ದೇಶದಲ್ಲಿ ನಡೆಯುತ್ತಿರುವ ಚುನಾವಣಾ ಪಟ್ಟಿಗಳ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ಮತ್ತು ಮತದಾರರ ಮೇಲೆ ಉಂಟಾಗಿರುವ ಅದರ ಪರಿಣಾಮಗಳ ವಿರುದ್ಧ ಸಮನ್ವಯತೆಯಿಂದ ಕಾರ್ಯನಿರ್ವಹಿಸಲು ಕರೆ ನೀಡಿರುವ ನಾಗರಿಕ ಸಂಘಟನೆಗಳು, ದೇಶದ ವಿವಿಧ ರಾಜ್ಯಗಳ ಸಂಘಟನೆಗಳು ಮತ್ತು ಪ್ರತಿನಿಧಿಗಳು ಇಂದು ಒಗ್ಗೂಡಿ ‘ಎಸ್ಐಆರ್ ಬೇಡ’ (NO SIR) ರಾಷ್ಟ್ರೀಯ ವೇದಿಕೆ ಘೋಷಿಸಿದ್ದಾರೆ.
ನವದೆಹಲಿಯ ಪ್ರೆಸ್ ಕ್ಲಬ್ ಆಫ್ ಇಂಡಿಯಾದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ, ಹಲವು ರಾಜ್ಯಗಳ ಪ್ರತಿನಿಧಿಗಳು ತಮ್ಮ ರಾಜ್ಯ ಮಟ್ಟದ ಅನುಭವಗಳನ್ನು ಹಂಚಿಕೊಂಡರು. ಎಸ್ಐಆರ್ ಅನ್ನು ಸಂಪೂರ್ಣವಾಗಿ ಹಿಂಪಡೆಯುವ ಜೊತೆಗೆ ಇಡೀ ಪ್ರಕ್ರಿಯೆಯನ್ನೇ ರದ್ದುಗೊಳಿಸಲು ಉದ್ದೇಶಿಸಿರುವ ಸಾರ್ವಜನಿಕ ಪರಿಶೀಲನೆ, ಜನರ ನ್ಯಾಯಮಂಡಳಿಗಳು (ಪೀಪಲ್ಸ್ ಟ್ರಿಬ್ಯೂನಲ್), ನಾಗರಿಕರ ಸಭೆಗಳು ಮತ್ತು ಇತರ ಜಂಟಿ ಕಾರ್ಯಕ್ರಮವನ್ನು ಘೋಷಿಸಿದರು.
ವಿವಿಧ ರಾಜ್ಯಗಳಿಂದ ವರದಿಯಾಗುತ್ತಿರುವ ಅನುಭವಗಳು, ಮತದಾರರ ಪಟ್ಟಿಯ ಬೃಹತ್ ತಿರುಚುವಿಕೆಯು ಸಾಮೂಹಿಕ ಹತ್ಯೆಕಾಂಡ ಮತ್ತು ಕಳಂಕಿತ (ರಿಗ್ಡ್) ಚುನಾವಣಾ ವ್ಯವಸ್ಥೆಯನ್ನು ಸೂಚಿಸುತ್ತವೆ ಎಂದು ವೇದಿಕೆಯು ತಿಳಿಸಿದೆ. ಭಾರತೀಯ ಚುನಾವಣಾ ಆಯೋಗದ (ಇಸಿಐ) ಮೇಲೆ ಸಾರ್ವಜನಿಕ ನಂಬಿಕೆ ಕುಸಿದಿರುವುದು ಚುನಾವಣಾ ಪ್ರಕ್ರಿಯೆಯ ಬಗ್ಗೆ ಕಳವಳಗಳನ್ನು ಹೆಚ್ಚಿಸಿದೆ ಎಂದು ವೇದಿಕೆ ಹೇಳಿದ್ದು, ಇಬ್ಬರು ಆಯುಕ್ತರ ನಡವಳಿಕೆ ಮತ್ತು ಹೇಳಿಕೆಗಳು ಇದನ್ನು ಮತ್ತಷ್ಟು ದೃಢಪಡಿಸಿವೆ ಎಂದು ತಿಳಿಸಿದೆ.
ಈ ಸಮಸ್ಯೆಯನ್ನು ಕೇವಲ ವೈಯಕ್ತಿಕ ರಾಜ್ಯಗಳಿಗೆ ಸಂಬಂಧಿಸಿದ ವಿಷಯವಾಗಿ ಪರಿಗಣಿಸಲಾಗುವುದಿಲ್ಲ, ಅರ್ಹ ಮತದಾರರನ್ನು ಕೈಬಿಡುವುದರ ವಿರುದ್ಧ ರಾಜ್ಯವಾರು ಕ್ರಮಗಳನ್ನು ಮುಂದುವರಿಸಲು ದೇಶಾದ್ಯಂತದ ಸಂಘಟನೆಗಳು ಮತ್ತು ಚಳುವಳಿಗಳು ತಮ್ಮ ಪ್ರಯತ್ನಗಳನ್ನು ಒಗ್ಗೂಡಿಸಬೇಕು ಎಂದು ಸಂಘಟನೆಗಳ ಮುಖಂಡರು ಹೇಳಿದ್ದಾರೆ.
ಎಸ್ಐಆರ್ ರದ್ದು; ಹಳೆ ಮತದಾರರ ಪಟ್ಟಿ ಮರುಸ್ಥಾಪನೆಗೆ ಆಗ್ರಹ
‘ಎಸ್ಐಆರ್ ಬೇಡ’ ರಾಷ್ಟ್ರೀಯ ವೇದಿಕೆಯು ಇಂದು ಹಲವು ಬೇಡಿಕೆಗಳನ್ನು ಮಂಡಿಸಿದೆ; ಎಸ್ಐಆರ್ ಅನ್ನು ರದ್ದುಗೊಳಿಸಿ ಹಿಂಪಡೆಯಿರಿ; ಎಸ್ಐಆರ್ ಪೂರ್ವದ ಹಳೆಯ ಚುನಾವಣಾ ಪಟ್ಟಿಯನ್ನು ಮರುಸ್ಥಾಪಿಸಿ ಎಂದು ಆಗ್ರಹಿಸಿದ್ದಾರೆ.
ಮುಖ್ಯ ಚುನಾವಣಾ ಆಯುಕ್ತ ಗ್ಯಾನೇಶ್ ಕುಮಾರ್ ಅವರನ್ನು ಹುದ್ದೆಯಿಂದ ತೆಗೆದುಹಾಕಿ; ದೇಶಾದ್ಯಂತ ಲಕ್ಷಾಂತರ ಮತದಾರರನ್ನು ಕಾನೂನುಬಾಹಿರವಾಗಿ ಕೈಬಿಟ್ಟಿರುವುದಕ್ಕಾಗಿ ಅವರ ವಿರುದ್ಧ ಕಾನೂನು (ಕ್ರಿಮಿನಲ್) ಪ್ರಕ್ರಿಯೆ ಜಾರಿ ಮಾಡಿ. ಚುನಾವಣಾ ಆಯುಕ್ತರ ನೇಮಕಾತಿ ಕಾನೂನನ್ನು ತಿದ್ದುಪಡಿ ಮಾಡಿ; ಆಡಳಿತ ಪಕ್ಷದ ಬಹುಮತದ ನಿಯಂತ್ರಣವನ್ನು ತೆಗೆದುಹಾಕಲು ಇಸಿಐ ಆಯ್ಕೆ ಸಮಿತಿಯನ್ನು ಪುನರ್ ರಚನೆ ಮಾಡಬೇಕು ಎಂದು ಒತ್ತಾಯಿಸಿದ್ದಾರೆ.
“ಪಶ್ಚಿಮ ಬಂಗಾಳ, ಉತ್ತರ ಪ್ರದೇಶ ಮತ್ತು ಪಂಜಾಬ್‌ನಲ್ಲಿ ಎಸ್ಐಆರ್ ಪಟ್ಟಿಗಳ ಆಧಾರದ ಮೇಲೆ ಯಾವುದೇ ಹೆಚ್ಚಿನ ಚುನಾವಣೆಗಳನ್ನು ನಡೆಸಬಾರದು. ಎಸ್ಐಆರ್ ನಿಂದ ಬಾಧಿತರಾಗಿರುವ ಮತದಾರರ ಪಟ್ಟಿಗಳನ್ನು ಮರುಹೊಂದಿಸಬೇಕು, ಸಾರ್ವಜನಿಕ ಪರಿಶೀಲನೆಗೆ ಒಳಪಡಿಸಬೇಕು” ಎಂದು ಬೇಡಿಕೆ ಇಟ್ಟಿದ್ದಾರೆ.
“ಪ್ರಸ್ತುತ ಪ್ರಕ್ರಿಯೆಯಿಂದ ಉಂಟಾಗುವ ಕಳವಳಗಳ ಬಗ್ಗೆ ತನಿಖೆ ನಡೆಸಬೇಕು, ಅದರಲ್ಲಿ ಉಲ್ಲಂಘನೆಗಳು ಕಂಡುಬಂದಲ್ಲಿ ಸೂಕ್ತ ಕ್ರಮಗಳನ್ನು ಕೈಗೊಳ್ಳಬೇಕು. ಮತದಾರರನ್ನು ಆಯ್ಕೆಮಾಡಿ ತೆಗೆದುಹಾಕುವುದು ಕೇವಲ ರಾಜಕೀಯ ಸಮಸ್ಯೆಯಲ್ಲ. ಹೀಗೆ ಕೈಬಿಡುವುದು ದ್ವೇಷ, ಬಹಿಷ್ಕಾರ ಮತ್ತು ವಿಭಜನೆಯನ್ನು ಹರಡುವ ಉದ್ದೇಶದಿಂದ ಉದ್ದೇಶಪೂರ್ವಕವಾಗಿ ನಡೆಸಲಾಗಿದೆ. ಇದರ ಪರಿಣಾಮಗಳು ಮತದಾನದ ಹಕ್ಕನ್ನು ಮೀರಿದವು” ಎಂದು ವೇದಿಕೆ ಹೇಳಿದೆ.
“ಮತದಾರರ ಪಟ್ಟಿಯಿಂದ ಹೊರಹಾಕಲ್ಪಡುವುದರ ಪರಿಣಾಮಗಳು ಜನರ ದಾಖಲೆಗಳು, ಸವಲತ್ತುಗಳು ಮತ್ತು ಜೀವನೋಪಾಯಕ್ಕೆ ಸಂಬಂಧಿಸಿದ ಪ್ರಕ್ರಿಯೆಗಳ ಪ್ರವೇಶದ ಮೇಲೂ ಪರಿಣಾಮ ಬೀರುತ್ತಿವೆ” ಎಂದಿರುವ ಪ್ರತಿನಿಧಿಗಳು, ಸಂಬಂಧಿತ ದಾಖಲೆಗಳಲ್ಲಿ ತಮ್ಮ ಸೇರ್ಪಡೆಯನ್ನು ಸ್ಥಾಪಿಸಲು ತೊಂದರೆಗಳನ್ನು ಎದುರಿಸುತ್ತಿರುವ ಸಂದರ್ಭಗಳಲ್ಲಿ ಜಾತಿ ಪ್ರಮಾಣ ಪತ್ರಗಳನ್ನು ನೀಡದಿರುವ ಬಗ್ಗೆ ಅವರು ನಿರ್ದಿಷ್ಟವಾಗಿ ಕಳವಳ ವ್ಯಕ್ತಪಡಿಸಿದ್ದಾರೆ.
“ವಲಸೆ ಕಾರ್ಮಿಕರು, ಯುವಜನರು, ಒಬಿಸಿಗಳು, ಮುಸ್ಲಿಮರು, ದಲಿತರು ಮತ್ತು ಆದಿವಾಸಿಗಳು ಸೇರಿದಂತೆ ಇತರೆ ವರ್ಗದವರು ಈ ಪ್ರಕ್ರಿಯೆಯ ಹೊರೆಯನ್ನು ಅನುಭವಿಸುತ್ತಿದ್ದಾರೆ. ಪೌರತ್ವ ಹಾಗೂ ಚುನಾವಣಾ ದಾಖಲೆಗಳ ಬಗ್ಗೆ ಇರುವ ಅನಿಶ್ಚಿತತೆಯ ಪರಿಣಾಮವಾಗಿ ಬಾಧಿತ ಜನರು ಕಷ್ಟದ ಜೊತೆಗೆ ಆಘಾತವನ್ನು ಅನುಭವಿಸುತ್ತಿದ್ದಾರೆ” ಎಂದು ವೇದಿಕೆ ಆತಂಕ ವ್ಯಕ್ತಪಡಿಸಿದೆ.
ದೇಶದ ವಿವಿಧ ಭಾಗಗಳಿಂದ ಸಾಕ್ಷ್ಯಗಳು ಮತ್ತು ಕೇಸ್ ಸ್ಟಡಿಗಳನ್ನು ಸಂಗ್ರಹಿಸಿರುವುದಾಗಿ ಸಂಘಟನೆಗಳು ತಿಳಿಸಿದ್ದು, ವೇದಿಕೆಯ ಮುಂಬರುವ ಕಾರ್ಯಕ್ರಮಗಳ ಮೂಲಕ ಈ ಅನುಭವಗಳನ್ನು ಸಾರ್ವಜನಿಕ ವಲಯಕ್ಕೆ ತರಲಾಗುವುದು ಎಂದಿದೆ.
ಅಕ್ರಮ ನುಸುಳುವಿಕೆ ಆರೋಪದ ಕುರಿತು ಮಾತನಾಡುತ್ತಾ, “ನಮ್ಮ ಕ್ಷೇತ್ರ ಕಾರ್ಯದ ಮೂಲಕ ಗಮನಿಸಿದ ಪ್ರಕರಣಗಳಲ್ಲಿ ಯಾವುದೇ ನುಸುಳಕೋರರ ಸಾಕ್ಷ್ಯಗಳು ಕಂಡುಬಂದಿಲ್ಲ, ಚುನಾವಣಾ ಪಟ್ಟಿಗಳಲ್ಲಿ ವಿದೇಶಿ ಪ್ರಜೆಗಳ ದೊಡ್ಡ ಪ್ರಮಾಣದ ಉಪಸ್ಥಿತಿಗೆ ಸಂಬಂಧಿಸಿದಂತೆ ಚುನಾವಣಾ ಆಯೋಗ ಕೂಡ ಯಾವುದೇ ಸಾಕ್ಷ್ಯವನ್ನು ಮಂಡಿಸಿಲ್ಲ. ಅಲ್ಲದೆ, ನುಸುಳುವಿಕೆಯ ಸುತ್ತಲಿನ ಹಕ್ಕುಬಾಧ್ಯತೆಗಳನ್ನು ನಿಜವಾದ ಮತದಾರರ ಬಹಿಷ್ಕಾರವನ್ನು ಸಮರ್ಥಿಸಲು ಬಳಸಬಾರದು” ಎಂದು ಹೇಳಿದೆ.
ರಾಷ್ಟ್ರೀಯ ಮಟ್ಟದಲ್ಲಿ ಸಂಘಟನೆ
ಜನರ ಹಕ್ಕುಗಳನ್ನು ರಕ್ಷಿಸಲು ಕೆಲಸ ಮಾಡುವ ಕಾರ್ಮಿಕ ಸಂಘಗಳು ಮತ್ತು ನಾಗರಿಕ ಸಂಸ್ಥೆಗಳು ಸೇರಿದಂತೆ ವಿಶಾಲ ಶ್ರೇಣಿಯ ಸಮೂಹ ಸಂಸ್ಥೆಗಳು ಎಸ್ಐಆರ್ ವಿರುದ್ಧದ ಪ್ರತಿಕ್ರಿಯೆಯಲ್ಲಿ ಭಾಗಿಯಾಗಬೇಕು ಎಂದು ‘ನೋ ಎಸ್ಐಆರ್’ ರಾಷ್ಟ್ರೀಯ ವೇದಿಕೆ ಮನವಿ ಮಾಡಿದೆ.
ರಾಜ್ಯ ಮಟ್ಟದ ಕ್ರಮಗಳು ಮುಂದುವರಿಯುತ್ತವೆ, ಎಸ್ಐಆರ್ ನಿಂದ ಬಾಧಿತವಾಗಿರುವ ಎಲ್ಲಾ ರಾಜ್ಯಗಳಲ್ಲಿ ಮತದಾರರ ಪಟ್ಟಿಯ ಸಾರ್ವಜನಿಕ ಪರಿಶೀಲನೆಯು ಅದರ ಕಾರ್ಯಕ್ರಮದ ನಿರಂತರ ಭಾಗವಾಗಿರುತ್ತದೆ ಎಂದು ವೇದಿಕೆ ಘೋಷಿಸಿದೆ.
ಬಾಧಿತ ಜನರ ಅನುಭವಗಳನ್ನು ದಾಖಲಿಸುವುದು, ಸಾರ್ವಜನಿಕರ ಮುಂದೆ ಸಾಕ್ಷ್ಯಗಳನ್ನು ಮಂಡಿಸುವ ಜೊತೆಗೆ ಎಸ್ಐಆಆರ್ ನಿಂದ ಉಂಟಾಗುವ ಕಳವಳಗಳಿಗೆ ಸಂಘಟಿತ ರಾಷ್ಟ್ರೀಯ ಪ್ರತಿಕ್ರಿಯೆಯನ್ನು ಸೃಷ್ಟಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ ಎಂದು ಪ್ರತಿನಿಧಿಗಳು ತಿಳಿಸಿದ್ದಾರೆ.
