ಗಾಜಾ: ಕಳೆದ 24 ಗಂಟೆಗಳಲ್ಲಿ ಗಾಜಾ ಪಟ್ಟಿಯಾದ್ಯಂತ ಇಸ್ರೇಲ್ ನಡೆಸಿದ ದಾಳಿಯಲ್ಲಿ ಕನಿಷ್ಠ 97 ಪ್ಯಾಲೆಸ್ತೀನಿಯನ್ನರು ಸಾವನ್ನಪ್ಪಿದ್ದಾರೆ ಮತ್ತು 138 ಮಂದಿ ಗಾಯಗೊಂಡಿದ್ದಾರೆ ಎಂದು ಗಾಜಾ ಮೂಲದ ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ.
ಆಂಬುಲೆನ್ಸ್‌ಗಳು ಮತ್ತು ನಾಗರಿಕ ರಕ್ಷಣಾ ಸಿಬ್ಬಂದಿಗೆ ತಲುಪಲು ಸಾಧ್ಯವಾಗದೆ ಇರುವ ಸ್ಥಳಗಳಲ್ಲಿ ಹಲವಾರು ಬಲಿಪಶುಗಳು ಅವಶೇಷಗಳ ಅಡಿಯಲ್ಲಿ ಮತ್ತು ರಸ್ತೆಗಳಲ್ಲಿ ಸಿಲುಕಿದ್ದಾರೆ ಎಂದು ಆರೋಗ್ಯ ಅಧಿಕಾರಿಗಳು ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಮಾರ್ಚ್ 18ರಂದು ಗಾಜಾಪಟ್ಟಿಯಾದ್ಯಂತ ಇಸ್ರೇಲ್ ತನ್ನ ತೀವ್ರ ದಾಳಿಯನ್ನು ಪ್ರಾರಂಭಿಸಿದಾಗಿನಿಂದ ಕನಿಷ್ಠ 1,163 ಪ್ಯಾಲೆಸ್ತೀನಿಯನ್ನರು ಸಾವನ್ನಪ್ಪಿದ್ದಾರೆ ಮತ್ತು 2,735 ಮಂದಿ ಗಾಯಗೊಂಡಿದ್ದಾರೆ ಎಂದು ಅದು ಹೇಳಿದೆ.
ಇನ್ನೊಂದು ಹೇಳಿಕೆಯಲ್ಲಿ ಇಸ್ರೇಲ್‌ನ “ಆಕ್ರಮಣಶೀಲತೆ” ಮತ್ತು ಬಿಗಿಗೊಳಿಸಿದ ದಿಗ್ಬಂಧನದಿಂದಾಗಿ ಗಾಜಾದಲ್ಲಿ ಆರೋಗ್ಯ ಕ್ಷೇತ್ರದ ತೀವ್ರ ಕ್ಷೀಣತೆಯ ಬಗ್ಗೆ ಆರೋಗ್ಯ ಅಧಿಕಾರಿಗಳು ಎಚ್ಚರಿಸಿದ್ದಾರೆ. ಇದು ವೈದ್ಯಕೀಯ ಮತ್ತು ಮಾನವೀಯ ಅಗತ್ಯಗಳು ಹೆಚ್ಚುತ್ತಿರುವ ಸಮಯದಲ್ಲಿ ಆರೋಗ್ಯ ವ್ಯವಸ್ಥೆಯ ಸಂಪೂರ್ಣ ಕುಸಿತಕ್ಕೆ ಕಾರಣವಾಗಿದೆ ಎಂದಿದ್ದಾರೆ.
ಗಾಜಾದಲ್ಲಿ ಆಸ್ಪತ್ರೆಗಳು ಮತ್ತು ಆರೋಗ್ಯ ಸೌಲಭ್ಯಗಳು ತಮ್ಮ ಸಾಮರ್ಥ್ಯ ಮೀರಿ ಕಾರ್ಯನಿರ್ವಹಿಸುತ್ತಿದ್ದು, ಔಷಧಿಗಳು ಮತ್ತು ವೈದ್ಯಕೀಯ ಸರಬರಾಜುಗಳ ತೀವ್ರ ಕೊರತೆ ಮತ್ತು ಇಂಧನದ ಕೊರತೆಯಿಂದಾಗಿ ಸಾವಿರಾರು ರೋಗಿಗಳು ಮತ್ತು ಗಾಯಾಳುಗಳು, ವಿಶೇಷವಾಗಿ ಮಕ್ಕಳು, ಗರ್ಭಿಣಿಯರು ಮತ್ತು ವೃದ್ಧರ ಜೀವಕ್ಕೆ ಅಪಾಯ ಎದುರಾಗಿದೆ ಎಂದು ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ.
ಅಂತರರಾಷ್ಟ್ರೀಯ ವೈದ್ಯಕೀಯ ತಂಡಗಳಿಂದ ಬೆಂಬಲವನ್ನು ಕೋರಲಾಗಿದೆ ಮತ್ತು ಪಶ್ಚಿಮ ದಂಡೆ ಅಥವಾ ವಿದೇಶಗಳಲ್ಲಿರುವ ಪ್ಯಾಲೇಸ್ತೀನಿಯನ್ ಆಸ್ಪತ್ರೆಗಳಲ್ಲಿ ಚಿಕಿತ್ಸೆಗಾಗಿ ಗಾಯಾಳುಗಳು ಮತ್ತು ರೋಗಿಗಳನ್ನು ಸಾಗಿಸಲು ಮಾನವೀಯ ಕಾರಿಡಾರ್‌ಗಳನ್ನು ತೆರೆಯಬೇಕು ಎಂದು ಹೇಳಿಕೆಯಲ್ಲಿ ಕರೆ ನೀಡಲಾಗಿದೆ.
ಪ್ಯಾಲೇಸ್ತೀನಿಯನ್ ಕೇಂದ್ರೀಯ ಅಂಕಿಅಂಶಗಳ ಬ್ಯೂರೋ ಪ್ರಕಾರ, ಗಾಜಾ ಪಟ್ಟಿಯಲ್ಲಿ 39,384 ಮಕ್ಕಳಿದ್ದಾರೆ, ಅವರು ಇಸ್ರೇಲ್‌ನೊಂದಿಗೆ ನಡೆಯುತ್ತಿರುವ ಸಂಘರ್ಷದ ಮಧ್ಯೆ ಈ ಬಹಳಷ್ಟು ಮಕ್ಕಳು ತಮ್ಮ ಒಬ್ಬ ಪೋಷಕರಲ್ಲಿ ಒಬ್ಬರನ್ನು ಕಳೆದುಕೊಂಡಿದ್ದಾರೆ. ಮತ್ತೊಂದೆಡೆ ಪೋಷಕರಲ್ಲಿ ಇಬ್ಬರನ್ನು ಈ ಮಕ್ಕಳು ಕಳೆದುಕೊಂಡಿದ್ದಾರೆ ಎಂದು ಹೇಳಿದೆ. ಈ ಮಕ್ಕಳು ದುರಂತ ಪರಿಸ್ಥಿತಿಗಳಲ್ಲಿ ವಾಸಿಸುತ್ತಿದ್ದಾರೆ, ಅವರಲ್ಲಿ ಹಲವರು ಸಾಮಾಜಿಕ ಆರೈಕೆ ಮತ್ತು ಮಾನಸಿಕ ಬೆಂಬಲದ ಸಂಪೂರ್ಣ ಅನುಪಸ್ಥಿತಿಯಲ್ಲಿ ಹರಿದ ಶಿಬಿರಗಳು ಅಥವಾ ನಾಶವಾದ ಮನೆಗಳಲ್ಲಿ ಆಶ್ರಯ ಪಡೆಯುವಂತೆ ಒತ್ತಾಯಿಸಲಾಗಿದೆ ಎಂದು ಅದು ತಿಳಿಸಿದೆ.
ಪ್ಯಾಲೇಸ್ತೀನಿಯನ್ ಜನಸಂಖ್ಯೆಯ ಶೇಕಡಾ 43ರಷ್ಟು ಮಕ್ಕಳಿದ್ದಾರೆ ಮತ್ತು ಗಾಜಾ ಪಟ್ಟಿಯಲ್ಲಿರುವ ಹೆಚ್ಚಿನ ಅನಾಥರ ಸಂಖ್ಯೆಯಿಂದಾಗಿ “ಆಧುನಿಕ ಇತಿಹಾಸದಲ್ಲಿ ಅತಿದೊಡ್ಡ ಅನಾಥ ಬಿಕ್ಕಟ್ಟು” ಎಂದು ಅದು ಹೇಳಿದೆ.
ಏತನ್ಮಧ್ಯೆ ಇಸ್ರೇಲಿ ಸೈನ್ಯವು ಗಾಜಾ ನಗರದ ಪೂರ್ವದಲ್ಲಿರುವ ಕೆಲವು ಪ್ರದೇಶಗಳ ನಿವಾಸಿಗಳನ್ನು ಸ್ಥಳಾಂತರಿಸಲು ಮತ್ತು ನಗರದ ಪಶ್ಚಿಮಕ್ಕೆ ಆಶ್ರಯ ತಾಣಗಳಿಗೆ ಹೋಗುವಂತೆ ಕರೆ ನೀಡಿದೆ.
ಇಸ್ರೇಲಿ ಮಿಲಿಟರಿ ವಕ್ತಾರ ಅವಿಚೇ ಅಡ್ರೇ ಒಂದು ಹೇಳಿಕೆಯಲ್ಲಿ, ಶುಜೈಯಾ ಪ್ರದೇಶ ಮತ್ತು ಇತರ ಕೆಲವು ನೆರೆಹೊರೆಗಳ ನಿವಾಸಿಗಳಿಗೆ “ಗಂಭೀರ ಮತ್ತು ತುರ್ತು ಎಚ್ಚರಿಕೆ” ನೀಡಿದ್ದಾರೆ.
“ನಿಮ್ಮ ಸ್ವಂತ ಸುರಕ್ಷತೆಗಾಗಿ, ನೀವು ಈ ಪ್ರದೇಶಗಳನ್ನು ತಕ್ಷಣವೇ ಸ್ಥಳಾಂತರಿಸಬೇಕು ಮತ್ತು ಪಶ್ಚಿಮ ಗಾಜಾ ನಗರದ ತಿಳಿದಿರುವ ಆಶ್ರಯಗಳಿಗೆ ಸ್ಥಳಾಂತರಗೊಳ್ಳಬೇಕು” ಎಂದು ಅವರು ಹೇಳಿದ್ದಾರೆ.
ಹೊಸದಾಗಿ 280,000 ಮಂದಿ ಸ್ಥಳಾಂತರ: ವಿಶ್ವಸಂಸ್ಥೆ
ಎರಡು ವಾರಗಳ ಹಿಂದೆ ಯುದ್ಧ ತೀವ್ರಗೊಂಡ ನಂತರ ಅಂದಾಜು 280,000 ಗಾಜಾ ನಿವಾಸಿಗಳು ಹೊಸದಾಗಿ ಸ್ಥಳಾಂತರಗೊಂಡಿದ್ದಾರೆ, ಅವರಲ್ಲಿ ಕೆಲವರು ಕಿಕ್ಕಿರಿದ, ಚಿಗಟ ಮತ್ತು ಹುಳಗಳಿಂದ ತುಂಬಿರುವ ಆಶ್ರಯಗಳಿಗೆ ಸ್ಥಳಾಂತರಗೊಳ್ಳಲು ಒತ್ತಾಯಿಸಲ್ಪಟ್ಟಿದ್ದಾರೆ ಎಂದು ವಿಶ್ವಸಂಸ್ಥೆ ಹೇಳಿದೆ.
ಹೆಚ್ಚುತ್ತಿರುವ ಸಂಖ್ಯೆಯ ಜನರು ಈಗಾಗಲೇ ಕಿಕ್ಕಿರಿದಿರುವ ಉಳಿದ ಆಶ್ರಯಗಳಿಗೆ ಸ್ಥಳಾಂತರಗೊಳ್ಳುತ್ತಿದ್ದಾರೆ” ಎಂದು OCHA ಹೇಳಿದೆ. “ಚಿಗಟಗಳು ಮತ್ತು ಹುಳಗಳ ಮುತ್ತಿಕೊಳ್ಳುವಿಕೆ ವರದಿಯಾಗಿದೆ, ಇದು ಚರ್ಮದ ದದ್ದುಗಳು ಮತ್ತು ಇತರ ಆರೋಗ್ಯ ಸಮಸ್ಯೆಗಳನ್ನು ಉಂಟುಮಾಡುತ್ತದೆ.” ಎಂದು ಅದು ತಿಳಿಸಿದೆ.
ಗಾಜಾದಲ್ಲಿ ನೈರ್ಮಲ್ಯ ಪರಿಸ್ಥಿತಿಗಳನ್ನು ಸುಧಾರಿಸಲು ಸಾಮಗ್ರಿಗಳು ಲಭ್ಯವಿಲ್ಲದ ಕಾರಣ ನೆರವು ನಿರ್ಬಂಧವು ಸಮಸ್ಯೆಯನ್ನು ನಿಭಾಯಿಸಲು ಕಷ್ಟಕರವಾಗಿದೆ ಎಂದು ಕಚೇರಿ ಹೇಳಿದೆ.
ಪರಿಸ್ಥಿತಿಗಳು ಅನುಮತಿಸಿದಂತೆ ವಿಶ್ವಸಂಸ್ಥೆ ಮತ್ತು ಅದರ ಮಾನವೀಯ ಪಾಲುದಾರರು ಜನಸಂಖ್ಯೆಯ ಅಪಾರ ಅಗತ್ಯಗಳಿಗೆ ಸ್ಪಂದಿಸುವುದನ್ನು ಮುಂದುವರಿಸಿದ್ದಾರೆ ಎಂದು OCHA ಹೇಳಿದೆ.
ಎಲ್ಲಾ ಮಾನವೀಯ ನೆರವು ಮತ್ತು ಅಗತ್ಯ ವಸ್ತುಗಳ ಪ್ರವೇಶದ ಮೇಲಿನ ಒಂದು ತಿಂಗಳ ಅವಧಿಯ ದಿಗ್ಬಂಧನವು ಜನಸಂಖ್ಯೆಯ ಮೂಲಭೂತ ಅಗತ್ಯಗಳನ್ನು ಕಸಿದುಕೊಳ್ಳುತ್ತಿದೆ. ಗಾಜಾದೊಳಗಿನ ಆಹಾರ ನೆರವು ವೇಗವಾಗಿ ಖಾಲಿಯಾಗುತ್ತಿದೆ. ಆದಾಗ್ಯೂ, ಆಹಾರ ಭದ್ರತಾ ಪಾಲುದಾರರು ಇಲ್ಲಿಯವರೆಗೆ ಪ್ರತಿದಿನ 9,00,00ಕ್ಕೂ ಹೆಚ್ಚು ಬಿಸಿ ಊಟಗಳನ್ನು ತಲುಪಿಸಲು ಸಮರ್ಥರಾಗಿದ್ದಾರೆ ಎಂದು ಕಚೇರಿ ಹೇಳಿದೆ.
ಗಾಜಾಗೆ ಪ್ರವೇಶಿಸಲು ಸರಕು ಮತ್ತು ಮಾನವೀಯ ನೆರವು ಪಡೆಯಲು ಕ್ರಾಸಿಂಗ್‌ಗಳನ್ನು ತಕ್ಷಣವೇ ಮತ್ತೆ ತೆರೆಯುವಂತೆ OCHA ಒತ್ತಾಯಿಸಿದೆ.
