ಇಸ್ರೇಲ್ ಬಾಂಬ್ ದಾಳಿಯಿಂದ ಧ್ವಂಸಗೊಂಡಿದ್ದ ಮನೆಗಳ ಅವಶೇಷಗಳ ಅಡಿಯಲ್ಲಿ ಇತ್ತೀಚೆಗೆ ಪತ್ತೆಯಾದ ಗಾಝಾದ ಹಸಾಯ್ನ ಮತ್ತು ಅಬು ಶರಿಯಾ ಕುಟುಂಬಗಳ 112 ಸದಸ್ಯರ ಮೃತದೇಹಗಳ ಅಂತ್ಯ ಸಂಸ್ಕಾರ ಮಂಗಳವಾರ (ಆ.4) ನಡೆಯಿತು. ಸಾವಿರಾರು ಸಂಖ್ಯೆಯಲ್ಲಿ ಪ್ಯಾಲೆಸ್ತೀನಿಯರು ಪಾಲ್ಗೊಂಡು ಕಣ್ಣೀರ ವಿದಾಯ ಹೇಳಿದರು.
ಮಕ್ಕಳು, ಮಹಿಳೆಯರು, ಪುರುಷರು ಮತ್ತು ವಯೋವೃದ್ಧರು ಸೇರಿದಂತೆ ಮೃತಪಟ್ಟವರ ದೇಹಗಳನ್ನು ಪ್ಯಾಲೆಸ್ತೀನ್ ಧ್ವಜಗಳಿಂದ ಸುತ್ತಲಾಗಿತ್ತು. ಗಾಝಾ ನಗರದ ಅಲ್-ಸಬ್ರಾ ಪ್ರದೇಶದಲ್ಲಿ ಧ್ವಂಸಗೊಂಡಿದ್ದ ಎರಡು ಕುಟುಂಬದ ಮನೆಗಳು ಮತ್ತು ಸುತ್ತಮುತ್ತಲಿನ ಕಟ್ಟಡಗಳ ಅವಶೇಷಗಳ ಮಧ್ಯೆ ಈ ದೇಹಗಳನ್ನು ಸಾಲಾಗಿ ಇಡಲಾಗಿತ್ತು. ಆ ಬಳಿಕ ಅಂತಿಮಯಾತ್ರೆಯು ಮಧ್ಯ ಗಾಝಾದ ಶೇಖ್ ಶಾಬಾನ್ ಸ್ಮಶಾನದತ್ತ ಸಾಗಿತು ಎಂದು ವರದಿಗಳು ವಿವರಿಸಿವೆ.
ಅಂತಿಮ ಸಂಸ್ಕಾರದ ವೇಳೆ ತೀವ್ರ ದುಃಖದ ದೃಶ್ಯಗಳು ಕಂಡುಬಂದವು. ಮಕ್ಕಳು ಶವದ ಬಟ್ಟೆಗಳ ಮೇಲೆ ಹೂವುಗಳನ್ನು ಇಡುತ್ತಿದ್ದರು. ಸಂಬಂಧಿಕರು ತಮ್ಮ ಪ್ರೀತಿಪಾತ್ರರಿಗೆ ವಿದಾಯ ಹೇಳುತ್ತಾ ಕಣ್ಣೀರು ಹಾಕುತ್ತಿದ್ದರು ಎಂದು ವರದಿಯೊಂದು ಉಲ್ಲೇಖಿಸಿದೆ.
ಅಂತ್ಯ ಸಂಸ್ಕಾರದ ನಂತರ ಮಾತನಾಡಿದ ಯೂಸೆಫ್ ಅಬು ಶರಿಯಾ ಅವರು, ಜನಾಂಗೀಯ ಹತ್ಯೆ ಪ್ರಾರಂಭವಾದಾಗಿನಿಂದ ಇಸ್ರೇಲಿ ಪಡೆಗಳಿಂದ ಈ ಎರಡು ಕುಟುಂಬಗಳ 308 ಸದಸ್ಯರು ಕೊಲ್ಲಲ್ಪಟ್ಟಿದ್ದಾರೆ ಎಂದು ತಿಳಿಸಿದ್ದಾಗಿ ಪ್ಯಾಲೆಸ್ತೀನಿಯನ್ ಸುದ್ದಿ ಸಂಸ್ಥೆ ‘ವಫಾ’ ವರದಿ ಮಾಡಿದೆ.
ಕಂದಮ್ಮಗಳು, ತಾಯಂದಿರು, ತಂದೆಯಂದಿರು, ಯುವಕರು, ವಯೋವೃದ್ಧ ಸಂಬಂಧಿಕರು ಸೇರಿದಂತೆ ಮಂಗಳವಾರ ಹೂಳಲಾದವರ ವಿವರಗಳನ್ನು ಸುದ್ದಿ ಸಂಸ್ಥೆಗೆ ತಿಳಿಸುತ್ತಾ, “ಇಸ್ರೇಲಿ ಕ್ಷಿಪಣಿಗಳು ಯಾರನ್ನೂ ಬಿಟ್ಟಿಲ್ಲ” ಎಂದು ಯೂಸೆಫ್ ಶರಿಯಾ ಕಣ್ಣೀರು ಹಾಕಿದ್ದಾರೆ.
ಕುಟುಂಬವನ್ನು ಪ್ರತಿನಿಧಿಸಿ ಮಾತನಾಡಿದ ಡಾ. ಜಾದು ಅಬು ಶರಿಯಾ ಅವರು, ಈ ಅಂತಿಮ ಸಂಸ್ಕಾರವನ್ನು “ಸಮಕಾಲೀನ ಪ್ಯಾಲೆಸ್ತೀನ್ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಅಂತ್ಯಕ್ರಿಯೆ” ಎಂದು ಹೇಳಿದ್ದಾರೆ.
ಕುಟುಂಬದ ಹಿರಿಯರಾದ ಅಲಿ ಅಬು ಶರಿಯಾ ಅವರು ಸುದ್ದಿ ಸಂಸ್ಥೆಗೆ ಮಾಹಿತಿ ನೀಡುತ್ತಾ, ಮೃತಪಟ್ಟ 112 ಜನರಲ್ಲಿ 44 ಮಕ್ಕಳು, 37 ಮಹಿಳೆಯರು, 23 ವಯೋವೃದ್ಧರು ಮತ್ತು ಏಳು ಮಂದಿ ವಿಕಲಚೇತನರು ಸೇರಿದ್ದಾರೆ ಎಂದು ತಿಳಿಸಿದ್ದಾರೆ.
