ಮುಂಬೈ: ಜಲಮಾರ್ಗಗಳ ಮೂಲಕ ಸಿಮೆಂಟ್ ಸಾಗಣೆಗೆ ಅನುಕೂಲವಾಗುವಂತೆ ಅಲಿಬಾಗ್ ಬಳಿ ಜೆಟ್ಟಿ ಮತ್ತು ಕನ್ವೇಯರ್ ಕಾರಿಡಾರ್ ನಿರ್ಮಾಣವನ್ನು ಮುಂದುವರಿಸಲು ಬಾಂಬೆ ಹೈಕೋರ್ಟ್ (ಎಚ್‌ಸಿ) ಬುಧವಾರ ಅದಾನಿ ಸಿಮೆಂಟೇಶನ್ ಲಿಮಿಟೆಡ್‌ಗೆ ಅನುಮತಿ ನೀಡಿದೆ. ಮ್ಯಾಂಗ್ರೋವ್ ಕಾಡುಗಳ ಮೇಲೆ ಈ ಯೋಜನೆಯ ಪರಿಣಾಮದ ಬಗ್ಗೆ ಪರಿಸರವಾದಿ ಸಂಘಟನೆಗಳ ವಿರೋಧದ ಹೊರತಾಗಿಯೂ ಈ ತೀರ್ಪು ಬಂದಿದೆ.
ಯೋಜನೆಯ ಆರ್ಥಿಕ ಪ್ರಯೋಜನಗಳನ್ನು ಗುರುತಿಸುವ ಜೊತೆಗೆ, ನ್ಯಾಯಾಲಯವು ಪರಿಸರ ಹಾನಿಯನ್ನು ತಗ್ಗಿಸಲು ಕಠಿಣ ಪರಿಸರ ಸುರಕ್ಷತೆಯ ಅಗತ್ಯವನ್ನು ಒತ್ತಿಹೇಳಿದೆ. ರಾಯಗಢ ಜಿಲ್ಲೆಯ ಅಲಿಬಾಗ್ ಬಳಿಯ ಶಹಬಾಜ್ ಮತ್ತು ಶಹಪುರ್ ಗ್ರಾಮಗಳಲ್ಲಿ ಅಂಬಾ ನದಿಯ ದಡದಲ್ಲಿ ಪ್ರಸ್ತಾಪಿಸಲಾದ ₹ 172 ಕೋಟಿ ಯೋಜನೆಯು ಜೆಟ್ಟಿ, ಕನ್ವೇಯರ್ ಕಾರಿಡಾರ್ ಮತ್ತು ಅಪ್ರೋಚ್ ರಸ್ತೆಯ ನಿರ್ಮಾಣವನ್ನು ಒಳಗೊಂಡಿದೆ. ಇದು ವರ್ಷಕ್ಕೆ 5 ಮಿಲಿಯನ್ ಮೆಟ್ರಿಕ್ ಟನ್ (MTPA) ಸಿಮೆಂಟ್, ಹಾರುಬೂದಿ, ಕಲ್ಲಿದ್ದಲು ಮತ್ತು ಪರ್ಯಾಯ ಇಂಧನಗಳು ಮತ್ತು ಕಚ್ಚಾ ವಸ್ತುಗಳನ್ನು (AFR) ನಿರ್ವಹಿಸುವ ನಿರೀಕ್ಷೆಯಿದೆ.
ಆರಂಭದಲ್ಲಿ, ಮಹಾರಾಷ್ಟ್ರ ಕರಾವಳಿ ವಲಯ ನಿರ್ವಹಣಾ ಪ್ರಾಧಿಕಾರ (MCZMA) ತನ್ನ ಡಿಸೆಂಬರ್ 2020ರ ಆದೇಶದಲ್ಲಿ ಹಲವಾರು ಅನುಸರಣಾ ಸಮಸ್ಯೆಗಳನ್ನು ಎತ್ತಿತ್ತು. ಆದಾಗ್ಯೂ, ಈ ಯೋಜನೆಯು ಸಿಮೆಂಟ್ ಸಾಗಣೆಯನ್ನು ರಸ್ತೆಮಾರ್ಗಗಳಿಂದ ಜಲಮಾರ್ಗಗಳಿಗೆ ಬದಲಾಯಿಸುವ ಮೂಲಕ ರಸ್ತೆ ದಟ್ಟಣೆ ಮತ್ತು ಇಂಗಾಲದ ಹೆಜ್ಜೆಗುರುತನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ ಎಂದು ಕಂಪನಿ ವಾದಿಸಿತು. ಪ್ರಸ್ತುತ, ಮುಂಬೈಗೆ ಸಿಮೆಂಟ್ ಪೂರೈಕೆಯ ಸರಿಸುಮಾರು 75% ಕರ್ನಾಟಕದ ಕಲಬುರಗಿ ಮತ್ತು ಮಹಾರಾಷ್ಟ್ರದ ವಿದರ್ಭದಿಂದ ರಸ್ತೆ ಸಾರಿಗೆಯ ಮೂಲಕ ಬರುತ್ತದೆ.
ಅಗತ್ಯ ಶಾಸನಬದ್ಧ ಅನುಮೋದನೆಗಳನ್ನು ಪಡೆದಿದ್ದರೂ, ಪರಿಸರ ಕಾರ್ಯಕರ್ತರು ಬಲವಾದ ಆಕ್ಷೇಪಣೆಗಳನ್ನು ವ್ಯಕ್ತಪಡಿಸಿದ್ದಾರೆ. ವಿಶೇಷವಾಗಿ ಮ್ಯಾಂಗ್ರೋವ್‌ಗಳ ಮೇಲಿನ ಪರಿಣಾಮದ ಬಗ್ಗೆ ಅವರು ಕಳವಳವನ್ನು ವ್ಯಕ್ತಪಡಿಸಿದ್ದಾರೆ. ಈ ಯೋಜನೆಯು ಮ್ಯಾಂಗ್ರೋವ್ ಮೀಸಲು ಅರಣ್ಯದ ವ್ಯಾಪ್ತಿಗೆ ಬರುತ್ತದೆ ಮತ್ತು ಇಲ್ಲಿ ಸುಮಾರು 158 ಮ್ಯಾಂಗ್ರೋವ್ ಮರಗಳನ್ನು ಕಡಿಯುವ ಅಗತ್ಯವಿದೆ.
ಅದಾನಿ ಸಿಮೆಂಟೇಶನ್ ಲಿಮಿಟೆಡ್ ಅನ್ನು ಪ್ರತಿನಿಧಿಸುವ ವಕೀಲ ವಿಕ್ರಮ್ ನಂಕಾನಿ, ಈ ಯೋಜನೆಯನ್ನು ಸಮರ್ಥಿಸಿಕೊಂಡಿದ್ದು, ಮುಂಬೈನ ಮೂಲಸೌಕರ್ಯ ಬೇಡಿಕೆಗಳನ್ನು ಪೂರೈಸುವುದರ ಜೊತೆಗೆ ವಾಯು ಮಾಲಿನ್ಯ ಮತ್ತು ಇಂಗಾಲದ ಹೊರಸೂಸುವಿಕೆಯನ್ನು ಕಡಿಮೆ ಮಾಡಲು ಇದು ಕೊಡುಗೆ ನೀಡುತ್ತದೆ ಎಂದು ಹೇಳಿದ್ದಾರೆ. ಕಡಿದುರುಳಿಸುವ ಮ್ಯಾಂಗ್ರೋವ್‌ಗಳ ಹತ್ತು ಪಟ್ಟು ಹೆಚ್ಚಿನ ಸಂಖ್ಯೆಯ ಸಸಿ ನೆಡುವಿಕೆ ಸೇರಿದಂತೆ ಪರಿಹಾರ ಅರಣ್ಯೀಕರಣ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಅವರು ಭರವಸೆ ನೀಡಿದರು.
ಆದಾಗ್ಯೂ, ನಗರದಲ್ಲಿ ಪರಿಸರದ ಹಿತಾಸಕ್ತಿಗಳನ್ನು ಪ್ರತಿಪಾದಿಸುವ ಸರ್ಕಾರೇತರ ಸಂಸ್ಥೆ ಬಾಂಬೆ ಎನ್ವಿರಾನ್ಮೆಂಟಲ್ ಆಕ್ಷನ್ ಗ್ರೂಪ್ (BEAG) ಅನ್ನು ಪ್ರತಿನಿಧಿಸುವ ವಕೀಲ ಆದಿತ್ಯ ಮೆಹ್ತಾ, ಈ ಯೋಜನೆಯು ಸಾರ್ವಜನಿಕ ಹಿತಾಸಕ್ತಿಗೆ ವಿರುದ್ಧವಾಗಿದೆ ಮತ್ತು ಪರಿಸರ ಯೋಗಕ್ಷೇಮಕ್ಕಿಂತ ವಾಣಿಜ್ಯ ಲಾಭಗಳಿಗೆ ಆದ್ಯತೆ ನೀಡುವ ಪ್ರಯತ್ನವಾಗಿದೆ ಎಂದು ವಾದಿಸಿದ್ದಾರೆ. “ಸಿಎಸ್ಆರ್ ಉಪಕ್ರಮಗಳು ಕೇವಲ ಕಣ್ಣೋಟ ಮತ್ತು ಅಂತಹ ಚಟುವಟಿಕೆಗಳು ಪರಿಸರ ಸೂಕ್ಷ್ಮ ಮ್ಯಾಂಗ್ರೋವ್ ಆವಾಸಸ್ಥಾನಗಳ ವೆಚ್ಚದಲ್ಲಿ ಬರಬಾರದು” ಎಂದು ಅವರು ವಾದಿಸಿದ್ದಾರೆ.
ಮುಖ್ಯ ನ್ಯಾಯಮೂರ್ತಿ ಅಲೋಕ್ ಆರಾಧೆ ಮತ್ತು ನ್ಯಾಯಮೂರ್ತಿ ಭಾರತಿ ಡಾಂಗ್ರೆ ಅವರನ್ನೊಳಗೊಂಡ ವಿಭಾಗೀಯ ಪೀಠವು ಅದಾನಿ ಸಿಮೆಂಟೇಶನ್ ಲಿಮಿಟೆಡ್ ಪರವಾಗಿ ತೀರ್ಪು ನೀಡಿದೆ. ಸುಸ್ಥಿರ ಅಭಿವೃದ್ಧಿಯ ಅಗತ್ಯವನ್ನು ಒತ್ತಿಹೇಳಿದೆ. ರಸ್ತೆ ದಟ್ಟಣೆಯನ್ನು ಕಡಿಮೆ ಮಾಡುವ ಮತ್ತು ಇಂಗಾಲದ ಹೊರಸೂಸುವಿಕೆಯನ್ನು 60%ಕ್ಕಿಂತ ಹೆಚ್ಚು ಕಡಿಮೆ ಮಾಡುವ ಯೋಜನೆಯ ಸಾಮರ್ಥ್ಯವನ್ನು ನ್ಯಾಯಾಲಯವು ಒಪ್ಪಿಕೊಂಡಿದೆ. ಆದಾಗ್ಯೂ ಕನಿಷ್ಠ ಪರಿಸರ ಪರಿಣಾಮವನ್ನು ಖಚಿತಪಡಿಸಿಕೊಳ್ಳುವ ಮಹತ್ವವನ್ನು ಅದು ಒತ್ತಿಹೇಳಿದೆ ಮತ್ತು ಕಂಪನಿಯು ಕಟ್ಟುನಿಟ್ಟಾದ ಅನುಸರಣಾ ಕ್ರಮಗಳನ್ನು ಪಾಲಿಸುವಂತೆ ಆದೇಶಿಸಿದೆ.
“ಸುಸ್ಥಿರ ಅಭಿವೃದ್ಧಿಯು ಆರ್ಥಿಕ ಬೆಳವಣಿಗೆಯನ್ನು ಪರಿಸರ ಸಂರಕ್ಷಣೆಯೊಂದಿಗೆ ಸಮತೋಲನಗೊಳಿಸುವುದನ್ನು ಅಗತ್ಯಗೊಳಿಸುತ್ತದೆ. ವಾಣಿಜ್ಯ ಯೋಜನೆಗಳು ನೈಸರ್ಗಿಕ ಸಂಪನ್ಮೂಲಗಳನ್ನು ಅತಿಯಾಗಿ ಖಾಲಿ ಮಾಡಬಾರದು, ಆದರೆ ಯಾವುದೇ ಅನಿವಾರ್ಯವಾಗಿ ಮಾಡಲೇಬೇಕಾದ ನಷ್ಟವನ್ನು ಬೇರೊಂದು ಕ್ರಮಗಳ ಮೂಲಕ ಸರಿದೂಗಿಸಬೇಕು. ಅರ್ಜಿದಾರರು ಶಾಸನಬದ್ಧ ಅನುಮತಿಗಳನ್ನು ಪಡೆದಿರುವುದರಿಂದ ಅವರು ಎಲ್ಲಾ ಪರಿಸರ ಪರಿಸ್ಥಿತಿಗಳನ್ನು ಪೂರೈಸಿದರೆ, ಯೋಜನೆಯು ಅನುಮೋದನೆಗೆ ಅರ್ಹವಾಗಿದೆ ಎಂದು ನಮಗೆ ಮನವರಿಕೆಯಾಗಿದೆ” ಎಂದು ಪೀಠವು ಅಭಿಪ್ರಾಯಿಸಿದೆ.
ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಚಿವಾಲಯ (MOEFCC) ಮತ್ತು MCZMA ಸೇರಿದಂತೆ ನಿಯಂತ್ರಕ ಅಧಿಕಾರಿಗಳು ವಿಧಿಸಿರುವ ಎಲ್ಲಾ ಷರತ್ತುಗಳನ್ನು ಪಾಲಿಸುವುದನ್ನು ದೃಢೀಕರಿಸುವ ಅಫಿಡವಿಟ್ ಸಲ್ಲಿಸುವಂತೆ ನ್ಯಾಯಾಲಯವು ಅದಾನಿ ಸಿಮೆಂಟೇಶನ್ ಲಿಮಿಟೆಡ್‌ಗೆ ನಿರ್ದೇಶನ ನೀಡಿದೆ.
ಮನೆಗೆ ನುಗ್ಗಿ ಪೊಲೀಸ್ ದಾಳಿ ಸಂದರ್ಭ ತುಳಿದು ಒಂದು ತಿಂಗಳ ಮುಸ್ಲಿಂ ಶಿಶು ಸಾವು: ಪ್ರತಿಭಟನೆ
