ಫಾರ್ಮ್-7 ಮೂಲಕ ಅರ್ಹ ಮತದಾರರ ಪಟ್ಟಿಯಿಂದ ಹೆಸರು ತೆಗೆದುಹಾಕಲು ಅರ್ಜಿ ಸಲ್ಲಿಸಿದ ತಕ್ಷಣ ಮತದಾರರ ಹೆಸರು ಸ್ವಯಂಚಾಲಿತವಾಗಿ ಡಿಲೀಟ್ ಆಗುವುದಿಲ್ಲ. ಇಆರ್‌ಒಗಳ ಕಡ್ಡಾಯ ಪರಿಶೀಲನೆ, ಅರ್ಜಿ ಕೊಟ್ಟವರಿಗೆ ನೋಟೀಸ್ ಮತ್ತು ವಿಚಾರಣೆ ನಡೆಸಿದ ನಂತರವೇ ನಿರ್ಧಾರ ಕೈಗೊಳ್ಳಲಾಗುತ್ತದೆ ಎಂದು ಕರ್ನಾಟಕ ಮುಖ್ಯ ಚುನಾವಣಾ ಆಯುಕ್ತ ವಿ. ಅನ್ಬುಕುಮಾರ್ ಸ್ಪಷ್ಟಪಡಿಸಿದ್ದಾರೆ.
ರಾಜ್ಯ ಚುನಾವಣಾ ಆಯೋಗದ ಕಚೇರಿಯಲ್ಲಿ ಇಂದು ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಎಸ್ಐಆರ್ ಪ್ರಕ್ರಿಯೆಯಲ್ಲಿ ಅರ್ಹ ಮತದಾರರು ಯಾರಾದರೂ ಮತದಾರರ ಪಟ್ಟಿಯಿಂದ ತಪ್ಪಾಗಿ ಕೈಬಿಟ್ಟುಹೋಗಿದ್ದಲ್ಲಿ, ಅವರನ್ನು ಮತ್ತೆ ಪಟ್ಟಿಗೆ ಸೇರಿಸಲಾಗುವುದು; ಇದರ ಬಗ್ಗೆ ವಿಶೇಷ ಜಾಗೃತಿ ಅಭಿಯಾನ ಹಮ್ಮಿಕೊಳ್ಳಲಾಗುವುದು” ಎಂದು ತಿಳಿಸಿದರು.
“ಅಕ್ಟೋಬರ್ 27 ಕ್ಕೆ ಅಂತಿಮ ಮತದಾರರ ಪಟ್ಟಿ ಬಿಡುಗಡೆ ಮಾಡಲಾಗುವುದು, ಅಲ್ಲಿವರೆಗೆ ಮತದಾರರ ಹೆಸರು ಸೇರಿಸುವುದು ಮತ್ತು ತೆಗೆಯುವ ಪ್ರಕ್ರಿಯೆ ಮಾಡಲಾಗುತ್ತದೆ. ನೋಟಿಸ್ ಪಡೆದವರು ವಿಚಾರಣೆಗೆ ಹಾಜರಾಗದೆ ಇದ್ದರೆ, ಬಿಎಲ್‌ಒಗಳು ಅವರ ಮನೆಗೆ ತೆರಳಿ ವಿಚಾರಣೆ ನಡೆಸಿ, ಮತದಾರರ ಮಾಹಿತಿ ಪಡೆದು ಇಆರ್‌ಒಗಳಿಗೆ ಸಲ್ಲಿಸುತ್ತಾರೆ. ಎಲ್ಲ ಅರ್ಹ ಮತದಾರರನ್ನು ಮತದಾರರ ಪಟ್ಟಿಗೆ ಮತ್ತೆ ಸೇರ್ಪಡೆ ಮಾಡುತ್ತೇವೆ” ಎಂದರು.
ಫಾರ್ಮ್ 7 ಕೊಟ್ಟ ತಕ್ಷಣ ಹೆಸರು ಡಿಲೀಟ್ ಮಾಡಲ್ಲ
“ಫಾರ್ಮ್ 7 ಕೊಟ್ಟ ತಕ್ಷಣ ಹೆಸರು ಡಿಲೀಟ್ ಮಾಡಲ್ಲ; ಆಕ್ಷೇಪಣೆ ಕೊಟ್ಟ ವ್ಯಕ್ತಿಗಳ ವಿಚಾರಣೆ ಬಳಿಕ ಇಆರ್‌ಒ ಕ್ರಮ ತೆಗೆದುಕೊಳ್ಳುತ್ತಾರೆ. ಈ ಕುರಿತು ಎಲ್ಲ ಇಆರ್‌ಒಗಳಿಗೆ ಸೂಚನೆ ನೀಡಲಾಗಿದೆ. ಆಕ್ಷೇಪಣೆ ಕೊಟ್ಟ ಕಾರಣಕ್ಕೆ ಈವರೆಗೆ ಯಾವ ಮತದಾರ ಹೆಸರನ್ನೂ ಕೈಬಿಟ್ಟಿಲ್ಲ. ಸುಳ್ಳು ಆರೋಪ ಮಾಡಿದವರ ಮೇಲೆ ಕಾನೂನು ಪ್ರಕಾರ ಕ್ರಮ ತೆಗೆದುಕೊಳ್ಳುವಂತೆ ಸೂಚನೆ ನೀಡಲಾಗಿದೆ. ಎಫ್‌ಐಆರ್‌ ಆಗಿರುವ ಈ ಸಂದರ್ಭದಲ್ಲಿ ಆ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಲು ಸಾಧ್ಯವಿಲ್ಲ” ಎಂದು ಹೇಳಿದರು.
“ದಿನವೊಂದಕ್ಕೆ ಒಬ್ಬರು 10 ಫಾರ್ಮ್ 7 ಕೊಡಬಹುದು; ಒಬ್ಬರು ಒಟ್ಟು 50 ಫಾರ್ಮ್ ಮಾತ್ರ ಕೊಡಲು ಅವಕಾಶವಿದೆ. ಅದಕ್ಕಿಂತಲೂ ಹೆಚ್ಚಿನ ಫಾರ್ಮ್‌ಗಳನ್ನು ಕೊಟ್ಟರೆ ಇಆರ್‌ಒ ತಿರಸ್ಕರಿಸುತ್ತಾರೆ. ಅರ್ಜಿ ಕೊಟ್ಟವರ ಉದ್ದೇಶ ಸುಳ್ಳು ಎಂದು ಸಾಬೀತಾದರೆ ಇಆರ್‌ಒ ಕ್ರಮ ತೆಗೆದುಕೊಳ್ಳುತ್ತಾರೆ; ಅವರು ಏನು ಕ್ರಮ ತೆಗೆದುಕೊಳ್ಳಬೇಕು ಎಂದು ನಾವು ನಿರ್ದೇಶನ ನೀಡಲು ಸಾಧ್ಯವಿಲ್ಲ. ಆಕ್ಷೇಪಣೆ ಸುಳ್ಳು ಎಂದಾದರೆ ಕಾನೂನು ಪ್ರಕಾರ ಅವರು ಕ್ರಮ ತೆಗೆದುಕೊಳ್ಳಬಹುದು. ನೋಟಿಸ್ ಕೊಟ್ಟ ಬಳಿಕ 7 ದಿನಗಳ ಅವಕಾಶ ಇರುತ್ತದೆ. ಇಆರ್‌ಒಗಳು ಸ್ವತಂತ್ರ ಅಧಿಕಾರಿಗಳಾಗಿದ್ದು, ಅವರ ಪರಮಾಧಿಕಾರ ಬಳಸಿ ಕ್ರಮ ತೆಗೆದುಕೊಳ್ಳಬಹುದು. ಯಾವುದೇ ವ್ಯಕ್ತಿ ಫಾರ್ಮ್ 7 ಮೂಲಕ ಸುಳ್ಳು ಮಾಹಿತಿ ನೀಡಿದರೆ ಕ್ರಮ ತೆಗೆದುಕೊಳ್ಳಬಹುದು ಎಂದು ಫಾರ್ಮ್‌ನಲ್ಲೇ ಘೋಷಣೆ ಇದೆ. ಆದ್ದರಿಂದ, ಕ್ರಮ ತೆಗೆದುಕೊಳ್ಳಲು ಇಆರ್‌ಗಳಿಗೆ ಪರಮಾಧಿಕಾರ ಇದೆ” ಎಂದರು.
“ಈವರೆಗೆ ಎಷ್ಟು ಫಾರ್ಮ್ 7 ಸಲ್ಲಿಕೆಯಾಗಿವೆ ಎಂಬ ಅಂಕಿ ಅಂಶಗಳು ನಮ್ಮಲ್ಲಿ ಇಲ್ಲ; ಆಕ್ಷೇಪಣೆ ಸಲ್ಲಿಸುವ ಅವಧಿ ಮುಗಿದಿದೆ. ಹೆಸರು ಡಿಲೀಟ್ ಮಾಡಿ ಎಂದು ವ್ಯಕ್ತಿಗೆ ಸಬಂಧಿಸಿದವರು ಅರ್ಜಿ ಸಲ್ಲಿಸಲು ಅವಕಾಶ ಇದೆ. ಮತದಾರರ ಪಟ್ಟಿಗೆ ಹೆಸರು ಸೇರ್ಪಡೆಗೆ ವಿಶೇಷ ಅಭಿಯಾನ ಮಾಡುವಾಗ 2025 ರ ಪಟ್ಟಿ ಹಾಗೂ ಹೊಸದಾಗಿ ತಯಾರಿಸಿದ ಎಸ್ಐಆರ್ ಪಟ್ಟಿಯಲ್ಲಿ ಯಾರದ್ದಾದರೂ ಹೆಸರು ಇಲ್ಲದೇ ಇದ್ದರೆ, ಅವರ ಹೆಸರು ಬೇರೆ ಕ್ಷೇತ್ರದಲ್ಲಿ ಇಲ್ಲ ಎಂಬುದನ್ನು ಖಚಿತಪಡಿಸಿಕೊಂಡು ಫಾರ್ಮ್ 6 ಕೊಡಬೇಕು” ಎಂದರು.
16-06-2026 ರಿಂದ 04-10-2026 ರವರೆಗೆ ಚುನಾವಣಾ ಆಯೋಗ ಸ್ವೀಕರಿಸಿರುವ ಅರ್ಜಿಗಳು
ಫಾರ್ಮ್ 6 – 9,10,732
ಫಾರ್ಮ್ 6ಎ – 4,677
ಫಾರ್ಮ್ 7 – 91,278
ಫಾರ್ಮ್ 8 – 11,98,484
ಒಟ್ಟು ಅರ್ಜಿಗಳು – 22,05,171
