ಗುಜರಾತ್ನ ಜುನಾಗಢ್ ಜಿಲ್ಲೆಯಲ್ಲಿ ಜಾತಿ ತಾರತಮ್ಯದ ಆರೋಪ ಹೊರಿಸಲಾಗಿದ್ದು, ಧಾರ್ಮಿಕ ಕಾರ್ಯಕ್ರಮದ ಸಂದರ್ಭದಲ್ಲಿ ದೇವಾಲಯದ ಆಯೋಜಕರು ಅಸ್ಪೃಶ್ಯತೆ ಆಚರಿಸುತ್ತಿದ್ದಾರೆ ಎಂದು ದಲಿತ ಸಮುದಾಯದ ಸದಸ್ಯರು ಆರೋಪಿಸಿದ್ದಾರೆ.
ಭುಟ್ಡಿ ಗ್ರಾಮದ ನಿವಾಸಿ 25 ವರ್ಷದ ಅಜಯ್ ಚತುರ್ ಬೋರಿಚಾ ನೀಡಿದ ದೂರಿನ ನಂತರ ಐದು ಜನರ ವಿರುದ್ಧ ವಿಶಾವದರ್ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಲಾಗಿದೆ.
ಬೋರಿಚಾ ಮತ್ತು ಪರಿಶಿಷ್ಟ ಜಾತಿ ಸಮುದಾಯದ ಇತರ ಸದಸ್ಯರನ್ನು ದೇವಾಲಯದ ಪವಿತ್ರೀಕರಣ ಸಮಾರಂಭಕ್ಕೆ ಆಹ್ವಾನಿಸಲಾಗಿತ್ತು. ಆದರೆ, ಅವಮಾನಕರ ಷರತ್ತುಗಳನ್ನು ಪಾಲಿಸುವಂತೆ ಕೇಳಲಾಗಿತ್ತು ಎಂದು ಆರೋಪಿಸಿದ್ದಾರೆ.
“ನಮ್ಮ ಸ್ವಂತ ತಟ್ಟೆಗಳು ಮತ್ತು ಲೋಟಗಳನ್ನು ತರಲು, ಇತರರು ಊಟ ಮುಗಿದ ನಂತರ ಪ್ರತ್ಯೇಕವಾಗಿ ಊಟ ಮಾಡಲು ಒತ್ತಾಯಿಸಲಾಯಿತು. ದೇವಾಲಯಕ್ಕೆ ಪ್ರವೇಶಿಸದಂತೆ ನಮಗೆ ತಿಳಿಸಲಾಯಿತು” ಎಂದು ಬೋರಿಚಾ ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ.
ಈ ಘಟನೆಯು ಏಪ್ರಿಲ್ 29 ರಂದು ನಡೆದ ಶ್ರೀರಾಮ ಮಂದಿರದ ‘ಪ್ರಾಣ ಪ್ರತಿಷ್ಠಾ’ ಸಮಾರಂಭಕ್ಕೆ ಸಂಬಂಧಿಸಿದೆ. ಎಫ್ಐಆರ್ ಪ್ರಕಾರ, ಆಯೋಜಕರು ಏಪ್ರಿಲ್ 27 ರಂದು ಸುಮಾರು 10 ದಲಿತ ನಿವಾಸಿಗಳನ್ನು ಸಂಪರ್ಕಿಸಿ ಕಾರ್ಯಕ್ರಮಕ್ಕೆ ಆಹ್ವಾನಿಸಿದರು. ಆದರೆ ತಾರತಮ್ಯದ ಷರತ್ತುಗಳನ್ನು ವಿಧಿಸಿದ್ದಾರೆ ಎಂದು ಆರೋಪಿಸಲಾಗಿದೆ.
ನಮಗೆ ಆಹಾರ ಮತ್ತು ನೀರನ್ನು ಪ್ರತ್ಯೇಕವಾಗಿ ವ್ಯವಸ್ಥೆ ಮಾಡಲಾಗಿತ್ತು. ಇತರ ಜಾತಿಗಳ ಜನರು ಊಟ ಮುಗಿಸಿದ ನಂತರವೇ ಹಾಜರಾಗಬೇಕು ಎಂದು ಆಯೋಜಕರು ಹೇಳಿದ್ದರು ಎಂದು ದೂರುದಾರರು ಹೇಳಿಕೊಂಡಿದ್ದಾರೆ.
ದಲಿತ ಸಮುದಾಯದ ಸದಸ್ಯರು ಅಂತಹ ಪರಿಸ್ಥಿತಿಗಳಲ್ಲಿ ಊಟದಲ್ಲಿ ಭಾಗವಹಿಸಲು ನಿರಾಕರಿಸಿದರು. ಇದು ಸ್ಪಷ್ಟ ಅಸ್ಪೃಶ್ಯತೆಯ ನಡವಳಿಕೆ, ನಮ್ಮ ಘನತೆಗೆ ಅವಮಾನ ಎಂದು ಹೆಳಿದ್ದಾರೆ.
ದೂರಿನ ನಂತರ, ಯೋಜಿತ ಸಮುದಾಯ ಭೋಜನವನ್ನು ರದ್ದುಗೊಳಿಸಲಾಯಿತು. ಆದರೂ ದೇವಾಲಯದ ಸಮಾರಂಭವು ನಿಗದಿಯಂತೆ ನಡೆಯಿತು.
ಪ್ರಕರಣದ ತನಿಖೆ ನಡೆಸಲಾಗುತ್ತಿದೆ, ಎರಡೂ ಕಡೆಯಿಂದ ಹೇಳಿಕೆಗಳನ್ನು ದಾಖಲಿಸಲಾಗುತ್ತಿದೆ ಎಂದು ಉಪ ಪೊಲೀಸ್ ವರಿಷ್ಠಾಧಿಕಾರಿ ರವಿರಾಜ್ಸಿನ್ಹ್ ಪರ್ಮಾರ್ ಹೇಳಿದ್ದಾರೆ.
“ಆರೋಪಿಗಳಿಗೆ ಪೊಲೀಸರ ಮುಂದೆ ಹಾಜರಾಗಿ ಹೇಳಿಕೆ ನೀಡುವಂತೆ ನಾವು ನೋಟಿಸ್ ಜಾರಿ ಮಾಡಿದ್ದೇವೆ. ಯಾವುದೇ ಡಿಜಿಟಲ್ ಪುರಾವೆಗಳು ಲಭ್ಯವಿದೆಯೇ ಎಂದು ನಾವು ಪರಿಶೀಲಿಸುತ್ತಿದ್ದೇವೆ” ಎಂದು ಅವರು ಹೇಳಿದರು.
ಪ್ರಕರಣವು ಪ್ರಸ್ತುತ ಆರೋಪ ಮತ್ತು ಪ್ರತಿವಾದಗಳನ್ನು ಆಧರಿಸಿದೆ. ಮುಂದಿನ ಕ್ರಮವು ತನಿಖೆಯ ಸಂಶೋಧನೆಯ ಆಧಾರದ ಮೇಲೆ ಅವಲಂಬಿತವಾಗಿರುತ್ತದೆ ಎಂದು ಪೊಲೀಸರು ಹೇಳಿದರು.
ಐವರು ಆರೋಪಿ ಸಂಘಟಕರಾದ ಬಾಬು ಉಕಾ ಹಪಾನಿ, ನರೇಂದ್ರ ಭಂಜಿ ಸಿರೋಯಾ, ರಾಮ್ನಿಕ್ ಸಂಜಿ ಸೊರಥಿಯಾ, ಅತುಲ್ ಭಿಖಾ ಸಿರೋಯಾ ಮತ್ತು ಫುಲಾ ಪೊಪತ್ ಸಿರೋಯಾ ವಿರುದ್ಧ ಹಲವಾರು ಕಾನೂನು ನಿಬಂಧನೆಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಇವುಗಳಲ್ಲಿ ದ್ವೇಷವನ್ನು ಉತ್ತೇಜಿಸುವುದಕ್ಕೆ ಸಂಬಂಧಿಸಿದ ಭಾರತೀಯ ನ್ಯಾಯ ಸಂಹಿತಾ (ಬಿಎನ್ಎಸ್) ವಿಭಾಗಗಳು ಮತ್ತು ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ (ದೌರ್ಜನ್ಯ ತಡೆ) ಕಾಯ್ದೆಯ ನಿಬಂಧನೆಗಳು ಸೇರಿವೆ.
