Homeಮುಖಪುಟರಾಕೇಶ್ ಟಿಕಾಯತ್ (2013-21)ರನ್ನು ಅರ್ಥ ಮಾಡಿಕೊಳ್ಳುವುದು ಹೇಗೆ? ‘ಹರ್ ಹರ್ ಮಹಾದೇವ್, ಅಲ್ಲಾಹು ಅಕ್ಬರ್’ ಘೋಷಣೆ...

ರಾಕೇಶ್ ಟಿಕಾಯತ್ (2013-21)ರನ್ನು ಅರ್ಥ ಮಾಡಿಕೊಳ್ಳುವುದು ಹೇಗೆ? ‘ಹರ್ ಹರ್ ಮಹಾದೇವ್, ಅಲ್ಲಾಹು ಅಕ್ಬರ್’ ಘೋಷಣೆ ಹಿಂದಿರುಗಿದೆಯೇ?

'ಮುಜಫರ್ ನಗರ ಗಲಭೆಯಿಂದಾಗಿ 2013ರಲ್ಲಿ ಪಶ್ಚಿಮ ಯುಪಿಯಲ್ಲಿ ಬಿಜೆಪಿ ಬೆಳೆಯಿತು, ಈಗ ಅದರ ಕುಸಿತವು ಅದೇ ಮುಜಫರ್ ನಗರದಿಂದ ಪ್ರಾರಂಭವಾಗುತ್ತದೆಯೇ?

- Advertisement -
- Advertisement -

ಮೂಲ – Raiot.in

ನಕುಲ್ ಸಿಂಗ್ ಸಾಹ್ನಿ, 

ರಾಕೇಶ್ ಟಿಕಾಯತ್ ಸುತ್ತಮುತ್ತಲಿನ ಸಂಭ್ರಮದ ಬಗ್ಗೆ ಕಳೆದ ಕೆಲವು ದಿನಗಳಿಂದ ಜನರು ಆತಂಕ ಮತ್ತು ಕೋಪವನ್ನು ವ್ಯಕ್ತಪಡಿಸುತ್ತಿರುವ ಹಲವಾರು ಪೋಸ್ಟ್‌ಗಳನ್ನು ನಾನು ಓದಿದ್ದೇನೆ. ಈ ಕೋಪಕ್ಕೆ ಕಾರಣವೇನು? ಮುಜಫರ್‌ನಗರ ಮತ್ತು ಶಾಮ್ಲಿ ಜಿಲ್ಲೆಗಳಲ್ಲಿ 2013 ರಲ್ಲಿ ನಡೆದ ಕೋಮುವಾದಿ ಸಂಘರ್ಷದ ಹಿಂಸಾಚಾರದ ಸಂದರ್ಭದಲ್ಲಿ ಭಾರತೀಯ ಕಿಸಾನ್ ಯೂನಿಯನ್ (ಬಿಕೆಯು) ವಹಿಸಿದ ಬೇಜವಾಬ್ದಾರಿ ಪಾತ್ರ ನೆನೆಸಿಕೊಂಡರೆ, ಆ ಹುಚ್ಚು (ಅಥವಾ ಮತಾಂಧತೆ) ಪಶ್ಚಿಮ ಯುಪಿಯನ್ನು ಆವರಿಸಿಕೊಂಡು ಏಳೂವರೆ ವರ್ಷಗಳಾಗಿವೆ. ಈ ಕಾರಣಕ್ಕೆ ಬಿಕೆಯು ಹೋಳಾಗಿದ್ದನ್ನು ಮತ್ತು ಅನೇಕ ಹೊಸ ಬಣಗಳು ಹೊರಹೊಮ್ಮಿದನ್ನು ನಾವು ನೋಡಿದ್ದೇವೆ. ಗಮನಾರ್ಹವಾದ ವಿಭಜನೆಯೆಂದರೆ ಬಿಕೆಯುನ ಅತಿದೊಡ್ಡ ಮುಸ್ಲಿಂ ಮುಖಂಡ ಗುಲಾಮ್ ಮೊಹಮ್ಮದ್ ಜೌಲಾ ಬಿಕೆಯುನಿಂದ ಹೊರಗೆ ಹೋಗಿದ್ದು. ಜೌಲಾ ಅವರನ್ನು ‘ಬಾಬಾ’ ಟಿಕಾಯತ್ ಅವರ ಬಲಗೈ ಮನುಷ್ಯ ಎಂದು ಪರಿಗಣಿಸಲಾಗುತ್ತದೆ.

ಕುತೂಹಲಕಾರಿ ಸಂಗತಿಯೆಂದರೆ, ಒಮ್ಮೆ ಅಜಿತ್ ಸಿಂಗ್ ಮತ್ತು ಜಯಂತ್ ಚೌಧರಿ ಅವರು 2014ರಲ್ಲಿ ಚುನಾವಣೆಯಲ್ಲಿ ಸೋತಾಗ, ಈ ಪ್ರದೇಶದ ಅನೇಕ ಹಳೆಯ ಜಾಟ್‌ಗಳು ಕೋಪಗೊಂಡಿದ್ದರು. ಅವರಲ್ಲಿ ಹಲವರು ‘ಹಮ್ನೆ ಚೌಧರಿ ಸಾಬ್ ಕೊ ಕೈಸೆ ಹರಾ ದಿಯಾ’ (ನಾವು ಚೌಧರಿ ಸಾಬ್ ಅವರನ್ನು ಸೋಲಿಸಿಬಿಟ್ಟೆವಲ್ಲ?) ಎಂದು ಗಲಾಟೆ ಮಾಡಿದರು. ಅನೇಕ ಜಾಟ್‌ಗಳು (ವಿಶೇಷವಾಗಿ ಹಳೆಯ ತಲೆಮಾರಿನವರು) 2013ರ ಹಿಂಸಾಚಾರದಲ್ಲಿ ಪಾಲ್ಗೊಂಡಿದ್ದಕ್ಕಾಗಿ ತಮ್ಮ ಯುವ ಪೀಳಿಗೆಯೊಂದಿಗೆ ಯಾವಾಗಲೂ ಅಸಮಧಾನಗೊಂಡಿದ್ದರು. ರಹಸ್ಯವಾಗಿ, ಅವರು ಆಗಾಗ್ಗೆ ಹೇಳುತ್ತಿದ್ದರು, ‘ನಮ್ಮ ಯುವಕರು ತಾವು ಎಲ್ಲಿಗೆ ಹೋಗಿ ತಲುಪಿದ್ದೇವೆಂದು ಮತ್ತು ತಮ್ಮ ತಪ್ಪನ್ನು ತಿಳಿದುಕೊಳ್ಳಲು ಇನ್ನೂ ತಡವಾಗಿಲ್ಲ’ ಎಂದು.

ಇದರಿಂದ ಸಮುದಾಯದ ಹಿರಿಯರು ಹಿಂಸಾಚಾರದಲ್ಲಿ ಭಾಗಿಯಾಗಿಲ್ಲ ಎಂದು ಹೇಳಲು ಸಾಧ್ಯವಿಲ್ಲ. ಆದರೆ ಬಿಕೆಯು ಮತ್ತು ಆರ್‌ಎಲ್‌ಡಿಯ ಉತ್ತುಂಗ ದಿನಗಳನ್ನು ನೊಡಿದವರಿಗೆ ಆ ಹುಚ್ಚುತನದ ನಿರರ್ಥಕತೆ ಅರ್ಥವಾಗುತ್ತದೆ. ಈ ಪ್ರದೇಶದ ಮುಸ್ಲಿಮರು, ತಮ್ಮ ಅಸ್ತಿತ್ವದ ಬೇರ್ಪಡಿಸಲಾಗದ ಭಾಗವೆಂದು ಅವರು ಅರ್ಥಮಾಡಿಕೊಂಡಿದ್ದರು. (ಅದರೊಳಗೆ ಈ ಪ್ರದೇಶದಲ್ಲಿ ಮುಸ್ಲಿಮರಲ್ಲಿ ಜಾತಿಯ ವಿರೋಧಾಭಾಸಗಳಿವೆ. ಆದರೆ ಅದು ಚರ್ಚೆಯ ಮತ್ತೊಂದು ವಿಷಯವಾಗಿದೆ).

ವಿಪಿನ್ ಸಿಂಗ್ ಬಲಿಯಾನ್ ಅವರಂತಹ ಕೆಲವು ಸ್ಥಳೀಯ ಮಟ್ಟದ ಜಾಟ್ ನಾಯಕರು ಹಿಂದೂ-ಮುಸ್ಲಿಂ ಬಿರುಕನ್ನು ಕಡಿಮೆ ಮಾಡಲು ಯತ್ನಿಸಿದ್ದಾರೆ. ಅಂತಹ ಪ್ರಯತ್ನಗಳು ಶ್ಲಾಘನೀಯವಾದರೂ, ದ್ವೇಷ ಮತ್ತು ಕಹಿ ಸಾಗರವಾಗಿ ಮಾರ್ಪಟ್ಟ ಪಶ್ಚಿಮ ಯುಪಿಯಲ್ಲಿ ಆ ಪ್ರಯತ್ನ ಒಂದು ಸಣ್ಣ ಹನಿ ಮಾತ್ರ.

ಗಲಭೆಯ ಸುಮಾರು ಐದು ವರ್ಷಗಳ ನಂತರ, ಠಾಕೂರ್ ಪುರಾನ್ ಸಿಂಗ್, ಗುಲಾಮ್ ಮೊಹಮ್ಮದ್ ಜೌಲಾ ಮುಂತಾದವರ ನೇತೃತ್ವದಲ್ಲಿ ಜಂಟಿ ಹಿಂದೂ-ಮುಸ್ಲಿಂ ಕಿಸಾನ್ ಪಂಚಾಯಿತಿಗಳು ನಡೆದವು.

ಅಂತಿಮವಾಗಿ, 2019 ರ ಚುನಾವಣೆಗೆ ಸ್ವಲ್ಪ ಮುಂಚಿತವಾಗಿ ರಾಕೇಶ್ ಟಿಕಾಯತ್ ನೇತೃತ್ವದ ಬೃಹತ್ ರ‍್ಯಾಲಿಯು 10 ಬೇಡಿಕೆಗಳನ್ನು ಮುಂದಿಟ್ಟುಕೊಂಡು ದೆಹಲಿಗೆ ಬಂದಿತು. ಆ ರ‍್ಯಾಲಿಯಲ್ಲಿ ಹಿಂದೂ ಮತ್ತು ಮುಸ್ಲಿಂ ರೈತರು ಭಾಗವಹಿಸಿದ್ದರು. ಅನೇಕ ಇತರ ಒಕ್ಕೂಟಗಳು ಚಳವಳಿಗೆ ಬೆಂಬಲವನ್ನು ನೀಡಿದ್ದವು. ದೆಹಲಿ ಮತ್ತೆ ಮುತ್ತಿಗೆಗೆ ಒಳಗಾಗಿತ್ತು. ಎಲ್ಲಾ ಬೇಡಿಕೆಗಳನ್ನು ಈಡೇರಿಸದಿದ್ದರೂ ಸಹ, ರ‍್ಯಾಲಿಯನ್ನು ಸ್ಥಗಿತಗೊಳಿಸಲಾಗಿತು. ಹಲವರು ಅಸಮಾಧಾನಗೊಂಡರು. ಅವರನ್ನು (ಟಿಕಾಯತ್) ಬಿಜೆಪಿ ಖರೀದಿಸಿದೆ ಎಂದು ಹಲವರು ಭಾವಿಸಿದರು.

2019ರ ನಂತರ ಮುಜಫರ್‌ನಗರ ಮತ್ತು ಶಾಮ್ಲಿ ಜಿಲ್ಲೆಗಳಲ್ಲಿ ಬಿಕೆಯು ನೇತೃತ್ವದಲ್ಲಿ ಅನೇಕ ಪ್ರತಿಭಟನೆಗಳು ನಡೆದವು. ಪ್ರತಿಭಟನಾ ಪ್ರದರ್ಶನಗಳಲ್ಲಿ ಅನೇಕ ಮುಸ್ಲಿಂ ರೈತರು ಇದ್ದುದು ಕುತೂಹಲಕಾರಿಯಾಗಿದೆ. ಅವರಲ್ಲಿ ಅನೇಕರು ಬಿಕೆಯುನ ವಿವಿಧ ಸಂಘಟನಾ ಸ್ಥಾನಗಳಲ್ಲಿದ್ದರು. ರಾಕೇಶ್ ಟಿಕಾಯತ್ ಬಿಕೆಯುಅನ್ನು ಪುನಶ್ಚೇತನಗೊಳಿಸಲು ಶ್ರಮಿಸುತ್ತಿದ್ದಾರೆ ಎಂಬುದು ಸ್ಪಷ್ಟವಾಗಿದೆ. ಆ ಕಾರಣಕ್ಕೆ ನರೇಶ್ ಟಿಕಾಯತ್ ಅವರನ್ನು ಪಕ್ಕಕ್ಕೆ ಸರಿಸಲಾಗಿದೆ.

2013ರ ಮಹಾಪಂಚಾಯತ್‌ನಲ್ಲಿ ಬಿಜೆಪಿ ಬಿಕೆಯುನಿಂದ ವೇದಿಕೆಯನ್ನು ಸಂಪೂರ್ಣವಾಗಿ ಹೈಜಾಕ್ ಮಾಡಿತ್ತು ಮತ್ತು ಬಿಜೆಪಿ ನಾಯಕರೊಂದಿಗೆ ವೇದಿಕೆಯಲ್ಲಿ ಕಾಣಿಸಿಕೊಂಡವರು ನರೇಶ್ ಟಿಕಾಯತ್. 2013ರ ಹಿಂಸಾಚಾರದ ನಂತರವೂ ಅವರು (ನರೇಶ್) ಪ್ರಚೋದನಾತ್ಮಕ ಹೇಳಿಕೆಗಳನ್ನು ನೀಡುತ್ತಲೇ ಇದ್ದರು.

ಕಳೆದ 2-3 ವರ್ಷಗಳಲ್ಲಿ, ರಾಕೇಶ್ ಅವರು ಬಿಕೆಯು ಆಡಳಿತವನ್ನು ವಹಿಸಿಕೊಂಡಿದ್ದಾರೆ. ಕೋಮುವಾದಿ ರಾಜಕಾರಣದೊಂದಿಗಿನ ಸಹವಾಸದ ಕಾರಣಕ್ಕೆ ನರೇಶ್ ಅವರನ್ನು ಕಡೆಗಣಿಸಿದ್ದಾರೆ. ಇದು ಇಬ್ಬರು ಸಹೋದರರ ನಡುವಿನ ಸೈದ್ಧಾಂತಿಕ ಘರ್ಷಣೆಯೋ ಅಥವಾ ಯುದ್ಧತಂತ್ರ ನಡೆದಿದೆಯೋ ಎಂಬುದು ಅವರಿಬ್ಬರಿಗೆ ಮಾತ್ರ ತಿಳಿದಿದೆ.

ಅಂತಿಮವಾಗಿ, ಕೃಷಿ ಕಾಯ್ದೆ ವಿರೋಧಿ ಪ್ರತಿಭಟನಾಕಾರರು ದೆಹಲಿಯ ಗಡಿಯನ್ನು ತಲುಪಿದ ನಂತರ, ಪ್ರತಿಯೊಬ್ಬರೂ ಗಾಜಿಪುರ ಗಡಿಯತ್ತ ಧಾವಿಸುವ ಹುಮ್ಮಸ್ಸಿನಲ್ಲಿದ್ದರು. ಆರಂಭದಲ್ಲಿ ಅದೇ ತೀವ್ರತೆ ಮತ್ತು ಉತ್ಸಾಹದಿಂದ ಪಶ್ಚಿಮ ಯುಪಿ ಏಕೆ ಪ್ರತಿಭಟನೆಯಲ್ಲಿ ಸೇರಲಿಲ್ಲ? ನಿಜ ಹೇಳಬೇಕೆಂದರೆ, ಅನೇಕ ರೈತರು ಆಂದೋಲನಕ್ಕೆ ಸೇರಲು ಬಹಳ ಉತ್ಸುಕರಾಗಿದ್ದರು. ಆದರೆ, ರಾಕೇಶ್ ಟಿಕಾಯತ್ ಬಗ್ಗೆ ಅವರಿಗೆ ನಂಬಿಕೆಯ ಕೊರತೆಯಿತ್ತು. ರಾಕೇಶ್ ಬಿಜೆಪಿ ಏಜೆಂಟ್‌ರಾಗಿದ್ದು, ಯಾವ ಕ್ಷಣದಲ್ಲಿಯಾದರೂ ಅವರು ಯಾವ ಕಡೆಗಾದರೂ ತಿರುಗಬಹುದೆಂಬ ಸಂಶಯ ಬಹಳಷ್ಟು ರೈತರಿಗೆ ಇತ್ತು.

ಆದರೆ, ಗಾಜಿಪುರ ಗಡಿಯಲ್ಲಿ ಜನೆವರಿ 27ನೇ ರಾತ್ರಿ ನಡೆದ ಘಟನೆಗಳು ಆ ಗ್ರಹಿಕೆಯನ್ನು ಬದಲಿಸಿದೆ. ಪ್ರತಿಭಟನಾ ನಿರತ ರೈತರನ್ನು ಗಾಜಿಪುರ ಗಡಿಯಿಂದ ತೆಗೆದುಹಾಕಲು ದೊಡ್ಡ ಪೊಲೀಸ್ ಪಡೆ ಹೊರಟಿತು. ರಾಕೇಶ್ ಟಿಕಾಯತ್ ಕಣ್ಣೀರಾಕುತ್ತಾ ನೀಡಿದ ವೀಡಿಯೊ ಸಂದೇಶದಲ್ಲಿ ಮಾಡಿದ ಭಾವನಾತ್ಮಕ ಮನವಿಯು ಪಶ್ಚಿಮ ಯುಪಿ ರೈತರನ್ನು ಪ್ರಚೋದಿಸಿದೆ. ಟಿಕಾಯತ್ ಅಂದು ಪ್ರಮುಖವಾಗಿ, ಬಿಜೆಪಿಯನ್ನು ಹಿಂದೊಮ್ಮೆ ಬೆಂಬಲಿಸಿದ ತಪ್ಪನ್ನು ಒಪ್ಪಿಕೊಂಡಿದ್ದು, ಅದಕ್ಕಾಗಿ ಯಾವಾಗಲೂ ವಿಷಾದಿಸುತ್ತೇವೆ ಎಂದು ಹೇಳಿದರು. ಆ ರಾತ್ರಿಯೇ ಸಾವಿರಾರು ಜನರು ಮುಜಫರ್‌ನಗರ ಜಿಲ್ಲೆಯ ಸಿಸೌಲಿ ಗ್ರಾಮದಲ್ಲಿರುವ ಟಿಕಾಯತ್ ಮನೆಯ ಹೊರಗೆ ಜಮಾಯಿಸಿದರು. ಎರಡು ದಿನಗಳ ನಂತರ, ಜನವರಿ 29, 2021ರಂದು ಸಿಸೌಲಿ ಗ್ರಾಮದಲ್ಲಿ ಐತಿಹಾಸಿಕ ಮಹಾಪಂಚಾಯತ್ ನಡೆಯಿತು. ಆ ಪಂಚಾಯತ್‌ನಲ್ಲಿ ಹಲವಾರು ಸಾವಿರ ಜನರು ಭಾಗವಹಿಸಿದ್ದರು.

ಪಂಚಾಯತ್‌ನಲ್ಲಿ ಪ್ರಮುಖ ಭಾಷಣಕಾರರಲ್ಲಿ ಗುಲಾಮ್ ಮೊಹಮ್ಮದ್ ಜೌಲಾ ಕೂಡ ಒಬ್ಬರು. ಜೌಲಾ ಯಾವುದನ್ನೂ ನುಂಗಿಕೊಳ್ಳದೆ ಎರಡು ಮುಖ್ಯ ಮಾತುಗಳನ್ನು ಹೇಳಿದರು: ‘ನೀವು ಇಲ್ಲಿಯವರೆಗೆ ಮಾಡಿದ ಎರಡು ದೊಡ್ಡ ತಪ್ಪುಗಳು: ‘ಒಂದು, ನೀವು ಅಜಿತ್ ಸಿಂಗ್ ಅವರನ್ನು ಸೋಲಿಸಿದ್ದೀರಿ, ಮತ್ತು ಎರಡನೇದು, ನೀವು ಮುಸ್ಲಿಮರನ್ನು ಕೊಂದಿದ್ದೀರಿ’.

ಕುತೂಹಲಕರವೆಂದರೆ, ಅಲ್ಲಿ ಜೌಲಾ ಮಾತಿಗೆ ಯಾರೂ ಆಕ್ಷೇಪ ಮಾಡಲಿಲ್ಲ, ತಡೆ ಒಡ್ಡಲಿಲ್ಲ. ಬದಲಿಗೆ ಅಲ್ಲಿ ಅಗಾಧ ಮೌನವಿತ್ತು, ಅಲ್ಲಿ ಆತ್ಮಾವಲೋಕನ ಶುರುವಾಗಿತ್ತು.

ಇತರ ಭಾಷಣಕಾರರು ‘ನಾವು ಇನ್ನೆಂದೂ ಬಿಜೆಪಿಯಿಂದ ಮೋಸ ಹೋಗಲಾರೆವು’ ಎಂದು ಹೇಳಿದರು. ಐತಿಹಾಸಿಕ ಪಂಚಾಯತ್‌ನಲ್ಲಿ ಬಿಜೆಪಿಯನ್ನು ಬಹಿಷ್ಕರಿಸಲು ಬಹಳ ಅಪರೂಪದ ಮತ್ತು ಹಿಂದೆಂದೂ ಕೇಳರಿಯದ ನಿರ್ಧಾರ ತೆಗೆದುಕೊಳ್ಳಲಾಯಿತು. ಮಹಾಪಂಚಾಯತ್‌ಗಳು ರಾಜಕೀಯ ಪಕ್ಷವನ್ನು ಸಾರ್ವಜನಿಕವಾಗಿ ನಿರಾಕರಿಸುವುದು ಅಪರೂಪ ಎಂಬುದನ್ನು ಇಲ್ಲಿ ಗಮನಿಸಿ.

ಇಂದಿಗೂ ಸಹ ಗಾಜಿಪುರ ಗಡಿಯಲ್ಲಿ ರೈತರ ಬೆಂಬಲ ಹೆಚ್ಚಾಗುತ್ತಿರುವಾಗ, ಬಾಗಪತ್, ಮುಜಾಫರ್ ನಗರ, ಶಾಮ್ಲಿ, ಮೀರತ್ ಮುಂತಾದ ಜಿಲ್ಲೆಗಳಿಂದ, ಇದೇ ರೀತಿಯ ಅಭಿಪ್ರಾಯಗಳು ಪ್ರತಿಧ್ವನಿಸುತ್ತಿರುವುದನ್ನು ನೀವು ಕೇಳುತಿದ್ದೀರಿ. ‘2013 ಮಹಾನ್ ತಪ್ಪು’, ‘ಬಿಜೆಪಿ ನಮಗೆ ಮೋಸ ಮಾಡಿತು’, ‘2013 ರ ಪರಿಸ್ಥಿತಿಗೆ ಬಿಜೆಪಿ ಮತ್ತು ಎಸ್‌ಪಿ ಕಾರಣ’ – ಈ ಮಹತ್ವದ ರಾಜಕೀಯ ಪ್ರಜ್ಞೆ ಅಲ್ಲೀಗ ಮೊಳಕೆಯೊಡೆದಿದೆ. ಮುಖ್ಯವಾಗಿ, ‘ಮುಜಫರ್ ನಗರ ಗಲಭೆಯಿಂದಾಗಿ 2013ರಲ್ಲಿ ಪಶ್ಚಿಮ ಯುಪಿಯಲ್ಲಿ ಬಿಜೆಪಿ ಬೆಳೆಯಿತು, ಈಗ ಅದರ ಕುಸಿತವು ಅದೇ ಮುಜಫರ್ ನಗರದಿಂದ ಪ್ರಾರಂಭವಾಗುತ್ತದೆ’ ಎಂಬ ದಟ್ಟ ಜನಾಭಿಪ್ರಾಯ ರೂಪುಗೊಂಡಿದೆ. 1988ರಲ್ಲಿ ಬೋಟ್ ಕ್ಲಬ್ ಪ್ರತಿಭಟನೆ ಮೂಲಕ ಪ್ರತಿಧ್ವನಿಸಿದ ‘ಹರ್ ಹರ್ ಮಹಾದೇವ್, ಅಲ್ಲಾಹು ಅಕ್ಬರ್’ ಎಂಬ ಬಿಕೆಯುನ ಪ್ರಮುಖ ಘೋಷಣೆಗಳು ಶೀಘ್ರದಲ್ಲೇ ಹಿಂತಿರುಗಬಹುದು.

ಇದು ಹಿಂದಿನದನ್ನು ಸುಲಭವಾಗಿ ಅಳಿಸುತ್ತದೆಯೇ?

ಇದು 2013ರ ಗಾಯಗಳನ್ನು ಗುಣಪಡಿಸುತ್ತದೆಯೇ?

2013ರ ಮುಜಫರ್ ನಗರ ಗಲಭೆಯ ಕುರಿತು ಸಾಕ್ಷ್ಯಚಿತ್ರ ಮಾಡಿದ ಮತ್ತು ಆ ಗಲಭೆ ಉಂಟುಮಾಡಿದ ಆಘಾತ, ವಿನಾಶ ಮತ್ತು ಧ್ರುವೀಕರಣವನ್ನು ನೋಡಿದ ನನ್ನ ಬಳಿ ಇದಕ್ಕೆ ಉತ್ತರವಿಲ್ಲ. (https://www.netflix.com/title/81035103)

ಮೇಲಿನ ಪ್ರಶ್ನೆಗಳಿಗೆ ಉತ್ತರ, ‘ಇರಬಹುದು ಅಥವಾ ಪ್ರಾಯಶಃ ಇಲ್ಲ.’ 2013ರ ಗಲಭೆ ಕಾರಣದಿಂದ 60,000 ಜನರು, ಮುಖ್ಯವಾಗಿ ಮುಸ್ಲಿಮರು, ಸ್ಥಳಾಂತರಗೊಂಡರು ಮತ್ತು ಎಂದಿಗೂ ತಮ್ಮ ಸ್ವಂತ ಹಳ್ಳಿಗಳಿಗೆ ಅವರು ಹೋಗಲಾರರು. 2013ರಲ್ಲಿ ನಡೆದ ಹಿಂಸಾಚಾರಕ್ಕೆ ಕಾರಣರಾದ ಹಲವರು ಇಂದು ವಿಷಾದ ವ್ಯಕ್ತಪಡಿಸಿದರೆ ಅವರ ಅಪರಾಧಕ್ಕೆ ಕ್ಲೀನ್ ಚಿಟ್ ನೀಡಬೇಕೇ? ಇದು ನಿಜವಾದ ಪರಿಹಾರವೇ? ನನಗೆ ಗೊತ್ತಿಲ್ಲ.

ನನಗೆ ತಿಳಿದಿರುವ ಸಂಗತಿಯೆಂದರೆ, 2013ರ ಹಿಂಸಾಚಾರದಿಂದಾಗಿ ಪಶ್ಚಿಮ ಯುಪಿ ಅಪಾರ ನಷ್ಟವನ್ನು ಅನುಭವಿಸಿದೆ. ಭಿನ್ನ ನೆಲೆಗಳಲ್ಲಿನ, ಒಂದಕ್ಕೊಂದು ಬೆಸೆದಂತಹ ಘಟನೆಗಳ ಪರಿಣಾಮಗಳು ಗಂಭೀರವಾಗಿವೆ. ಅನೇಕರು ಈಗಲೂ ಬಳಲುತ್ತಿದ್ದಾರೆ. 2013ರ ಆ ಕರಾಳ ವಿದ್ಯಮಾನ ಸಂಭವಿಸದೆ ಇದ್ದರೆ, ಇವತ್ತು ಯೋಗಿ ಸಿಎಂ ಆಗಿರುತ್ತಿರಲಿಲ್ಲ ಮತ್ತು ಬಹುಶಃ ಮೋದಿ ಪ್ರಧಾನ ಮಂತ್ರಿಯೂ ಆಗಿರುತ್ತಿರಲಿಲ್ಲ. ನನಗೆ ತಿಳಿದಿರುವ ಸಂಗತಿಯೆಂದರೆ, ಪಶ್ಚಿಮ ಯುಪಿಯಲ್ಲಿನ ಇತ್ತೀಚಿನ ಘಟನೆಗಳು, ಅಲ್ಲಿ ಸಮಸ್ಯೆಯಿರುವ ಪ್ರದೇಶಗಳನ್ನು ಗುಣಪಡಿಸುವ ಮತ್ತು ಅಲ್ಲಿ ಸ್ವಲ್ಪ ಶಾಂತಿಯನ್ನು ತರುವಲ್ಲಿ ಕೊಡುಗೆ ನೀಡಿದ್ದು, ಅವು ದೀರ್ಘಕಾಲೀನವಾಗಲಿವೆ. ಹಿಂದೂ ಮತ್ತು ಮುಸ್ಲಿಮರ ನಡುವಿನ ವೈಯಕ್ತಿಕ ಸಂಬಂಧಗಳು ಮತ್ತೆ ಸೌಹಾರ್ದವಾಗಿ ಏರ್ಪಡಲು ಇಲ್ಲಿ ಮಾತುಕತೆಗಳ ಅಗತ್ಯವಿದೆ. ಇದು ಎಲ್ಲವನ್ನೂ ಬದಲಾಯಿಸುತ್ತದೆ ಎಂದು ಅರ್ಥವಲ್ಲ. ಆದರೆ ಅಂತಹ ಪ್ರತಿಯೊಂದು ಸಣ್ಣ ಮತ್ತು ದೊಡ್ಡ ಹೆಜ್ಜೆ ತನ್ನದೇ ಮಹತ್ವ ಹೊಂದಿದೆ.

ರಾಕೇಶ್ ಟಿಕಾಯತ್ ಬಗ್ಗೆ ಅನೇಕರು ಈಗಲೂ ಆತಂಕಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ ಮತ್ತು ಅದು ಬಹುಶಃ ಸರಿಯಾಗಿದೆ. ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುತ್ತಿರುವ ಸಂದರ್ಭದಲ್ಲಿ ಈ ಗುಂಪು ಈಗ ತಾಳ್ಮೆಯಿಂದಿರಲು ನಾನು ಮನವಿ ಮಾಡುತ್ತೇನೆ. ಇದು ಕಷ್ಟದ ಸಮಯ ಮತ್ತು ಇಂತಹ ನಿರ್ಣಯ ಕೆಲವೊಮ್ಮೆ ಅಗತ್ಯ. ಭಾರತಕ್ಕೆ ಬಿಜೆಪಿ ಮಾಡಿರುವ ಹಾನಿಯನ್ನು ಸರಿಪಡಿಸಲು ಬಹಳ ಸಮಯ ಬೇಕು. ಕೆಲವೊಮ್ಮೆ ಈ ಸರಿಪಡಿಸುವಿಕೆಯ ಪ್ರಕ್ರಿಯೆ ವಿರೋಧಾಭಾಸಗಳಿಂದ ಕೂಡಿರಬಹುದು. ಹಠಾತ್ ಪ್ರತಿಕ್ರಿಯೆಗಳು ಯಾರಿಗೂ ಸಹಾಯ ಮಾಡುವುದಿಲ್ಲ.

ಪಶ್ಚಿಮ ಯುಪಿಯಲ್ಲಿ ಇನ್ನೂ ಅನೇಕ ಸಮಸ್ಯೆಗಳಿವೆ. ಮಿಲಿಟಂಟ್ ಗುಣ ಹೊಂದಿರುವ ರೈತ ಸಂಘಗಳು ಹಲವು ದಶಕಗಳಿಂದ ಪಂಜಾಬ್‌ನಲ್ಲಿ ಸಕ್ರಿಯವಾಗಿವೆ. ಇದಕ್ಕೆ ಭಿನ್ನವಾಗಿ, ಹರಿಯಾಣ ಮತ್ತು ಪಶ್ಚಿಮ ಯುಪಿಯ ರೈತ ಸಂಘಟನೆಗಳು (ಬಿಕೆಯು ಸೇರಿದಂತೆ) ರೈತರನ್ನು ಸಜ್ಜುಗೊಳಿಸಲು ಖಾಪ್‌ಗಳನ್ನು ಅವಲಂಬಿಸಿವೆ. ಊಳಿಗಮಾನ್ಯ ವರ್ತನೆಗಳನ್ನು ಒಡೆಯಲು ಸಮಯ ಬೇಕು. ಆದರೆ 2021 ರ ಜನವರಿ 29 ರಂದು ನಡೆದ ಮಹಾಪಂಚಾಯತ್, ಆ ಸಮಾಜದ ಪ್ರಜಾಪ್ರಭುತ್ವೀಕರಣದತ್ತ ಒಂದು ಖಚಿತವಾದ, ಸಣ್ಣ ಆದರೆ ಮಹತ್ವದ ಹೆಜ್ಜೆಯಾಗಿದೆ.

(ನಕುಲ್ ಸಿಂಗ್ ಸಾಹ್ನಿ, ಸ್ವತಂತ್ರ ಸಾಕ್ಷ್ಯಚಿತ್ರ ನಿರ್ಮಾಪಕರು. ಅವರ ಗಮನಾರ್ಹ ಸಾಕ್ಷ್ಯಚಿತ್ರಗಳಲ್ಲಿ, ‘ಇಜ್ಜತ್‌ನಗರಿ ಕಿ ಅಸಭ್ಯ ಭೇಟಿಯಾಂ’ ಮತ್ತು ‘ಮುಜಫರ್‌ನಗರ್ ಬಾಕಿ ಹೈ’ ಸೇರಿವೆ. ಅವರು ಪಶ್ಚಿಮ ಯುಪಿಯಲ್ಲಿ ಚಲ್ಚಿತ್ರ್ ಅಭಿಯಾನ್ ಎಂಬ ಚಲನಚಿತ್ರ ಮಾಧ್ಯಮ ಅಭಿಯಾನದ ಸ್ಥಾಪಕರಾಗಿದ್ದಾರೆ.)


ಇದನ್ನೂ ಓದಿ: ಟಿಕಾಯತ್ ಮನವಿಗೆ ಭಾರೀ ಬೆಂಬಲ: ರೈತರೊಟ್ಟಿಗೆ ಹರಿದುಬರುತ್ತಿರುವ ಸಾವಿರಾರು ಯುವಜನರು

ಇದನ್ನೂ ಓದಿ: ಮಧ್ಯರಾತ್ರಿಯ ಮಾಸ್ಟರ್‌ಸ್ಟ್ರೋಕ್: ಸುಳ್ಳು, ಸಂಚು, ದಮನಗಳೇ ತಿರುಗುಬಾಣವಾದ ಗಳಿಗೆ

ಸತ್ಯದ ಪಥಕ್ಕೆ ಬಲ ತುಂಬಲು ದೇಣಿಗೆ ನೀಡಿ. ನಿಮ್ಮಗಳ ಬೆಂಬಲವೇ ನಮಗೆ ಬಲ. ಈ ಕೆಳಗಿನ ಲಿಂಕ್ ಮೂಲಕ ದೇಣಿಗೆ ನೀಡಿ

LEAVE A REPLY

Please enter your comment!
Please enter your name here

- Advertisment -

Must Read

ಸಿದ್ದರಾಮಯ್ಯ, ಡಿ.ಕೆ.ಶಿವಕುಮಾರ್‌ರನ್ನು ಗುಂಡಿಕ್ಕಿ ಕೊಲ್ಲಿ: ಪಬ್ಲಿಕ್‌ ಟಿವಿಯಲ್ಲಿ ಮಾಡಲಾದ ಪ್ರಚೋದನೆಗೆ ಖಂಡನೆ

“ಮಾಜಿ ಮುಖ್ಯಮಂತ್ರಿ, ವಿಧಾನಸಭೆ ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯ ಹಾಗೂ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಅವರನ್ನು ಗುಂಡಿಕ್ಕಿ ಕೊಲ್ಲಿ”- ಹೀಗೆ ಪ್ರಚೋದನಾತ್ಮಕವಾಗಿ ವ್ಯಕ್ತಿಯೊಬ್ಬರು ಪಬ್ಲಿಕ್‌ ಟಿ.ವಿ. ಜೊತೆ ಮಾತನಾಡಿರುವುದು ಆಕ್ರೋಶಕ್ಕೆ ಕಾರಣವಾಗಿದೆ. ಇಬ್ಬರು ಧಾರ್ಮಿಕ...