ಉತ್ತರಪ್ರದೇಶದ ಆಗ್ರಾ ಜಿಲ್ಲೆಯಲ್ಲಿ ಮೊಘಲರ ಕಾಲದ ಮಸೀದಿಯೊಂದರ ಮೇಲೆ ಮತ್ತು ಒಳಗೆ ಕೇಸರಿ ಧ್ವಜ ಹಾರಾಟ ನಡೆಸಲಾಗಿದ್ದು, ಘಟನೆಗೆ ಸಂಬಂಧಿಸಿ 11 ಮಂದಿ ದುಷ್ಕರ್ಮಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.
ರಾಮಮಂದಿರದ ಉದ್ಘಾಟನೆ ವೇಳೆ ಬಲಪಂಥೀಯ ಕಾರ್ಯಕರ್ತರು ನಡೆಸಿದ ಶೋಭಾ ಯಾತ್ರೆಯ ವೇಳೆ ಘಟನೆ ನಡೆದಿದೆ. ಆಗ್ರಾದ ತಾಜ್‌ಗಂಜ್ ಪೊಲೀಸ್ ಠಾಣೆಯಲ್ಲಿ ಈ ಕುರಿತು ಪ್ರಕರಣ ದಾಖಲಾಗಿದೆ. ಜನವರಿ 22ರಂದು ಮಧ್ಯಾಹ್ನ ಸುಮಾರು 3:30ಕ್ಕೆ 1,000-1,500 ಜನರು ಲಾಠಿಗಳು ಮತ್ತು ದೊಣ್ಣೆಗಳನ್ನು ಹಿಡಿದುಕೊಂಡು ಮಸೀದಿ ಬಳಿ ಬಂದಿದ್ದರು ಎಂದು ಬಿಲ್ಲೋಚ್‌ಪುರದ ದಿವಾನ್ ಜಿ ಕಿ ಬೇಗಂ ಶಾಹಿ ಮಸೀದಿಯ ಜಹೀರ್ ಉದ್ದೀನ್ ಆರೋಪಿಸಿದ್ದಾರೆ.
ಈ ಕುರಿತು ಪ್ರತಿಕ್ರಿಯಿಸಿದ ಜಹೀರ್ ಉದ್ದೀನ್, ಅವರು ಮಸೀದಿಯಲ್ಲಿ ಸಂಪೂರ್ಣ ಅವ್ಯವಸ್ಥೆಯನ್ನು ಸೃಷ್ಟಿಸಿದರು. ಮಿನಾರ್‌ಗಳು, ಗೋಡೆಗಳು ಮತ್ತು ಮಸೀದಿಯ ಒಳಗೆ ಗೋಡೆಗಳಲ್ಲಿ ಕೇಸರಿ ಧ್ವಜಗಳನ್ನು ಹಾರಿಸಿದ್ದಾರೆ, ಮಸೀದಿಯನ್ನು ಅಪವಿತ್ರಗೊಳಿಸಿದ್ದಾರೆ. ಮಸೀದಿಯೊಳಗಡೆ ಘೋಷಣೆಗಳನ್ನು ಕೂಗಿದರು ಮತ್ತು ಮಸೀದಿಯೊಳಗಿದ್ದವರಿಗೆ ಬೆದರಿಕೆ ಹಾಕಿದರು ಇತರ ಧರ್ಮದ ಬಗ್ಗೆ ಅವಹೇಳನ ಮಾಡಿದ್ದಾರೆ ಎಂದು ಹೇಳಿದ್ದಾರೆ.
ಈ ಕುರಿತು ಜಹೀರ್ ನೀಡಿದ ದೂರಿನ ಮೇರೆಗೆ 1,000-1,500 ಅಪರಿಚಿತ ವ್ಯಕ್ತಿಗಳ ವಿರುದ್ಧ ಸೆಕ್ಷನ್ 147 (ಗಲಭೆ), 148, 452 ಮತ್ತು 505 (2) ಸೇರಿ ಭಾರತೀಯ ದಂಡ ಸಂಹಿತೆಯ ವಿವಿಧ ಸೆಕ್ಸನ್‌ಗಳಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಘಟನೆಗೆ ಸಂಬಂಧಿಸಿದಂತೆ ಇದುವರೆಗೆ 11 ಜನರನ್ನು ಬಂಧಿಸಲಾಗಿದೆ ಮತ್ತು ಇತರರಿಗಾಗಿ ಶೋಧ ನಡೆಸಲಾಗುತ್ತಿದೆ ಎಂದು ಸ್ಟೇಷನ್ ಹೌಸ್ ಆಫೀಸರ್ ಜಸ್ವೀರ್ ಸಿಂಗ್ ಹೇಳಿದ್ದಾರೆ. ಬಂಧಿತ ವ್ಯಕ್ತಿಗಳು ಸಂಪರ್ಕಿತ ಸಂಘಟನೆಯ ಬಗ್ಗೆ ಕೂಡ ತನಿಖೆ ನಡೆಸಲಾಗುವುದು ಎಂದು ಹೇಳಿದ್ದಾರೆ.
ಸಾರ್ವಜನಿಕವಾಗಿ ಶಾಂತಿ ಕದಡಲು ಕೃತ್ಯ ಎಸಗಲಾಗಿದೆ ಎಂದು ಜಹೀರ್ ಉದ್ದೀನ್ ಪೊಲೀಸ್ ದೂರಿನಲ್ಲಿ ಆರೋಪಿಸಿದ್ದು, ಮಸೀದಿಯ ಬಳಿ ಇದ್ದವರು ಸಾಂಭವ್ಯ ಕೋಮು ಗಲಭೆ ತಡೆಯಲು ಸಂಯಮವನ್ನು ಪ್ರದರ್ಶಿಸಿದರು ಮತ್ತು ದುಷ್ಕರ್ಮಿಗಳ ಕೃತ್ಯವನ್ನು ಸಹಿಸಿಕೊಂಡರು ಎಂದು ಹೇಳಿದ್ದಾರೆ.
ಆಗ್ರಾದಲ್ಲಿರುವ ದಿವಾಂಜಿ ಬೇಗಂ ಅವರ ಸಮಾಧಿ ಮತ್ತು ಮಸೀದಿ, ಭಾರತೀಯ ಪುರಾತತ್ವ ಇಲಾಖೆಯಡಿಯಲ್ಲಿ ಸ್ಮಾರಕಗಳ ಪಟ್ಟಿಯಲ್ಲಿದೆ. ರೌಜಾ ಖ್ವಾಜಾ ಘಿಯಾಸ್-ಉದ್-ದಿನ್ ಖಾಜಿವಾನಿ ಅವರ ಪುತ್ರಿ ದಿವಾಂಜಿ ಬೇಗಂ ಅವರಿಗೆ ಸೇರಿದ ಸಮಾಧಿಯಾಗಿದೆ. ಮಸೀದಿಯ ನಿರ್ಮಾಣದ ವರ್ಷವನ್ನು ಪರ್ಷಿಯನ್ ಶಾಸನದಲ್ಲಿ 1,677 ಎಂದು ಉಲ್ಲೇಖಿಸಲಾಗಿದೆ. ಇದು ಷಾ ಜಹಾನಿ ಶೈಲಿಯ ವಾಸ್ತುಶಿಲ್ಪವನ್ನು ಪ್ರತಿನಿಧಿಸುತ್ತದೆ ಎಂದು ASI ಹೇಳುತ್ತದೆ.
ಇದನ್ನು ಓದಿ: ಭಾರತ್‌ ಜೋಡೋ ನ್ಯಾಯ ಯಾತ್ರೆ ವೇಳೆ ಅಸ್ಸಾಂನಲ್ಲಿ ಭದ್ರತಾ ಸಮಸ್ಯೆ: ಅಮಿತ್ ಶಾಗೆ ಪತ್ರ ಬರೆದ ಖರ್ಗೆ
