ನೂರರ ನೋಟ: ಎಗ್ಗಿಲ್ಲದೆ ನಡೆಯುತ್ತಿರುವ ’ಬಿಜೆಪಿ ಸೇರಿದರೆ ಆರೋಪಮುಕ್ತವಾಗುವ’ ರಾಜಕಾರಣ

ಮೋದಿ ಸರ್ಕಾರ ಶಕ್ತಿಶಾಲಿಗಳಾದ ರಾಜಕಾರಣಿಗಳನ್ನು ಬಗ್ಗುಬಡಿದು ತಮ್ಮ ಅಧೀನರನ್ನಾಗಿ ಮಾಡಿಕೊಳ್ಳುತ್ತಿದೆ. ಮಿಥುನ್ ಚಕ್ರವರ್ತಿ ಮತ್ತು ಶತಾಬ್ದಿ ರೇ ಉದಾಹರಣೆಯನ್ನೇ ತೆಗೆದುಕೊಳ್ಳಿ. ಇವರುಗಳ ಹೆಸರು ಪಶ್ಚಿಮ ಬಂಗಾಳದಲ್ಲಿ ಮನೆ ಮಾತಾಗಿತ್ತು. ಇವರು ನಡೆಸುತ್ತಿದ್ದ ಶಾರದಾ ಚಿಟ್ ಫಂಡ್ ಸ್ಕೀಮ್‌ನಲ್ಲಿ 17 ಲಕ್ಷ ಹೂಡಿಕೆದಾರರು 2461 ಕೋಟಿ ರೂಪಾಯಿಗಳನ್ನು ಹೂಡಿದ್ದರು. ಇವರು ಹುಟ್ಟು ಹಾಕಿದ 200 ಖಾಸಗಿ ಕಂಪೆನಿಗಳು ಭಾಗಿಯಾಗಿದ್ದವು. 16000 ನೌಕರರು ಈ ಕಂಪೆನಿಗಳ ಪರವಾಗಿ ಕಾರ್ಯನಿರ್ವಹಿಸುತ್ತಿದ್ದರು. ವಿಚಾರಣೆ ನಡೆಯುತ್ತಿದ್ದಂತೆ ಮಿಥುನ್ ಚಕ್ರವರ್ತಿ ಭಾರತೀಯ ಜನತಾ ಪಕ್ಷ ಸೇರಿಕೊಂಡರು. ಶತಾಬ್ದಿ ರೇ ತೃಣಮೂಲ ಕಾಂಗ್ರೆಸ್ಸಿನಲ್ಲೇ ಸದಸ್ಯರಾಗಿ ಉಳಿದುಕೊಂಡರು. ಶತಾಬ್ದಿ ರೇ ಅವರ ಆಸ್ತಿಯನ್ನು ಇ.ಡಿ ವಶಪಡಿಸಿಕೊಂಡಿತು. ಯುಪಿಎ ಸರ್ಕಾರದಲ್ಲಿ ರೈಲ್ವೆ ರಾಜ್ಯ ಸಚಿವರಾಗಿದ್ದ ಮುಕುಲ್ ರಾಯ್ ಹಾಗೂ ಅಸ್ಸಾಂನ ಕಾಂಗ್ರೆಸ್ ಸರ್ಕಾರದಲ್ಲಿ ಮಂತ್ರಿಯಾಗಿದ್ದ ಹಿಮಂತ ಬಿಸ್ವಾ ಶರ್ಮಾ ಅವರುಗಳಿಗೂ ಕೇಂದ್ರ ಬೇಹುಗಾರಿಕೆ ಸಂಸ್ಥೆಯ ತನಿಖಾಧಿಕಾರಿಗಳು ಬಿಸಿ ಮುಟ್ಟಿಸಿದರು. ಈ ಮಧ್ಯ ಅವರಿಬ್ಬರೂ ಬಿಜೆಪಿ ಸೇರಿಕೊಂಡರು. ಅದಾದ ನಂತರ ಅವರ ಮೇಲೆ ಏನೂ ಕ್ರಮ ಕೈಗೊಂಡ ಸುದ್ದಿ ಇಲ್ಲ.

ಈ ಪ್ರಕರಣಗಳು ಒಂದು ಅಂಶವನ್ನು ಹೊರಗೆಡುತ್ತದೆ. ನೀವು ಬಿಜೆಪಿಗೆ ಸೇರಿಬಿಟ್ಟರೆ, ಮೋದಿ ಷಾಗಳ ಪಾದ ಹಿಡಿದುಕೊಂಡುಬಿಟ್ಟರೆ, ನೀವು ಎಂತಹ ಘನಘೋರ ಕೃತ್ಯ ಎಸಗಿದ್ದರೂ ನಿಮಗೆ ರಕ್ಷಣೆ ಸಿಗುತ್ತದೆ. ನೀವು ಅವರಿಗೆ ಶರಣಾಗತರಾಗದಿದ್ದರೆ, ನಿಮ್ಮ ಭವಿಷ್ಯಕ್ಕೇ ಕುತ್ತು ಬರುತ್ತದೆ.

ಅಣ್ಣಾ ಹಜಾರೆ ತಮ್ಮ ನೈತಿಕ ಶಕ್ತಿಯ ಮೇಲೆ ಭರವಸೆ ಇಟ್ಟು ಹೋರಾಟ ಮಾಡುವವರು. ಲೋಕಾಯುಕ್ತ ಮಸೂದೆಯನ್ನು ಜಾರಿಗೆ ತರಲು ಒತ್ತಾಯಿಸಿ ಮನಮೋಹನ ಸಿಂಗ್ ಸರ್ಕಾರದ ವಿರುದ್ಧ, ಕ್ರಿಯಾಹೀನ ಪಾರ್ಲಿಮೆಂಟ್ ಸದಸ್ಯರ ವಿರುದ್ಧ ಸತ್ಯಾಗ್ರಹ ಹೂಡಿದರು. ಪಾರ್ಲಿಮೆಂಟಿನಲ್ಲಿ ಹತ್ತಾರು ವರ್ಷಗಳ ಹಿಂದೆ ಮಂಡಿಸಲಾದ ಲೋಕಾಯುಕ್ತ ಮಸೂದೆಯನ್ನು ಚರ್ಚೆಗೆ ತೆಗೆದುಕೊಳ್ಳದೆ ಕಾಲಹರಣ ಮಾಡಿದ ಲೋಕಸಭಾ ಸದಸ್ಯರನ್ನು ಅಣ್ಣಾಹಜಾರೆ ತರಾಟೆಗೆ ತೆಗೆದುಕೊಂಡಿದ್ದರು. ’ಈ ಸದಸ್ಯರು ತಮ್ಮ ಪಾತ್ರವನ್ನೇ ಯೋಗ್ಯವಾಗಿ ನಿರ್ವಹಿಸಿದ್ದರೆ, ಪ್ರಜೆಯಾದ ನಾನು ಸರ್ಕಾರದ ಬಾಗಿಲು ತಟ್ಟುವ ಕೆಲಸ ಮಾಡುತ್ತಿರಲಿಲ್ಲ. ಆದರೆ ನನ್ನ ಪ್ರತಿನಿಧಿಗಳು ನಿಷ್ಕ್ರಿಯರಾದಾಗ ಅದನ್ನು ಪ್ರಶ್ನಿಸುವ ಹಕ್ಕು ಪ್ರಜೆಯಾದ ನನಗಿದೆ’ ಎಂದು ಅಣ್ಣಾ ಹಜಾರೆ ವಾದ ಮಾಡಿದ ಮೇಲೆ ಪ್ರಧಾನಿಗಳು ಅವರಿಗೆ ಗೌರವಕೊಟ್ಟು ಲೋಕಾಯುಕ್ತ ಮಸೂದೆಯನ್ನು ಮಂಡಿಸಿ ಮಸೂದೆಗೆ ಪಾರ್ಲಿಮೆಂಟಿನ ಅನುಮೋದನೆ ಪಡೆದರು.

ಈ ಬಗೆಯ ನೈತಿಕ ಶಕ್ತಿಯಲ್ಲಿ ಪ್ರಧಾನಿ ಮೋದಿ ಮತ್ತು ಗೃಹ ಸಚಿವ ಷಾಗಳಿಗೆ ನಂಬಿಕೆ ಇಲ್ಲ. ಅವರದೇನಿದ್ದರೂ ಕಿರುಕುಳ ಕೊಟ್ಟು ವಿರೋಧಿ ರಾಜಕಾರಣಿಗಳನ್ನು ಶರಣಾಗತರಾಗಿಸುವುದರಲ್ಲೇ ದೃಢವಾದ ನಂಬಿಕೆ. ಅಧಿಕಾರದ ದುರುಪಯೋಗ ಒಂದರಿಂದಲೇ ಸರ್ವಸ್ವವನ್ನೂ ಸಾಧಿಸಿಬಿಡುವೆವೆಂಬ ಅಹಂಕಾರ.
ಯಾರೇ ಮಾಡಬಾರದ್ದನ್ನೆಲ್ಲ ಮಾಡಿದ್ದರೂ, ಅವರು ಯಾವುದೇ ಪಾತಕ ಮಾಡಿದ್ದರೂ, ಅವರು ಬಿಜೆಪಿಗೆ ಶರಣಾಗತರಾದರೆ, ಅದು ಪಾತಕವೇ ಅಲ್ಲ. ಯಾರು ಮೋದಿಯವರನ್ನ ವಿರೋಧಿಸುತ್ತಾರೋ ಶರಣಾಗತರಾಗುವುದಿಲ್ಲವೋ ಅವರು ಮೋದಿ ಷಾಗಳ ದೃಷ್ಟಿಯಲ್ಲಿ ದೇಶದ್ರೋಹಿಗಳು.

ರಫೇಲ್ ಯುದ್ಧ ವಿಮಾನಗಳ ಖರೀದಿಯ ಸಂದರ್ಭದಲ್ಲಿ ಒಬ್ಬ ಖಾಸಗಿ ಭಾರತೀಯ ವ್ಯಕ್ತಿಗೆ ಕೋಟ್ಯಂತರ ರೂಗಳು ಹರಿದುಬರುವಂತೆ ಸರ್ಕಾರ ಮಸಲತ್ತು ಮಾಡಿದೆ ಎಂದು ಒಂದು ಫ್ರೆಂಚ್ ಮೂಲದ ಸುದ್ದಿವಾಹಿನಿ ವರದಿ ಮಾಡಿದೆ.

ರಫೇಲ್ ಯುದ್ಧ ವಿಮಾನಗಳನ್ನು ಕೊಳ್ಳುವ ಜವಾಬ್ದಾರಿಯನ್ನು ಮೊದಲು ಸರ್ಕಾರ ರಕ್ಷಣಾ ಸಚಿವಾಲಯಕ್ಕೆ ವಹಿಸಿತ್ತು. ರಕ್ಷಣಾ ಸಚಿವಾಲಯ ಉನ್ನತ ಸೈನ್ಯಾಧಿಕಾರಿಗಳ ಸಮಿತಿ ರಚಿಸಿ, ಅವರಿಗೆ ರಫೇಲ್ ಕೊಳ್ಳುವ ಬಗೆಗೆ ವ್ಯವಹರಿಸಲು ಅಧಿಕಾರ ನೀಡಿತು. ಅವರು ನಾಲ್ಕಾರು ಸಭೆಗಳನ್ನು ನಡೆಸಿ ವ್ಯವಹಾರ ಕುದುರಿಸುವ ಕೆಲಸ ಮಾಡುತ್ತಿರುವಾಗಲೇ ಮೋದಿಯವರ ಸರ್ಕಾರ ನೇರವಾಗಿ ತಾನೂ ಈ ಡೀಲ್‌ನಲ್ಲಿ ವ್ಯವಹರಿಸಲು ತೊಡಗುತ್ತದೆ. ಬೇಸರಗೊಂಡ ಸೈನ್ಯಾಧಿಕಾರಿಗಳ ಸಮಿತಿ ಬೇಸರಪಟ್ಟುಕೊಂಡು ಇನ್ನು ಮೇಲೆ ಸರ್ಕಾರವೇ ಈ ಸಂಬಂಧ ವ್ಯವಹಾರ ನಡೆಸಲಿ ಎಂದು ಹೇಳಿ ಮಾತುಕತೆಯಲ್ಲಿ ತೊಡಗಿಸಿಕೊಳ್ಳಲು ನಿರಾಕರಿಸಿತು. ಉನ್ನತಾಧಿಕಾರಿಗಳಿಗೆ ವಹಿಸಿದ್ದ ಕೆಲಸದಲ್ಲಿ ಮಧ್ಯೆ ತಲೆಹಾಕಿದ್ದು ತಪ್ಪು ಎಂದು ಮೋದಿಯವರಿಗೆ ಅನಿಸಲೇ ಇಲ್ಲ. ಯುದ್ಧ ವಿಮಾನದ ವಿಚಾರದಲ್ಲಿ ಏನೂ ತಿಳಿವಳಿಕೆ ಇಲ್ಲದ ಅಂಬಾನಿಯ ರಿಲಯನ್ಸ್ ಕಂಪನಿಯನ್ನು ಈ ವ್ಯವಹಾರದಲ್ಲಿ ಒಬ್ಬ ಪಾಲುದಾರರನ್ನಾಗಿಸುವಲ್ಲಿ ಯಶಸ್ವಿಯಾದರು. ವಿಮಾನ ನಿರ್ಮಾಣದಲ್ಲೇ ನಿರತವಾಗಿರುವ ರಕ್ಷಣಾ ಇಲಾಖೆಯ ಭಾಗವಾಗಿರುವ ಹಿಂದೂಸ್ತಾನ್ ಏರ್ ಕ್ರಾಫ್ಟ್‌ನವರು (ಹೆಚ್‌ಎಎಲ್) ತಮಗೆ ಈ ವಿಮಾನಗಳ ನಿರ್ಮಾಣದ ಕೆಲಸವನ್ನು ವಹಿಸುವುದಾದರೆ ಯುದ್ಧ ವಿಮಾನಗಳನ್ನು ತಯಾರಿಸಿಕೊಡುವುದಾಗಿ ನಿವೇದಿಸಿಕೊಂಡರೂ ಅದನ್ನು ಮೋದಿ ಸರ್ಕಾರ ತಳ್ಳಿಹಾಕಿತು.

ಈಗ ಈ ವ್ಯವಹಾರದಲ್ಲಿ ಭಾರತೀಯರೊಬ್ಬರಿಗೆ ಅಪಾರ ಹಣ ದೊರೆಯುವಂತೆ ಹುನ್ನಾರ ಮಾಡಿದೆಯೆಂದು ಆರೋಪಿಸಿ ಸರ್ವೋಚ್ಚ ನ್ಯಾಯಾಲಯಕ್ಕೆ ದೂರು ಸಲ್ಲಿಸಲಾಗಿದೆ.

ಈ ಪ್ರಮುಖ ಪ್ರಕರಣದ ತನಿಖೆಯನ್ನು ಏಪ್ರಿಲ್ 24ರಂದು ನಿವೃತ್ತರಾದ ಮುಖ್ಯನ್ಯಾಯಾಧೀಶರ ನೇತೃತ್ವದ ಪೀಠವೇ ವಿಚಾರಣೆಗೆ ತೆಗೆದುಕೊಂಡಿತ್ತು. ಈಗ ಬೊಬ್ಡೆ ಅವರು ನಿವೃತ್ತರಾಗಿದ್ದು ಮುಂದಿನ ಮುಖ್ಯ ನ್ಯಾಯಮೂರ್ತಿಗಳು ಈ ವಿಚಾರಣೆಯ ನೇತೃತ್ವ ವಹಿಸುತ್ತಾರೆಯೇ ಕಾದು ನೋಡಬೇಕಿದೆ.

(ಇದು ಎಚ್ ಎಸ್ ದೊರೆಸ್ವಾಮಿಯವರು ಮೇ 5ರ ನ್ಯಾಯಪಥ ಸಂಚಿಕೆಗೆ ಬರೆದಿದ್ದ ಅಂಕಣ ಬರಹ)