ದೇಶದ ಶೈಕ್ಷಣಿಕ ವ್ಯವಸ್ಥೆಯ ಭವಿಷ್ಯವನ್ನು ಗಾಳಿಗೆ ತೂರಿರುವ ಪ್ರಶ್ನೆಪತ್ರಿಕೆ ಸೋರಿಕೆ ಮತ್ತು ಸಾಲು ಸಾಲು ಭ್ರಷ್ಟಾಚಾರದ ವಿರುದ್ಧ ಸಿಡಿದೆದ್ದು, ದೆಹಲಿಯ ಜಂತರ್ ಮಂತರ್ನಲ್ಲಿ ಅನಿರ್ದಿಷ್ಟಾವಧಿ ಉಪವಾಸ ಸತ್ಯಾಗ್ರಹ ನಡೆಸುತ್ತಿರುವ ಪ್ರಖ್ಯಾತ ಹವಾಮಾನ ಮತ್ತು ಸಾಮಾಜಿಕ ಕಾರ್ಯಕರ್ತ ಸೋನಮ್ ವಾಂಗ್ಚುಕ್ ಅವರ ಆರೋಗ್ಯ ಸ್ಥಿತಿ ಅತ್ಯಂತ ಆತಂಕಕಾರಿ ಹಂತ ತಲುಪಿದೆ. ಜೂನ್ 28 ರಿಂದ ಕೇವಲ ನೀರು ಕುಡಿದು ಹೋರಾಟ ನಿರತರಾಗಿರುವ ವಾಂಗ್ಚುಕ್ ಅವರು ಈಗಾಗಲೇ ಬರೋಬ್ಬರಿ 8.5 ಕೆಜಿ ತೂಕ ಕಳೆದುಕೊಂಡಿದ್ದು, ಮುಂದಿನ ಎರಡು ದಿನಗಳಲ್ಲಿ ಅವರ ಪ್ರಾಣಕ್ಕೇ ಅಪಾಯವಾಗುವ ಭೀತಿ ಎದುರಾಗಿದೆ. ಈ ಆಘಾತಕಾರಿ ಬೆಳವಣಿಗೆಯ ಬೆನ್ನಲ್ಲೇ, ಅವರ ಪ್ರಾಣ ರಕ್ಷಣೆಗಾಗಿ ತುರ್ತು ವೈದ್ಯಕೀಯ ಹಸ್ತಕ್ಷೇಪ ಮಾಡಬೇಕೆಂದು ಕೋರಿ ದೆಹಲಿ ಹೈಕೋರ್ಟ್ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆ (PIL) ದಾಖಲಿಸಲಾಗಿದೆ.
ಬಲವಂತವಾಗಿ ಆಹಾರ ನೀಡಿಯಾದರೂ ಜೀವ ಉಳಿಸಿ: ಅರ್ಜಿದಾರರ ಮನವಿ
ಪ್ರಮುಖ ಕಾನೂನು ಸುದ್ದಿ ಜಾಲತಾಣ ‘ಲೈವ್ ಲಾ’ ವರದಿ ಮಾಡಿರುವ ಪ್ರಕಾರ, ಸಾರ್ವಜನಿಕ ಹಿತಾಸಕ್ತಿ ಸಲ್ಲಿಸಿರುವ ವಕೀಲ ಹಾಗೂ ಸಾಮಾಜಿಕ ಕಾರ್ಯಕರ್ತ ರಾಕೇಶ್ ಕುಮಾರ್ ಸೈನಿ ಅವರು ದೆಹಲಿ ಹೈಕೋರ್ಟ್ಗೆ ಈ ಪ್ರಮುಖ ಅರ್ಜಿಯನ್ನು ಸಲ್ಲಿಸಿದ್ದಾರೆ. ತೀವ್ರವಾಗಿ ಜರ್ಜರಿತರಾಗಿರುವ ಸೋನಮ್ ವಾಂಗ್ಚುಕ್ ಅವರನ್ನು ಕೂಡಲೇ ಹತ್ತಿರದ ಸುಸಜ್ಜಿತ ಆಸ್ಪತ್ರೆಗೆ ದಾಖಲಿಸಿ, ಅವರ ಜೀವ ರಕ್ಷಿಸಲು ಬಲವಂತವಾಗಿ ಆಹಾರ ನೀಡುವಂತೆ (Force-feed) ಕೇಂದ್ರ ಮತ್ತು ದೆಹಲಿ ಸರ್ಕಾರಗಳಿಗೆ ತಕ್ಷಣದ ಆದೇಶ ಹೊರಡಿಸಬೇಕು ಎಂದು ಅವರು ನ್ಯಾಯಾಲಯದ ಮೊರೆ ಹೋಗಿದ್ದಾರೆ.
“ದೇಶದ ಅತ್ಯಂತ ಪ್ರಾಮಾಣಿಕ ಮತ್ತು ಸೃಜನಶೀಲ ನಾಗರಿಕನೊಬ್ಬ ಇಡೀ ರಾಷ್ಟ್ರದ ಕಣ್ಣೆದುರೇ ಪ್ರಾಣ ತ್ಯಜಿಸುವ ಸ್ಥಿತಿಗೆ ತಲುಪುತ್ತಿರುವುದು ನಮ್ಮ ಪ್ರಜಾಪ್ರಭುತ್ವದ ವ್ಯವಸ್ಥೆಗೆ ಅತ್ಯಂತ ದುಃಖಕರ ಮತ್ತು ಅಷ್ಟೇ ದುರದೃಷ್ಟಕರ ಸಂಗತಿಯಾಗಿದೆ. ಈ ನಿಟ್ಟಿನಲ್ಲಿ ನ್ಯಾಯಾಲಯವು ಮಧ್ಯಪ್ರವೇಶಿಸಿ ಸರ್ಕಾರಕ್ಕೆ ಕಠಿಣ ಆದೇಶ ನೀಡಬೇಕು.” ಎಂದು ರಾಕೇಶ್ ಕುಮಾರ್ ಸೈನಿ ಕೇಳಿಕೊಂಡಿದ್ದಾರೆ.
ಕಲಾಪ ಬಹಿಷ್ಕಾರದ ನಡುವೆಯೂ ತುರ್ತು ವಿಚಾರಣೆ ಕೈಗೆತ್ತಿಕೊಂಡ ಹೈಕೋರ್ಟ್
ಬುಧವಾರ ಮುಖ್ಯ ನ್ಯಾಯಮೂರ್ತಿ ಡಿ.ಕೆ. ಉಪಾಧ್ಯಾಯ ಮತ್ತು ನ್ಯಾಯಮೂರ್ತಿ ತೇಜಸ್ ಕರಿಯಾ ಅವರ ನೇತೃತ್ವದ ವಿಭಾಗೀಯ ಪೀಠದ ಮುಂದೆ ಈ ಅರ್ಜಿಯ ಪ್ರಸ್ತಾಪ ಬಂದಿತ್ತು. ದೆಹಲಿ ಹೈಕೋರ್ಟ್ನ ಬಾರ್ ಅಸೋಸಿಯೇಷನ್ ಕರೆ ನೀಡಿದ್ದ ನ್ಯಾಯಾಲಯದ ಕಲಾಪದ ಗೈರುಹಾಜರಿಯ (Boycott) ಹಿನ್ನೆಲೆಯಲ್ಲಿ ಯಾವುದೇ ಅಧಿಕಾರಿಗಳಾಗಲಿ ಅಥವಾ ಸರ್ಕಾರದ ಪರ ವಕೀಲರಾಗಲಿ ನ್ಯಾಯಾಲಯದ ಮುಂದೆ ಹಾಜರಿರಲಿಲ್ಲ. ಆದರೆ, ಅರ್ಜಿಯ ಗಂಭೀರತೆಯನ್ನು ಗಮನಿಸಿದ ಪೀಠವು ಈ ಪ್ರಕರಣವನ್ನು ನಿರ್ಲಕ್ಷಿಸಲು ನಿರಾಕರಿಸಿತು.
“ವಿಷಯದ ಗಂಭೀರತೆಯನ್ನು ಪರಿಗಣಿಸಿ, ನಾಳೆಯೇ (ಗುರುವಾರ) ಈ ಅರ್ಜಿಯನ್ನು ವಿಚಾರಣಾ ಪಟ್ಟಿಯಲ್ಲಿ ಸೇರಿಸಿ” ಎಂದು ನ್ಯಾಯಪೀಠವು ಅಧಿಕಾರಿಗಳಿಗೆ ಆದೇಶಿಸಿತು ಎಂದು ಸುದ್ದಿ ಸಂಸ್ಥೆ ಪಿಟಿಐ ವರದಿ ಮಾಡಿದೆ. ಜೊತೆಗೆ, ಈ ಆದೇಶದ ನಕಲು ಪ್ರತಿಯನ್ನು ತಕ್ಷಣವೇ ಹೆಚ್ಚುವರಿ ಸಾಲಿಸಿಟರ್ ಜನರಲ್ (ASG) ಮತ್ತು ದೆಹಲಿ ಸರ್ಕಾರದ ಮುಖ್ಯ ವಕೀಲರಿಗೆ ತಲುಪಿಸಿ ಸಿದ್ಧರಾಗಿರಲು ಕೋರ್ಟ್ ನಿರ್ದೇಶಿಸಿದೆ.
ಶಿಕ್ಷಣ ಇಲಾಖೆಯ ಭ್ರಷ್ಟಾಚಾರದ ವಿರುದ್ಧದ ಕ್ರಾಂತಿ
ಈ ಇಡೀ ಹೋರಾಟದ ಮೂಲ ಇರುವುದು ಯುವಜನರ ಭವಿಷ್ಯವನ್ನು ಕಮರಿಸುತ್ತಿರುವ ದೇಶದ ಶಿಕ್ಷಣ ವ್ಯವಸ್ಥೆಯ ಭ್ರಷ್ಟಾಚಾರದ ವಿರುದ್ಧ. ಪ್ರಶ್ನೆಪತ್ರಿಕೆ ಸೋರಿಕೆ ಮತ್ತು ಶಿಕ್ಷಣ ಇಲಾಖೆಯೊಳಗಿನ ಸಾಲು ಸಾಲು ಆಕ್ರಮಗಳ ನೈತಿಕ ಹೊಣೆ ಹೊತ್ತು ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರು ತಕ್ಷಣವೇ ತಮ್ಮ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಪ್ರತಿಭಟನಾಕಾರರು ಒತ್ತಾಯಿಸುತ್ತಿದ್ದಾರೆ.
ಶಿಕ್ಷಣ ವ್ಯವಸ್ಥೆಯ ಈ ದಯನೀಯ ಸ್ಥಿತಿಯ ವಿರುದ್ಧ ಜೂನ್ 20 ರಿಂದಲೇ ‘ಕಾಕ್ರೋಚ್ ಜನತಾ ಪಕ್ಷ’ (CJP) ಜಂತರ್ ಮಂತರ್ನಲ್ಲಿ ಅನಿರ್ದಿಷ್ಟಾವಧಿ ಧರಣಿ ಆರಂಭಿಸಿತ್ತು.
ದೇಶದ ಯುವ ಸಮುದಾಯದ ಧ್ವನಿಗೆ ಸಾಥ್ ನೀಡಲು ಮುಂದೆ ಬಂದ ಸೋನಮ್ ವಾಂಗ್ಚುಕ್ ಅವರು ಜೂನ್ 28 ರಂದು ಖುದ್ದಾಗಿ ಈ ಸತ್ಯಾಗ್ರಹಕ್ಕೆ ಧುಮುಕಿದರು. ಅಲ್ಲಿಂದ ಇಂದಿನವರೆಗೂ ಯಾವುದೇ ಆಹಾರ ಸೇವಿಸದೆ ಕೇವಲ ಸತ್ಯದ ಬಲದಿಂದ ಹೋರಾಡುತ್ತಿರುವ ವಾಂಗ್ಚುಕ್ ಅವರ ಪ್ರಾಣ ಈಗ ಆಡಳಿತ ವರ್ಗದ ಹಠಮಾರಿ ಧೋರಣೆಯಿಂದಾಗಿ ಸಂಕಟಕ್ಕೆ ಸಿಲುಕಿದೆ.
ಜನಾಂದೋಲನಗಳಿಗೆ ಸ್ಪಂದಿಸದ ಮತ್ತು ಜನಸಾಮಾನ್ಯರ ಜೀವಕ್ಕೆ ಬೆಲೆ ನೀಡದ ಪ್ರಭುತ್ವದ ಕ್ರೌರ್ಯವನ್ನು ಈ ಧರಣಿ ಮತ್ತು ಹೈಕೋರ್ಟ್ ಮೆಟ್ಟಿಲೇರಿರುವ ಈ ಇಡೀ ಪ್ರಕ್ರಿಯೆ ಬಯಲುಮಾಡಿದೆ.
Supreme court intervention is must. It should have voluntarily taken up the case in the interest of the nation.
Should not spare the government which not caring the life of a citizen who is fighting for justice.
This amounts to murder of citizens by the rulers. The responcible statutory bodies are not discharging
their duties as per the constitution instead the bodies have become the agents of BJP and RSS.