ಫ್ಯಾಕ್ಟ್‌ಚೆಕ್‌: ಇದು ಅಯೋಧ್ಯೆ ರೈಲು ನಿಲ್ದಾಣವೇ?

ಅಯೋಧ್ಯೆ ರೈಲು ನಿಲ್ದಾಣದ ಪೋಟೋ ಎಂಬ ಒಕ್ಕಣೆಯೊಂದಿಗೆ ಪೋಟೋವೊಂದು ಇತ್ತೀಚೆಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್‌ ಆಗಿದೆ. ಇದರ ಸತ್ಯಾಸತ್ಯತೆಯನ್ನು ‘ಆಲ್ಟ್‌ ನ್ಯೂಸ್‌’ ಬಯಲಿಗೆಳೆದಿದೆ.

ಆರ್‌‌ಎಸ್‌‌ಎಸ್‌ ಮತ್ತು ಬಜರಂಗ ಯುವ ಸಂಘ ಬೆಂಬಲಿಗ ಎಂದು ಬರೆದುಕೊಂಡಿರುವ ನಾಯಕ್‌ ಮಹೇಶ್‌ ಚೌಹಾಣ್ ಎಂಬ ಟ್ವಿಟರ್‌ ಬಳಕೆದಾರ, ಹೀಗೆ ಪೋಟೋವನ್ನು ಶೇರ್‌ ಮಾಡಿದ್ದು, 500ಕ್ಕೂ ಹೆಚ್ಚು ಮಂದಿ ರೀಟ್ವೀಟ್‌ ಮಾಡಿದ್ದಾರೆ (ಅರ್‍ಕೈವ್‌ ಲಿಂಕ್‌).

मेरा देश बदल रहा है आगे बढ़ रहा है

आप सोच रहे होंगे की यह रेलवे स्टेशन अमेरिका चीन या जापान का होगा पर
नही दोस्तों यह है हमारे आराध्य देव भगवान श्री राम जी की जन्म स्थली अयोध्या का रेलवे स्टेशन है जो बहुत शीघ्र ही देश को समर्पित होने वाला है…!!?? pic.twitter.com/Zj76LfO70Q

— नायक महेश चौहान (@Mahesh__Chouhan) September 20, 2021

ಪ್ರಸ್ತಾವಿತ ಅಯೋಧ್ಯೆ ರೈಲು ನಿಲ್ದಾಣದ ಚಿತ್ರವೆಂದು ಭಾಗ್ವಾ ಸೇನಾ ಎಂಬವರು ಇದೇ ಚಿತ್ರವನ್ನು ಹಂಚಿಕೊಂಡಿದ್ದಾರೆ.  ಈ ಚಿತ್ರ ಫೇಸ್‌ಬುಕ್‌ ಮತ್ತು ಟ್ವಿಟರ್‌ನಲ್ಲಿ ಅತಿಹೆಚ್ಚು ಶೇರ್‌ ಆಗಿದ್ದು, ಗುಜರಾತಿ ಭಾಷೆಯಲ್ಲೂ ಇದೇ ಒಕ್ಕಣೆಯೊಂದಿಗೆ ವಾಟ್ಸ್‌ಆಪ್‌ನಲ್ಲಿಯೂ ಹರಿದಾಡಿದೆ.

ಸತ್ಯಾಂಶವೇನು?

ಇಲ್ಲಿ ಹರಿದಾಡಿರುವ ಪೋಟೋವನ್ನು ಕೆಲವು ಸುದ್ದಿ ವರದಿಗಳಲ್ಲಿಯೂ ಕಾಣಬಹುದು. 2020ರ ಫೆಬ್ರುವರಿ 17ರಂದು ಪ್ರಕಟವಾಗಿರುವ  ‘ಲೈವ್‌ ಹಿಂದೂಸ್ಥಾನ್‌ ಸ್ಟೋರಿ’ ವರದಿಯಲ್ಲಿ ‘ಪ್ರಸ್ತಾವಿತ ಹೊಸ ದೆಹಲಿ ರೈಲು ನಿಲ್ದಾಣದ ಯೋಜನೆ’ ಎನ್ನಲಾಗಿದೆ. ಈ ಯೋಜನೆಗೆ 6,500 ಕೋಟಿ ರೂ.ಗಳನ್ನು ಖರ್ಚು ಮಾಡಲಾಗುತ್ತಿದ್ದು, ಮುಂಬರುವ ತಿಂಗಳಲ್ಲಿ ಟೆಂಟರ್‌ ಪ್ರಕ್ರಿಯೆ ನಡೆಯಲಿದೆ. ‘ಫೈನಾನ್ಸ್‌ಷಿಯಲ್‌ ಎಕ್ಸ್‌ಪ್ರೆಸ್‌’ ಕೂಡ ಇದೇ ಪೋಟೋವನ್ನು ಪ್ರಕಟಿಸಿ, ಹೊಸ ದಿಲ್ಲಿ ರೈಲು ನಿಲ್ದಾಣದ ಪುನರ್‌ ಅಭಿವೃದ್ಧಿ ಯೋಜನೆಯ ಸುದ್ದಿಯನ್ನು ಪ್ರಕಟಿಸಿದೆ.

2014, ಜೂನ್‌ 24ರಂದು ‘ಡೈಲಿ ಮೇಲ್‌’ ವರದಿಯು, ಕಂಪ್ಯೂಟರ್‌‌ ಮೂಲಕ ಸೃಷ್ಟಿಸಿರುವ ಯೋಜನೆಯ ಮಾದರಿ ಇದೆಂದು ಹೇಳುತ್ತದೆ. “ರೈಲು ನಿಲ್ದಾಣವನ್ನು ಪುನರ್‌ ಅಭಿವೃದ್ಧಿ ಪಡಿಸಲು ಅರೂಪ್‌ ಕನ್ಸಲ್‌ಟೆನ್ಸಿ ನೇಮಕವಾಗುತ್ತಿದೆ. 86 ಹೆಕ್ಟೇರ್‌ಗಳಲ್ಲಿ ನಿಲ್ದಾಣವನ್ನು ಪುನರಾಭಿವೃದ್ಧಿಪಡಿಸಲು ಮತ್ತು 21ನೇ ಶತಮಾನದ ಪ್ರಯಾಣವನ್ನು ಸುಗಮಗೊಳಿಸಲು ಅರುಪ್‌ ಕನ್ಸಲ್‌ಟೆನ್ಸಿ ನೇಮಿಸಲಾಗಿದೆ ಎಂದು ವರದಿ ಹೇಳುತ್ತದೆ. 

ಇಂಡಿಯನ್ ರೈಲ್ವೆ ವೆಬ್‌ಸೈಟ್‌ನಲ್ಲಿ ಹುಡುಕಾಡಿದಾಗ `ಇಂಡಿಯನ್‌ ರೈಲ್ವೇಸ್‌ ವಿಷನ್‌ 2020′ ಎಂಬ ಯೋಜನೆಯ ಫೈಲ್‌ನಲ್ಲೂ ಇದೇ ಫೋಟೋ ಬಳಸಲಾಗಿದೆ. ಈ ದಾಖಲಾತಿಯನ್ನು ರೈಲ್ವೆ ಸಚಿವಾಲಯ 2009ರ ಡಿಸೆಂಬರ್‌‌ನಲ್ಲಿ ಬಿಡುಗಡೆ ಮಾಡಲಾಗಿದೆ.

ಅರೂಪ್‌ ಕನ್ಸಲ್‌ಟೆನ್ಸಿ ವೆಬ್‌ಸೈಟ್‌ನಲ್ಲೂ ಈ ಫೋಟೋ ಇದೆ. ಮಾಸ್ಟರ್‌ ಪ್ಲಾನ್‌, ಡಿಸೈನ್‌ ಹಾಗೂ ನವೀಕರಣಕ್ಕಾಗಿ ಸಿದ್ಧತೆ ಎಂದು ವೆಬ್‌ಸೈಟ್‌ ಹೇಳಿದೆ.

ಅಯೋಧ್ಯೆ ರೈಲು ನಿಲ್ದಾಣದ ಯೋಜನೆ ಹೇಗಿದೆ?

ರೈಲ್ವೆ ಸಚಿವಾಲಯವು ಆಗಸ್ಟ್ 5, 2020ರಂದು ‘ಅಯೋಧ್ಯೆ ರೈಲು ನಿಲ್ದಾಣದ ಪುನರಾಭಿವೃದ್ಧಿಯ ಕಲಾವಿದನ ಕಲ್ಪನೆ’ಯನ್ನು ಯೂಟ್ಯೂಬ್‌ನಲ್ಲಿ ಅಪ್‌ಲೋಡ್‌ ಮಾಡಿದೆ. ಇದು ಹೊಸದಿಲ್ಲಿ ರೈಲು ನಿಲ್ದಾಣದ ಡಿಜಿಟಲ್ ಪರಿಕಲ್ಪನೆಗಿಂತ ಭಿನ್ನವಾಗಿದೆ.

ಕಂಪ್ಯೂಟರ್‌ ಮೂಲಕ ಸೃಷ್ಟಿಸಿರುವ ಹೊಸ ದೆಹಲಿ ರೈಲು ನಿಲ್ದಾಣದ ಪುನಾರಾಭಿವೃದ್ಧಿ ಯೋಜನೆಯ ಫೋಟೋ, ಆಯೋಧ್ಯೆ ರೈಲು ನಿಲ್ದಾಣದ ನವೀಕರಣ ಯೋಜನೆಯಾಗಿಲ್ಲ ಎಂಬುದು ಇಲ್ಲಿ ಸ್ಪಷ್ಟವಾಗುತ್ತದೆ.

ಕೃಪೆ: ಆಲ್ಟ್‌ ನ್ಯೂಸ್‌

ಇದನ್ನೂ ಓದಿ: ಫ್ಯಾಕ್ಟ್‌‌ಚೆಕ್ – ನಟ ಅಮಿತಾಬ್‌ ಬಚ್ಚನ್ ಹಂಚಿರುವ ಗಣೇಶ ಹಬ್ಬದ ಈ ವಿಡಿಯೊ 5 ವರ್ಷ ಹಳೆಯದು!