ಜೆಮ್ಸ್ ಬಾಂಡ್ ಸರಣಿಯ ಏಳು ಚಿತ್ರಗಳಲ್ಲಿ ಗೂಢಾಚಾರಿ ಜೇಮ್ಸ್ ಬಾಂಡ್ ಪಾತ್ರಕ್ಕೆ ಜೀವ ತುಂಬಿದ್ದ ಹಾಲಿವುಡ್ ನಟ ಸೀನ್ ಕಾನೆರಿ ಕೊನೆಯುಸಿರೆಳೆದಿದ್ದಾರೆ. ಜೇಮ್ಸ್ ಬಾಂಡ್ ಹೆಸರಿನಿಂದ ಇಡೀ ಜಗತ್ತಿನಲ್ಲೇ ಹೆಸರುವಾಸಿಯಾಗಿದ್ದ ನಟ ತಮ್ಮ 90ನೇ ವಯಸ್ಸಿನಲ್ಲಿ ಇಹಲೋಕ ತ್ಯಜಿಸಿದ್ದಾರೆ.
ಸ್ಕಾಟ್ಲ್ಯಾಂಡ್ ಮೂಲದವರಾದ ಸಿಯಾನ್ ಕಾನೆರಿ ತಮ್ಮ 90ನೇ ವರ್ಷದ ಹುಟ್ಟುಹಬ್ಬವನ್ನ ಆಗಸ್ಟ್ ತಿಂಗಳಿನಲ್ಲಿ ಆಚರಿಸಿಕೊಂಡಿದ್ದರು. 1962ರಿಂದ 1983ರ ವರೆಗೆ ಏಳು ಬಾಂಡ್ ಚಲನಚಿತ್ರಗಳಲ್ಲಿ ಕಾನೆರಿ ನಟಿಸಿದ್ದರು.
1988 ರಲ್ಲಿ ಸೀನ್ ಕಾನೆರಿ ಅವರ ದಿ ಅನ್ಟಚಬಲ್ ಸಿನಿಮಾದ ಐರಿಶ್ ಪೋಲೀಸ್ ಪೋಷಕ ಪಾತ್ರಕ್ಕಾಗಿ ಆಸ್ಕರ್ ಒಲಿದುಬಂದಿತ್ತು. ಅಲ್ಲದೇ ಎರಡು ಬಾಫ್ತಾ ಮತ್ತು ಮೂರು ಬಾರಿ ಗೋಲ್ಡನ್ ಗ್ಲೋಬ್ ಪ್ರಶಸ್ತಿ ವಿಜೇತರಾಗಿದ್ದರು. ಇದಲ್ಲದೇ ಅನೇಕ ಪ್ರಶಸ್ತಿಗಳನ್ನು ಕಾನೆರಿ ತಮ್ಮದಾಗಿಸಿಕೊಂಡಿದ್ದಾರೆ.
ಕಾನೆರಿ “ದಿ ಹಂಟ್ ಫಾರ್ ರೆಡ್ ಅಕ್ಟೋಬರ್”, “ಇಂಡಿಯಾನಾ ಜೋನ್ಸ್ ಮತ್ತು ದಿ ಲಾಸ್ಟ್ ಕ್ರುಸೇಡ್” ಮತ್ತು “ದಿ ರಾಕ್ 2, ಮರ್ನಿ, ಮರ್ಡರ್ ಆನ್ ದಿ ಓರಿಯೆಂಟ್ ಎಕ್ಸ್ ಪ್ರೆಸ್, ಡ್ರ್ಯಾಗನ್ ಹಾರ್ಟ್, ಫೈಂಡಿಂಗ್ ಫಾರೆಸ್ಟರ್ ಸೇರಿ ಅನೇಕ ಚಿತ್ರಗಳಲ್ಲಿಯೂ ನಟಿಸಿದ್ದಾರೆ. ಸಾಕಷ್ಟು ಚಿತ್ರಗಳಲ್ಲಿ ನಟಿಸಿದ್ದರೂ ಕೂಡ ಜನ ಮಾತ್ರ ಅವರನ್ನು ಜೇಮ್ಸ್ ಬಾಂಡ್ ಎಂದೇ ನೆನಪಿಸಿಕೊಳ್ಳುತ್ತಾರೆ.