ಪಶ್ಚಿಮ ಬಂಗಾಳದಲ್ಲಿ ಸುವೇಂದು ಅಧಿಕಾರಿ ನೇತೃತ್ವದಲ್ಲಿ ಬಿಜೆಪಿ ತನ್ನ ಮೊದಲ ಸರ್ಕಾರವನ್ನು ರಚಿಸಿದ ಕೆಲವೇ ದಿನಗಳಲ್ಲಿ, ಪಕ್ಷದ ಶಾಸಕ ರಿತೇಶ್ ತಿವಾರಿ ಅವರು ಮಾಡಿರುವ ಭಾಷಣವೊಂದು ಸಾಮಾಜಿಕ ಮಾಧ್ಯಮಗಳಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
“ಪಶ್ಚಿಮ ಬಂಗಾಳದ ಈ 74 ವರ್ಷಗಳ ಚುನಾವಣಾ ಇತಿಹಾಸದಲ್ಲೇ, ನನ್ನ ಕ್ಷೇತ್ರದಲ್ಲಿ ಒಬ್ಬನೇ ಒಬ್ಬ ಮುಸ್ಲಿಮನ ಮತ ಪಡೆಯದ ಮೊದಲ ಶಾಸಕ ಬಹುಶಃ ನಾನೇ ಇರಬಹುದು. ಹಾಗಾಗಿ, ನನಗೆ ಮತ ಹಾಕಿದವರಿಗೆ ಮಾತ್ರ ನನ್ನ ಮೇಲೆ ಹಕ್ಕಿರುತ್ತದೆ. ನಮಗೆ ಮತ ಹಾಕದವರ ಬಳಿ ನಾವು ವೋಟ್ ಕೇಳಲು ಹೋಗಿರಲಿಲ್ಲ,” ಎಂದು ತಿವಾರಿ ವೈರಲ್ ವಿಡಿಯೋದಲ್ಲಿ ಹೇಳುತ್ತಿರುವುದು ಕೇಳಿಬಂದಿದೆ.
“ಇವತ್ತು, ಬಾಬಾ ಭೋಲೇನಾಥನ ಸಾಕ್ಷಿಯಾಗಿ ನಾನು ಪ್ರಮಾಣ ಮಾಡುತ್ತೇನೆ, ಮುಂಬರುವ ಐದು ವರ್ಷಗಳಲ್ಲಿ ನಾನು ಅವರಿಗಾಗಿ (ಮುಸ್ಲಿಮರಿಗಾಗಿ) ಒಂದು ಕೆಲಸವನ್ನೂ ಮಾಡಿಕೊಡುವುದಿಲ್ಲ. ಅವರಿಗೆ ಯಾವುದೇ ಪ್ರಮಾಣಪತ್ರವನ್ನು (ಸರ್ಟಿಫಿಕೇಟ್) ನೀಡುವುದಿಲ್ಲ. ಇದನ್ನು ನಾನು ಲೈವ್ನಲ್ಲೇ ಹೇಳುತ್ತಿದ್ದೇನೆ. ಬೇರೆಯವರು ಏನು ಹೇಳುತ್ತಾರೆ ಅಥವಾ ಯೋಚಿಸುತ್ತಾರೆ ಎಂಬುದರ ಬಗ್ಗೆ ನಾನು ತಲೆಕೆಡಿಸಿಕೊಳ್ಳುವುದಿಲ್ಲ. ಮೋದಿಜಿಯವರು ‘ಸಬ್ಕಾ ಸಾತ್, ಸಬ್ಕಾ ವಿಕಾಸ್’ ಎನ್ನುತ್ತಾರೆ; ನಾನು ಅದನ್ನು ಒಪ್ಪುತ್ತೇನೆ, ಅವರೇ ನನ್ನ ನಾಯಕ. ಆದರೆ ಈ ಚುನಾವಣೆಯ ಸಂದರ್ಭದಲ್ಲಿ ಅವರು ಅದಕ್ಕೆ ಮತ್ತೊಂದು ವಾಕ್ಯವನ್ನು ಸೇರಿಸಿದ್ದಾರೆ: ‘ಸಬ್ಕಾ ಹಿಸಾಬ್’ (ಎಲ್ಲರ ಲೆಕ್ಕ ಚುಕ್ತಾ). ಅದು ಹಾಗೆಯೇ ಇರಬೇಕಲ್ಲವೇ?” ಎಂದು ಅವರು ಭಾಷಣದಲ್ಲಿ ಹೇಳಿದ್ದಾರೆ.
ಇತ್ತೀಚೆಗೆ ನಡೆದ ವಿಧಾನಸಭಾ ಚುನಾವಣೆಯಲ್ಲಿ ಕಾಶಿಪುರ-ಬೆಲ್ಗಾಚಿಯಾ ಕ್ಷೇತ್ರದಿಂದ ಸ್ಪರ್ಧಿಸಿದ್ದ ತಿವಾರಿ, ತೃಣಮೂಲ ಕಾಂಗ್ರೆಸ್ನ ಪ್ರಭಾವಿ ನಾಯಕ ಅತಿನ್ ಘೋಷ್ ಅವರನ್ನು 1,651 ಮತಗಳ ಅಲ್ಪ ಅಂತರದಿಂದ ಸೋಲಿಸಿ ಜಯಗಳಿಸಿದ್ದರು. ಆದರೆ, 2016 ಮತ್ತು 2021ರ ಚುನಾವಣೆಯಲ್ಲಿ ಇದೇ ಕ್ಷೇತ್ರದಲ್ಲಿ ತೃಣಮೂಲ ಕಾಂಗ್ರೆಸ್ ಭಾರಿ ಬಹುಮತದೊಂದಿಗೆ ಗೆದ್ದಿತ್ತು.
“ಟಿಎಂಸಿ ಇಸ್ಲಾಮಿಕ್ ಆಡಳಿತ ತರಲು ಬಯಸಿತ್ತು”
ಮೇ 11 ರಂದು ರಿತೇಶ್ ತಿವಾರಿ ಅವರ ಅಧಿಕೃತ ಫೇಸ್ಬುಕ್ ಪೇಜ್ನಲ್ಲಿ ಪೋಸ್ಟ್ ಮಾಡಲಾದ 20 ನಿಮಿಷಗಳ ಸಂಪೂರ್ಣ ಲೈವ್ ವಿಡಿಯೋವನ್ನು ಪರಿಶೀಲಿಸಿದಾಗ ಈ ಅಂಶಗಳು ಬೆಳಕಿಗೆ ಬಂದಿವೆ. ವಿಡಿಯೋದ 15:44 ನಿಮಿಷದ ಅವಧಿಯಲ್ಲಿ ವೈರಲ್ ಆಗಿರುವ ಆ ವಿವಾದಾತ್ಮಕ ಮಾತುಗಳು ಶುರುವಾಗುತ್ತವೆ. ತಾನು ಮುಸ್ಲಿಮರಿಗಾಗಿ ಕೆಲಸ ಮಾಡುವುದಿಲ್ಲ ಎಂದು ತಿವಾರಿ ಹೇಳುತ್ತಿದ್ದಂತೆ, ಅಲ್ಲಿದ್ದ ಜನಸಮೂಹ ಜೋರಾಗಿ ಚಪ್ಪಾಳೆ ತಟ್ಟಿ ಸಂಭ್ರಮಿಸುವುದು ವಿಡಿಯೋದಲ್ಲಿ ದಾಖಲಾಗಿದೆ.
ಭಾಷಣದ ಉದ್ದಕ್ಕೂ ‘ಲವ್ ಜಿಹಾದ್’ ಕುರಿತು ಮಾತನಾಡಿದ ತಿವಾರಿ, ಹೆಣ್ಣುಮಕ್ಕಳಿಗೆ ಬಾಲ್ಯದಿಂದಲೇ ಮುಸ್ಲಿಂ ಮನೆಗಳಿಗೆ ಹೋಗದಂತೆ ಕಲಿಸಬೇಕು ಎಂದಿದ್ದಾರೆ. ಅಲ್ಲದೆ, ತೃಣಮೂಲ ಕಾಂಗ್ರೆಸ್ನ ಧ್ವಜ ಹಿಡಿದವರು ಪಶ್ಚಿಮ ಬಂಗಾಳದಲ್ಲಿ “ಇಸ್ಲಾಮಿಕ್ ಆಡಳಿತ” ತರಲು ಬಯಸಿದ್ದರು ಎಂದು ಆರೋಪಿಸಿದ್ದಾರೆ.
ವಿಡಿಯೋದ 8:35 ನಿಮಿಷದ ಅವಧಿಯಲ್ಲಿ ತಿವಾರಿ ಹೀಗೆ ಹೇಳುತ್ತಾರೆ: “ಇದು ಕೇವಲ ಮತ್ತೊಂದು ಸಾಧಾರಣ ಚುನಾವಣೆಯಾಗಿರಲಿಲ್ಲ. ಈ ರಾಜ್ಯವು 1952 ರಿಂದಲೂ ಚುನಾವಣೆಗಳನ್ನು ನೋಡುತ್ತಿದೆ. ಇವತ್ತಿನ 18 ವರ್ಷ ಮೇಲ್ಪಟ್ಟ ಯುವಕರು ನಮ್ಮಲ್ಲಿ ಜನಸಂಖ್ಯಾ ಹಂಚಿಕೆ (ಡೆಮೋಗ್ರಫಿ) ಹೇಗೆ ಬದಲಾಗುತ್ತಿದೆ ಎಂಬುದನ್ನು ಕಲಿಯಬೇಕು. ಜನಸಂಖ್ಯಾ ಬದಲಾವಣೆ ಎಂದರೆ ಕೇವಲ ಆರ್ಥಿಕ ಅಥವಾ ಲಿಂಗ ತಾರತಮ್ಯವಲ್ಲ. ಆರ್ಥಿಕ ಅಸಮಾನತೆಯನ್ನು ಮುಂದಿನ ದಿನಗಳಲ್ಲಿ ಸರಿಪಡಿಸಬಹುದು. ಈ ಹಿಂದೆ ಇದ್ದ ಲಿಂಗ ತಾರತಮ್ಯವನ್ನು ಸಮಾಜವು ಜಾಗೃತಗೊಂಡು ನಿರ್ಮೂಲನೆ ಮಾಡಿದೆ. ಹೆಣ್ಣು ಭ್ರೂಣ ಹತ್ಯೆಗಳ ಸಂಖ್ಯೆ ಕಡಿಮೆಯಾಗಿದೆ. ನನಗೂ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ, ಗಂಡು ಮಗನಿಲ್ಲ ಎಂಬ ಕೊರಗಿಲ್ಲ. ಲಿಂಗ ತಾರತಮ್ಯದಿಂದ ನಮಗೆ ಸ್ವಾತಂತ್ರ್ಯ ಸಿಕ್ಕಿದೆ. ಆದರೆ ಈಗ ನಾವು ನಮ್ಮ ಗಮನವನ್ನು ಜನಸಂಖ್ಯಾ ಬದಲಾವಣೆಯತ್ತ ಹರಿಸಬೇಕಾಗಿದೆ. ತಂತ್ರಜ್ಞಾನದ ಸಹಾಯದಿಂದ ಪ್ರೀತಿಯ ಸುಳ್ಳು ಭರವಸೆಗಳನ್ನು ನೀಡಿ ನಮ್ಮ ಹೆಣ್ಣುಮಕ್ಕಳನ್ನು ಮತ್ತು ಸಹೋದರಿಯರನ್ನು ಹೇಗೆ ಪ್ರೇಮದ ಬಲೆಯಲ್ಲಿ ಬೀಳಿಸಲಾಗುತ್ತಿದೆ, ಈ ಜಿಹಾದಿಗಳು ಹೇಗೆ ದಾಳಿ ಮಾಡುತ್ತಿದ್ದಾರೆ ಎಂಬುದರ ಬಗ್ಗೆ ಮಹಿಳೆಯರು ಹೆಚ್ಚು ಜಾಗೃತರಾಗಬೇಕಾಗಿದೆ.”
ಮುಂದುವರಿದು ಮಾತನಾಡಿದ ಅವರು, “ಯಾವ ಮಹಿಳೆಯೂ ಮುಸ್ಲಿಮನ ಮನೆಗೆ ಹೋಗಬಾರದು ಎಂಬ ಮುಖ್ಯ ವಿಷಯವನ್ನು ನಾವು ಗುರುತಿಸಬೇಕು. ಆದರೆ ಜನರು ಭಯದಿಂದ ಇದನ್ನು ಬಹಿರಂಗವಾಗಿ ಹೇಳುವುದಿಲ್ಲ. ಇದನ್ನು ನಾವು ತಡೆಯಲು ಸಾಧ್ಯವಿಲ್ಲ, ಆದ್ದರಿಂದ ಈಗ ಇದರ ಬಗ್ಗೆ ಬಹಿರಂಗವಾಗಿ ಮಾತನಾಡುವ, ಆತ್ಮವಿಶ್ವಾಸ ಮೂಡಿಸುವ ಮತ್ತು ಬಾಲ್ಯದಿಂದಲೇ ಈ ವಿಷಯಗಳ ಬಗ್ಗೆ ಅವರಿಗೆ ಅರಿವು ಮೂಡಿಸುವ ಸಮಯ ಬಂದಿದೆ. (ಚುನಾವಣೆಗೆ ಮುಂಚೆ) ನಾನು ಅಲ್ಲಿ ಟಿಎಂಸಿ ಧ್ವಜ ಹಿಡಿದು ಕುಳಿತಿರುವ ಜನರನ್ನು ನೋಡಿದಾಗ, ಅವರೇನೂ ವಿಶೇಷ ವ್ಯಕ್ತಿಗಳಾಗಿರಲಿಲ್ಲ, ಅನ್ವರ್ ಖಾನ್ ಅವರ ವಂಶಸ್ಥರಾಗಲಿ ಅಥವಾ ರಾಜಮನೆತನದವರಾಗಲಿ ಆಗಿರಲಿಲ್ಲ; ಅವರು ನಿಮ್ಮ ಮತ್ತು ನನ್ನಂತೆಯೇ ಸಾಮಾನ್ಯ ಜನರಾಗಿದ್ದರು. ಅವರು ಯಾರ ಪರವಾಗಿ ನಿಂತಿದ್ದರು? ಪಶ್ಚಿಮ ಬಂಗಾಳಕ್ಕೆ ಇಸ್ಲಾಮಿಕ್ ಆಡಳಿತವನ್ನು ತರಲು ಬಯಸುವವರ ಧ್ವಜವನ್ನು ಅವರು ಬೀಸುತ್ತಿದ್ದರು. ಕಳೆದ ಐದು ವರ್ಷಗಳಲ್ಲಿ ಟಿಎಂಸಿ ಧ್ವಜ ಬೀಸುತ್ತಾ ನಿಮಗೆ ಕಿರುಕುಳ ನೀಡಿದವರನ್ನು ಈಗ ಗುರುತಿಸಿ ಸಮಾಜದಿಂದ ಬಹಿಷ್ಕರಿಸುವ ಸಮಯ ಬಂದಿದೆ,” ಎಂದಿದ್ದಾರೆ.
ಮಾಜಿ ಉಪರಾಷ್ಟ್ರಪತಿ ಹಮೀದ್ ಅನ್ಸಾರಿ ತೀವ್ರ ತರಾಟೆ
‘ದಿ ವೈರ್’ (The Wire) ಮಾಧ್ಯಮಕ್ಕಾಗಿ ಕರಣ್ ಥಾಪರ್ ಅವರಿಗೆ ನೀಡಿದ ಸಂದರ್ಶನದಲ್ಲಿ ಮಾಜಿ ಉಪರಾಷ್ಟ್ರಪತಿ ಹಮೀದ್ ಅನ್ಸಾರಿ ಅವರು ರಿತೇಶ್ ತಿವಾರಿ ಅವರ ಕಾಮೆಂಟ್ಗಳನ್ನು ಕಟುವಾಗಿ ಟೀಕಿಸಿದ್ದಾರೆ. ಇದು ಸಂಪೂರ್ಣ ಅಸಾಂವಿಧಾನಿಕ ಮತ್ತು ಪ್ರಜಾಪ್ರಭುತ್ವದ ಆಶಯಕ್ಕೆ ವಿರುದ್ಧವಾದದ್ದು ಎಂದು ಅವರು ಬಣ್ಣಿಸಿದ್ದಾರೆ.
“ಗೆದ್ದ ಪಕ್ಷದ ಸಿದ್ಧಾಂತವೇ ಇದಾಗಿದ್ದರೆ, ನಾವು ನಡೆಸುತ್ತಿದ್ದೇವೆ ಎಂದು ಹೇಳಿಕೊಳ್ಳುವ ಇಡೀ ವ್ಯವಸ್ಥೆಯ ಮೇಲೆಯೇ ಇದು ಅತ್ಯಂತ ದುರದೃಷ್ಟಕರ ಕಲೆಯಾಗಿದೆ. ನಾವು ಪ್ರಜಾಪ್ರಭುತ್ವ ಎಂದು ನಾಟಕವಾಡುತ್ತೇವೆ, ಸಂವಿಧಾನದ ಮೇಲೆ ಪ್ರಮಾಣ ಮಾಡುತ್ತೇವೆ. ಆ ಸಂವಿಧಾನದ ಮೊದಲ ಪುಟವಾದ ಪ್ರಸ್ತಾವನೆಯಲ್ಲಿ (Preamble) ಕೆಲವು ಮೂಲಭೂತ ತತ್ವಗಳನ್ನು ಸ್ಪಷ್ಟವಾಗಿ ಹೇಳಲಾಗಿದೆ. ಇವರ ಈ ಹೇಳಿಕೆ ಆ ತತ್ವಗಳಲ್ಲಿ ಯಾವುದಕ್ಕಾದರೂ ಹೊಂದಿಕೆಯಾಗುತ್ತದೆಯೇ?” ಎಂದು ಅನ್ಸಾರಿ ಪ್ರಶ್ನಿಸಿದ್ದಾರೆ.
“ನಾವು ಒಪ್ಪಿಕೊಳ್ಳುವ ಸಂವಿಧಾನ ಮತ್ತು ಅದರ ಪ್ರಸ್ತಾವನೆಯ ಮೇಲೆ ನೀವು ಪ್ರಮಾಣ ಮಾಡುವುದಾದರೆ, ಒಬ್ಬ ಪ್ರಜೆ ಮತ್ತು ಇನ್ನೊಬ್ಬ ಪ್ರಜೆಯ ನಡುವೆ ತಾರತಮ್ಯ ಮಾಡಲು ನಿಮಗೆ ಸಾಧ್ಯವಿಲ್ಲ,” ಎಂದಿದ್ದಾರೆ.
“ನೀವು ನಿಮ್ಮ ದೇಶದ ಶೇಕಡಾ 15 ರಷ್ಟು ಜನಸಂಖ್ಯೆಯನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸುತ್ತೀರಾ? ಭ್ರಾತೃತ್ವ (Fraternity) ಎಂದರೆ ಇದೇನಾ? ಸಂವಿಧಾನದ ಪ್ರಸ್ತಾವನೆಯ ಕೊನೆಯ ಪದದ ಅರ್ಥ ಇದೇನಾ? ದೇಶದ ಶೇಕಡಾ 15 ರಷ್ಟು ಜನಸಂಖ್ಯೆಯ ಬಗ್ಗೆ ನಮಗೆ ಕಾಳಜಿಯಿಲ್ಲ ಎಂದು ಯಾವುದೇ ರಾಜಕೀಯ ಪಕ್ಷ ಗಂಭೀರವಾಗಿ ಹೇಳಲು ಸಾಧ್ಯವೇ? ಹಾಗೆ ಮಾಡಲು ಸಾಧ್ಯವೇ ಇಲ್ಲ… ಮುಸ್ಲಿಮರು ಈ ದೇಶದ ಅತಿ ದೊಡ್ಡ ಅಲ್ಪಸಂಖ್ಯಾತ ಸಮುದಾಯವಾಗಿದ್ದಾರೆ. ಇತರ ಅಲ್ಪಸಂಖ್ಯಾತರಾದ ಕ್ರಿಶ್ಚಿಯನ್ನರು, ಸಿಖ್ಖರು ಮತ್ತು ಇತರರನ್ನು ಸೇರಿಸಿದರೆ ಅವರು ಭಾರತದ ಜನಸಂಖ್ಯೆಯ ಶೇಕಡಾ 20 ರಷ್ಟಾಗುತ್ತಾರೆ, ಅಂದರೆ ಜನಸಂಖ್ಯೆಯ ಐದನೇ ಒಂದು ಭಾಗ. ಈ ಐದನೇ ಒಂದು ಭಾಗದ ಜನರನ್ನು ಸಂಪೂರ್ಣವಾಗಿ ಕಡೆಗಣಿಸಿ ನೀವು ಪ್ರಜಾಪ್ರಭುತ್ವವನ್ನು ನಡೆಸಲು ಸಾಧ್ಯವಿಲ್ಲ. ನೀವು ಬೇರೆ ಯಾವುದೇ ರೀತಿಯ ಆಡಳಿತವನ್ನು ನಡೆಸಬಹುದು, ಆದರೆ ಪ್ರಜಾಪ್ರಭುತ್ವವನ್ನಂತೂ ಅಲ್ಲ,” ಎಂದು ಹಮೀದ್ ಅನ್ಸಾರಿ ಖಾರವಾಗಿ ಹೇಳಿದ್ದಾರೆ.
ಚುನಾವಣೆಯಲ್ಲಿ ಗೆದ್ದ ನಂತರ ಜನಪ್ರತಿನಿಧಿಯೊಬ್ಬರು ತಮಗೆ ಮತ ಹಾಕದ ಒಂದು ನಿರ್ದಿಷ್ಟ ಸಮುದಾಯವನ್ನು ಬಹಿಷ್ಕರಿಸುವುದಾಗಿ ಮತ್ತು ಅವರಿಗಾಗಿ ಯಾವುದೇ ಸಾಂವಿಧಾನಿಕ ಜವಾಬ್ದಾರಿಗಳನ್ನು ನಿಭಾಯಿಸುವುದಿಲ್ಲ ಎಂದು ಬಹಿರಂಗವಾಗಿ ಶಪಥ ಮಾಡಿರುವುದು ಭಾರತೀಯ ಪ್ರಜಾಪ್ರಭುತ್ವದ ಆಶಯಕ್ಕೆ ವಿರುದ್ದವಾಗಿದೆ.
ಭಾರತದ ಸಂವಿಧಾನವು ಯಾವುದೇ ಜನಪ್ರತಿನಿಧಿಗೆ ಜಾತಿ, ಧರ್ಮ, ಲಿಂಗ ಅಥವಾ ರಾಜಕೀಯ ಒಲವಿನ ಆಧಾರದ ಮೇಲೆ ತಾರತಮ್ಯ ಮಾಡಲು ಅನುಮತಿ ನೀಡುವುದಿಲ್ಲ. ಚುನಾವಣೆಯ ಕಣ ಮುಗಿದ ತಕ್ಷಣ, ಗೆದ್ದ ಅಭ್ಯರ್ಥಿಯು ಕೇವಲ ತನಗೆ ಮತ ನೀಡಿದವರಿಗಷ್ಟೇ ಅಲ್ಲ, ಇಡೀ ಕ್ಷೇತ್ರದ ಎಲ್ಲಾ ನಾಗರಿಕರಿಗೂ ಶಾಸಕನಾಗಿರುತ್ತಾನೆ.
ಮಾಜಿ ಉಪರಾಷ್ಟ್ರಪತಿ ಹಮೀದ್ ಅನ್ಸಾರಿ ಅವರು ಹೇಳಿದಂತೆ, ದೇಶದ ಜನಸಂಖ್ಯೆಯ ಐದನೇ ಒಂದು ಭಾಗವನ್ನು ಹೊಂದಿರುವ ಅಲ್ಪಸಂಖ್ಯಾತರನ್ನು ಸಂಪೂರ್ಣವಾಗಿ ಕಡೆಗಣಿಸಿ ಅಥವಾ ಬಹಿಷ್ಕರಿಸಿ ಯಾವುದೇ ಪ್ರಜಾಪ್ರಭುತ್ವ ದೇಶ ಮುನ್ನಡೆಯಲು ಸಾಧ್ಯವಿಲ್ಲ. ರಾಜಕೀಯ ಪಕ್ಷಗಳು ಮತ್ತು ಜನಪ್ರತಿನಿಧಿಗಳು ಕೇವಲ ಅಧಿಕಾರದ ಅಮಲಿನಲ್ಲಿ ಅಥವಾ ಬಹುಸಂಖ್ಯಾತರ ಓಲೈಕೆಗಾಗಿ ಸಾಂವಿಧಾನಿಕ ನೈತಿಕತೆ ಮತ್ತು ಸೌಹಾರ್ದತೆಯನ್ನು ಬಲಿಗೊಟ್ಟರೆ, ಅದು ಸಮಾಜದಲ್ಲಿ ಶಾಶ್ವತ ಬಿರುಕನ್ನು ಸೃಷ್ಟಿಸುತ್ತದೆ. ಅಭಿವೃದ್ಧಿ ಎಂಬುದು ಎಲ್ಲರನ್ನೂ ಒಳಗೊಂಡಿರಬೇಕೇ ಹೊರತು, ಸೇಡಿನ ರಾಜಕಾರಣದ ಸಾಧನವಾಗಬಾರದು.
