ನನ್ನನ್ನು ಕೊಂಡುಕೊಳ್ಳಲು ಯಾರ ಕೈಲೂ ಸಾಧ್ಯವಿಲ್ಲ: ಮಹುವಾ ಮೋಯಿತ್ರಾ ವಿಶೇಷ ಸಂದರ್ಶನ

ಪಶ್ಚಿಮ ಬಂಗಾಳದ ವಿಧಾನಸಭಾ ಚುನಾವಣೆಯಲ್ಲಿ ಭಾರತೀಯ ಜನತಾ ಪಕ್ಷ (ಬಿಜೆಪಿ) ಜಯಭೇರಿ ಬಾರಿಸಿದ ಬೆನ್ನಲ್ಲೇ, ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ಅವರ ಭದ್ರಕೋಟೆ ಧೂಳೀಪಟವಾಗಿದೆ. ಚುನಾವಣಾ ಸೋಲಿನ ನಂತರ ಸಾಲು ಸಾಲು ನಾಯಕರು ಪಕ್ಷ ತೊರೆಯುತ್ತಿರುವುದರಿಂದ, ಮಾಜಿ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ಪ್ರಸ್ತುತ ಅಸೆಂಬ್ಲಿ ಮತ್ತು ಪಾರ್ಲಿಮೆಂಟ್ ಎರಡರಲ್ಲೂ ದೊಡ್ಡ ಮಟ್ಟದ ರಾಜಕೀಯ ಬಿಕ್ಕಟ್ಟನ್ನು ಎದುರಿಸುತ್ತಿದ್ದಾರೆ.

ಪಕ್ಷದ ‘ಬಂಡಾಯಗಾರರು’ ಮಿಂಚಿನ ವೇಗದಲ್ಲಿ ಪಕ್ಷಾಂತರ ಮಾಡುತ್ತಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಇಷ್ಟು ಸುವ್ಯವಸ್ಥಿತವಾಗಿದ್ದ ಟಿಎಂಸಿ ಪಕ್ಷ ಇಷ್ಟು ಬೇಗ ಹೇಗೆ ಹರಿದು ಹಂಚಿಹೋಯಿತು? ಸದಾ ಬೀದಿಗಿಳಿದು ಹೋರಾಡುವ ಹಠವಾದಿ ಮಮತಾ ಬ್ಯಾನರ್ಜಿ, ಮತ್ತೆ ಬಂಗಾಳದ ರಾಜಕೀಯದ ಹೃದಯಭಾಗಕ್ಕೆ ಮರಳಲು ಸಾಧ್ಯವೇ? ಅವರು ತಮ್ಮ ಪಕ್ಷದ ಚಿಹ್ನೆಯನ್ನು ಉಳಿಸಿಕೊಳ್ಳುತ್ತಾರಾ? ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ, ಮಮತಾ ಬ್ಯಾನರ್ಜಿ ತಮ್ಮ ಪರಮಶತ್ರು ಬಿಜೆಪಿಗೆ ಇನ್ನೂ ಪ್ರಬಲ ಪೈಪೋಟಿ ನೀಡಬಲ್ಲರೇ?

ಈ ಎಲ್ಲಾ ಗೊಂದಲಗಳಿಗೆ ‘ದಿ ಕ್ವಿಂಟ್’ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ, ಟಿಎಂಸಿಯ ಫೈರ್‌ಬ್ರಾಂಡ್ ಸಂಸದೆ ಮತ್ತು ಮಮತಾ ಬ್ಯಾನರ್ಜಿ ಅವರ ಪರಮ ಆಪ್ತೆ ಮಹುವಾ ಮೋಯಿತ್ರಾ ಅತ್ಯಂತ ನೇರವಾಗಿ ಉತ್ತರಿಸಿದ್ದಾರೆ. ಪಕ್ಷದ ಒಳಗಿನ ಬೆಳವಣಿಗೆಗಳು, ಟಿಎಂಸಿಯ ಭವಿಷ್ಯ, ಬಂಡಾಯ ನಾಯಕರು, ರಾಮಮಂದಿರದ ‘ದೇಣಿಗೆ ಕಳ್ಳತನ’ದ ಆರೋಪಗಳು ಹಾಗೂ ಆರ್‌ಎಸ್‌ಎಸ್-ಬಿಜೆಪಿಯ “ಫ್ಯಾಸಿಸ್ಟ್” ರಾಜಕೀಯದ ಅಪಾಯಗಳ ಬಗ್ಗೆ ಅವರು ಮುಕ್ತವಾಗಿ ಮಾತನಾಡಿದ್ದಾರೆ. ಆ ಸಂದರ್ಶನದ ಆಯ್ದ ಭಾಗಗಳು ನಾನು ಗೌರಿ.ಕಾಂ ನಲ್ಲಿ.

ಪ್ರಶ್ನೆ: ನೇರವಾಗಿ ವಿಷಯಕ್ಕೆ ಬರೋಣ, ಟಿಎಂಸಿ ಪಕ್ಷ ಸಂಪೂರ್ಣವಾಗಿ ನೆಲಕಚ್ಚಿದೆ. ಹಿರಿಯರು, ಕಿರಿಯರು, ಸಂಸದರು, ಶಾಸಕರು, ಮೇಯರ್‌ಗಳು, ಜಿಲ್ಲಾ ಕೌನ್ಸಿಲರ್‌ಗಳು ಹೀಗೆ ಎಲ್ಲಾ ಹಂತದ ನಾಯಕರು ಬಂಡಾಯವೆದ್ದಿದ್ದಾರೆ. ಇಷ್ಟು ಬೇಗ ಪಕ್ಷ ಹೀಗೆ ಒಡೆದು ಚೂರಾಗಿದ್ದನ್ನು ನೀವು ಹೇಗೆ ವಿವರಿಸುತ್ತೀರಿ?

ಮಹುವಾ ಮೋಯಿತ್ರಾ: ಮೊದಲನೆಯದಾಗಿ, ಇದನ್ನು “ಪಕ್ಷ ಒಡೆದಿದೆ” ಅಥವಾ “ನೆಲಕಚ್ಚಿದೆ” ಎಂದು ಕರೆಯಲು ನಾನು ಒಪ್ಪುವುದಿಲ್ಲ. ಕೇವಲ ಒಂದು ತಿಂಗಳ ಹಿಂದೆಯಷ್ಟೇ ಪಶ್ಚಿಮ ಬಂಗಾಳದಲ್ಲಿ ಶೇ. 41 ರಷ್ಟು ಜನರ ಮತಗಳನ್ನು ಪಡೆದ ಪಕ್ಷ ಇದು. ನಮಗೆ ಬರೋಬ್ಬರಿ 2.6 ಕೋಟಿ ಮತಗಳು ಬಂದಿವೆ. ಇದು ಡೆನ್ಮಾರ್ಕ್ ದೇಶದ ಒಟ್ಟು ಜನಸಂಖ್ಯೆಯ ಅರ್ಧದಷ್ಟಿದೆ. ಇಷ್ಟು ದೊಡ್ಡ ಜನಾಭಿಪ್ರಾಯ ಇರುವ ನಮ್ಮ ಪಕ್ಷದಿಂದ ಈಗ ಹೊರಹೋಗಿರುವುದು ಎಷ್ಟು ಜನ? ಕೇವಲ 20 ಸಂಸದರು, 65 ಶಾಸಕರು, ಒಂದು 10 ಜನ ಮೇಯರ್‌ಗಳು ಮತ್ತು ಇನ್ನೊಂದಷ್ಟು ನಾಯಕರು ಅಷ್ಟೇ. ಅಂದರೆ ಸುಮಾರು 200 ರಿಂದ 250 ಜನ ಪಕ್ಷ ಬಿಟ್ಟಿದ್ದಾರೆ. ಇನ್ನೂ ಸ್ಪಷ್ಟವಾಗಿ ಹೇಳಬೇಕೆಂದರೆ, ಇವರೆಲ್ಲರೂ ಹಣದ ಆಸೆಗೆ ಬಿದ್ದು ಅಥವಾ ಬಿಜೆಪಿಯ ತನಿಖಾ ಸಂಸ್ಥೆಗಳ ದಂಡನೆಗೆ ಹೆದರಿ ತಮ್ಮ ಚರ್ಮ ಉಳಿಸಿಕೊಳ್ಳಲು ಓಡಿಹೋಗಿದ್ದಾರೆ. ಆದರೆ, 2.6 ಕೋಟಿ ಜನರ ಬೆಂಬಲವಿರುವ ಪಕ್ಷವೊಂದು ಕೇವಲ 200-250 ಸ್ವಾರ್ಥಿ ನಾಯಕರು ಬಿಟ್ಟು ಹೋದ ತಕ್ಷಣ ಮುಳುಗಿಹೋಗುವುದಿಲ್ಲ.

ಅದರಲ್ಲೂ ಮಮತಾ ಬ್ಯಾನರ್ಜಿ ಅವರ ವರ್ಚಸ್ಸು ಮತ್ತು ತಳಮಟ್ಟದ ಕಾರ್ಯಕರ್ತರ ರಕ್ತ, ಬೆವರಿನಿಂದ ಕಟ್ಟಿದ ಪಕ್ಷ ಎಂದಿಗೂ ನಾಶವಾಗಲ್ಲ. ನಮ್ಮ ಪಕ್ಷ ಎಂದೂ ಮಧ್ಯಮ ಹಂತದ ನಾಯಕರನ್ನು ನಂಬಿ ಬೆಳೆದಿದ್ದಲ್ಲ. ಈ ಹಿಂದೆ ಇದೇ ಮಾಧ್ಯಮಗಳು ಕಳೆದ 20 ವರ್ಷಗಳಿಂದ “ಟಿಎಂಸಿಯಲ್ಲಿ ಮಮತಾ ಬ್ಯಾನರ್ಜಿ ಒಬ್ಬರೇ ನಾಯಕಿ, ಬಾಕಿಯವರೆಲ್ಲ ಬರೀ ಲ್ಯಾಂಪ್ ಪೋಸ್ಟ್‌ಗಳು” ಎಂದು ದೂರುತ್ತಿದ್ದವು. ಅದೇ ಮಾಧ್ಯಮಗಳು ಈಗ “ದೊಡ್ಡ ದೊಡ್ಡ ನಾಯಕರು ಪಕ್ಷ ಬಿಟ್ಟಿದ್ದಾರೆ” ಎಂದು ಕಣ್ಣೀರು ಸುರಿಸುತ್ತಿವೆ. ನಿನ್ನೆವರೆಗೂ ಮಮತಾ ಬಿಟ್ಟರೆ ಯಾರೂ ಇಲ್ಲ ಎಂದವರು, ಇಂದು ಈ ನಾಯಕರನ್ನು ಇಷ್ಟೊಂದು ದೊಡ್ಡವರನ್ನಾಗಿ ಮಾಡುತ್ತಿರುವುದು ಆಶ್ಚರ್ಯ ತಂದಿದೆ.

ಪ್ರಶ್ನೆ: ಆದರೆ 65 ಶಾಸಕರು ಮತ್ತು 20 ಸಂಸದರು ಪಕ್ಷ ಬಿಟ್ಟಿರುವುದು ‘ಪಕ್ಷಾಂತರ ನಿಷೇಧ ಕಾಯ್ದೆ’ಯ ಮೂರನೇ ಎರಡರಷ್ಟು (Two-Thirds) ಬಹುಮತದ ಪರೀಕ್ಷೆಯಲ್ಲಿ ಗೆದ್ದಂತಾಗುವುದಿಲ್ಲವೇ?

ಮಹುವಾ ಮೋಯಿತ್ರಾ: ಇಲ್ಲಿ ಯಾವುದೇ ‘ಮೂರನೇ ಎರಡರಷ್ಟು’ ಬಹುಮತದ ಪ್ರಶ್ನೆಯೇ ಬರುವುದಿಲ್ಲ. ದಯವಿಟ್ಟು ಕಾನೂನನ್ನು ಸರಿಯಾಗಿ ಅರ್ಥ ಮಾಡಿಕೊಳ್ಳಿ. ಸಂವಿಧಾನದ ಹತ್ತನೇ ಪರಿಚ್ಛೇದದ ಸೆಕ್ಷನ್ 21A ಪ್ರಕಾರ, ಪಕ್ಷಾಂತರ ಮಾಡಿದವರನ್ನು ಅನರ್ಹಗೊಳಿಸಲು ಸ್ಪಷ್ಟ ನಿಯಮಗಳಿವೆ. ಸುಪ್ರೀಂ ಕೋರ್ಟ್ ತೀರ್ಪುಗಳನ್ನು ನೋಡಿದರೆ, ಮೂರನೇ ಎರಡರಷ್ಟು ಬಹುಮತ ಎಂದರೆ ಇಡೀ ‘ಮೂಲ ರಾಜಕೀಯ ಪಕ್ಷದ’ (Total Party) ಮೂರನೇ ಎರಡರಷ್ಟು ಇರಬೇಕೇ ಹೊರತು, ಕೇವಲ ಶಾಸಕಾಂಗ ಪಕ್ಷ ಅಥವಾ ಸಂಸದೀಯ ಪಕ್ಷದ ನಾಯಕರದ್ದಲ್ಲ. 70 ಶೇ. ಶಾಸಕರು ಅಥವಾ ಸಂಸದರು ಹೋದ ತಕ್ಷಣ ಅದು ಕಾನೂನುಬದ್ಧವಾಗಲ್ಲ. ಇಡೀ ಪಕ್ಷದ ಮೂರನೇ ಎರಡರಷ್ಟು ಜನರನ್ನು ಒಟ್ಟುಗೂಡಿಸುವ ತಾಕತ್ತು ಸದ್ಯಕ್ಕೆ ಯಾರಿಗೂ ಇಲ್ಲ. ಪಕ್ಷ ಬಿಟ್ಟ ನಾಯಕರು ಈ ಸುಳ್ಳು ಕಥೆಯನ್ನು ಹರಡುತ್ತಿದ್ದಾರೆ ಮತ್ತು ಮಾಧ್ಯಮಗಳು ಅದನ್ನು ನಂಬಿ ಅವರಿಗೆ ಉಚಿತ ಪ್ರಚಾರ ನೀಡುತ್ತಿವೆ.

ಪ್ರಶ್ನೆ: ಹಾಗಾದರೆ ಈ ಬಂಡಾಯ ನಾಯಕರನ್ನು ನೀವು ಏನೆಂದು ಕರೆಯುತ್ತೀರಿ? ರಾಜಕೀಯ ಅವಕಾಶವಾದಿಗಳೇ? ದೇಶದ್ರೋಹಿಗಳೇ ಅಥವಾ ಹೇಡಿಗಳೇ?

ಮಹುವಾ ಮೋಯಿತ್ರಾ: ನಾನು ಇವರನ್ನು ಮೊದಲು ‘ಬಂಡಾಯಗಾರರು’ ಎಂದು ಕರೆಯುವುದೇ ಇಲ್ಲ. ಏಕೆಂದರೆ ಇತಿಹಾಸದಲ್ಲಿ ‘ಬಂಡಾಯ’ (Rebel) ಎಂಬ ಪದದ ಹಿಂದೆ ಒಂದು ಪವಿತ್ರವಾದ ಉದ್ದೇಶ ಇರುತ್ತದೆ. ಆದರೆ ಈ ನಾಯಕರಲ್ಲಿ ಅಂತಹ ಯಾವುದೇ ಸದಾಶಯವಿಲ್ಲ. ಇತ್ತೀಚೆಗೆ ನಾನು ಕಲ್ಕತ್ತಾ ವಿಶ್ವವಿದ್ಯಾಲಯದ ಪ್ರೊಫೆಸರ್ ಒಬ್ಬರನ್ನು ಭೇಟಿಯಾಗಿದ್ದೆ. ಅವರು ನನಗೆ ಇವರನ್ನು “ಪ್ರಜಾಪ್ರಭುತ್ವದ ಅಪರಾಧಿಗಳು” (Democratic Criminals) ಎಂದು ಕರೆಯಲು ಸಲಹೆ ನೀಡಿದರು. ನಾನು ಖಂಡಿತ ಹಾಗೇ ಕರೆಯುತ್ತೇನೆ.

ಮಾನವೀಯತೆಯ ವಿರುದ್ಧದ ಅಪರಾಧಗಳನ್ನು ವಿಚಾರಣೆ ಮಾಡಲು ಹೇಗೆ ಅಂತರರಾಷ್ಟ್ರೀಯ ನ್ಯಾಯಾಲಯ (ICJ) ಇದೆಯೋ, ಅದೇ ರೀತಿ ಭವಿಷ್ಯದಲ್ಲಿ ಇಂತಹ ಪ್ರಜಾಪ್ರಭುತ್ವದ ಅಪರಾಧಿಗಳ ವಿಚಾರಣೆ ಮಾಡಲು ‘ಜನತಾ ಅದಾಲತ್’ (ಜನರ ನ್ಯಾಯಾಲಯ) ನಡೆಯಲಿದೆ. ಆ ದಿನ ಈ ನಾಯಕರು ಜನರ ತೀರ್ಪಿನ ಮುಂದೆ ಖಂಡಿತ ತಲೆ ಎತ್ತಿ ನಿಲ್ಲಲು ಸಾಧ್ಯವಿಲ್ಲ.

ಪ್ರಶ್ನೆ: ನೀವು ಹಣದ ಆಸೆ ಮತ್ತು ಸಿಬಿಐ/ಇಡಿ ಭೀತಿಯಿಂದ ನಾಯಕರು ಹೋಗುತ್ತಿದ್ದಾರೆ ಎನ್ನುತ್ತೀರಿ. ಆದರೆ ಪಕ್ಷ ಬಿಟ್ಟ ಎಲ್ಲರ ಮೇಲೂ ಯಾವುದೇ ಕೇಸ್‌ಗಳಿಲ್ಲವಲ್ಲ? ಹಾಗಾದರೆ ಅವರು ಹೋಗುತ್ತಿರುವುದಕ್ಕೆ ಕೇವಲ ಹಣವೊಂದೇ ಕಾರಣವೇ?

ಮಹುವಾ ಮೋಯಿತ್ರಾ: ನನಗೂ ಅದೇ ದೊಡ್ಡ ಪ್ರಶ್ನೆ, ಅವರು ಯಾಕೆ ಹೋಗುತ್ತಿದ್ದಾರೆ? ಸಂಸದರ ವಿಷಯವೇ ಬೇರೆ, ಶಾಸಕರ ವಿಷಯವೇ ಬೇರೆ. ಬಂಗಾಳದಲ್ಲಿ ಇದುವರೆಗೆ ಬಿಜೆಪಿ ಆಡಳಿತದಲ್ಲಿ ಇರಲಿಲ್ಲ. ಆದರೆ 2019 ರಲ್ಲಿ ಬಂಗಾಳದ ಜನ 18 ಬಿಜೆಪಿ ಸಂಸದರನ್ನು ಗೆಲ್ಲಿಸಿದ್ದರು, ಅವರು ತಮ್ಮ 5 ವರ್ಷದ ಅವಧಿ ಮುಗಿಸಿದರು. 2024 ರಲ್ಲೂ 12 ಜನ ಗೆದ್ದಿದ್ದಾರೆ. ನಮ್ಮದು ಫೆಡರಲ್ (ಒಕ್ಕೂಟ) ವ್ಯವಸ್ಥೆ. ರಾಜ್ಯದಲ್ಲಿ ಯಾರ ಸರ್ಕಾರ ಇದೆ ಎನ್ನುವುದಕ್ಕೂ, ಸಂಸತ್ತಿನಲ್ಲಿ ನಾವು ಹೊಂದಿರುವ ಸ್ಥಾನಕ್ಕೂ ಸಂಬಂಧವಿಲ್ಲ. ನಾನು 2024 ರಲ್ಲಿ ಟಿಎಂಸಿ ಟಿಕೆಟ್‌ನಿಂದ ಗೆದ್ದು 5 ವರ್ಷಗಳ ಕಾಲ ಸಂಸದೆಯಾಗಿ ಸೇವೆ ಸಲ್ಲಿಸಲು ಜನಾದೇಶ ಪಡೆದಿದ್ದೇನೆ. ಕೇವಲ ಎರಡು ವರ್ಷಗಳ ಹಿಂದೆ ಬಿಜೆಪಿಯನ್ನು ಸೋಲಿಸಿ ಟಿಎಂಸಿ ಅಭ್ಯರ್ಥಿಯಾಗಿ ಗೆದ್ದ ನಾಯಕರನ್ನು ಬಂಗಾಳದ ಜನ ಆರಿಸಿದ್ದು ಬಿಜೆಪಿಯ ಸಿದ್ಧಾಂತಕ್ಕೆ ವಿರುದ್ಧವಾಗಿ.

ಎರಡನೆಯದಾಗಿ, ಚುನಾವಣೆ ನಡೆಯುತ್ತಿದ್ದಾಗ ಇವರೆಲ್ಲರೂ ಟಿಎಂಸಿ ಪರವಾಗಿ ಭರ್ಜರಿ ಪ್ರಚಾರ ಮಾಡುತ್ತಿದ್ದರು. ಆಗೆಲ್ಲ ಈ ಪಕ್ಷದಲ್ಲಿ ಕಳ್ಳರು, ಲೂಟಿಕೋರರು ಇದ್ದಾರೆ ಎಂದು ಇವರಿಗೆ ಅನಿಸಲಿಲ್ಲವೇ? ಒಂದು ವೇಳೆ ಮಮತಾ ಬ್ಯಾನರ್ಜಿ ಅಥವಾ ಅಭಿಷೇಕ್ ಬ್ಯಾನರ್ಜಿ ಅವರ ಮೇಲೆ ಭಿನ್ನಾಭಿಪ್ರಾಯಗಳಿದ್ದರೆ ಮುಕ್ತವಾಗಿ ಹೇಳಬಹುದಿತ್ತು. ನನಗೂ ಹಲವು ವಿಷಯಗಳಲ್ಲಿ ಭಿನ್ನಾಭಿಪ್ರಾಯ ಇತ್ತು, ನಾನು ಅದನ್ನು ಬಹಿರಂಗವಾಗಿಯೇ ಟೀಕಿಸಿದ್ದೇನೆ. ಆದರೆ ಇವರು ಆಗೆಲ್ಲ ಬಾಯಿ ಮುಚ್ಚಿಕೊಂಡಿದ್ದರು ಯಾಕೆ? ಚುನಾವಣೆಗೂ ಮುನ್ನವೇ ಪಕ್ಷಕ್ಕೆ ರಿಸೈನ್ ಮಾಡಿ ಬೇರೆ ಪಕ್ಷದಿಂದ ಸ್ಪರ್ಧಿಸಿದ್ದರೆ ಅದು ಪ್ರಾಮಾಣಿಕ ರಾಜಕೀಯ ಎನಿಸಿಕೊಳ್ಳುತ್ತಿತ್ತು. ಆದರೆ ಈಗ ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಹೋಗುತ್ತಿದ್ದಾರೆ ಎಂದರೆ, ಅದು ಖಂಡಿತ ‘ದೊಡ್ಡ ಮಟ್ಟದ ಹಣದ ಡೀಲ್’ (Big Bucks) ಕಾರಣಕ್ಕೇ ಇರಬೇಕು. ಇದರಿಂದ ಅವರಿಗೆ ಜನರ ಆಶೀರ್ವಾದವಂತೂ ಖಂಡಿತ ಸಿಗಲ್ಲ.

ಪ್ರಶ್ನೆ: ನಿಮಗೆ ಬಿಜೆಪಿಯಿಂದ ಏನಾದರೂ ಆಫರ್‌ಗಳು ಬಂದಿದ್ದವಾ? ಮಹುವಾ ಮೋಯಿತ್ರಾ ಅವರಿಗೂ ಒಂದು ಬೆಲೆ ಕಟ್ಟಬಹುದೇ?

ಮಹುವಾ ಮೋಯಿತ್ರಾ: ನನಗೆ ಇವತ್ತು ಜನರು ಕೇಳುತ್ತಾರೆ, ‘ಮಹುವಾ, ನಿನಗೆ ಈ ರಾಜಕೀಯ ಯಾಕೆ ಬೇಕು?’ ಅಂತ. ಅದು ನಿಜ, ನನಗೆ ಇದರ ಅಗತ್ಯವೇನಿದೆ? ನನಗೆ 51 ವರ್ಷ ವಯಸ್ಸು, ನನ್ನ ವೈಯಕ್ತಿಕ ಜೀವನದಲ್ಲಿ ನಾನು ಆರಾಮವಾಗಿದ್ದೇನೆ. ವರ್ಷದಲ್ಲಿ ಮೂರು ಹೊತ್ತು ನೆಮ್ಮದಿಯ ಊಟ ಮತ್ತು ಒಂದು ರಜಾದಿನದ ಪ್ರವಾಸಕ್ಕೆ ಬೇಕಾದಷ್ಟು ಹಣ ನನ್ನ ಬಳಿ ಇದೆ. ನಾನಿನ್ನು ಕೆಲಸ ಮಾಡದಿದ್ದರೂ ಬದುಕಬಲ್ಲೆ. ಹಾಗಿದ್ದರೂ ನಾನು ಈ ರಾಜಕೀಯದ ಕೆಸರಿನಲ್ಲಿ ಯಾಕಿದ್ದೇನೆ? ಟಿವಿ ಸ್ಟುಡಿಯೋಗಳಲ್ಲಿ ಉದ್ರಿಕ್ತ ಗುಂಪಿನ ನಡುವೆ ಕೂತು ಯಾಕೆ ಕಿರುಚಾಡಬೇಕು?

ಏಕೆಂದರೆ, ನನ್ನ ದೇಶದ ಮಣ್ಣನ್ನು ಬಿಜೆಪಿಯ ಫ್ಯಾಸಿಸ್ಟ್, ದ್ವೇಷಪೂರಿತ ಮತ್ತು ಕ್ರೂರ ರಾಜಕೀಯದ ಕಪಿಮುಷ್ಟಿಯಿಂದ ಮುಕ್ತಗೊಳಿಸುವುದೇ ನನ್ನ ಜೀವನದ ಏಕೈಕ ಧೀಶಕ್ತಿ ಮತ್ತು ಕರ್ತವ್ಯ ಎಂದು ನಾನು ನಂಬಿದ್ದೇನೆ. ಬಿಜೆಪಿಯ ಡೀಲ್ ಕುದುರಿಸುವ ಸಿ.ಎಂ. ರಮೇಶ್ ಅಥವಾ ನಿಶಿಕಾಂತ್ ದುಬೆಯಂತಹ ನಾಯಕರಿಗೆ ನನ್ನ ಬಗ್ಗೆ ಚೆನ್ನಾಗಿ ಗೊತ್ತು. ಸಿ.ಎಂ. ರಮೇಶ್‌ಗೆ ನನ್ನ ತಾಕತ್ತು ಏನು ಎಂಬುದು ತಿಳಿದಿರುವುದರಿಂದ ಅವರು ನನ್ನ ಹತ್ತಿರ ಅಂತಹ ತಪ್ಪು ಪ್ರಯತ್ನವನ್ನು ಎಂದಿಗೂ ಮಾಡುವುದಿಲ್ಲ. ಹಾಗಾಗಿ ಮಹುವಾ ಮೋಯಿತ್ರಾಗೆ ಬೆಲೆ ಕಟ್ಟಲು ಯಾರ ಕೈಲೂ ಸಾಧ್ಯವಿಲ್ಲ. ಬಹುಶಃ ಕೆಲವು ಬ್ರಾಂಡೆಡ್ ಲಿಪ್‌ಸ್ಟಿಕ್‌ಗಳನ್ನು ಬಿಟ್ಟರೆ.

ಪ್ರಶ್ನೆ: ಈಗ ದೇಶದಲ್ಲಿ ಶೈಕ್ಷಣಿಕ ಬಿಕ್ಕಟ್ಟು ಮತ್ತು ರಾಮಮಂದಿರದ ಭ್ರಷ್ಟಾಚಾರದಂತಹ ದೊಡ್ಡ ವಿಷಯಗಳಿವೆ. ಕೇಂದ್ರ ಸರ್ಕಾರವನ್ನು ಇಕ್ಕಟ್ಟಿಗೆ ಸಿಲುಕಿಸಲು ವಿರೋಧ ಪಕ್ಷಗಳಿಗೆ ಸಾಲು ಸಾಲು ಅವಕಾಶಗಳಿವೆ. ಆದರೆ ಸರ್ಕಾರ ಇದೆಲ್ಲವನ್ನೂ ಬದಿಗಿಟ್ಟು ‘ಕ್ಷೇತ್ರ ಮರುವಿಂಗಡಣೆ’ಯ (Delimitation) ಕಡೆಗೆ ಮುನ್ನುಗ್ಗುತ್ತಿದೆ. ಇದು ಹೇಗೆ ಸಾಧ್ಯವಾಗುತ್ತಿದೆ?

ಮಹುವಾ ಮೋಯಿತ್ರಾ: ಇದಕ್ಕೆ ಕಾರಣ ಮಾಧ್ಯಮಗಳಾದ ನಿಮ್ಮ ಪ್ರಮುಖ ಪ್ರಶ್ನೆಗಳೇ ತಪ್ಪು ಹಾದಿಯಲ್ಲಿವೆ. ಕೇಂದ್ರ ಸರ್ಕಾರ ರಾಮಮಂದಿರ ಹಗರಣದಿಂದ ಹೇಗೆ ನುಣುಚಿಕೊಳ್ಳುತ್ತಿದೆ ಎಂದು ಕೇಳುವ ಬದಲು, ಪ್ರಾದೇಶಿಕ ಪಕ್ಷದ 20 ಸಂಸದರು ಯಾಕೆ ಬಿಜೆಪಿ ಸೇರಿದರು ಎಂಬುದೇ ಮಾಧ್ಯಮಗಳಿಗೆ ದೊಡ್ಡ ಸುದ್ದಿಯಾಗಿದೆ. ಭಾರತದ ಪ್ರಜಾಪ್ರಭುತ್ವದ ಆಶಯಗಳಿಗಿಂತ ನಿಮಗೆ ಪಕ್ಷಾಂತರವೇ ಮುಖ್ಯವಾಗಿದೆ. ಬಿಜೆಪಿ ಹೇಗೆ ರಾಜಕೀಯ ದಾಳ ಉರುಳಿಸುತ್ತದೆ ಎಂಬುದು ಇಡೀ ದೇಶಕ್ಕೆ ಗೊತ್ತಿದೆ.

ಇನ್ನು ರಾಮಮಂದಿರದ ವಿಷಯಕ್ಕೆ ಬರೋಣ. 2020 ರ ಫೆಬ್ರವರಿಯಲ್ಲಿ ಸ್ವತಃ ದೇಶದ ಪ್ರಧಾನಮಂತ್ರಿಯವರೇ ‘ರಾಮಮಂದಿರ ಟ್ರಸ್ಟ್’ ಅನ್ನು ಘೋಷಿಸಿದರು. ನೆನಪಿರಲಿ, ಇದೊಂದು ಖಾಸಗಿ ಟ್ರಸ್ಟ್ (Private Trust). ಭಾರತದ ಇತಿಹಾಸದಲ್ಲಿ ಯಾವುದೇ ಖಾಸಗಿ ಟ್ರಸ್ಟ್ ಅನ್ನು ಪ್ರಧಾನಿ ಘೋಷಿಸಿದ ಉದಾಹರಣೆ ಇದೆಯೇ? ಇದನ್ನು ಸಾರ್ವಜನಿಕ ಟ್ರಸ್ಟ್ ಮಾಡುವ ಬದಲು ಖಾಸಗಿ ಟ್ರಸ್ಟ್ ಮಾಡಿದ್ದೇ ಆರ್‌ಟಿಐ (ಮಾಹಿತಿ ಹಕ್ಕು ಕಾಯ್ದೆ) ವ್ಯಾಪ್ತಿಯಿಂದ ಹೊರಗಿಡಲು. ಈ ಟ್ರಸ್ಟ್‌ನಲ್ಲಿರುವ 15 ಜನ ಟ್ರಸ್ಟಿಗಳ ಪೈಕಿ 12 ಜನರನ್ನು ಬಿಜೆಪಿ, ಆರ್‌ಎಸ್‌ಎಸ್ ಮತ್ತು ವಿಎಚ್‌ಪಿ ಒಕ್ಕೂಟವೇ ನೇಮಕ ಮಾಡಿದೆ. ಇದರ ಅಧಿಕೃತ ನೋಟಿಫಿಕೇಶನ್ ಹೊರಡಿಸಿದ್ದು ಕೇಂದ್ರ ಗೃಹ ಸಚಿವಾಲಯ. ಒಂದು ಖಾಸಗಿ ಟ್ರಸ್ಟ್‌ನ ವಿಷಯದಲ್ಲಿ ಕೇಂದ್ರ ಗೃಹ ಸಚಿವಾಲಯ ಹಸ್ತಕ್ಷೇಪ ಮಾಡಿದ್ದು ಯಾಕೆ? ಉತ್ತರ ಎಲ್ಲರಿಗೂ ಗೊತ್ತಿದೆ.

ಕೃಪೆ: ದಿ ಕ್ವಿಂಟ್