ಭಾರತವು ತನ್ನ ಸಂವಿಧಾನದಲ್ಲಿ ಪ್ರತಿಪಾದಿಸಲಾದ ಮೂಲಭೂತ ಮೌಲ್ಯಗಳನ್ನು ಹಾಗೂ ತನ್ನ ಶ್ರೇಷ್ಠ ನಾಯಕರು ಎತ್ತಿಹಿಡಿದ ತತ್ವಗಳನ್ನು ಕಳೆದುಕೊಳ್ಳುವ ಅಂಚಿನಲ್ಲಿದೆ. ನಮ್ಮ ಸಾಮೂಹಿಕ ಜೀವನದಲ್ಲಿ ಅವುಗಳನ್ನು ತಕ್ಷಣವೇ ರಕ್ಷಿಸಿ ಮರುಸ್ಥಾಪಿಸಬೇಕಾಗಿದೆ. ಗಾಂಧೀಜಿಯವರು ನಮಗೆ ಕೇವಲ ಮೌಲ್ಯಗಳನ್ನು ನೀಡಲಿಲ್ಲ, ಬದಲಿಗೆ ಆ ಮೌಲ್ಯಗಳಿಗೆ ಆಪತ್ತು ಬಂದಾಗ ಅವುಗಳನ್ನು ಹೇಗೆ ಎತ್ತಿಹಿಡಿಯಬೇಕು ಮತ್ತು ರಕ್ಷಿಸಬೇಕು ಎಂಬುದನ್ನೂ ತೋರಿಸಿಕೊಟ್ಟಿದ್ದಾರೆ.
ಸಮಕಾಲೀನ ಸವಾಲುಗಳು ಮತ್ತು ಬಿಕ್ಕಟ್ಟುಗಳಿಗೆ ಪರಿಹಾರ ಕಂಡುಕೊಳ್ಳಲು ಮಹಾತ್ಮ ಗಾಂಧೀಜಿಯವರ ಚಿಂತನೆಗಳು ಹಾಗೂ ಜೀವನ ಪದ್ಧತಿಗಳು ಇಂದಿಗೂ ಸದಾ ಪ್ರಸ್ತುತ ಮತ್ತು ಅತ್ಯಂತ ಮೌಲ್ಯಯುತ ಪಾಠಗಳನ್ನು ನೀಡುತ್ತವೆ ಎಂಬುದು ಅತ್ಯಂತ ರೋಚಕ ವಿಷಯ. ಅವರು ಬೇರೊಂದು ಕಾಲಘಟ್ಟದಲ್ಲಿ ಜೀವಿಸಿದ್ದರು ಎಂಬ ಕಾರಣಕ್ಕೆ ಅವರ ಒಳನೋಟಗಳು ಹಳೆಯದಾಗುವುದಿಲ್ಲ. ಇಂದು ನಾವು ಎದುರಿಸುತ್ತಿರುವ ಪ್ರತಿಯೊಂದು ಸಂಕಷ್ಟ ಮತ್ತು ಸಮಸ್ಯೆಗೆ, ಗಾಂಧೀಜಿಯವರು ಎಲ್ಲೋ ಒಂದು ಕಡೆ ಆಡಿದ ಮಾತು ಅಥವಾ ಮಾಡಿದ ಕೃತ್ಯವು ತತ್ವಬದ್ಧ ಹಾಗೂ ಆಳವಾದ ಪರಿಹಾರವನ್ನು ಸೂಚಿಸುತ್ತದೆ. ನಾವು ಮಾಡಬೇಕಿರುವುದು ಇಷ್ಟೇ — ಅವರ ಬರಹಗಳು ಹಾಗೂ ಜೀವಿಸಿದ ರೀತಿಯಲ್ಲಿ ಅದನ್ನು ಹುಡುಕುವುದು.
ಇಂದು ಭಾರತವು ತೀವ್ರ ರಾಜಕೀಯ ಕಷ್ಟಕಾಲದಲ್ಲಿದೆ. ಮತದಾನದ ಹಕ್ಕು, ಚುನಾವಣಾ ಪ್ರಕ್ರಿಯೆಯ ಪಾರದರ್ಶಕತೆ, ಚುನಾವಣೆ ನಡೆಸುವ ಸಂಸ್ಥೆಗಳ ಹೊಣೆಗಾರಿಕೆ ಮತ್ತು ನಂಬಿಕಾರ್ಹತೆ ಹಾಗೂ ರಾಜಕೀಯ ಪಕ್ಷಗಳು ಗಳಿಸುವ ಜನಾದೇಶದ ವೈಧತೆಯ ಕುರಿತು ಗಂಭೀರ ಪ್ರಶ್ನೆಗಳು ಎದ್ದಿವೆ. ‘ವಿಶೇಷ ತೀವ್ರ ಪರಿಷ್ಕರಣೆ’ (SIR) ಪ್ರಕ್ರಿಯೆಯ ಅನುಷ್ಠಾನದ ವೇಳೆ ಭಾರತೀಯ ಚುನಾವಣಾ ಆಯೋಗದಲ್ಲಿ (ECI) ನಡೆದಿದೆ ಎನ್ನಲಾದ ಅಕ್ರಮಗಳ ಕುರಿತು ತನಿಖಾ ಪತ್ರಕರ್ತರು ಇತ್ತೀಚೆಗೆ ಹೊರಗೆಡವಿದ ಸ್ಫೋಟಕ ಸತ್ಯಗಳು, ಕಾರ್ಯಾಂಗ ಹಾಗೂ ನ್ಯಾಯಾಂಗದ ಹಲವು ನಿರ್ಧಾರಗಳ ಯೋಗ್ಯತೆಯನ್ನೇ ನಮ್ಮ ರಾಜಕೀಯ ಚರ್ಚೆಯ ಕೇಂದ್ರಬಿಂದುವನ್ನಾಗಿ ಮಾಡಿವೆ.
ಹಿಂತಿರುಗಿ ನೋಡಿದರೆ, 1924ರ ಜುಲೈನಲ್ಲಿ ಜಮಾಲುದ್ದೀನ್ ಮುಖ್ನೂರ್ ಎಂಬುವವರಿಂದ ಗಾಂಧೀಜಿಯವರಿಗೆ ಒಂದು ಪತ್ರ ಬಂದಿತ್ತು. ಆ ಪತ್ರ ಮತ್ತು ಅದಕ್ಕೆ ಗಾಂಧೀಜಿ ನೀಡಿದ ಉತ್ತರವನ್ನ 1924ರ ಜುಲೈ 17ರ ‘ಯಂಗ್ ಇಂಡಿಯಾ’ ಆವೃತ್ತಿಯಲ್ಲಿ ಪ್ರಕಟಿಸಲಾಗಿತ್ತು (ನೋಡಿ: ಮಹಾತ್ಮ ಗಾಂಧಿಯವರ ಸಮಗ್ರ ಕೃತಿಗಳು, ಸಂಪುಟ 24, ಪುಟ 407-408). ಸ್ಥಳೀಯ ಸರ್ಕಾರಿ ಅಧಿಕಾರಿಯೊಬ್ಬರು ಪುರಸಭೆಯ ಮತದಾರರ ಪಟ್ಟಿಯಿಂದ ತಮ್ಮ ಹೆಸರನ್ನು ತೆಗೆದುಹಾಕಿದ್ದಾರೆ ಎಂದು ಮುಖ್ನೂರ್ ಗಾಂಧೀಜಿಯವರಿಗೆ ತಿಳಿಸಿದ್ದರು. ಕ್ರಿಮಿನಲ್ ಪ್ರೊಸೀಜರ್ ಕೋಡ್‌ನ ನಿರ್ದಿಷ್ಟ ವಿಭಾಗದಡಿಯಲ್ಲಿ ಆರು ತಿಂಗಳ ಶಿಕ್ಷೆಗೆ ಒಳಗಾಗಿದ್ದನ್ನು ನೆಪವಾಗಿಟ್ಟುಕೊಂಡು ಈ ಹೆಸರು ಡಿಲೀಟ್ ಮಾಡಲಾಗಿತ್ತು.
ಈ ಕಡಿತದ ವಿರುದ್ಧ ಮುಖ್ನೂರ್ ಆಡಳಿತಕ್ಕೆ ಮೇಲ್ಮನವಿ ಸಲ್ಲಿಸಿದರು. ಆದರೆ ಆಡಳಿತ ಮಂಡಳಿಯು ಅವರ ಮೇಲ್ಮನವಿಗೆ ಒಂದು ತಿಂಗಳಾದರೂ ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ. ಈ ಮಧ್ಯೆ, ಸ್ಥಳೀಯ ಪುರಸಭೆಯ ಚುನಾವಣೆ ಪ್ರಕಟವಾಗಿ ಮತದಾನದ ದಿನಾಂಕವೂ ನಿಗದಿಯಾಯಿತು. ಮತದಾನದ ದಿನಕ್ಕೆ ಸರಿಯಾದ ಸಮಯಕ್ಕೆ ಮುಂಚಿತವಾಗಿ ಅವರು ಸಂಬಂಧಪಟ್ಟ ಅಧಿಕಾರಿಗೆ ಜ್ಞಾಪನ ಪತ್ರ (Reminder) ಕಳುಹಿಸಿದರು. ತಮ್ಮ ಮೇಲ್ಮನವಿಯ ಅಂತಿಮ ತೀರ್ಪು ಬರುವವರೆಗೆ ಮತದಾರರ ಪಟ್ಟಿಯಿಂದ ತಮ್ಮ ಹೆಸರನ್ನು ತೆಗೆದುಹಾಕುವ ನಿರ್ಧಾರವನ್ನು ತಡೆಹಿಡಿಯಬೇಕೆಂದು ಅವರು ಆ ಜ್ಞಾಪನ ಪತ್ರದಲ್ಲಿ ವಿನಂತಿಸಿಕೊಂಡರು.
ಆದರೆ ಆಡಳಿತವು ಅವರ ವಿನಂತಿಗೆ ಕಿವಿಗೊಡದೆ, ಅವರಿಗೆ ಮತದಾನದ ಹಕ್ಕನ್ನು ಚಲಾಯಿಸಲು ಅವಕಾಶ ನೀಡದೆಯೇ ಮತದಾನ ಪ್ರಕ್ರಿಯೆಯನ್ನು ನಡೆಸಿತು. ಅಂದರೆ, ಅವರ ಮೇಲ್ಮನವಿಯ ಅಂತಿಮ ವಿಲೇವಾರಿ ಇಲ್ಲದೆಯೇ ಚುನಾವಣೆ ನಡೆದುಹೋಯಿತು. ಮತದಾನ ಮುಗಿದ ಸುಮಾರು ಎಂಟು ತಿಂಗಳ ನಂತರ, ಅವರ ಹೆಸರನ್ನು ಮತ್ತೆ ಮತದಾರರ ಪಟ್ಟಿಗೆ ಸೇರಿಸಲಾಗಿದೆ ಎಂಬ ಅಧಿಕೃತ ಮಾಹಿತಿ ಮುಖ್ನೂರ್ ಅವರಿಗೆ ತಲುಪಿತು! ಆ ಪತ್ರದಲ್ಲಿ, ಮತದಾನ ನಡೆದ ದಿನದಂದೇ ಮೇಲ್ಮನವಿಯು ಅವರ ಪರವಾಗಿ ತೀರ್ಮಾನವಾಗಿತ್ತು, ಆದರೆ ಅವರಿಗೆ “ಮತದಾನದ ಸೌಲತ್ತು” ಚಲಾಯಿಸಲು ಅನುಕೂಲವಾಗುವಂತೆ ಸಮಯಕ್ಕೆ ಸರಿಯಾಗಿ ತಿಳಿಸಲು ಸಾಧ್ಯವಾಗಲಿಲ್ಲ ಎಂದು ಆಡಳಿತವು ಉಲ್ಲೇಖಿಸಿತ್ತು.
ಈ ಕಾಲಾನುಕ್ರಮವನ್ನು ಗಮನಿಸಿ: ನವೆಂಬರ್ 1923ರಲ್ಲಿ ನಡೆದ ಪುರಸಭೆ ಚುನಾವಣೆಗೆ ಮುನ್ನ ಮುಖ್ನೂರ್ ಅವರ ಮತವನ್ನು ಪಟ್ಟಿಯಿಂದ ತೆಗೆದುಹಾಕಲಾಯಿತು. ತಕ್ಷಣವೇ ಮುಖ್ನೂರ್ ಆಡಳಿತಕ್ಕೆ ಮೇಲ್ಮನವಿ ಸಲ್ಲಿಸಿದರು. ಅಧಿಕಾರಿಗಳು ಒಂದು ತಿಂಗಳು ಮೌನ ವಹಿಸಿದರು. ಈ ಮಧ್ಯೆ ಚುನಾವಣಾ ದಿನಾಂಕ ಪ್ರಕಟವಾಯಿತು. ಅವರು ಜ್ಞಾಪನ ಪತ್ರ ಕಳುಹಿಸಿ, ಮೇಲ್ಮನವಿ ಇತ್ಯರ್ಥವಾಗುವವರೆಗೆ ಡಿಲೀಟ್ ಆದೇಶವನ್ನು ತಡೆಹಿಡಿಯಲು ವಿನಂತಿಸಿದರು. ಅಧಿಕಾರಿಗಳು ಯಾವುದೇ ಪ್ರತಿಕ್ರಿಯೆ ನೀಡದೆ ಮೇಲ್ಮನವಿಯನ್ನು ಇತ್ಯರ್ಥಪಡಿಸದೆ ಮತದಾನ ನಡೆಸಿದರು. ಚುನಾವಣೆ ಮುಗಿದ ಏಳು ತಿಂಗಳ ನಂತರ, ಮೇಲ್ಮನವಿ ಅವರ ಪರವಾಗಿ ತೀರ್ಮಾನವಾಗಿದೆ ಮತ್ತು ಹೆಸರು ಮರುಸ್ಥಾಪಿಸಲಾಗಿದೆ ಎಂದು ಆಡಳಿತ ತಿಳಿಸಿತು. ಆ ನಿರ್ಧಾರವನ್ನು 26 ನವೆಂಬರ್ 1923 (ಮತದಾನದ ದಿನ) ರಂದೇ ತೆಗೆದುಕೊಳ್ಳಲಾಗಿತ್ತು ಎಂದೂ, ಆದರೆ ಸಮಯಕ್ಕೆ ಸರಿಯಾಗಿ ತಲುಪಿಸಲು ಸಾಧ್ಯವಾಗಲಿಲ್ಲ ಎಂದೂ ಸಾಪಾಟು ಉತ್ತರ ನೀಡಲಾಯಿತು.
ಮುಖ್ನೂರ್ ಪತ್ರಕ್ಕೆ ಗಾಂಧೀಜಿ ನೀಡಿದ ಉತ್ತರವು ಅತ್ಯಂತ ಸರಳ, ಚುಟುಕು ಹಾಗೂ ಪ್ರಸ್ತುತ ಸಂಕಷ್ಟಕ್ಕೆ ನಮಗೆ ಮಾರ್ಗದರ್ಶಕವಾಗಿದೆ. ಗಾಂಧೀಜಿ ನೀಡಿದ ಮೊದಲ ಸಾಲೇ ಅತ್ಯಂತ ಕಟುವಾಗಿತ್ತು — “ಇದು ಗಲ್ಲಿಗೇರಿಸಿದ ನಂತರ ಕ್ಷಮಾದಾನ (ಉಳಿವಿನ ಆದೇಶ) ಕಳುಹಿಸಿದಂತೆ!” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದರು. ಈ ಘಟನೆಯು ತಮಗೆ “ಅಸಹಕಾರ ಚಳವಳಿಗೆ ಮತ್ತೊಂದು ಹೆಚ್ಚುವರಿ ಕಾರಣವನ್ನು ನೀಡಿದೆ” ಎಂದು ಅವರು ಹೇಳಿದರು. ಗಾಂಧೀಜಿಯವರ ಈ ಉತ್ತರವು, ಪ್ರತಿಯೊಂದು ಮತವೂ ಅತ್ಯಂತ ಅಮೂಲ್ಯವಾದದ್ದು ಮತ್ತು “ಮಹತ್ವದ ಸಂದರ್ಭಗಳಲ್ಲಿ ಫಲಿತಾಂಶವನ್ನು ಬದಲಾಯಿಸಲು ಒಂದು ಮತವೇ ಸಾಕು” ಎಂಬ ಅವರ ದೃಢ ನಂಬಿಕೆಯನ್ನು ಎತ್ತಿಹಿಡಿಯಿತು.
ಗಾಂಧೀಜಿಯವರಿಗೆ ಪ್ರತಿಯೊಂದು ಮತವೂ ಮುಖ್ಯವಾಗಿತ್ತು. ಯಾರೊಬ್ಬರನ್ನೂ ಮೊದಲು ‘ಅನರ್ಹರು’ ಎಂದು ಅಧಿಕೃತವಾಗಿ ಘೋಷಿಸದೆ ಅವರ ಮತಹಕ್ಕನ್ನು ಕಸಿಯಬಾರದು ಎಂಬುದೇ ಈ ಘಟನೆಗೆ ಅವರು ನೀಡಿದ ಉತ್ತರದ ಸಾರವಾಗಿತ್ತು. ಅಂದರೆ, ಮತ ಕಡಿತದ ವಿರುದ್ಧ ಸಲ್ಲಿಸಿದ ಮೇಲ್ಮನವಿಯನ್ನು ಸರಿಯಾಗಿ ವಿಲೇವಾರಿ ಮಾಡದೆ ಯಾರ ಮತಹಕ್ಕನ್ನೂ ಕಸಿದುಕೊಳ್ಳಬಾರದು. ಮೇಲ್ಮನವಿಗಳು ಇತ್ಯರ್ಥವಾಗದ ವ್ಯಕ್ತಿಗಳ ಮತದಾನದ ಹಕ್ಕನ್ನು ಕಸಿಯಲಾಗುವುದಿಲ್ಲ ಎಂಬ ನಿಯಮಕ್ಕೆ ಈ ಘಟನೆ ಸಾಕ್ಷಿಯಾಗಿದೆ.
2026ರಲ್ಲಿ ಪಶ್ಚಿಮ ಬಂಗಾಳದಲ್ಲಿ ನಡೆದ ಮತದಾರರ ಪಟ್ಟಿಯ ‘ವಿಶೇಷ ತೀವ್ರ ಪರಿಷ್ಕರಣೆ’ (SIR) ಪ್ರಕ್ರಿಯೆಯಲ್ಲಿ ವಿವಿಧ ಕಾರಣಗಳನ್ನು ನೀಡಿ ಸುಮಾರು 93 ಲಕ್ಷ ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ಡಿಲೀಟ್ ಮಾಡಲಾಗಿತ್ತು. ಆಡಳಿತಾತ್ಮಕ ಮಟ್ಟದಲ್ಲಿ ದಾಖಲೆಗಳನ್ನು ಸಲ್ಲಿಸಿ ಪರಿಶೀಲಿಸಿದ ನಂತರ ಕೆಲವರ ಹೆಸರುಗಳನ್ನು ಮರುಸ್ಥಾಪಿಸಲಾಯಿತು. ಆದರೆ ಆ ಹಂತದಲ್ಲೂ ಮತಹಕ್ಕು ನಿರಾಕರಿಸಲ್ಪಟ್ಟವರಲ್ಲಿ ಬರೋಬ್ಬರಿ 28 ಲಕ್ಷ ಜನರು ಮುಖ್ನೂರ್ ಅವರಂತೆಯೇ ಆಡಳಿತದ ಮುಂದೆ ಮೇಲ್ಮನವಿ ಸಲ್ಲಿಸಿದ್ದರು. ಆದರೆ, ಅವರ ಮೇಲ್ಮನವಿಗಳ ವಿಚಾರಣೆ ನಡೆಯುವ ಮುನ್ನವೇ ಕೇಂದ್ರ ಚುನಾವಣಾ ಆಯೋಗವು ರಾಜ್ಯ ವಿಧಾನಸಭಾ ಚುನಾವಣೆಯನ್ನು ನಡೆಸಿ ಮುಗಿಸಿತು. ಸುಮಾರು 28 ಲಕ್ಷ ಜನರಿಗೆ ತಾವು ಅರ್ಹರೋ ಅಥವಾ ಅನರ್ಹರೋ ಎಂಬ ತೀರ್ಪು ಸಿಗುವ ಮುನ್ನವೇ ಮತದಾನದ ಹಕ್ಕನ್ನು ಕಸಿದುಕೊಳ್ಳಲಾಯಿತು. ಅವರ ಮೇಲ್ಮನವಿಗಳನ್ನು ಆಲಿಸಲೇ ಇಲ್ಲ, ಇತ್ಯರ್ಥಪಡಿಸುವುದು ದೂರದ ಮಾತಾಗಿತ್ತು.
ಪಶ್ಚಿಮ ಬಂಗಾಳದಲ್ಲಿ ಇಂದಿನ ಚುನಾವಣಾ ಆಯೋಗ ನಡೆದುಕೊಂಡ ರೀತಿ ಅಂದಿನ ವಸಾಹತುಶಾಹಿ ಬ್ರಿಟಿಷ್ ಆಡಳಿತದ ನಡವಳಿಕೆಗಿಂತ ಭಿನ್ನವಾಗಿಲ್ಲ. ಬ್ರಿಟಿಷ್ ಆಡಳಿತಗಾರರು ಮುಖ್ನೂರ್ ಅವರಿಗೆ ಮಾಡಿದ್ದನ್ನೇ ಇಂದಿನ ಇಸಿಐ ಪಶ್ಚಿಮ ಬಂಗಾಳದ ಲಕ್ಷಾಂತರ ಮತದಾರರಿಗೆ ಮಾಡಿದೆ. ಮತದಾನ ಮುಗಿದ ನಂತರ ವಿಚಾರಣೆ ನಡೆಸಲಾದ ಕೆಲವೇ ಕೆಲವು ಪ್ರಕರಣಗಳಲ್ಲಿ ಶೇಕಡಾ 93 ರಷ್ಟು ಜನರು ಮತದಾರರ ಪಟ್ಟಿಗೆ ಮರಳಲು ಅರ್ಹರಾಗಿದ್ದಾರೆ ಎಂದು ತೀರ್ಪು ನೀಡಲಾಯಿತು — ಸರಿ ಮುಖ್ನೂರ್ ಘಟನೆಯಲ್ಲಿ ನಡೆದಂತೆಯೇ! ಗಾಂಧೀಜಿಯವರ ಮಾತುಗಳನ್ನೇ ಪುನರುಚ್ಚರಿಸುವುದಾದರೆ, ಪಶ್ಚಿಮ ಬಂಗಾಳದ ಈ ಮತದಾರರು ಮುಖ್ನೂರ್ ಅವರಂತೆಯೇ ‘ಗಲ್ಲಿಗೇರಿಸಿದ ಮೇಲೆ ಕ್ಷಮಾದಾನ’ ಪಡೆದಿದ್ದಾರೆ.
1924ರಷ್ಟು ಹಿಂದೆಯೇ ಮತದಾನದ ಹಕ್ಕು ನಿರಾಕರಣೆಗೆ ಗಾಂಧೀಜಿ ನೀಡಿದ ಪ್ರತಿಕ್ರಿಯೆಯನ್ನು ಓದಿದಾಗ, ಇಂದಿನ ಚುನಾವಣಾ ಆಯೋಗ ಮತ್ತು ದುರದೃಷ್ಟವಶಾತ್ ಉನ್ನತ ನ್ಯಾಯಾಂಗದ ನಿಷ್ಕಾಳಜಿಯು ತೀವ್ರ ಆಘಾತಕಾರಿ ಹಾಗೂ ವಿಲಕ್ಷಣವಾಗಿ ಕಾಣಿಸುತ್ತದೆ. ಇಂದು ಎಸ್ಐಆರ್ ಅನುಷ್ಠಾನಗೊಳ್ಳುತ್ತಿರುವ ರೀತಿ ನೋಡುಗರನ್ನು ದಂಗುಬಡಿಸುವಂತಿದ್ದು, ನಮ್ಮ ಆಡಳಿತ ಮತ್ತು ನ್ಯಾಯಾಂಗ ವ್ಯವಸ್ಥೆಯು ನೈಸರ್ಗಿಕ ನ್ಯಾಯದ ಮೂಲಭೂತ ತತ್ವಗಳಿಂದ ಎಷ್ಟು ದೂರ ಸಾಗಿದೆ ಎಂಬುದನ್ನು ತೋರಿಸುತ್ತದೆ. ಅಂದು ಗಾಂಧೀಜಿಯವರಿಗೆ ಅನಿಸಿದಂತೆಯೇ, ಇಂದಿನ ಪರಿಸ್ಥಿತಿಯೂ ನಮ್ಮೆಲ್ಲರಿಗೂ ಶಾಂತಿಯುತ ಅಸಹಕಾರ ಚಳವಳಿ ಹಾಗೂ ಬೃಹತ್ ಸತ್ಯಾಗ್ರಹಕ್ಕೆ ಮತ್ತೊಂದು ಬಲವಾದ ಕಾರಣವನ್ನು ನೀಡಬೇಕಿದೆ.
ಭಾರತವು ತನ್ನ ಸಂವಿಧಾನದಲ್ಲಿ ಪ್ರತಿಪಾದಿಸಲಾದ ಮೂಲಭೂತ ಮೌಲ್ಯಗಳನ್ನು ಹಾಗೂ ತನ್ನ ಶ್ರೇಷ್ಠ ನಾಯಕರು ಎತ್ತಿಹಿಡಿದ ತತ್ವಗಳನ್ನು ಕಳೆದುಕೊಳ್ಳುವ ಅಂಚಿನಲ್ಲಿದೆ. ನಮ್ಮ ಸಾಮೂಹಿಕ ಜೀವನದಲ್ಲಿ ಅವುಗಳನ್ನು ತಕ್ಷಣವೇ ರಕ್ಷಿಸಿ ಮರುಸ್ಥಾಪಿಸಬೇಕಾಗಿದೆ. ಗಾಂಧೀಜಿಯವರು ನಮಗೆ ಕೇವಲ ಮೌಲ್ಯಗಳನ್ನು ನೀಡಲಿಲ್ಲ, ಬದಲಿಗೆ ಆ ಮೌಲ್ಯಗಳಿಗೆ ಆಪತ್ತು ಬಂದಾಗ ಅವುಗಳನ್ನು ಹೇಗೆ ಎತ್ತಿಹಿಡಿಯಬೇಕು ಮತ್ತು ರಕ್ಷಿಸಬೇಕು ಎಂಬುದನ್ನೂ ತೋರಿಸಿಕೊಟ್ಟಿದ್ದಾರೆ.
ಮೂಲ: ದಿ ಲೀಫ್‌ಲೆಟ್‌, ಪರಕಾಲ ಪ್ರಭಾಕರ್
ಅನುವಾದ: ರಾಘವೇಂದ್ರ ಡಿ.ಎಲ್
