`ನಿಮ್ಮ ಜೋಳಿಗೆ ಎತ್ತಿಕೊಂಡು ಹೊರಟು ಬಿಡಿ!’ – ಪ್ರಧಾನಿ ಮೋದಿಗೆ ಅರುಂಧತಿ ರಾಯ್ ಪತ್ರ

ನಮಗೊಂದು ಸರ್ಕಾರ ಬೇಕು. ಅತ್ಯಗತ್ಯವಾಗಿ, ತಕ್ಷಣವೇ ಬೇಕು. ಆದರೆ ನಮಗೀಗ ಸರ್ಕಾರ ಎಂಬುದಿಲ್ಲ. ನಮಗೆ ಉಸಿರಾಡಲಾಗುತ್ತಿಲ್ಲ. ನಮ್ಮ ಪ್ರಾಣ ಹಾರಿ ಹೋಗುತ್ತಿದೆ. ಸಿಗುವ ಸಹಾಯವನ್ನಾದರೂ ಪಡೆದುಕೊಳ್ಳಲು ನಾವು ಏನು ಮಾಡಬೇಕೆಂದು ತಿಳಿಸುವ ವ್ಯವಸ್ಥೆಗಳಾವುದೂ ಕಾರ್ಯನಿರ್ವಾಹಿಸುತ್ತಿಲ್ಲ.

ಬೇರೇನು ಮಾಡಬೇಕು? ಈ ಕ್ಷಣ, ಈ ಸ್ಥಳದಲ್ಲಿ ನಮ್ಮ ಕರ್ತವ್ಯವೇನು?

ನಾವು 2024 ರವರೆಗೆ ಕಾಯಲಾರೆವು. ಯಾವುದೇ ವಿಚಾರಕ್ಕಾದರೂ ಸರಿಯೇ. ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರಿಗೆ ವಿನಂತಿಸಿಕೊಳ್ಳುವ ದಿನವೊಂದು ಬರುವುದೆಂಬ ಊಹೆ ನನ್ನ ಸುತ್ತಮುತ್ತಲಿನ ಜನಕ್ಕೆ ಎಂದೂ ಬಂದಿರಲಿಕ್ಕಿಲ್ಲ. ವೈಯುಕ್ತಿಕವಾಗಿ ತನ್ನಷ್ಟಕ್ಕೆ ನಾನೇ ಅಂತಹ ವಿನಂತಿ ಮಾಡುವುದಕ್ಕಿಂತ ಜೈಲಿಗೆ ಹೋಗುವುದೇ ಉತ್ತಮವೆಂದು ಭಾವಿಸಿದ್ದೆ.

ಇದನ್ನೂ ಓದಿ: ಇತಿಹಾಸ: 60 ಲಕ್ಷ ಜನರ ಹತ್ಯಾಕಾಂಡದ ರೂವಾರಿ ‘ಅಡಾಲ್ಫ್‌ ಹಿಟ್ಲರ್‌‌’ ಆತ್ಮಹತ್ಯೆ ಮಾಡಿಕೊಂಡ

ಆದರೆ ಇಂದು ನಾವು ನಮ್ಮ ಮನೆಗಳಲ್ಲಿ, ಬೀದಿಗಳಲ್ಲಿ, ಆಸ್ಪತ್ರೆಗಳ ಕಾರ್ ಪಾರ್ಕಿಂಗ್ ಪ್ರದೇಶಗಳಲ್ಲಿ, ಮಹಾನಗರಗಳಲ್ಲಿ, ಸಣ್ಣ ಪಟ್ಟಣಗಳಲ್ಲಿ, ಗ್ರಾಮಗಳಲ್ಲಿ, ಅರಣ್ಯಗಳಲ್ಲಿ, ಹೊಲ-ಗದ್ದೆಗಳಲ್ಲಿ – ಎಲ್ಲೆಂದರಲ್ಲಿ ಬಿದ್ದು ಸಾಯುತ್ತಿದ್ದರೆ ಒಬ್ಬ ಸಾಮಾನ್ಯ ಪ್ರಜೆಯಾದ ನಾನು ನನ್ನ ಆತ್ಮಗೌರವವನ್ನು ಮರೆತು, ಕೋಟ್ಯಾಂತರ ಜನ ಸಹಚರರ ಜೊತೆ ಧ್ವನಿಗೂಡಿಸುತ್ತಿದ್ದೇನೆ. ಸ್ವಾಮಿ ದಯವಿಟ್ಟು… ದಯವಿಟ್ಟು.. ರಾಜಿನಾಮೆ ನೀಡಿ ಎಂದು ವಿನಂತಿಸಿಕೊಳ್ಳುತ್ತಿದ್ದೇನೆ. ಕನಿಷ್ಟ ಪಕ್ಷ ಈಗಲಾದರೂ ಪಕ್ಕಕ್ಕೆ ತೊಲಗಿ. ನಾನು ನಿಮ್ಮನ್ನು ಬೇಡಿಕೊಳ್ಳುತ್ತಿದ್ದೇನೆ, ದಯವಿಟ್ಟು ಕೆಳಗಿಳಿಯಿರಿ.

ಈ ಬಿಕ್ಕಟ್ಟನ್ನು ನೀವೇ ಸೃಷ್ಟಿಸಿದ್ದೀರಿ. ಇದನ್ನು ಬಗೆಹರಿಸುವುದು ನಿಮ್ಮ ಕೈಗಳಲ್ಲಿ ಇಲ್ಲ. ನೀವು ಇದನ್ನು ಮತ್ತಷ್ಟು ದಾರುಣವಾಗಿ ಮಾತ್ರವೇ ಮಾರ್ಪಡಿಸಬಲ್ಲಿರಿ. ಭಯ, ದ್ವೇಷ, ಅಜ್ಞಾನ ತುಂಬಿದ ವಾತಾವರಣದಲ್ಲಿ ಈ ವೈರಸ್ ಮತ್ತಷ್ಟು ಬಲಗೊಳ್ಳುತ್ತದೆ. ಧ್ವನಿಯೆತ್ತಿ ಮಾತನಾಡಬಲ್ಲ ಧ್ವನಿಗಳನ್ನು ನೀವು ಹತ್ತಿಕ್ಕಿದಾಗ ಈ ವೈರಸ್ ವಿಸ್ತರಿಸುತ್ತದೆ. ಸತ್ಯ ಏನೆಂದರೆ ಅಂತರಾಷ್ಟ್ರೀಯ ಪ್ರಚಾರ ಸಾಧನಗಳಲ್ಲಿ ಮಾತ್ರವೇ ಪ್ರಕಟವಾಗುವಂತೆ ನೀವು ದೇಶದಲ್ಲಿರುವ ಪ್ರಚಾರ ಸಾಧನಗಳನ್ನು ನಿಮ್ಮ ಗುಲಾಮಗಿರಿಯಲ್ಲಿರಿಸಿಕೊಂಡಾಗ ಈ ವೈರಸ್ ದಿಕ್ಕು ದಿಕ್ಕುಗಳಿಗೂ ವ್ಯಾಪಿಸುತ್ತದೆ. ತಮ್ಮ ಅಧಿಕಾರವಧಿಯಲ್ಲಿ ಒಟ್ಟಾರೆ ಒಂದೇ ಒಂದು ಪತ್ರಿಕಾಗೋಷ್ಠಿಯನ್ನು ಕೂಡ ನಿರ್ವಹಿಸದ, ಇಷ್ಟು ಭಯಾನಕ ವಾತಾವರಣದಲ್ಲಿಯೂ ಕೂಡ ಎದುರಿನಲ್ಲಿರುವವರ ಪ್ರಶ್ನೆಗಳಿಗೆ ಉತ್ತರಿಸಲಾಗದ ಪ್ರಧಾನ ಮಂತ್ರಿ ಇದ್ದಾಗ ಈ ವೈರಸ್ ಮತ್ತಷ್ಟು ರೌದ್ರನರ್ತನ ಮಾಡುತ್ತದೆ.

ಇದನ್ನೂ ಓದಿ: ’ಬಂಗಾಳದಲ್ಲಿ ಮುಸ್ಲಿಮರ ಮೇಲೆ ಭೀಕರ ದಾಳಿ ನಡೆಯಲಿದೆ’- ಕೋಮುಗಲಭೆಗೆ ಪ್ರಚೋದನೆ ನೀಡಿದ ಪ್ರಕಾಶ್‌‌ ಬೆಳವಾಡಿ

ನೀವೀಗ ಅಧಿಕಾರದಿಂದ ಕೆಳಗಿಳಿಯದಿದ್ದರೆ ನಮ್ಮಲ್ಲಿ ಸಾವಿರಾರು, ಲಕ್ಷಾಂತರ ಮಂದಿ ಅನಾವಶ್ಯಕವಾಗಿ ಮರಣ ಹೊಂದುತ್ತಾರೆ. ಹಾಗಾಗಿ ನೀವು ಹೊರಡಿ, ನಿಮ್ಮ ಜೋಳಿಗೆ ಎತ್ತಿಕೊಂಡು. ನೀವು ಗೌರವಯುತವಾಗಿ ಇಳಿಯುವ ಅವಕಾಶವಿದ್ದಾಗಲೇ ಇಳಿದುಬಿಡಿ. ನಿಮಗೆ ಧ್ಯಾನದಲ್ಲಿ, ಏಕಾಂತದಲ್ಲಿ ಉಜ್ವಲವಾದ ಭವಿಷ್ಯವಿದೆ. ನಿಮಗೆ ಬೇಕಾದುದು ಅದೇ ಎಂದು ಈ ಹಿಂದೆ ನೀವೇ ಹೇಳಿದ್ದೀರಿ. ಈಗಾಗಲೇ ನಡೆಯುತ್ತಿರುವ ಸಾಮೂಹಿಕ ಮಾರಣಹೋಮ ಹೀಗೆ ಮುಂದುವರೆದರೆ ನಿಮಗೆ ಅದೂ ಕೂಡ ಸಾಧ್ಯವಾಗದೇ ಹೋಗಬಹುದು.

ಈಗಾಗಲೇ ನಿಮ್ಮ ಸ್ಥಾನವನ್ನು ಅಲಂಕರಿಸಲು ನಿಮ್ಮ ಪಕ್ಷದಲ್ಲೇ ಬಹಳಷ್ಟು ಮಂದಿ ಇದ್ದಾರೆ. ಇಂತಹ ಬಿಕ್ಕಟ್ಟಿನ ಸಂದರ್ಭದಲ್ಲಿ ವಿರೋಧ ಪಕ್ಷಗಳ ಜೊತೆ ಸಾಮರಸ್ಯವಾಗಿ ಇರಬೇಕೆಂದು ತಿಳಿದವರು. ನಿಮ್ಮ ಪಕ್ಷದಿಂದಲೇ, ರಾಷ್ಟ್ರೀಯ ಸ್ವಯಂ ಸೇವಕ್ ಸಂಘದ ಅನುಮತಿಯೊಂದಿಗೆ, ಯಾರಾದರೂ ಆಗಲಿಬಿಡಿ. ಸರ್ಕಾರವನ್ನು, ಪ್ರಸ್ತುತ ವಾಗಿ ಇರುವ ಬಿಕ್ಕಟ್ಟು ನಿರ್ವಹಣೆಯ ತಂಡವನ್ನು ನಡೆಸಬಲ್ಲವು.

ಇದನ್ನೂ ಓದಿ: ಟಿಎಂಸಿಯಿಂದ ಹಾರಿದ 148 ಜನರಿಗೆ BJP ಟಿಕೆಟ್, ಗೆದ್ದವರು 6 ಜನ!

ರಾಜ್ಯಗಳ ಮುಖ್ಯಮಂತ್ರಿಗಳು ತಮ್ಮ ಪ್ರತಿನಿಧಿಗಳನ್ನು ಆಯ್ಕೆ ಮಾಡಿಕೊಳ್ಳಬಹುದು. ಆ ಮೂಲಕ ಎಲ್ಲಾ ಪಕ್ಷಗಳಿಗೂ ಪ್ರತಿನಿಧಿತ್ವ ದೊರೆಯಬಹುದು. ಒಂದು ರಾಷ್ಟ್ರೀಯ ಪಕ್ಷವಾಗಿ ಕಾಂಗ್ರೆಸ್‌ಗೂ ಆ ಬಿಕ್ಕಟ್ಟು ನಿರ್ವಹಣೆ ಯ ತಂಡದಲ್ಲಿ ಸ್ಥಾನ ಇರಬಹುದು. ಹಾಗೆಯೇ ವಿಜ್ಞಾನಿಗಳು, ಜನಾರೋಗ್ಯ ತಜ್ಞರು, ವೈದ್ಯರು, ಅನುಭವಿಗಳಾದ ಉನ್ನತಾಧಿಕಾರಿಗಳು ಇರಬಹುದು. ಇದೆಲ್ಲಾ ನಿಮಗೆ ಅರ್ಥವಾಗದಿರಬಹುದು, ಆದರೆ ಇದನ್ನೇ ಪ್ರಜಾತಂತ್ರ ಎನ್ನುತ್ತಾರೆ. ನೀವು ಅಂದುಕೊಳ್ಳುತ್ತಿರಬಹುದು, ಪ್ರತಿಪಕ್ಷ ಮುಕ್ತ ಪ್ರಜಾತಂತ್ರ ಎಂಬುದು ಇರದು. ಒಂದು ವೇಳೆ ಇದ್ದರೆ ಅದನ್ನು ನಿರಂಕುಶತ್ವ ಎನ್ನುತ್ತಾರೆ. ಈಗಿರುವ ವೈರಸ್‌ಗೆ ನಿರಂಕುಶತ್ವ ಎಂದರೆ ಬಹಳ ಇಷ್ಟ.

ನೀವೀಗ ಈ ಕೆಲಸ ಮಾಡದಿದ್ದರೆ, ಪ್ರಸ್ತುತ ಇರುವ ವಾತಾವರಣ ಹಂತ ಹಂತವಾಗಿ ಬೆಳೆದು ಅಂತರಾಷ್ಟ್ರೀಯ ಸಮಸ್ಯೆಯಾಗಿ, ಪ್ರಪಂಚಕ್ಕೇ ಅಪಾಯಕಾರಿ ಎಂದು ಕಾಣುತ್ತಿದೆ. ಇದು – ನಿಮ್ಮ ಅಸಾಮರ್ಥ್ಯ ಬೇರೆ ದೇಶಗಳಿಗೆ ನಮ್ಮ ಆತಂರಿಕ ವ್ಯವಹಾರಗಳಲ್ಲಿ ಮೂಗು ತೂರಿಸಲು ಪ್ರಯತ್ನಿಸುವುದಕ್ಕೆ ಮತ್ತು ಅಧಿಕಾರ ಹಿಡಿಯಲು ಪ್ರಯತ್ನಿಸುವುದಕ್ಕೆ ನ್ಯಾಯಯುತವಾದ ಅವಕಾಶವನ್ನು ನೀಡುತ್ತದೆ. ನಾವು ಕಷ್ಟಪಟ್ಟು ಹೋರಾಡಿ ಸಾಧಿಸಿಕೊಂಡ ಸಾರ್ವಭೌಮತ್ವ ಅಪಾಯದಲ್ಲಿ ಸಿಲುಕುತ್ತದೆ. ಪುನಃ ನಮ್ಮ ದೇಶ ಒಂದು ವಸಾಹತುವಾಗಿ ಮಾರ್ಪಡುತ್ತದೆ. ಇದೊಂದು ಗಂಭೀರವಾದ ಅಪಾಯಕಾರಿ ಅವಕಾಶ. ಇದನ್ನು ಕಡೆಗಣಿಸಬೇಡಿ.

ಆದ್ದರಿಂದ ಮಹಾನುಭಾವಾ, ದಯವಿಟ್ಟು ನೀವು ದಯಮಾಡಿಸಿ…ನೀವು ಮಾಡಬಹುದಾದ ಅತ್ಯಂತ ಜವಾಬ್ದಾರಿಯುತ ಕೆಲಸವಿದು. ನಮಗೆ ಪ್ರಧಾನ ಮಂತ್ರಿಯಾಗಿರುವ ನೈತಿಕ ಅಧಿಕಾರವನ್ನು ನೀವು ಕಳೆದುಕೊಂಡಿದ್ದೀರಿ.

ಕೃಪೆ: scroll. In
ಅನುವಾದ ರೇಣುಕಾ ಭಾರತಿ ಚಿಕ್ಕಮಗಳೂರು

ಇದನ್ನೂ ಓದಿ: ತೇಜಸ್ವಿ ಸೂರ್ಯ, ನಿಮ್ಮ ಮೆದುಳಲ್ಲಿರುವ ಕೋಮು ವೈರಸ್‌ ಕೊರೊನಾಗಿಂತಲೂ ಅಪಾಯಕಾರಿ, ಚಿಕಿತ್ಸೆ ಪಡ್ಕೊಳ್ಳಿ: ಸಿದ್ದರಾಮಯ್ಯ