ಎರಡು ವರ್ಷಗಳ ವಿಳಂಬದ ನಂತರ ಪಿಎಂ ಕೇರ್ಸ್ ನಿಧಿಯು ತನ್ನ 2023-24 ಮತ್ತು 2024-25ರ ಹಣಕಾಸು ವರ್ಷಗಳ ಆಡಿಟ್ ವರದಿಗಳನ್ನು (ಲೆಕ್ಕಪರಿಶೋಧನಾ ವರದಿ) ಆಗಸ್ಟ್ 17ರಂದು ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಅಪ್‌ಲೋಡ್ ಮಾಡಿದೆ.
ಪಿಎಂ ಕೇರ್ಸ್‌ನ ಖಾತೆಗಳನ್ನು ಆಗಸ್ಟ್ 6 ರಂದು ಆಡಿಟ್ (ಲೆಕ್ಕಪರಿಶೋಧನೆ) ಮಾಡಲಾಗಿದ್ದು, ಆಗಸ್ಟ್ 7 ರಂದು ಆಡಿಟರ್‌ಗಳು (ಲೆಕ್ಕಪರಿಶೋಧಕರು) ಇದಕ್ಕೆ ಸಹಿ ಹಾಕಿದ್ದಾರೆ ಎಂದು ವರದಿಗಳು ಹೇಳಿವೆ.
2024-25ರ ಹಣಕಾಸು ವರ್ಷದ ವರದಿಯ ಪ್ರಕಾರ, ಪಿಎಂ ಕೇರ್ಸ್ ನಿಧಿಯು ದೇಣಿಗೆಗಳು ಮತ್ತು ಠೇವಣಿಗಳ ಮೇಲಿನ ಬಡ್ಡಿಯ ಮೂಲಕ 1,200 ಕೋಟಿ ರೂಪಾಯಿಗಿಂತಲೂ ಹೆಚ್ಚು ಹಣವನ್ನು ಸ್ವೀಕರಿಸಿದೆ. ಮಾರ್ಚ್ 31, 2025ಕ್ಕೆ ಕೊನೆಗೊಂಡ ಈ ವರ್ಷದಲ್ಲಿ 87 ಲಕ್ಷ ರೂಪಾಯಿಗಳನ್ನು ವೆಚ್ಚ ಎಂದು ದಾಖಲಿಸಲಾಗಿದೆ. ಮಾರ್ಚ್ 31, 2025ರ ಅವಧಿಗೆ ಪಿಎಂ ಕೇರ್ಸ್ ಖಾತೆಗಳಲ್ಲಿ ಒಟ್ಟು 8,452 ಕೋಟಿ ರೂಪಾಯಿ ಬಾಕಿ ಉಳಿದಿದೆ.
ಕೋವಿಡ್-19 ಸಾಂಕ್ರಾಮಿಕದ ಆರಂಭದಲ್ಲಿ, ತುರ್ತು ಪರಿಸ್ಥಿತಿಗಳು ಮತ್ತು ವಿಪತ್ತುಗಳನ್ನು ಎದುರಿಸುವ ಉದ್ದೇಶದಿಂದ ಮಾರ್ಚ್ 2020ರಲ್ಲಿ ಪಿಎಂ ಕೇರ್ಸ್ ನಿಧಿಯನ್ನು ಸ್ಥಾಪಿಸಲಾಯಿತು. ಇದು ತನ್ನ ಮೊದಲ ಮೂರು ವರ್ಷಗಳಲ್ಲಿ ಭಾರಿ ಪ್ರಮಾಣದ 13,000 ಕೋಟಿ ರೂಪಾಯಿಗಳನ್ನು ಸಂಗ್ರಹಿಸಿತ್ತು. ಆರಂಭದ ಮೊದಲ ವಾರದಲ್ಲೇ ಸುಮಾರು 3,000 ಕೋಟಿ ರೂಪಾಯಿ ದೇಣಿಗೆಯನ್ನು ಒಟ್ಟುಗೂಡಿಸಿತ್ತು.
ಹಣ ಸಂಗ್ರಹಿಸುವ ಸಮಯದಲ್ಲಿ, ಪಿಎಂ ಕೇರ್ಸ್ ನಿಧಿಯನ್ನು ಕೇಂದ್ರ ಸರ್ಕಾರವೇ ಸ್ಥಾಪಿಸಿರುವುದರಿಂದ ಇದು ಸಿಎಸ್‌ಆರ್ (ಸಿಎಸ್‌ಆರ್ – ಕಾರ್ಪೊರೇಟ್ ಸಾಮಾಜಿಕ ಹೊಣೆಗಾರಿಕೆ) ಹಣವನ್ನು ಸ್ವೀಕರಿಸಬಹುದು ಎಂದು ಸರ್ಕಾರ ಹೇಳಿತ್ತು. ಅಷ್ಟೇ ಅಲ್ಲದೆ, ಸಾರ್ವಜನಿಕ ಅಧಿಕಾರಿಗಳು/ಸರ್ಕಾರಿ ನೌಕರರು ತಮ್ಮ ಸಂಬಳವನ್ನು ದೇಣಿಗೆಯಾಗಿ ನೀಡುವಂತೆ ಸಚಿವರು ಮನವಿಗಳನ್ನು ಕೂಡ ಮಾಡಿದ್ದರು. ಆದರೆ, ಸಾರ್ವಜನಿಕರು ಇದರ ಬಗ್ಗೆ ಮಾಹಿತಿ ಕೇಳಲು ಪ್ರಾರಂಭಿಸಿದಾಗ, ಈ ಟ್ರಸ್ಟ್ ಒಂದು ‘ಸಾರ್ವಜನಿಕ ಪ್ರಾಧಿಕಾರ’ ಅಲ್ಲ, ಆದ್ದರಿಂದ ಇದು ಮಾಹಿತಿ ಹಕ್ಕು ಕಾಯ್ದೆಯ (ಆರ್‌ಟಿಐ) ಅಡಿಯಲ್ಲಿ ಉತ್ತರಿಸಲು ಬದ್ಧವಾಗಿಲ್ಲ ಎಂದು ಸರ್ಕಾರ ವಾದಿಸಿತ್ತು.
ಇತ್ತೀಚೆಗೆ, ಲೋಕಸಭೆಯ ಕಾರ್ಯವಿಧಾನ ಮತ್ತು ಕಾರ್ಯನಿರ್ವಹಣೆಯ ನಿಯಮಾವಳಿಗಳ ಅಡಿಯಲ್ಲಿ ಪಿಎಂ ಕೇರ್ಸ್ ನಿಧಿಗೆ ಸಂಬಂಧಿಸಿದ ಪ್ರಶ್ನೆಗಳು ಮತ್ತು ಇತರ ಸಂಸದೀಯ ಮಧ್ಯಪ್ರವೇಶಗಳಿಗೆ ಅವಕಾಶವಿಲ್ಲ ಎಂದು ಪ್ರಧಾನ ಮಂತ್ರಿ ಕಾರ್ಯಾಲಯವು (ಪಿಎಂಒ) ಲೋಕಸಭಾ ಸಚಿವಾಲಯಕ್ಕೆ ತಿಳಿಸಿತ್ತು. ಇದರೊಂದಿಗೆ, ಈ ನಿಧಿಯ ನಾಪತ್ತೆಯಾಗಿದ್ದ ಆಡಿಟ್ ವರದಿಗಳ (ಲೆಕ್ಕಪರಿಶೋಧನಾ ವರದಿಗಳು) ಕುರಿತಾಗಿಯೂ ಪ್ರಶ್ನೆಗಳನ್ನು ಎತ್ತಲಾಗಿತ್ತು.
ನ್ಯಾಯಾಲಯಗಳು ಮತ್ತು ಮಾಹಿತಿ ಆಯೋಗಗಳ ಮೂಲಕ ಪಿಎಂ ಕೇರ್ಸ್ ನಿಧಿಯ ಬಗ್ಗೆ ಹೆಚ್ಚಿನ ವಿವರಗಳನ್ನು ಪಡೆಯಲು ಪ್ರಯತ್ನಿಸಿರುವ ಅಂಜಲಿ ಭಾರದ್ವಾಜ್ ಸೇರಿದಂತೆ ಆರ್‌ಟಿಐ ಕಾರ್ಯಕರ್ತರು, ಈ ಹಿಂದೆ ಹೀಗೆ ಹೇಳಿದ್ದಾರೆ, “ಈ ಪಾರದರ್ಶಕತೆಯ ಕೊರತೆಯು ಚುನಾವಣಾ ಬಾಂಡ್‌ಗಳ ಯೋಜನೆಯ ಸುತ್ತ ಎದ್ದಿದ್ದ ಕಳವಳಗಳನ್ನು ಹೋಲುತ್ತದೆ, ಅಲ್ಲಿ ದಾನಿಗಳ ಅನಾಮಧೇಯತೆಯು ಸಾರ್ವಜನಿಕ ಹೊಣೆಗಾರಿಕೆಯನ್ನು ಸೀಮಿತಗೊಳಿಸಿತ್ತು.
ದೊಡ್ಡ ಪ್ರಮಾಣದ ದೇಣಿಗೆಗಳನ್ನು ಸಾರ್ವಜನಿಕ ಪರಿಶೀಲನೆಯಿಂದ ಮರೆಮಾಚಿದಾಗ, ಅದು ಕ್ವಿಡ್-ಪ್ರೊ-ಕ್ವೋ (ಪ್ರತಿಫಲಾಪೇಕ್ಷೆಯ ವ್ಯವಸ್ಥೆ) ಮೂಲಕ ಭ್ರಷ್ಟಾಚಾರಕ್ಕೆ ದಾರಿ ಮಾಡಿಕೊಡುತ್ತದೆ. ಇಂತಹ ಅಪಾರದರ್ಶಕತೆಯು, ಚುನಾವಣಾ ಬಾಂಡ್ ವಿವಾದಗಳಲ್ಲಿ ಬೆಳಕಿಗೆ ಬಂದಿದ್ದ ಅಕ್ರಮಗಳಾದ — ಪ್ರತಿಫಲಾಪೇಕ್ಷೆಯ ಒಪ್ಪಂದಗಳು, ನಿಯಂತ್ರಕ ಸಂಸ್ಥೆಗಳ ನಿಷ್ಕ್ರಿಯತೆ ಮತ್ತು ಸುಲಿಗೆಯಂತಹ ದುರುಪಯೋಗಗಳಿಗೆ ಇಡೀ ವ್ಯವಸ್ಥೆಯನ್ನು ತುತ್ತಾಗುವಂತೆ ಮಾಡಬಹುದು.
Courtesy : thewire.in
