ನೇಪಾಳ ಪ್ರವಾಸೋದ್ಯಮ ಮಂಡಳಿಯ ಮಾಹಿತಿ ಪ್ರಕಾರ, ಬುಧವಾರ (ಆ.26) ಬೆಳಿಗ್ಗೆ ನೇಪಾಳದ ರಸುವಾ ಜಿಲ್ಲೆಯ ಭೋಟೆ ಕೋಶಿ ನದಿಯಲ್ಲಿ ಸಂಭವಿಸಿದ ಹಠಾತ್ ಪ್ರವಾಹದ ನಂತರ 105 ಭಾರತೀಯ ಪ್ರಜೆಗಳು ಸೇರಿದಂತೆ ಕನಿಷ್ಠ 384 ಪ್ರವಾಸಿಗರು ನಾಪತ್ತೆಯಾಗಿದ್ದಾರೆ ಎಂದು ವರದಿಯಾಗಿದೆ.
ನಾಪತ್ತೆಯಾದವರ ಪ್ರಾಥಮಿಕ ಪಟ್ಟಿಯಲ್ಲಿ 291 ವಿದೇಶಿ ಪ್ರಜೆಗಳು ಮತ್ತು 93 ನೇಪಾಳಿ ಪ್ರಜೆಗಳು ಸೇರಿದ್ದಾರೆ. ವಿದೇಶಿ ಪ್ರವಾಸಿಗರಲ್ಲಿ ಭಾರತದವರೇ ಅತಿ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ, 105 ಭಾರತೀಯರು ನಾಪತ್ತೆಯಾಗಿದ್ದಾರೆ. ಇವರೊಂದಿಗೆ ಇತರ 37 ಜನರನ್ನು ಅನಿವಾಸಿ ಭಾರತೀಯರು (ಎನ್ಆರ್ಐ) ಎಂದು ಗುರುತಿಸಲಾಗಿದೆ. ಈ ಪಟ್ಟಿಯಲ್ಲಿ ಆಸ್ಟ್ರೇಲಿಯಾ, ನೆದರ್ಲ್ಯಾಂಡ್ಸ್, ಯುನೈಟೆಡ್ ಸ್ಟೇಟ್ಸ್, ಮಲೇಷ್ಯಾ, ಯುನೈಟೆಡ್ ಕಿಂಗ್ಡಮ್ ಮತ್ತು ದಕ್ಷಿಣ ಆಫ್ರಿಕಾದ ಪ್ರಜೆಗಳೂ ಇದ್ದಾರೆ. ಇನ್ನುಳಿದ ಹಲವಾರು ವಿದೇಶಿ ಪ್ರವಾಸಿಗರ ರಾಷ್ಟ್ರೀಯತೆಯ ಖಚಿತವಾಗಬೇಕಿದೆ.
ನೇಪಾಳ ಪ್ರವಾಸೋದ್ಯಮ ಮಂಡಳಿಯು ಈ ಪ್ರಾಥಮಿಕ ಮಾಹಿತಿಯನ್ನು 10 ಟೂರಿಸಂ ಮತ್ತು ಟ್ರಾವೆಲ್ ಏಜೆನ್ಸಿಗಳಿಂದ ಸಂಗ್ರಹಿಸಲಾಗಿದೆ ಎಂದು ತಿಳಿಸಿದೆ. ನಾಪತ್ತೆಯಾದವರ ಪತ್ತೆ ಮತ್ತು ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಮಂಡಳಿ, ಟೂರಿಸ್ಟ್ ಪೊಲೀಸ್ ಮತ್ತು ಇತರ ಪ್ರವಾಸೋದ್ಯಮ ಪಾಲುದಾರರು ಪ್ರಸ್ತುತ ಟ್ರಾವೆಲ್ ಏಜೆನ್ಸಿಗಳು, ಗೈಡ್ಗಳು, ಸ್ಥಳೀಯ ಅಧಿಕಾರಿಗಳು ಹಾಗೂ ಭದ್ರತಾ ಸಂಸ್ಥೆಗಳೊಂದಿಗೆ ಒಟ್ಟಾಗಿ ಕೆಲಸ ಮಾಡುತ್ತಿದೆ.
ಏಜೆನ್ಸಿವಾರು ಪ್ರಾಥಮಿಕ ದಾಖಲೆಗಳ ಪ್ರಕಾರ, ಟ್ರೆಕ್ಕರ್ಸ್ ಸೊಸೈಟಿಯಿಂದ 92 ಪ್ರವಾಸಿಗರು, ಸಾಮ್ರಾಟ್ ಟೂರ್ಸ್ ಅಂಡ್ ಟ್ರಾವೆಲ್ಸ್ನಿಂದ 71, ಲೀಫ್ ಹಾಲಿಡೇಯಿಂದ 55, ಹಿಮಾಲಯನ್ ಗ್ಲೇಸಿಯರ್ನಿಂದ 52, ಕೈಲಾಶ್ ಜರ್ನಿಯಿಂದ 31, ಫಿಶ್ಟೇಲ್ ಟೂರ್ಸ್ ಅಂಡ್ ಟ್ರಾವೆಲ್ಸ್ನಿಂದ 27, ಆಲ್ಪೈನ್ ಎಕೋ ಟ್ರೆಕ್ನಿಂದ 20, ಕಠ್ಮಂಡು ಹಾಲಿಡೇ ಟೂರ್ಸ್ ಅಂಡ್ ಟ್ರಾವೆಲ್ಸ್ನಿಂದ 17, ರಿಚಾ ಟೂರ್ಸ್ ಅಂಡ್ ಟ್ರಾವೆಲ್ಸ್ನಿಂದ 12 ಮತ್ತು ಎಕ್ಸ್ಪ್ಲೋರ್ ವೆಕೇಶನ್ನಿಂದ ಏಳು ಪ್ರವಾಸಿಗರು ನಾಪತ್ತೆಯಾಗಿದ್ದಾರೆ.
ಈ ಪಟ್ಟಿಯು ಕೇವಲ ಪ್ರಾಥಮಿಕವಾಗಿದ್ದು, ಪರಿಶೀಲನೆಗೆ ಒಳಪಟ್ಟಿರುತ್ತದೆ ಎಂದು ಪ್ರವಾಸೋದ್ಯಮ ಮಂಡಳಿಯು ಒತ್ತಿಹೇಳಿದೆ. ಹಾಗಾಗಿ ಪರಿಶೀಲನಾ ಪ್ರಕ್ರಿಯೆಯು ಪೂರ್ಣಗೊಳ್ಳುವವರೆಗೆ ಪ್ರವಾಸಿಗರು ಮತ್ತು ಅವರ ಕುಟುಂಬಸ್ಥರು ಯಾವುದೇ ತೀರ್ಮಾನಕ್ಕೆ ಬರಬಾರದು ಎಂದು ವಿನಂತಿಸಿದೆ.
ಪ್ರವಾಹ ಉಂಟಾದ ಪ್ರದೇಶಗಳಲ್ಲಿರುವ ಪ್ರವಾಸಿಗರು ಧೈರ್ಯದಿಂದ ಇರಲು, ಅಧಿಕೃತ ಅಪ್ಡೇಟ್ಗಳನ್ನು ಮತ್ರ ಪರಿಗಣಿಸಲು ಮತ್ತು ಸುರಕ್ಷತಾ ಸೂಚನೆಗಳನ್ನು ಪಾಲಿಸಲು ಸಲಹೆ ನೀಡಲಾಗಿದೆ. ತುರ್ತು ಸಹಾಯದ ಅಗತ್ಯವಿರುವವರು 1234 ಅಥವಾ 1144 ಸಂಖ್ಯೆಯನ್ನು ಸಂಪರ್ಕಿಸಬಹುದು. ಟೂರಿಸ್ಟ್ ಪೊಲೀಸರನ್ನು 9851289445 ಸಂಖ್ಯೆಯ ಮೂಲಕ ಸಂಪರ್ಕಿಸಬಹುದು. ಪ್ರವಾಸಿಗರು ಹತ್ತಿರದ ಪೊಲೀಸ್ ಅಥವಾ ಭದ್ರತಾ ಅಧಿಕಾರಿಗಳು, ಸ್ಥಳೀಯ ಆಡಳಿತ, ಟ್ರಾವೆಲ್ ಏಜೆನ್ಸಿ, ಗೈಡ್ ಅಥವಾ ಟೂರ್ ಆಪರೇಟರ್ಗಳನ್ನು ಸಹ ಸಂಪರ್ಕಿಸಬಹುದಾಗಿದೆ ಎಂದು ವರದಿಗಳು ತಿಳಿಸಿವೆ.
