮಾನಕ್ಕೆ ಬಂದಿತು. ಈ ಬೆಳವಣಿಗೆ ಎಡಗೈ ಮತ್ತು ಬಲಗೈ ಅತಿರೇಕಿಗಳ ಬೆಂಕಿಗೆ ಇನ್ನಷ್ಟು ತುಪ್ಪ ಸುರಿಯಿತು. ನಿಜಕ್ಕೂ ಈ ತೀರ್ಮಾನ ಕಳೆದ 30 ವರ್ಷಗಳ ಒಳಮೀಸಲಾತಿ ಹೋರಾಟಕ್ಕೆ ಮಾಡಿದ ಅನ್ಯಾಯವಾಗಿತ್ತಲ್ಲದೇ, ತಾನೇ ಮಾಡಿದ್ದ ಕಾನೂನಿನ ಉಲ್ಲಂಘನೆಯಾಗಿತ್ತು.

ಮಾದಿಗ ಸಮುದಾಯ ಮತ್ತೆ ಬೀದಿಗಿಳಿದು ಹೋರಾಡಿತು. ಇದರ ಬೆನಹಿಂದೆಯೇ ಬಲಗೈ ಸಮುದಾಯ ಹೋರಾಟ ಮಾಡಿತು. ಮನುವಾದಿ ಬೆಂಬಲಿತ ಅತಿರೇಕಿಗಳ ‘ಹಿಕಮತು’ ಫಲ ನೀಡಿತ್ತು. ಕರ್ನಾಟಕದಾದ್ಯಂತ ಸಾಮಾಜಿಕ ಜಾಲತಾಣ ಗಮನಿಸುತ್ತಿದ್ದ ಎಡಗೈ-ಬಲಗೈ ಪ್ರಜ್ಞಾವಂತರಿಗೆ ‘ಅಸಹ್ಯ’ ಮೂಡಿಸುವಂತೆ ವಾದಗಳು ನಡೆಯುತ್ತಿದ್ದವು. ಇದೇನಿದು..! ಹೊಲೆಮಾದಿಗರು ಪರಸ್ಪರ ಹೊಡೆದಾಡಿಕೊಳ್ಳುವಂತಿದ್ದಾರಲ್ಲ ಎಂಬ ಮಾತುಗಳು ಕೇಳಲಾರಂಭಿಸಿದವು. ಇದೆಲ್ಲವನ್ನೂ ನಿಭಾಯಿಸಬೇಕಿದ್ದ ದಲಿತ ಸಂಘರ್ಷ ಸಮಿತಿಯ ನಾಯಕರುಗಳು ಮೌನವಹಿಸಿ, ಒಂದಲ್ಲಾ ಒಂದು ವಾದದೊಂದಿಗೆ ತಮ್ಮನ್ನು ತಳುಕು ಹಾಕಿಕೊಂಡರು. ಮಾತನಾಡಬೇಕಾದಾಗ ಮಾತನಾಡದಿದ್ದರೆ ಯಾವುದೋ ಒಂದು ಬಣದೊಂದಿಗೆ ನಾವಿದ್ದೇವೆ ಎಂದೇ ಅರ್ಥವಲ್ಲವೇ? ನಿಜಕ್ಕೂ ದಸಂಸ ನಾಯಕರು ಮನಸ್ಸು ಮಾಡಿದ್ದರೆ ಈ ಸಮಸ್ಯೆಯನ್ನು ಬಗೆಹರಿಸಬಹುದಿತ್ತು. ಆದರೆ ಅಂತಹ ಅವಕಾಶವನ್ನು ಕಳೆದುಕೊಂಡರು.

ಇಂತಹ ವಿಷಮ ಪರಿಸ್ಥಿತಿ ನಿರ್ಮಾಣವಾಗಿದ್ದಾಗಲೇ ಮೈಸೂರಿನ ಪೂರ್ಣಾನಂದರವರು, ಕೋಲಾರದ ಗಡ್ಡಂ ವೆಂಕಟೇಶ್‌ರವರು, ಬೆಂಗಳೂರಿನ ಹೆಣ್ಣೂರು ಶ್ರೀನಿವಾಸ್‌ರವರು, ಹ.ರಾ.ಮಹೇಶ್ ರವರು ತಮ್ಮ ಮುಂದಾಳತ್ವದಲ್ಲಿ ಎಡಗೈ-ಬಲಗೈ ಸಮುದಾಯಗಳ ಅತಿರೇಕಿಗಳು ಮಾಡುತ್ತಿರುವ ರಂಪಾಟದ ವಿರುದ್ಧ ’ಐಕ್ಯ ಸಭೆ’ಗಳನ್ನು ನಡೆಸಿದರು. ಈ ಸಭೆಗಳೂ ಫಲ ನೀಡಿದವು. ಇದಕ್ಕೆ ಕಾರಣ ಸಾಮಾಜಿಕ ಜಾಲವನ್ನು ಹೊರತುಪಡಿಸಿ ರಾಜ್ಯಾದ್ಯಂತ ಹಲವು ಹೊಲೆಮಾದಿಗ ಮನಸ್ಸುಗಳು ಒಗ್ಗಟ್ಟನ್ನು ಬಯಸುತ್ತಿದ್ದವು. ಎಡ-ಬಲ ಒಗ್ಗಟ್ಟಿದ್ದರೆ ಆನೆಬಲ ಎಂಬ ಘೋಷದೊಂದಿಗೆ ಒಂದಾಗುವ ಮಾತುಗಳನ್ನೂ ಆಡಿದರು. ಒಳಮೀಸಲಾತಿಯ ಹೊರತಾಗಿರುವ ಬೆಟ್ಟದಷ್ಟು ಜವಾಬ್ದಾರಿಗಳನ್ನು ನೆನೆಸಿದರು. ಇದರ ಪರಿಣಾಮವಾಗಿ ಅತಿರೇಕಿಗಳ ಆಟಾಟೋಪಕ್ಕೆ ಬ್ರೇಕ್ ಬಿದ್ದಿತು. ಮನುವಾದಿಯ ಹಿಂಬಾಲಕರಿಗೆ ದಿಗಿಲು ಹುಟ್ಟುಕೊಂಡಿತು. ಮನುವಾದಿಯಂತೂ ತೀರ ತಲೆಕೆಡಿಸಿಕೊಂಡು ಸಿಕ್ಕಸಿಕ್ಕವರ ಬಳಿ ಹೊಲೆಮಾದಿಗರ ಒಗ್ಗಟ್ಟು ಮುರಿಯುವ ಕುರಿತು ಸಂಚುಗಳನ್ನು ರೂಪಿಸಲು ಆರಂಭಿಸಿದನು. ಆದರೆ ಈ ಎಲ್ಲಕ್ಕೂ ಇತಿಶ್ರೀ ಹಾಡುವಂತೆ ಕರ್ನಾಟಕ ಸರ್ಕಾರದ ಸಚಿವ ಸಂಪುಟ ಸಭೆಯು ತೀರ್ಮಾನ ತೆಗೆದುಕೊಂಡಿದೆ.

ಪರಿಶಿಷ್ಟ ಜಾತಿಗಳಲ್ಲಿ ಒಳ ಮೀಸಲಾತಿ ಕುರಿತು ಸಚಿವ ಸಂಪುಟದ ನಿರ್ಣಯ

1. ಪರಿಶಿಷ್ಟ ಜಾತಿಗೆ ನಿಗದಿಪಡಿಸಿರುವ ಶೇಕಡಾ 15 ಮೀಸಲಾತಿಯಲ್ಲಿ ಪ್ರವರ್ಗ-ಎ, ಪ್ರವರ್ಗ-ಬಿ ಹಾಗೂ ಪ್ರವರ್ಗ-ಸಿ ಗಳಿಗೆ ಒಳಮೀಸಲಾತಿಯನ್ನು ಕ್ರಮವಾಗಿ 5.25 : 5.25 : 4.5 ಪ್ರಮಾಣದಲ್ಲಿ ಅನುಷ್ಠಾನಗೊಳಿಸಲು ತೀರ್ಮಾನಿಸಲಾಯಿತು. ಪ್ರವರ್ಗ “ಸಿ” ಗೆ ಲಭ್ಯವಾಗುವ ಹುದ್ದೆಗಳಲ್ಲಿ ಶೇಕಡಾ 20 ರಷ್ಟು ಹುದ್ದೆಗಳನ್ನು 59 ಅಲೆಮಾರಿ ಜಾತಿಗಳಿಗೆ ಮೀಸಲಿರಿಸತಕ್ಕದ್ದು.

1) ಈ ತೀರ್ಮಾನವನ್ನು ಅನುಷ್ಠಾನಗೊಳಿಸಲು 400 ಬಿಂದುಗಳ ವರ್ತುಲಗಳನ್ನು ಅನುಪಾಲಿಸಲು ತೀರ್ಮಾನಿಸಲಾಯಿತು.

2) ಯಾವುದೇ ವೃಂದದಲ್ಲಿ 3ಕ್ಕಿಂತ ಕಡಿಮೆ ಪರಿಶಿಷ್ಟ ಜಾತಿ ಬಿಂದುಗಳು ಲಭ್ಯವಾಗುತ್ತಿದ್ದಲ್ಲಿ, ಪರಿಶಿಷ್ಟ ಜಾತಿಗೆ ಮೀಸಲಾದ ಹುದ್ದೆಗಳನ್ನು ಪರಿಶಿಷ್ಟ ಜಾತಿ ಸಾಮಾನ್ಯ ಎಂದು ಪರಿಗಣಿಸಿ, ನೇಮಕಾತಿ ಮಾಡತಕ್ಕದ್ದು.

ರಾಜ್ಯ ಸರ್ಕಾರವು ಈ ಮೇಲಿನಂತೆ ತೀರ್ಮಾನ ತೆಗೆದುಕೊಂಡಿದ್ದು ಎಡಗೈ ಸಮುದಾಯ ಬಯಸಿದಂತೆ 56,432 ಹುದ್ದೆಗಳಿಗೆ ಒಳಮೀಸಲಾತಿಯನ್ನು ಅನ್ವಯಿಸಲಾಗಿದೆ. ಹಾಗೂ ಬಲಗೈ ಸಮುದಾಯ ಬಯಸಿದಂತೆ ರೋಸ್ಟರ್ ಬಿಂದುಗಳಲ್ಲಿ ಬದಲಾವಣೆ ತರಲಾಗಿದೆ. ಜೊತೆಗೆ ಅಲೆಮಾರಿ ಗುಂಪುಗಳಿಗೆ ಒಳಮೀಸಲಾತಿ ಒಳಗಡೆಯೇ ಶೇ.20 ಮೀಸಲಾತಿ ಒದಗಿಸಲಾಗಿದೆ. ಜೊತೆಗೆ ಹೆಚ್ಚುವರಿ ಶೇ.6 ರಷ್ಟು ಹುದ್ದೆಗಳನ್ನು (ಶೇ.56 ಮೀಸಲಾತಿ ಮೀರಿದರೆ ದೊರಕುವ) ಬ್ಯಾಕ್ ಲಾಗ್ ಇಡಲಾಗುತ್ತದೆ.

ಇಷ್ಟಾಗಿಯೂ ಯಾವುದೇ ವೃಂದದಲ್ಲಿ 3ಕ್ಕಿಂತ ಕಡಿಮೆ ಪರಿಶಿಷ್ಟ ಜಾತಿ ಬಿಂದುಗಳು ಲಭ್ಯವಾಗುತ್ತಿದ್ದಲ್ಲಿ, ಪರಿಶಿಷ್ಟ ಜಾತಿಗೆ ಮೀಸಲಾದ ಹುದ್ದೆಗಳನ್ನು ಪರಿಶಿಷ್ಟ ಜಾತಿ ಸಾಮಾನ್ಯ ಎಂದು ಪರಿಗಣಿಸಿ, ನೇಮಕಾತಿ ಮಾಡತಕ್ಕದ್ದು ಎಂದಿರುವುದು ಇಷ್ಟು ದಿನ ಹಿಂದುಳಿದಿದ್ದ ಜಾತಿಗಳಿಗೆ ಅನ್ಯಾಯವಾಗುತ್ತದೆ. ಆದರೆ ಇದನ್ನು ಬಿಟ್ಟರೆ ಸದ್ಯದ ಪರಿಸ್ಥಿತಿಯಲ್ಲಿ ಬೇರೇನು ದಾರಿಗಳಿತ್ತು? ನನಗೂ ತಿಳಿಯುತ್ತಿಲ್ಲ. ಅಷ್ಟೇ ಅಲ್ಲ ಯಾರಿಗೂ ತಿಳಿಯುತ್ತಿಲ್ಲ. ಬಿಟ್ಟುಕೊಡುವ ಗುಣವಿಲ್ಲದಿದ್ದರೆ, ರಾಜಕೀಯ ವೋಟ್ ಬ್ಯಾಕ್ ಆಟದಲ್ಲಿ ಇದು ಸಾಮಾನ್ಯವೇ ಅಲ್ಲವೇ?

ಕೊನೆಯದಾಗಿ, ಅಲೆಮಾರಿಗಳಿಗೆ ಪ್ರತ್ಯೇಕವಾಗಿಯೇ ಮೀಸಲಾತಿ ಕಲ್ಪಿಸಬಹುದಿತ್ತು.

ಇದನ್ನೂ ಓದಿ: ದಾವಣಗೆರೆ ಉಪ ಚುನಾವಣೆ ಅಡ್ಡ ಪರಿಣಾಮ: ಮುಸ್ಲಿಮ್ ಮುಖಂಡರ ಮೇಲೆ ಖರ್ಗೆ-ಡಿಕೆಶಿ ಶಿಸ್ತು ಪ್ರಹಾರ ಕಾಂಗ್ರೆಸ್‌ನ ಆತ್ಮಹತ್ಯಾತ್ಮಕ ರಾಜಕಾರಣ!!