ತನ್ನ ಹುಟ್ಟುಹಬ್ಬದ ಸಂತೋಷಕೂಟಕ್ಕೆ 150 ಅತಿಥಿಗಳನ್ನು ಆಹ್ವಾನಿಸಿದ್ದ ತೆಲಂಗಾಣದ ಆಭರಣ ವ್ಯಾಪಾರಿ ಕೋವಿಡ್-19 ರಿಂದ ಸಾವನ್ನಪ್ಪಿದ್ದಾರೆ. ಆ ಹುಟ್ಟುಹಬ್ಬದ ಸಂತೋಷಕೂಟದಲ್ಲಿ ಹಾಜರಿದ್ದ ತೆಲಂಗಾಣದ ರಾಜಕಾರಣಿ ಸೇರಿದಂತೆ 12 ಜನರಿಗೆ ಕೊರೊನಾ ಸೋಂಕು ತಗುಲಿರುವುದು ದೃಢಪಟ್ಟಿದೆ.
ಎರಡು ವಾರಗಳ ಹಿಂದೆ 150 ಜನರಿಗೆ ಹುಟ್ಟುಹಬ್ಬದ ಸಂತೋಷಕೂಟವನ್ನು ಆಯೋಜಿಸಿದ್ದ ಹೈದರಾಬಾದ್‌ನ 63 ವರ್ಷದ ಆಭರಣ ವ್ಯಾಪಾರಿ ಈ ವಾರದ ಆರಂಭದಲ್ಲಿ ಕೋವಿಡ್ -19 ನಿಂದ ನಿಧನರಾದರು. ಈ ಕಾರ್ಯಕ್ರಮಕ್ಕೆ ಹಾಜರಾಗಿದ್ದ ಮತ್ತೊಬ್ಬ ಆಭರಣ ವ್ಯಾಪಾರಿ ಕೂಡ ಕೋವಿಡ್ -19 ಕಾರಣ ಶನಿವಾರ ಸಾವನ್ನಪ್ಪಿದ್ದಾರೆ. ಎರಡೂ ಸಾವುಗಳು ಐದು ದಿನಗಳ ಅವಧಿಯಲ್ಲಿ ಸಂಭವಿಸಿವೆ.
ಹುಟ್ಟುಹಬ್ಬದ ಸಂತೋಷಕೂಟದಲ್ಲಿ ಹಾಜರಿದ್ದ ತೆಲಂಗಾಣ ರಾಜಕಾರಣಿ ಸೇರಿದಂತೆ 12 ಜನರು ಧನಾತ್ಮಕ ಪರೀಕ್ಷೆ ಮಾಡಿದ್ದಾರೆ. ಈ ಬೆಳವಣಿಗೆಯ ಬಗ್ಗೆ ತಿಳಿದಿರುವ ರಾಜ್ಯ ಆರೋಗ್ಯ ಇಲಾಖೆಯ ಅಧಿಕಾರಿಯೊಬ್ಬರು, ಸೋಂಕಿತರು ನಗರದ ಹಲವಾರು ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.
ಆಗಾಗ್ಗೆ ಪಾರ್ಟಿಗಳನ್ನು ಆಯೋಜಿಸುವುದರಲ್ಲಿ ಹೆಸರುವಾಸಿಯಾದ ಹಿಮಾಯತ್ ನಗರದ ಆಭರಣ ವ್ಯಾಪಾರಿಯು ತನ್ನ ಸ್ನೇಹಿತರು ಮತ್ತು ಸಂಬಂಧಿಕರಿಗಾಗಿ ಹೈದರಾಬಾದ್‌ನಲ್ಲಿ ಹುಟ್ಟುಹಬ್ಬದ ಸಂತೋಷಕೂಟವನ್ನು ಆಯೋಜಿಸಿದ್ದರು. ಹಲವಾರು ಪ್ರಮುಖ ಆಭರಣ ಅಂಗಡಿ ಮಾಲಿಕರು, ಚಿನ್ನದ ವ್ಯಾಪಾರಿಗಳು ಮತ್ತು ರಾಜಕೀಯ ಮುಖಂಡರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು ಎನ್ನಲಾಗಿದೆ.
ಪಾರ್ಟಿಯ ನಡೆದ ಮೂರು ದಿನಗಳ ನಂತರ, ಆ ಆಭರಣ ವ್ಯಾಪಾರಿಗೆ ಕೋವಿಡ್ -19 ರ ಲಕ್ಷಣಗಳು ಕಾಣಿಸಿಕೊಂಡಿದ್ದವು ಮತ್ತು ತಕ್ಷಣವೇ ನಗರದ ಕಾರ್ಪೊರೇಟ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಮೂರು ದಿನಗಳ ನಂತರ ಅವರು ಸಾವನಪ್ಪಿದ್ದಾರೆ.
ಪಾರ್ಟಿಯಲ್ಲಿ ಭಾಗವಹಿಸಿದ್ದ ನಗರದ ಇನ್ನೊಬ್ಬ ಪ್ರಮುಖ ಆಭರಣ ವ್ಯಾಪಾರಿ ಮತ್ತು ತೆಲಂಗಾಣ ಜ್ಯುವೆಲ್ಲರ್ಸ್ ಅಸೋಸಿಯೇಶನ್‌ನ ಸದಸ್ಯರೊಬ್ಬರಿಗೆ ಕೋವಿಡ್ -19 ರೋಗಲಕ್ಷಣಗಳು ಕಾಣಿಸಿಕೊಂಡ ನಂತರ ಕಾರ್ಪೊರೇಟ್ ಆಸ್ಪತ್ರೆಗೆ ದಾಖಲಿಸಲಾಯಿತು. ಅವರು ಶುಕ್ರವಾರ ನಿಧನರಾದರು. ಪಾರ್ಟಿಗೆ ಹಾಜರಾಗಿದ್ದ ಪ್ರಮುಖ ತೆಲಂಗಾಣ ರಾಷ್ಟ್ರ ಸಮಿತಿ (ಟಿಆರ್‌ಎಸ್) ಮುಖಂಡರು ಸಹ ಕೋವಿಡ್ -19 ಪಾಸಿಟಿವ್ ಆಗಿದ್ದಾರೆ ಎಂದು ತಿಳಿದುಬಂದಿದೆ.
ಹುಟ್ಟುಹಬ್ಬದ ಪಾರ್ಟಿಯಲ್ಲಿ ಹಾಜರಾದವರಲ್ಲಿ ಹಲವಾರು ಉನ್ನತ ಉದ್ಯಮಿಗಳು ಮತ್ತು ರಾಜಕಾರಣಿಗಳು ಸೇರಿದ್ದರಿಂದ, ಈ ಘಟನೆಯನ್ನು ಮುಚ್ಚಿಡಲಾಗಿತ್ತು. ಆದರೆ 12 ಜನರಿಗೆ ಪಾಸಿಟಿವ್ ವರದಿ ಬಂದ ನಂತರ ಬಹಿರಂಗವಾಯಿತು ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ.
