ಮೊರಾದಾಬಾದ್: ಉತ್ತರಾಖಂಡದ ಉತ್ತರಕಾಶಿಯಲ್ಲಿ ಇತ್ತೀಚೆಗೆ ಸಂಭವಿಸಿದ ಭೀಕರ ಮೇಘಸ್ಫೋಟದ ಬಗ್ಗೆ ಸಮಾಜವಾದಿ ಪಕ್ಷದ ಮಾಜಿ ಸಂಸದ ಎಸ್.ಟಿ. ಹಸನ್ ನೀಡಿದ ವಿವಾದಾತ್ಮಕ ಹೇಳಿಕೆ ಹೊಸ ಚರ್ಚೆಗೆ ನಾಂದಿ ಹಾಡಿದೆ. ಉತ್ತರಾಖಂಡ ಮತ್ತು ಹಿಮಾಚಲ ಪ್ರದೇಶಗಳಲ್ಲಿ ಇತರ ಧರ್ಮಗಳಿಗೆ ಸೂಕ್ತ ಗೌರವ ಸಿಗುತ್ತಿಲ್ಲ, ಅದಕ್ಕಾಗಿಯೇ ಇಂತಹ ದುರಂತಗಳು ಸಂಭವಿಸುತ್ತಿವೆ ಎಂದು ಅವರು ದೂರಿದ್ದಾರೆ.
ಐಎಎನ್ಎಸ್ ಜೊತೆ ಮಾತನಾಡಿದ ಹಸನ್, ಮೇಘಸ್ಫೋಟದಿಂದಾಗಿ ಇಡೀ ಗ್ರಾಮವೇ ಕೊಚ್ಚಿಕೊಂಡು ಹೋಗಿದ್ದು, ಅನೇಕರು ಅವಶೇಷಗಳ ಅಡಿಯಲ್ಲಿ ಸಿಲುಕಿದ್ದಾರೆ. ಇದು ನಿಜಕ್ಕೂ ಹೃದಯ ವಿದ್ರಾವಕ ಘಟನೆ ಎಂದು ಬೇಸರ ವ್ಯಕ್ತಪಡಿಸಿದರು. ಇಂತಹ ಘಟನೆಗಳು ಈ ಹಿಂದೆ ಸಂಭವಿಸಿರಲಿಲ್ಲ. ಮಿತಿಮೀರಿದ ಮರಗಳ ಕಡಿತವೇ ಇದಕ್ಕೆ ಕಾರಣವಾಗಿರಬಹುದು ಎಂದು ಮೊದಲಿಗೆ ಹೇಳಿದ ಅವರು, ನಂತರ ತಮ್ಮ ಹೇಳಿಕೆಗೆ ಧಾರ್ಮಿಕ ಆಯಾಮವನ್ನು ಸೇರಿಸಿದರು.
“ಉತ್ತರಾಖಂಡ ಮತ್ತು ಹಿಮಾಚಲ ಪ್ರದೇಶದಲ್ಲಿ ಇತರ ಧರ್ಮಗಳಿಗೆ ಗೌರವ ಸಿಗುತ್ತಿಲ್ಲ. ಈ ಜಗತ್ತನ್ನು ಆಳುವ ಒಬ್ಬ ಶಕ್ತಿ ಇದೆ. ದೈವಿಕ ನ್ಯಾಯ ನಡೆಯುವಾಗ ಯಾರೂ ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಸಾಧ್ಯವಿಲ್ಲ. ಯಾವುದೇ ದರ್ಗಾ ಅಥವಾ ದೇವಸ್ಥಾನಗಳ ಮೇಲೆ ಬುಲ್ಡೋಜರ್ ಬಳಸಬಾರದು. ಅಂತಹ ಸ್ಥಳಗಳನ್ನು ಶಾಂತಿಯುತವಾಗಿ ಸ್ಥಳಾಂತರಿಸುವುದು ಉತ್ತಮ,” ಎಂದು ಹಸನ್ ಹೇಳಿದರು. ಈ ಹೇಳಿಕೆ ರಾಜಕೀಯ ವಲಯಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
ಬಿಜೆಪಿ ತೀವ್ರ ಟೀಕೆ
ಹಸನ್ ಅವರ ಈ ಹೇಳಿಕೆಗಳನ್ನು ಬಿಜೆಪಿ ತೀವ್ರವಾಗಿ ಖಂಡಿಸಿದೆ. ಇದು ಸಮಾಜವನ್ನು ಒಡೆಯುವ, ಆಧಾರರಹಿತ ಮತ್ತು ರಾಜಕೀಯ ಪ್ರೇರಿತ ಹೇಳಿಕೆ ಎಂದು ಬಿಜೆಪಿ ಬಣ್ಣಿಸಿದೆ. ಬಿಜೆಪಿ ವಕ್ತಾರ ಪ್ರದೀಪ್ ಭಂಡಾರಿ, “ಎಂತಹ ನಾಚಿಕೆಗೇಡು! ಮಾಜಿ ಸಂಸದ ಎಸ್.ಟಿ. ಹಸನ್ ನೈಸರ್ಗಿಕ ದುರಂತವನ್ನು ಕೋಮುವಾದೀಕರಣಗೊಳಿಸಿದ್ದಾರೆ. ಹಿಂದೂಗಳಿಗೆ ಅವಮಾನ ಮಾಡಿ, ಉತ್ತರಕಾಶಿಯ ಧಾರಾಲಿ ಗ್ರಾಮಸ್ಥರ ಸಂಕಟವನ್ನು ಕಡೆಗಣಿಸಿದ್ದಾರೆ. ಸಮಾಜವಾದಿ ಪಕ್ಷಕ್ಕೆ ಸಾವಾಗಲಿ ಅಥವಾ ದುರಂತವಾಗಲಿ, ಅದು ಹಿಂದೂ-ಮುಸ್ಲಿಂ ದೃಷ್ಟಿಕೋನದಿಂದ ಮಾತ್ರ ಕಾಣುತ್ತದೆ,” ಎಂದು ತೀವ್ರವಾಗಿ ಟೀಕಿಸಿದ್ದಾರೆ.
ದೆಹಲಿ ಬಿಜೆಪಿ ಸಂಸದ ಪ್ರವೀಣ್ ಖಂಡೇಲ್ವಾಲ್ ಮಾತನಾಡಿ, “ಅವರು ಹೇಳಿದ್ದು ಸಂಪೂರ್ಣ ಆಧಾರರಹಿತ. ನೈಸರ್ಗಿಕ ದುರಂತಗಳು ಎಲ್ಲಿ ಬೇಕಾದರೂ ಸಂಭವಿಸಬಹುದು, ಮತ್ತು ಯಾವುದೇ ಧರ್ಮಕ್ಕೆ ಗೌರವ ಸಿಗುತ್ತಿಲ್ಲ ಎಂದು ಹೇಳುವುದು ಸಂಪೂರ್ಣವಾಗಿ ತಪ್ಪು,” ಎಂದರು.
ಹಿರಿಯ ಬಿಜೆಪಿ ನಾಯಕ ಮುಖ್ತಾರ್ ಅಬ್ಬಾಸ್ ನಖ್ವಿ ಕೂಡ ಈ ಹೇಳಿಕೆಯನ್ನು ಖಂಡಿಸಿದರು. “ದೇಶದ ಜನರು ಸಂತ್ರಸ್ತರ ಯೋಗಕ್ಷೇಮಕ್ಕಾಗಿ ಪ್ರಾರ್ಥಿಸುತ್ತಿರುವಾಗ, ಕೆಲವರು ಶಾಪಗಳನ್ನು ನೀಡುತ್ತಿದ್ದಾರೆ. ಈ ದುರಂತಕ್ಕೆ ಇದೇ ಕಾರಣ ಎಂದು ನಿರಾಧಾರ ವಾದಗಳನ್ನು ಮಾಡುತ್ತಿದ್ದಾರೆ. ಪ್ಯಾಲೆಸ್ಟೈನ್ನಲ್ಲಿ ಏನಾಗುತ್ತಿದೆ? ಇರಾಕ್ನಲ್ಲಿ ಏನಾಗುತ್ತಿದೆ? ನೀವು ಏಕೆ ಇಂತಹ ತರ್ಕಹೀನ ವಾದಗಳನ್ನು ಮಾಡುತ್ತಿದ್ದೀರಿ?” ಎಂದು ಪ್ರಶ್ನಿಸಿದರು.
ತೀವ್ರಗೊಂಡ ರಕ್ಷಣಾ ಕಾರ್ಯಾಚರಣೆ
ಇದೇ ವೇಳೆ, ಪ್ರವಾಹದಿಂದ ತತ್ತರಿಸಿರುವ ಉತ್ತರಾಖಂಡದ ಉತ್ತರಕಾಶಿ ಜಿಲ್ಲೆಯಲ್ಲಿ ಶನಿವಾರ ಐದನೇ ದಿನವೂ ಪರಿಹಾರ ಮತ್ತು ರಕ್ಷಣಾ ಕಾರ್ಯಾಚರಣೆಗಳು ಮುಂದುವರಿದಿವೆ. ಭಾರತೀಯ ಸೇನೆ, ರಾಜ್ಯ ವಿಪತ್ತು ನಿರ್ವಹಣಾ ಪಡೆ (SDRF), ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪಡೆ (NDRF) ಮತ್ತು ಇಂಡೋ ಟಿಬೆಟಿಯನ್ ಬಾರ್ಡರ್ ಪೊಲೀಸ್ (ITBP) ಪಡೆಗಳು ಹರ್ಸಿಲ್ ಮತ್ತು ಧಾರಾಲಿ ಪ್ರದೇಶಗಳಿಂದ ಜನರನ್ನು ರಕ್ಷಿಸಲು ಜಂಟಿ ಪ್ರಯತ್ನಗಳನ್ನು ಮಾಡುತ್ತಿವೆ.
ಉತ್ತರಕಾಶಿ ಪೊಲೀಸರು ಸಾಮಾಜಿಕ ಜಾಲತಾಣವಾದ ‘X’ ನಲ್ಲಿ, “ಶನಿವಾರ ಬೆಳಿಗ್ಗೆ 8 ಗಂಟೆಯವರೆಗೆ, ಐಟಿಬಿಪಿ ಯೋಧರನ್ನು ಮತ್ಲಿಗೆ ಸ್ಥಳಾಂತರಿಸಲಾಗಿದೆ. ದುರಂತದಲ್ಲಿ ಸಿಲುಕಿರುವ ಜನರನ್ನು ಹೆಲಿಕಾಪ್ಟರ್ ಮೂಲಕ ರಕ್ಷಿಸಲಾಗುತ್ತಿದೆ,” ಎಂದು ಮಾಹಿತಿ ನೀಡಿದ್ದಾರೆ.
ಚಿನ್ನೂಕ್ ಮತ್ತು ಚೀತಾ ಹೆಲಿಕಾಪ್ಟರ್ಗಳು ಸಿಕ್ಕಿಹಾಕಿಕೊಂಡ ಯಾತ್ರಾರ್ಥಿಗಳನ್ನು ಧಾರಾಲಿ ಮತ್ತು ಹರ್ಸಿಲ್ನ ಎತ್ತರದ ಪ್ರದೇಶಗಳಿಗೆ ಸ್ಥಳಾಂತರಿಸುತ್ತಿವೆ. ಜೊತೆಗೆ, ಅನೇಕ ಸ್ಥಳಗಳಲ್ಲಿ ನಿಯೋಜಿಸಲಾದ ವೈದ್ಯಕೀಯ ತಂಡಗಳು ಸಂತ್ರಸ್ತರಿಗೆ ಚಿಕಿತ್ಸೆ ನೀಡುತ್ತಿವೆ. ಸೇನೆ, ಐಟಿಬಿಪಿ, ಎನ್ಡಿಆರ್ಎಫ್, ಎಸ್ಡಿಆರ್ಎಫ್, ರಾಜ್ಯ ಸರ್ಕಾರ ಮತ್ತು ಸ್ಥಳೀಯ ಆಡಳಿತ ಸೇರಿದಂತೆ 800 ಕ್ಕೂ ಹೆಚ್ಚು ಸದಸ್ಯರ ರಕ್ಷಣಾ ತಂಡಗಳು ಈ ಕಾರ್ಯಾಚರಣೆಯಲ್ಲಿ ತೊಡಗಿವೆ.
ರಕ್ಷಣಾ ತಂಡಗಳು ಪ್ರವಾಹ ಪೀಡಿತ ಹರ್ಸಿಲ್ನಿಂದ 382 ಜನರನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಿವೆ. ಎರಡು ಚಿನ್ನೂಕ್, ಎರಡು MI-17 ಮತ್ತು ನಾಲ್ಕು ವಾಯುಪಡೆ ಹೆಲಿಕಾಪ್ಟರ್ಗಳನ್ನು ರಕ್ಷಣಾ ಕಾರ್ಯಾಚರಣೆಗಾಗಿ ಬಳಸಲಾಗುತ್ತಿದೆ. ಮಣ್ಣು ಕುಸಿತಕ್ಕೆ ಒಳಗಾದ ಗಂಗೋತ್ರಿಯಿಂದ ಹರ್ಸಿಲ್ಗೆ 274 ಜನರನ್ನು, ಗಂಗೋತ್ರಿಯಿಂದ ನೀಲಂಗ್ಗೆ 19 ಜನರನ್ನು, ಹರ್ಸಿಲ್ನಿಂದ ಮತ್ಲಿಗೆ 260 ಜನರನ್ನು ಮತ್ತು ಹರ್ಸಿಲ್ನಿಂದ ಜಾಲಿ ಗ್ರಾಂಟ್ ಏರ್ಸ್ಟ್ರಿಪ್ಗೆ 112 ಜನರನ್ನು ವೈಮಾನಿಕವಾಗಿ ಸ್ಥಳಾಂತರಿಸಲಾಗಿದೆ.
ರಾಜ್ಯ ಆಹಾರ ಮತ್ತು ಸರಬರಾಜು ಇಲಾಖೆಯು ನಿರಾಶ್ರಿತರಿಗೆ ಊಟದ ವ್ಯವಸ್ಥೆ ಮಾಡುತ್ತಿದೆ. ಆಗಸ್ಟ್ 5 ರ ಮೇಘಸ್ಫೋಟದ ನಂತರ, ಧಾರಾಲಿಯಲ್ಲಿ 50 ನಾಗರಿಕರು, 8 ಯೋಧರು ಮತ್ತು ಒಬ್ಬ ಜೂನಿಯರ್ ಕಮಿಷನ್ಡ್ ಆಫೀಸರ್ (JCO) ಇನ್ನೂ ಕಾಣೆಯಾಗಿದ್ದಾರೆ. ಮೇಘಸ್ಫೋಟದಿಂದಾಗಿ ಬರ್ತ್ವಾರಿ, ಲಿಂಚಿಗಾಡ್, ಗಂಗ್ರಾಣಿ, ಹರ್ಸಿಲ್ ಮತ್ತು ಧಾರಾಲಿಯ ಪ್ರಮುಖ ರಸ್ತೆ ಸಂಪರ್ಕಗಳು ಹಾನಿಗೊಳಗಾಗಿದ್ದು, ಈ ಪ್ರದೇಶಗಳು ಪ್ರವೇಶಿಸಲಾಗದಂತಾಗಿವೆ. ಸೇನೆ ಮತ್ತು ಇಂಡೋ-ಟಿಬೆಟಿಯನ್ ಬಾರ್ಡರ್ ಪೊಲೀಸ್ ಸಿಬ್ಬಂದಿ ಸಿಕ್ಕಿಹಾಕಿಕೊಂಡ ಪ್ರವಾಸಿಗರಿಗೆ ಆಹಾರ, ವೈದ್ಯಕೀಯ ಸಹಾಯ ಮತ್ತು ಆಶ್ರಯ ಒದಗಿಸುತ್ತಿದ್ದಾರೆ.
ಲಡಾಖ್ಗೆ ರಾಜ್ಯ ಸ್ಥಾನಮಾನ ಮತ್ತು ಆರನೇ ಶೆಡ್ಯೂಲ್ ವಿಸ್ತರಣೆ ಕೋರಿ ಕಾರ್ಗಿಲ್ನಲ್ಲಿ ಮೂರು ದಿನಗಳ ಉಪವಾಸ ಸತ್ಯಾಗ್ರಹ
