ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯ ಮೂಲಕ ಮತದಾರರ ಪಟ್ಟಿಯಲ್ಲಿ ಬೃಹತ್ ಅಕ್ರಮ ಎಸಗಲಾಗುತ್ತಿದೆ ಎಂದು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಸೇರಿದಂತೆ ಕಾಂಗ್ರೇಸ್ ನಾಯಕರು ದೆಹಲಿಯಲ್ಲಿ ಬೀದಿಗಿಳಿದು ಪ್ರತಿಭಟಿಸಿ, ಭಾರತದ ಮುಖ್ಯ ಚುನಾವಣಾ ಆಯುಕ್ತ (CEC) ಗ್ಯಾನೇಶ್ ಕುಮಾರ್ ರಾಜೀನಾಮೆಗೆ ಪಟ್ಟುಹಿಡಿದಿರುವ ಬೆನ್ನಲ್ಲೇ, ಗ್ಯಾನೇಶ್ ಕುಮಾರ್ ವಿರುದ್ಧದ 2006ರ ಹಳೆಯ ಭ್ರಷ್ಟಾಚಾರದ ಪ್ರಕರಣವೊಂದನ್ನು ಮರುತನಿಖೆ ಮಾಡಲು ಕೇರಳಂನ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ (UDF) ಸರ್ಕಾರ ಆದೇಶಿಸಿದೆ.
ಕೇರಳಂ ಗೃಹ ಸಚಿವ ರಮೇಶ್ ಚೆನ್ನಿತ್ತಲ ಅವರು ಈ ಕುರಿತು ರಾಜ್ಯದ ವಿಜಿಲೆನ್ಸ್ ಮತ್ತು ಭ್ರಷ್ಟಾಚಾರ ನಿಗ್ರಹ ದಳಕ್ಕೆ ಪ್ರಾಥಮಿಕ ತನಿಖೆ ನಡೆಸುವಂತೆ ಸೂಚನೆ ನೀಡಿದ್ದಾರೆ. 1988ರ ಬ್ಯಾಚ್‌ನ ಕೇರಳಂ ಕೇಡರ್ ಐಎಎಸ್ ಅಧಿಕಾರಿಯಾಗಿರುವ ಜ್ಞಾನೇಶ್ ಕುಮಾರ್, 2006ರಲ್ಲಿ ರಾಜ್ಯದ ಲೋಕೋಪಯೋಗಿ ಇಲಾಖೆ (PWD) ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸುತ್ತಿದ್ದ ಸಂದರ್ಭದಲ್ಲಿ ವಿಶ್ವಬ್ಯಾಂಕ್ ನೆರವಿನ ರಸ್ತೆ ಕಾಮಗಾರಿ ಯೋಜನೆಗೆ ಸಂಬಂಧಿಸಿದಂತೆ ಲಂಚಕ್ಕೆ ಬೇಡಿಕೆಯಿಟ್ಟಿದ್ದರು ಎಂಬ ಗಂಭೀರ ಆರೋಪ ಎದುರಿಸುತ್ತಿದ್ದಾರೆ.
ಈ ಭ್ರಷ್ಟಾಚಾರದ ಆರೋಪದ ಮೂಲ ಇರುವುದು ಕೇರಳಂ ಲೋಕೋಪಯೋಗಿ ಇಲಾಖೆಯ ಪ್ರಮುಖ ಯೋಜನೆಯಾದ ‘ಕೇರಳ ರಾಜ್ಯ ಸಾರಿಗೆ ಯೋಜನೆ’ಯಲ್ಲಿ (KSTP). ಸುಮಾರು 1,600 ಕೋಟಿ ರೂಪಾಯಿ ವೆಚ್ಚದ ಈ ಯೋಜನೆಯನ್ನು ವಿಶ್ವಬ್ಯಾಂಕ್ ಸಾಲದ ನೆರವಿನೊಂದಿಗೆ ರಾಜ್ಯದ ಪ್ರಮುಖ ರಸ್ತೆಗಳನ್ನು ಉನ್ನತೀಕರಿಸಲು ರೂಪಿಸಲಾಗಿತ್ತು. 1996 ರಿಂದ 2001ರ ಸಿಪಿಐ(ಎಂ) ನೇತೃತ್ವದ ಎಲ್‌‌ಡಿಎಫ್ ಸರ್ಕಾರದಲ್ಲಿ ಪಿಡಬ್ಲ್ಯೂಡಿ ಸಚಿವರಾಗಿದ್ದ ಪಿ.ಜೆ. ಜೋಸೆಫ್ ಅವರ ಅವಧಿಯಲ್ಲಿ ಈ ಯೋಜನೆಯ ಆರಂಭಿಕ ಚರ್ಚೆಗಳು ಪೂರ್ಣಗೊಂಡಿದ್ದವು (ಇವರು ಪ್ರಸ್ತುತ ಆಡಳಿತಾರೂಢ ಯುಡಿಎಫ್ ಮೈತ್ರಿಕೂಟದಲ್ಲಿದ್ದಾರೆ).
ಈ ಯೋಜನೆಯಡಿ ತಿರುವನಂತಪುರಂನಿಂದ ಅಂಕಮಾಲಿವರೆಗಿನ ಮುಖ್ಯ ರಸ್ತೆಯನ್ನು ನೂತನ ತಂತ್ರಜ್ಞಾನದೊಂದಿಗೆ ಮೇಲ್ದರ್ಜೆಗೇರಿಸಲು 216 ಕೋಟಿ ರೂಪಾಯಿ ವೆಚ್ಚದ ಗುತ್ತಿಗೆಯನ್ನು ಕೇರಳಂನ ಭಗೀರಥ ಇಂಜಿನಿಯರಿಂಗ್ ಹಾಗೂ ಮಲೇಷ್ಯಾದ ‘ಪ್ರಾಪರ್ಟಿ ಅಂಡ್ ಟ್ರಾನ್ಸ್‌ಪೋರ್ಟ್ ಇನ್‌ಫ್ರಾಸ್ಟ್ರಕ್ಚರ್’ (PATI) ಕಂಪನಿಗಳ ‘ಪಾಟಿ-ಬೆಲ್’ (PATI-BEL) ಒಕ್ಕೂಟಕ್ಕೆ ನೀಡಲಾಗಿತ್ತು.
ಆದರೆ, ಡಿಸೆಂಬರ್ 2002ರಲ್ಲಿ ಕಾಂಗ್ರೆಸ್ ನೇತೃತ್ವದ ಸರ್ಕಾರ ಒಪ್ಪಂದ ಮಾಡಿಕೊಂಡರೂ ಭೂಸ್ವಾಧೀನ ಪ್ರಕ್ರಿಯೆ ಪೂರ್ಣಗೊಳಿಸದೆ ಯೋಜನೆಯನ್ನು ಹಸ್ತಾಂತರಿಸಿತ್ತು. 2004ರಲ್ಲಿ ಭೂಸ್ವಾಧೀನದ ಅಧಿಸೂಚನೆ ಹೊರಬಿದ್ದರೂ, ವಿಳಂಬದ ಕಾರಣದಿಂದಾಗಿ ಯೋಜನೆಯ ವೆಚ್ಚ ಹೆಚ್ಚಾಯಿತು. ಅಷ್ಟರಲ್ಲಿ ಸಿಪಿಐ(ಎಂ) ಸರ್ಕಾರ ಅಧಿಕಾರಕ್ಕೆ ಬಂದಿದ್ದು, ಹಣಕಾಸು ಸಚಿವ ಥಾಮಸ್ ಐಸಾಕ್ ಅವರು ಯೋಜನಾ ವೆಚ್ಚದಲ್ಲಿ ಶೇ.30ರಷ್ಟು ಹೆಚ್ಚಳ ಮಾಡಲು ನಿರಾಕರಿಸಿದರು.
ಇನ್ನೊಂದೆಡೆ ಸಬ್-ಕಾಂಟ್ರಾಕ್ಟರ್‌ಗಳು ಹಾಗೂ ಸಾಮಗ್ರಿ ಪೂರೈಕೆದಾರರಿಂದ ಹಣಕ್ಕಾಗಿ ತೀವ್ರ ಒತ್ತಡದಲ್ಲಿದ್ದ ಪಾಟಿ-ಬೆಲ್ ಒಕ್ಕೂಟದ ಮುಖ್ಯ ಪ್ರಾಜೆಕ್ಟ್ ಮ್ಯಾನೇಜರ್, 54 ವರ್ಷದ ಮಲೇಷ್ಯನ್ ಎಂಜಿನಿಯರ್ ಲೀ ಸೀ ಬಿನ್ 2006ರ ನವೆಂಬರ್ 11ರಂದು ಕೌಲಾಲಂಪುರದಲ್ಲಿ ಆತ್ಮಹತ್ಯೆ ಮಾಡಿಕೊಂಡರು. ಅವರು ಬರೆದಿಟ್ಟಿದ್ದ ಡೆತ್ ನೋಟ್‌ನಲ್ಲಿ ಪಿಡಬ್ಲ್ಯೂಡಿ ಅಧಿಕಾರಿಗಳು 18 ಕೋಟಿ ರೂ. ಬಿಲ್ ಪಾಸ್ ಮಾಡಲು ಲಂಚಕ್ಕೆ ಬೇಡಿಕೆಯಿಟ್ಟು ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿದ್ದು, ಅದರಲ್ಲಿ ಅಂದಿನ ಪಿಡಬ್ಲ್ಯೂಡಿ ಕಾರ್ಯದರ್ಶಿ ಜ್ಞಾನೇಶ್ ಕುಮಾರ್ ಅವರ ಹೆಸರನ್ನೂ ಉಲ್ಲೇಖಿಸಲಾಗಿತ್ತು.
ಲೀ ಆತ್ಮಹತ್ಯೆಯ ಬಳಿಕ ತೀವ್ರ ಸಾರ್ವಜನಿಕ ಆಕ್ರೋಶ ವ್ಯಕ್ತವಾದಾಗ, ಅಂದಿನ ಸಿಪಿಐ(ಎಂ) ಸರ್ಕಾರ ಜ್ಞಾನೇಶ್ ಕುಮಾರ್ ಅವರನ್ನು ಹುದ್ದೆಯಿಂದ ತೆಗೆದುಹಾಕಿ ವಿಜಿಲೆನ್ಸ್ ತನಿಖೆಗೆ ಆದೇಶಿಸಿತ್ತಲ್ಲದೆ, ‘ಪಾಟಿ-ಬೆಲ್’ ಒಪ್ಪಂದವನ್ನೂ ರದ್ದುಗೊಳಿಸಿತ್ತು. ಆದರೆ, ಕಾಂಗ್ರೆಸ್ ನಾಯಕ ಮಲಯಿಂಕಿಲ ಜಿ. ವೇಣುಗೋಪಾಲ್ ಅವರು ಇತ್ತೀಚೆಗೆ ನೀಡಿದ ದೂರಿನಲ್ಲಿ ತಿಳಿಸಿರುವಂತೆ, ಅಂದಿನ ತನಿಖೆಯನ್ನು ಹಾದಿತಪ್ಪಿಸಿ ಅರ್ಧದಲ್ಲೇ ಸ್ಥಗಿತಗೊಳಿಸಲಾಗಿತ್ತು. ಹುದ್ದೆಯಿಂದ ವಜಾಗೊಂಡಿದ್ದ ಗ್ಯಾನೇಶ್ ಕುಮಾರ್ ಅವರಿಗೆ ರಾಜ್ಯದಲ್ಲಿ ಯಾವುದೇ ಹೊಸ ಹುದ್ದೆ ನೀಡದ ಕಾರಣ, ಅವರು ಕೇಂದ್ರ ಸೇವೆಯ ಡೆಪ್ಯುಟೇಶನ್ ಮೇಲೆ ನವದೆಹಲಿಗೆ ತೆರಳಿದ್ದರು (ಅಂದು ಕೇಂದ್ರದಲ್ಲಿ ಕಾಂಗ್ರೆಸ್ ನೇತೃತ್ವದ ಯುಪಿಎ-1 ಸರ್ಕಾರವಿತ್ತು ಹಾಗೂ ಸಿಪಿಐ-ಎಂ ಕೂಡ ಹೊರಗಿನಿಂದ ಬೆಂಬಲ ನೀಡಿತ್ತು).
ನಂತರದ ದಿನಗಳಲ್ಲಿ ಮರು-ಟೆಂಡರ್ ಕರೆದರೂ ಯಾರೂ ಮುಂದೆ ಬಾರದಿದ್ದಾಗ, 2008ರಲ್ಲಿ ಸಿಪಿಐ(ಎಂ) ಸರ್ಕಾರವು ಮೂಲ 216 ಕೋಟಿ ರೂ. ಜೊತೆಗೆ ಹೆಚ್ಚುವರಿಯಾಗಿ 72 ಕೋಟಿ ರೂ.ಗಳನ್ನು ನೀಡಿ ಮತ್ತೆ ‘ಪಾಟಿ-ಬೆಲ್’ ಕಂಪನಿಗೆ ಕಾಮಗಾರಿ ನವೀಕರಿಸಿಕೊಟ್ಟಿತು. ಅಂದು ವಿರೋಧ ಪಕ್ಷದಲ್ಲಿದ್ದ ಒಮ್ಮನ್ ಚಾಂಡಿ ಅವರು, ತನಿಖೆ ಬಾಕಿ ಇರುವಾಗಲೇ ಕಪ್ಪುಪಟ್ಟಿಗೆ ಸೇರಿಸಬೇಕಾದ ಕಂಪನಿಗೆ ಪುನಃ ಕಾಮಗಾರಿ ವಹಿಸಿದ್ದನ್ನು ಪ್ರಶ್ನಿಸಿ ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡಿದ್ದರು. ಇದೀಗ ಹಲವು ದಶಕಗಳ ಬಳಿಕ, ದೇಶಾದ್ಯಂತ ‘ಸಿರ್’ (SIR) ಅಕ್ರಮಗಳ ವಿವಾದದ ನಡುವೆಯೇ ಜ್ಞಾನೇಶ್ ಕುಮಾರ್ ವಿರುದ್ಧದ ಈ ಹಳೆಯ ಭ್ರಷ್ಟಾಚಾರದ ಕಡತವನ್ನು ಕೇರಳಂ ಗೃಹ ಇಲಾಖೆ ಮರುಪರಿಶೀಲನೆಗೆ ತೆಗೆದುಕೊಂಡಿದ್ದು, ಪ್ರಾಥಮಿಕ ತನಿಖೆಗೆ ಆದೇಶಿಸಿರುವುದು ಚುನಾವಣಾ ಆಯುಕ್ತರಿಗೆ ಸಂಕಷ್ಟ ತಂದಿಟ್ಟಿದೆ.
