ಕರ್ನಾಟಕದಲ್ಲಿ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ಭಾಗವಾಗಿ ಮತದಾರರ ಪಟ್ಟಿಯಿಂದ ಈಗಾಗಲೇ ಹೊರಗಿಟ್ಟಿರುವ 1.08 ಕೋಟಿ (1,07,96,415) ಮತದಾರರ ಪೈಕಿ ಅಂದಾಜು 52 ಲಕ್ಷ ಮಂದಿ ಅರ್ಹರಿದ್ದಾರೆ ಎಂದು ನಾಗರಿಕ ಸಂಘಟನೆಗಳು ಗಂಭೀರ ಆರೋಪ ಮಾಡಿವೆ.
ಆಗಸ್ಟ್ 25ರಂದು ಎಸ್ಐಆರ್ಗೆ ಸಂಬಂಧಿಸಿದಂತೆ ಕೇಂದ್ರ ಚುನಾವಣಾ ಆಯೋಗದ ವಿರುದ್ದ ಎಫ್ಐಆರ್ ಬಿಡುಗಡೆ ಮಾಡಿರುವ ಸಂಘಟನೆಗಳು, ಪತ್ತೆಯಾಗದವರು ಅಥವಾ ಗೈರು ಹಾಜರಿ, ಶಾಶ್ವತವಾಗಿ ಸ್ಥಳಾಂತರಗೊಂಡವರು, ಮರಣ ಹೊಂದಿದವರು, ಒಂದಕ್ಕಿಂತ ಹೆಚ್ಚು ಕಡೆ ನೋಂದಣಿಯಾದವರು ಮತ್ತು ಇತರರು (ASDDO)ಎಂದು ಪಟ್ಟಿ ಮಾಡಿರುವವರ ಕುರಿತು ಗಂಭೀರ ಪ್ರಶ್ನೆಗಳನ್ನು ಎತ್ತಿವೆ.
ಮರಣ ಹೊಂದಿದವರು ಮತ್ತು ಒಂದಕ್ಕಿಂತ ಹೆಚ್ಚು ಕಡೆ ನೋಂದಣಿಯಾದವರ ಸಂಖ್ಯೆಗಳಲ್ಲಿ ಕೆಲವು ದೋಷಗಳಿದ್ದರೂ, ಅದರ ಬಗ್ಗೆ ನಮಗೆ ಮೂಲಭೂತ ತಕರಾರು ಇಲ್ಲ. ಆದರೆ, ಗೈರು ಹಾಜರಿ, ಶಾಶ್ವತವಾಗಿ ಸ್ಥಳಾಂತರಗೊಂಡವರು ಮತ್ತು ಇತರರು ಎಂದು ಡಿಲೀಟ್ ಮಾಡಿರುವ ಬಗ್ಗೆ ಗಂಭೀರ ಆಕ್ಷೇಪಗಳಿವೆ ಎಂದು ಸಂಘಟನೆಗಳು ಹೇಳಿವೆ.
‘ಗೈರು ಹಾಜರಿ’ ಎಂದರೆ ಇದ್ದಾರೆ. ಆದರೆ, ಅವರು ದುಡಿಯಲು ಹೋಗಿದ್ದರಿಂದಾಗಿ ಅಥವಾ ಅನ್ಯ ಕಾರಣಕ್ಕಾಗಿ ಊರಲ್ಲಿ ಇಲ್ಲದ ಕಾರಣದಿಂದಾಗಿ ಬಿಎಲ್ಓ ಮತ್ತು ಅವರ ಭೇಟಿ ಸಾಧ್ಯವಾಗಿಲ್ಲ. ಇವರೆಲ್ಲಾ ಅರ್ಹ ಮತದಾರರು. ‘ಇತರರು’ ಎಂದರೆ ಎನ್ಯುಮುರೇಷನ್ ಫಾರಂ ಪಡೆದಿದ್ದಾರೆ, ಆದರೆ ಅದನ್ನು ಸಂಗ್ರಹಿಸಿಕೊಂಡಿಲ್ಲ [ಎನ್ಯುಮುರೇಷನ್ ಫಾರಂ ಕೊಡಲು ನಿರಾಕರಿಸಿದವರು ಎಂದು ಆರೋಪವನ್ನು ಅವರ ತಲೆಗೆ ಕಟ್ಟಲಾಗಿದೆ]. ‘ಸ್ಥಳಾಂತರಗೊಂಡವರು’ ಎಂದರೆ ಬಾಡಿಗೆ ಮನೆ ಬದಲಾಯಿಸಿರುವ, ಬೇರೆ ಊರಿಗೆ ಸ್ಥಳಾಂಂತರಗೊಂಡವರು. ಇವರುಗಳ ಮತಗಳನ್ನು ಡಿಲೀಟ್ ಮಾಡಿರುವುದು ಅಕ್ರಮ ಎಂದು ಆಕ್ಷೇಪ ವ್ಯಕ್ತಪಡಿಸಿವೆ.
ವೋಟನ್ನು ಹೊಸ ವಿಳಾಸಕ್ಕೆ ವರ್ಗಾವಣೆ ಮಾಡಿಕೊಳ್ಳಲು ಅವಕಾಶ ನೀಡುವ ಬದಲು, ಡಿಲೀಟ್ ಮಾಡಲಾಗಿದೆ. ಇದರಲ್ಲಿ ಕೆಲವು ಮತಗಳು ಹಳೆಯ ಕಡೆಯೂ ಉಳಿದು ಹೋಗಿವೆ. ಹೋದವರು ಹೊಸ ಕಡೆ ಹೊಸ ಕಾರ್ಡ್ ಸಹ ಮಾಡಿಸಿಕೊಂಡಿದ್ದಾರೆ. ಅನೇಕರಿಗೆ ಇಲ್ಲಿಯೂ ಇಲ್ಲ, ಅಲ್ಲಿಯೂ ಇಲ್ಲ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ. ಮತದಾನದ ಹಕ್ಕನ್ನೇ ಕಳೆದುಕೊಂಡವರು, ಇನ್ನೊಂದು ಕಡೆ ಹೋಗಿ ಹೊಸ ಕಾರ್ಡ್ ಮಾಡಿಸಿಕೊಂಡಿರುವವರು ಎಷ್ಟು ಎಂಬ ವರ್ಗೀಕರಣ ಇಲ್ಲವಾದ್ದರಿಂದ 50-50 ಚಾನ್ಸ್ ಎಂದು ಲೆಕ್ಕ ಹಿಡಿದರೆ ಕನಿಷ್ಟ 33 ಲಕ್ಷ ಜನ ಡಿಲೀಟ್ ಆಗಿದ್ದಾರೆ. ಅಂದರೆ [15+4+33=52] ಲಕ್ಷ ಕರ್ನಾಟಕದ ಅರ್ಹ ಮತದಾರರು ತಮ್ಮ ಹಕ್ಕನ್ನು ಕಳೆದುಕೊಂಡಿದ್ದಾರೆ. ಇವರಲ್ಲಿ ಹೆಚ್ಚಿನವರು ದುಡಿಯುವ ಹಾಗೂ ಶೋಷಿತ ವರ್ಗಗಳಿಗೆ ಸೇರಿದ ಜನರಾಗಿದ್ದಾರೆ ಎಂದು ನಾಗರಿಕ ಸಂಘಟನೆಗಳು ಗಂಭೀರ ಆರೋಪ ಮಾಡಿವೆ.
ಆಗಸ್ಟ್ 19ರಂದು ರಾಜ್ಯ ಚುನಾವಣಾ ಆಯೋಗ ಬಿಡುಗಡೆ ಮಾಡಿರುವ ಅಂಕಿ ಅಂಶಗಳ ಪ್ರಕಾರ, ಒಟ್ಟು 1,07,96,415 ಮತದಾರರನ್ನು ಎಎಸ್ಡಿಡಿಒ ಎಂದು ಪಟ್ಟಿ ಮಾಡಲಾಗಿದೆ. ಈ ಪೈಕಿ 15,17,056 ಪತ್ತೆಯಾಗದವರು ಅಥವಾ ಗೈರು ಹಾಜರಾದವರು, 65,45,721 ಶಾಶ್ವತವಾಗಿ ಸ್ಥಳಾಂತರಗೊಂಡವರು, 16,39,871 ಮರಣ ಹೊಂದಿದವರು, 7,09,875 ಒಂದಕ್ಕಿಂತ ಹೆಚ್ಚು ಕಡೆ ನೋಂದಣಿಯಾದವರು ಮತ್ತು 3,83,892 ಇತರರ ಎಂದು ಹೇಳಲಾಗಿದೆ.
