ಬ್ರೆಜಿಲ್: ಬೊಲ್ಸೊನಾರೊ ಸೋಲು; ಅಮೆಜಾನ್ ಕಾಡು ಉಳಿವ ಭರವಸೆ; ಜಗತ್ತಿಗೂ ನಿಟ್ಟುಸಿರು

ಅಮೆಜಾನ್ ಅರಣ್ಯ ಮತ್ತು ಅದರ ವಿನಾಶವು ಕೇವಲ ದಕ್ಷಿಣ ಅಮೆರಿಕದ ವಿಷಯವಷ್ಟೇ ಅಲ್ಲ, ಕಾರಣ, ವಿಶ್ವದ ಅಳಿವು ಉಳಿವು ಅಮೆಜಾನ್ ಅರಣ್ಯಗಳ ಸುಸ್ಥಿತಿಯ ಮೇಲೆ ನಿಂತಿದೆ. ಹವಾಮಾನ ವೈಪರೀತ್ಯದ ಕುರಿತ ಎಲ್ಲ ಜಾಗತಿಕ ಸಭೆಗಳಲ್ಲಿಯೂ ಅಮೆಜಾನ್ ಕುರಿತ ಚರ್ಚೆ ಇದ್ದೆ ಇರುತ್ತದೆ. ಜಾಗತಿಕ ಸಮುದಾಯದ ಒತ್ತಾಸೆ ಮತ್ತು ಬೆಂಬಲದ ಕಾರಣದಿಂದಾಗಿ, ಬೊಲ್ಸೊನಾರೊರ ಅಧ್ಯಕ್ಷೀಯ ಅವಧಿಗೂ ಮುಂಚೆ, ಬ್ರೆಜಿಲ್‌ನ ಈ ಕಾಡುಗಳ ನಾಶದ ಪ್ರಮಾಣವು ಸ್ವಲ್ಪ ಮಟ್ಟಿಗಾದರೂ ತಗ್ಗಿತ್ತು. ಸುಮಾರು ಎರಡು ಅವಧಿಗೆ ಅಧ್ಯಕ್ಷರಾಗಿದ್ದ ಲೂಲಾರ ಕ್ರಮಗಳಿಂದಾಗಿ ಅಲ್ಲಿನ ಮೂಲನಿವಾಸಿಗಳ ಹಕ್ಕುಗಳ ರಕ್ಷಣೆ ಕೂಡ ತಕ್ಕಮಟ್ಟಿಗೆ ಆಗಿತ್ತು. ಆದರೆ 2019-2022ರ ಅವಧಿಗೆ ಅಧ್ಯಕ್ಷರಾಗಿದ್ದ ಬೊಲ್ಸೊನಾರೊ, ಅಮೆಜಾನ್ ಕಾಡುಗಳ ಮೇಲೆ ಬ್ರೆಜಿಲ್ ಜನರಿಗಷ್ಟೇ ಹಕ್ಕು ಇದೆ, ಅದರಲ್ಲಿ ವಿದೇಶಿ ಹಸ್ತಕ್ಷೇಪ ಆಗಕೂಡದು ಎಂಬ ತತ್ವದ ಮೂಲಕ ಬ್ರೆಜಿಲ್ ನಲ್ಲಿ ವ್ಯಾಪಕವಾಗಿ ಕೃಷಿ ಉದ್ಯಮ, ಗಣಿಗಾರಿಕೆಗೆ ಅವಕಾಶ ಕೊಟ್ಟರು; ಮತ್ತು ಅದರ ಮುಸುಕಿನಲ್ಲಿ ನಡೆಯುವ ಮರಮುಟ್ಟುಗಳ ಉದ್ಯಮಕ್ಕೆ ಸಂಪೂರ್ಣ ಬೆಂಬಲ ಕೊಟ್ಟರು. ಇಲ್ಲಿ ಕೃಷಿಯೆಂದರೆ ನಮ್ಮ ದೇಶದಲ್ಲಿ ಇದ್ದಂತೆ ಸಣ್ಣ ಹಿಡುವಳಿದಾರರ ಸಾಂಪ್ರದಾಯಿಕ ಕೃಷಿ ಅಲ್ಲ. ವಿಶಾಲವಾದ ಪ್ರದೇಶದಲ್ಲಿ ಕಾಡುಗಳನ್ನು ಸವರಿ ಬೆಂಕಿ ಕೊಟ್ಟು ಅಲ್ಲಿ ಸೋಯಾ ಅವರೆಯನ್ನು ಏಕ ಬೆಳೆಯನ್ನಾಗಿ ಬೆಳೆಸುವ ಬೃಹತ್ ಉದ್ಯಮ. ಯಾವ ದೃಷ್ಟಿಯಲ್ಲಿಯೂ ಪರಿಸರ ಸ್ನೇಹಿಯಲ್ಲದ ಈ ಕೃಷಿಯು ಅಪಾರವಾದ ಕೀಟನಾಶಕಗಳನ್ನು ಬೇಡುತ್ತದೆ, ಹೀಗಾಗಿ ಇವರ ಅವಧಿಯಲ್ಲಿ ಬ್ರೆಜಿಲ್, ವಿಶ್ವದ ಅತಿದೊಡ್ಡ ಕೀಟನಾಶಕಗಳ ಬಳಕೆದಾರ ರಾಷ್ಟ್ರವಾಗಿಯೂ ಹೊರಹೊಮ್ಮಿತು. ಮುಂಚೆ ನಿಷೇಧಿತವಾಗಿದ್ದ ಅಪಾಯಕಾರಿ ಕೀಟನಾಶಕಗಳ ಬಳಕೆಗೆ ಅವಕಾಶ ನೀಡಲಾಯಿತು. ಇದಷ್ಟೇ ಅಲ್ಲದೆ ಬ್ರೆಜಿಲ್ ವಿಶ್ವದ ಅತಿದೊಡ್ಡ ದನದ ಮಾಂಸದ ರಫ್ತುದಾರ ರಾಷ್ಟ್ರ.ಇದೇನು ಬಡ ದನಗಾಹಿಗಳು ನಡೆಸುವ ಉದ್ಯೋಗವಲ್ಲ, ದೊಡ್ಡ ದೊಡ್ಡ ಕಾಡುಗಳನ್ನು ಸವರಿ ಅವನ್ನು ಹುಲ್ಲುಗಾವಲನ್ನಾಗಿ ಪರಿವರ್ತಿಸಿ ದನಗಳನ್ನು ಸಾಕುವ ವಿಧಾನ. ಇದು ಕೂಡ  ಅಮೆಜಾನ್ ನಾಶಕ್ಕೆ ದೊಡ್ಡ ಕೊಡುಗೆ ನೀಡಿದೆ.

ಇಷ್ಟೇ ಅಲ್ಲದೆ, ಬೊಲ್ಸೊನಾರೊ ಅಮೆಜಾನ್‌ನ ನಾಶಕ್ಕೆ ಇನ್ನೂ ಮುಂದುವರೆದು ಹೊಸ ಆಯಾಮವನ್ನೇ ತೆರೆದರು. ಕೃಷಿ ಉದ್ಯಮ ಲಾಬಿಯ ಅಣತಿಯಂತೆ ಅಕ್ರಮವಾಗಿ ಕಾಡು ಕಡಿದು ನಿರ್ಮಿಸಿದ ಕೃಷಿ ಭೂಮಿಯನ್ನು ಸಕ್ರಮ ಮಾಡುವ ಕರಡು ಮಸೂದೆಯನ್ನು ಹೊರಡಿಸಿದರು. ಇದು, ಅಪರಾಧಿಗಳಾಗಿ ಕಾನೂನಿನ ಕ್ರಮವನ್ನು ಎದುರಿಸಬೇಕಾಗಿದ್ದಂತವರನ್ನು ಭೂಮಿಯ ಒಡೆಯರನ್ನಾಗಿಸುತ್ತಿತ್ತು. ಅಲ್ಲಿನ ಮೂಲನಿವಾಸಿಗಳ ಹಕ್ಕನ್ನು ಮೊಟಕುಗೊಳಿಸಿ ಅವರ ವ್ಯಾಪ್ತಿಯ ಭೂಮಿಯನ್ನು ಕಾಡುಗಳ್ಳರು ಸುಲಭವಾಗಿ ಪಡೆಯುವಂತಹ ಕರಡನ್ನು ರೂಪಿಸಿದರು. ಸಾಮಾನ್ಯವಾಗಿ ಪರಿಸರ ವಿರೋಧಿ ಧೋರಣೆಯುಳ್ಳವರು ಮಾಡುವ ಮೊದಲ ಕೆಲಸವೆಂದರೆ ವಿಜ್ಞಾನ ಮತ್ತು ವಿಜ್ಞಾನಿಗಳನ್ನು ದೂಷಿಸುವುದು ಮತ್ತು ಸಂಶೋಧನೆಗೆ ಇದ್ದ ಬೆಂಬಲವನ್ನು ಮೊಟಕುಗೊಳಿಸುವುದು.  ಬೊಲ್ಸೊನಾರೊ ಕೂಡ ಇದನ್ನು ಚಾಚೂ ತಪ್ಪದೆ ಜಾರಿಗೆ ತಂದರು. ಬ್ರೆಜಿಲ್‌ನ ಪರಿಸರ ರಕ್ಷಣೆ ಮತ್ತು ಸಂಶೋಧನೆಗೆ ಮೀಸಲಾಗಿದ್ದ ಹಣಕಾಸಿನ ನೆರವನ್ನು ಕಡಿತಗೊಳಿಸಿದರು. ಇದರ ಪರಿಣಾಮವಾಗಿ ಪರಿಸರ ಅಪರಾಧಗಳನ್ನು ಪತ್ತೆ ಹಚ್ಚುವ ಮತ್ತು ಶಿಕ್ಷಿಸುವ ಪ್ರಕ್ರಿಯೆಯು ಕುಂಠಿತವಾಗಿ ಅರಣ್ಯನಾಶ ಇನ್ನೂ ಹೆಚ್ಚಿತು. ಇದು ಅಮೆಜಾನಿನ ಇತಿಹಾಸದಲ್ಲೇ ಭೀಕರವಾದ ಕಾಳ್ಗಿಚ್ಚಿಗೂ ನಾಂದಿ ಹಾಡಿತು. ಈವರೆಗೂ ಜಾಗತಿಕ ಇಂಗಾಲವನ್ನು ಹೀರಿಕೊಳ್ಳುವ ತಾಣವಾಗಿದ್ದ ಅಮೆಜಾನ್, ಭಾರೀ ಪ್ರಮಾಣದ ಇಂಗಾಲವನ್ನು ಹೊರಸೂಸುವ ಕುಲುಮೆಯಾಗಿ ಮಾರ್ಪಟ್ಟಿತು. ಇದರ ತೀವ್ರತೆ ಯಾವ ಮಟ್ಟಕ್ಕೆ ಇತ್ತೆಂದರೆ ಬ್ರೆಜಿಲ್‌ನ ಸಾವೋ ಪೌಲೊ ನಗರ ಬೆಂಕಿಯ ಹೊಗೆಯಿಂದಾಗಿ ಒಂದು ದಿನ ಪೂರ್ತಿ ಕತ್ತೆಲೆಯಿಂದ ಅವರಿಸಲ್ಪಟ್ಟಿತ್ತು. ಇತ್ತ ಎಚ್ಛೆತ್ತ ಜಾಗತಿಕ ಸಮುದಾಯ ನೆರವಿಗೆ ನಿಂತರೂ ಮೊಂಡಾಟ ಬಿಡದ ಬೊಲ್ಸೊನಾರೊ, ಜಿ7 ರಾಷ್ಟ್ರಗಳು ನೀಡಿದ ನೆರವನ್ನು ನಾನು ಸ್ವೀಕರಿಸಲಾರೆ ಎಂದು ಚಂಡಿ ಹಿಡಿದರು. ಬದಲಾಗಿತ್ತರುವ ಜಾಗತಿಕ ರಾಜಕೀಯ ಸಮೀಕರಣಗಳೂ ಅವರ ಮೊಂಡು ಹಠಕ್ಕೆ ಕಾರಣ ಎನ್ನಬಹುದು. ಒಂದು ವೇಳೆ ಯುರೋಪ್ ಅಥವಾ ಅಮೆರಿಕ ಬ್ರೆಜಿಲ್‌ನ ಉತ್ಪನ್ನಗಳನ್ನು ನಿರ್ಬಂಧಿಸಿದರೂ ಚೀನಾ ಅವುಗಳಿಗೆ ದೊಡ್ಡ ಮಾರುಕಟ್ಟೆಯನ್ನೇ ಒದಗಿಸಿದೆ. ಹೀಗಾಗಿ  ಪರಿಸರ ರಕ್ಷಣೆಗೆ ಜಾಗತಿಕ ಒತ್ತಡ ಮುಂಚಿನಷ್ಟು ಪರಿಣಾಮಕಾರಿಯಾಗಿ ಇಲ್ಲದೆ ಹೋಗಬಹುದು, ಒಂದು ವೇಳೆ ಇದ್ದರೂ, ಅದನ್ನು ದೇಶಭಕ್ತಿಯ ಆಧಾರದ ಮೇಲೆ ಅಲ್ಲಗಳೆಯುವ ಕ್ರಮಗಳೂ ಹೆಚ್ಚುತ್ತಿವೆ. ಆದರೆ ಇಲ್ಲಿ ಗಮನಿಸಬೇಕಾದ ವಿಷಯವೆಂದರೆ, ಬಾಹ್ಯ ಹಸ್ತಕ್ಷೇಪವನ್ನು ವಿರೋಧಿಸುವುದೇನೋ ಸರಿ ಆದರೆ ಆ ವಿರೋಧವನ್ನು ಕೇವಲ ಇನ್ನೂ ಹೆಚ್ಚಿನ ಅರಣ್ಯ ನಾಶಕ್ಕೆ ಬಳಸಿಕೊಳ್ಳಲಾಗಿದೆಯೇ ಹೊರತು ತಮ್ಮದೇ ದೇಶದ ಪರಿಸರ ರಕ್ಷಣೆಯ ಬಾಧ್ಯತೆಯಾಗಿ ಮಾತ್ರ ಪರಿವರ್ತನೆಯಾಗುತ್ತಿಲ್ಲ.