ವಿದೇಶಿ ವಿನಿಮಯ ನಿರ್ವಹಣಾ ಕಾಯ್ದೆ (ಎಫ್‌ಇಎಂಎ-ಫೆಮಾ) ಉಲ್ಲಂಘನೆಗೆ ಸಂಬಂಧಿಸಿದಂತೆ ನ್ಯೂಸ್ಕ್ಲಿಕ್ ಸುದ್ದಿ ಜಾಲತಾಣ ಮತ್ತು ಅದರ ಪ್ರಧಾನ ಸಂಪಾದಕ ಪ್ರಬೀರ್ ಪುರಕಾಯಸ್ಥ ಅವರಿಗೆ ಜಾರಿ ನಿರ್ದೇಶನಾಲಯ (ಇಡಿ) 184 ಕೋಟಿ ರೂಪಾಯಿ ದಂಡ ವಿಧಿಸಿದೆ ಎಂದು ಸೋಮವಾರ (ಫೆ.16) ವರದಿಯಾಗಿದೆ.
ನ್ಯೂಸ್ಕ್ಲಿಕ್ ಮಾಲೀಕತ್ವದ ‘ಪಿಪಿಕೆ ನ್ಯೂಸ್ಕ್ಲಿಕ್ ಸ್ಟುಡಿಯೋ ಪ್ರೈವೇಟ್ ಲಿಮಿಟೆಡ್’ ಸಂಸ್ಥೆಗೆ 120 ಕೋಟಿ ರೂಪಾಯಿ ಹಾಗೂ ಪುರಕಾಯಸ್ಥ ಅವರಿಗೆ ವೈಯಕ್ತಿಕವಾಗಿ 64 ಕೋಟಿ ರೂಪಾಯಿ ದಂಡ ವಿಧಿಸಲಾಗಿದೆ.
ವಿದೇಶಿ ನೇರ ಹೂಡಿಕೆ (ಎಫ್‌ಡಿಐ) ನಿಧಿಯ ದುರುಪಯೋಗ ಮತ್ತು ರಫ್ತು ಸೇವೆಗಳ ತಪ್ಪು ಘೋಷಣೆಯ ಆರೋಪದ ಮೇಲೆ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ವರದಿಗಳು ಹೇಳಿವೆ.
ನ್ಯೂಸ್ ಕ್ಲಿಕ್ 2018-19ರ ಹಣಕಾಸು ವರ್ಷದಲ್ಲಿ ಸುಮಾರು 9.59 ಕೋಟಿ ರೂಪಾಯಿ ಎಫ್‌ಡಿಐ ಹಣವನ್ನು ತನ್ನ ವ್ಯವಹಾರದ ಸ್ವರೂಪದ ಬಗ್ಗೆ ತಪ್ಪು ಮಾಹಿತಿ ನೀಡಿ ಪಡೆದಿದೆ ಎಂದು ಇಡಿ ಆರೋಪಿಸಿದೆ. 2018-19 ರಿಂದ 2023-24ರ ಅವಧಿಯಲ್ಲಿ ಸೇವೆಗಳ ರಫ್ತಿಗಾಗಿ ಬಂದ 82.63 ಕೋಟಿ ರೂಪಾಯಿ ವಿದೇಶಿ ಹಣದ ವರ್ಗಾವಣೆಯಲ್ಲಿ ಫೆಮಾ ನಿಯಮಗಳನ್ನು ಉಲ್ಲಂಘಿಸಲಾಗಿದೆ ಎಂದು ಹೇಳಿದೆ.
ಹಣ ಅಕ್ರಮ ವರ್ಗಾವಣೆ ಆರೋಪದ ಮೇಲೆ ಇಡಿ ಮೊದಲ ಬಾರಿಗೆ ಸೆಪ್ಟೆಂಬರ್ 2021ರಲ್ಲಿ ರಾಷ್ಟ್ರ ರಾಜಧಾನಿ ದೆಹಲಿಯ ಸೈದುಲಾಜಾಬ್ ಪ್ರದೇಶದಲ್ಲಿರುವ ನ್ಯೂಸ್ಕ್ಲಿಕ್ ಕಚೇರಿಯ ಮೇಲೆ ದಾಳಿ ನಡೆಸಿತ್ತು. ಈ ದಾಳಿಯು ಸಂಸ್ಥೆಯ ವಿರುದ್ಧದ ತನಿಖೆಯ ಆರಂಭಿಕ ಹಂತವಾಗಿತ್ತು.
ವಿದೇಶಿ ಹೂಡಿಕೆಯಲ್ಲಿನ ಅಕ್ರಮ ಮತ್ತು ಚೀನಾ ಪರ ಪ್ರಚಾರಕ್ಕಾಗಿ ಹಣ ಪಡೆದಿದ್ದಾರೆ ಎಂಬ ಗಂಭೀರ ಆರೋಪಗಳನ್ನು ಮಾಡಿ ಈ ಕಾರ್ಯಾಚರಣೆ ನಡೆಸಲಾಗಿತ್ತು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪುರಕಾಯಸ್ಥ ಸೇರಿದಂತೆ ಸುಮಾರು 25ಕ್ಕೂ ಹೆಚ್ಚು ಜನರ ಹೇಳಿಕೆಗಳನ್ನು ಇಡಿ ದಾಖಲಿಸಿಕೊಂಡಿದೆ. ಇದೇ ತನಿಖೆಯ ಮುಂದುವರಿದ ಭಾಗವಾಗಿ, ಪ್ರಸ್ತುತ ಫೆಬ್ರವರಿ 16,2026 ರಂದು ನ್ಯೂಸ್ಕ್ಲಿಕ್ ಮತ್ತು ಅದರ ಸಂಪಾದಕರಿಗೆ 184 ಕೋಟಿ ರೂಪಾಯಿ ದಂಡ ವಿಧಿಸಲಾಗಿದೆ ಎಂದು ವರದಿಯಾಗಿದೆ.
2023ರಲ್ಲಿ ಬಿಜೆಪಿ ದಿ ನ್ಯೂಯಾರ್ಕ್ ಟೈಮ್ಸ್ ಪತ್ರಿಕೆಯ ವರದಿಯೊಂದನ್ನು ಉಲ್ಲೇಖಿಸಿ, ನ್ಯೂಸ್ಕ್ಲಿಕ್ ಪೋರ್ಟಲ್ ಮತ್ತು ಅದರ ಪ್ರವರ್ತಕರು ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ತೊಡಗಿದ್ದಾರೆ ಎಂದು ಆರೋಪಿಸಿತ್ತು.
ನ್ಯೂಸ್ಕ್ಲಿಕ್ ಜಾಗತಿಕ ಜಾಲದ ಭಾಗವಾಗಿದ್ದು, ಚೀನಾ ಸರ್ಕಾರದ ಮಾಧ್ಯಮಗಳೊಂದಿಗೆ ನಿಕಟ ಸಂಬಂಧ ಹೊಂದಿರುವ ಅಮೆರಿಕದ ಬಿಲಿಯನೇರ್ ನೆವಿಲ್ಲೆ ರಾಯ್ ಸಿಂಘಂ ಅವರಿಂದ ಹಣ ಪಡೆದು ಚೀನಾ ಪರ ಅಜೆಂಡಾವನ್ನು ಪ್ರಚಾರ ಮಾಡುತ್ತಿದೆ ಎಂದು ಬಿಜೆಪಿ ನಾಯಕರು ಆರೋಪ ಮಾಡಿದ್ದರು.
ಈ ವರದಿಯನ್ನು ಆಧರಿಸಿ ಕೇಂದ್ರ ಸಚಿವ ಅನಿರುದ್ಧ್ ಧರ್ ಮತ್ತು ನಿಶಿಕಾಂತ್ ದುಬೆ ಸಂಸತ್ತಿನಲ್ಲಿ ಈ ವಿಷಯವನ್ನು ಪ್ರಸ್ತಾಪಿಸಿ ತನಿಖೆಗೆ ಒತ್ತಾಯಿಸಿದ್ದರು. ಸೈದುಲಾಜಾಬ್ ಕಚೇರಿಯ ಮೇಲೆ ನಡೆದ ದಾಳಿ ಮತ್ತು ಪ್ರಸ್ತುತ ವಿಧಿಸಲಾಗಿರುವ 184 ಕೋಟಿ ರೂಪಾಯಿ ದಂಡವು ಈ ವಿದೇಶಿ ಹೂಡಿಕೆಯ ಅಕ್ರಮ ಆರೋಪಗಳ ತನಿಖೆಯ ಫಲಿತಾಂಶವಾಗಿದೆ.
ನ್ಯೂಸ್ಕ್ಲಿಕ್ ಮತ್ತು ಪುರಕಾಯಸ್ಥ ಅವರು ಈ ಎಲ್ಲಾ ಆರೋಪಗಳನ್ನು ಮೊದಲಿನಿಂದಲೂ ನಿರಾಕರಿಸುತ್ತಾ ಬಂದಿದ್ದಾರೆ. ತಾವು ಯಾವುದೇ ವಿದೇಶಿ ಸರ್ಕಾರದ ನಿರ್ದೇಶನದಂತೆ ಸುದ್ದಿ ಪ್ರಕಟಿಸಿಲ್ಲ ಮತ್ತು ಎಲ್ಲಾ ಹೂಡಿಕೆಗಳು ಕಾನೂನುಬದ್ಧವಾಗಿವೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
2009ರಲ್ಲಿ ಸ್ಥಾಪನೆಯಾದ ನ್ಯೂಸ್ ಕ್ಲಿಕ್ ಸುದ್ದಿ ಪೋರ್ಟಲ್ ತನ್ನ ವೆಬ್‌ಸೈಟ್‌ನಲ್ಲಿ, ತಾನು ಭಾರತ ಮತ್ತು ಅನ್ಯ ದೇಶಗಳ ಸುದ್ದಿಗಳ ಮೇಲೆ ಗಮನಹರಿಸುವ ಹಾಗೂ ಪ್ರಗತಿಪರ ಚಳುವಳಿಗಳಿಗೆ ಒತ್ತು ನೀಡುವ ಒಂದು ಸ್ವತಂತ್ರ ಮಾಧ್ಯಮ ಸಂಸ್ಥೆಯಾಗಿದೆ ಎಂದು ಹೇಳಿಕೊಂಡಿದೆ.
