ಹೊಸದಿಲ್ಲಿ: ಕಳೆದ ಸೋಮವಾರ (ಫೆ.7ರಂದು) ಗುಜರಾತ್ನ ಬನಸ್ಕಾಂತ ಜಿಲ್ಲೆಯ ಮೋಟಾ ಗ್ರಾಮದಲ್ಲಿ ದಲಿತರ ಮೇಲೆ ಸವರ್ಣೀಯರು ಕಲ್ಲು ತೂರಾಟ ನಡೆಸಿದ್ದಾರೆ. ದಲಿತ ವ್ಯಕ್ತಿಯ ವಿವಾಹದ ಮೆರವಣಿಗೆಯಲ್ಲಿ ದಲಿತರು ಸಫಾಗಳನ್ನು (ಸಾಂಪ್ರದಾಯಿಕ ಪೇಟಗಳನ್ನು) ಧರಿಸಿದ್ದಕ್ಕಾಗಿ ಸವರ್ಣೀಯರು ಕಲ್ಲುಗಳಿಂದ ದಾಳಿ ಮಾಡಿದ್ದಾರೆ ಎಂದು ಡೆಕ್ಕನ್ ಹೆರಾಲ್ಡ್ ವರದಿ ಮಾಡಿದೆ.
ಸವರ್ಣೀಯ ರಜಪೂತ ಸಮುದಾಯದವರಾದ ಗ್ರಾಮದ ಸರಪಂಚ್ ಸೇರಿದಂತೆ 28 ಜನರ ಮೇಲೆ ಪ್ರಕರಣವನ್ನು ಬನಸ್ಕಾಂತ ಪೊಲೀಸರು ದಾಖಲಿಸಿದ್ದಾರೆ. ದಾಳಿಕೋರರ ವಿರುದ್ಧ ಭಾರತೀಯ ದಂಡ ಸಂಹಿತೆಯ (ಐಪಿಸಿ) ವಿವಿಧ ಸೆಕ್ಷನ್ಗಳ ಅಡಿಯಲ್ಲಿ ಎಫ್ಐಆರ್ ದಾಖಲಿಸಲಾಗಿದೆ.
ಐಪಿಸಿ ಸೆಕ್ಷನ್ 143 (ಕಾನೂನುಬಾಹಿರ ಸಭೆ), 506 (ಅಪರಾಧ ಬೆದರಿಕೆ) ಹಾಗೂ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳ (ದೌರ್ಜನ್ಯ ತಡೆ) ಕಾಯ್ದೆಯ ಹಲವು ವಿಭಾಗಗಳ ಅಡಿಯಲ್ಲಿ ಗಢ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ನಂತರ ಪ್ರಕರಣವನ್ನು ಎಸ್ಸಿ/ಎಸ್ಟಿ ಪೊಲೀಸ್ ವಿಭಾಗದ ಉಪ ಅಧೀಕ್ಷಕರಿಗೆ (ಡಿವೈಎಸ್ಪಿಗೆ) ಹಸ್ತಾಂತರಿಸಲಾಯಿತು ಎಂದು ಗಢ್ ಪೊಲೀಸ್ ಠಾಣೆಯ ಡಿವೈಎಸ್ಪಿ ಕುಶಾಲ್ ಓಜಾ ಹೇಳಿದ್ದಾರೆ ಎಂದು ಸುದ್ದಿ ಸಂಸ್ಥೆ ಪಿಟಿಐ ತಿಳಿಸಿದೆ.
ಘಟನೆಯ ವಿವರಗಳು
ಮದುಮಗ ಅತುಲ್ ಸೆಖಾಲಿಯಾ ಅವರ ತಂದೆ ವೀರಭಾಯ್ ಸೆಖಾಲಿಯಾ ಅವರು ಘಟನೆಯ ಕುರಿತು ನೀಡಿದ ದೂರಿನ ಆಧಾರದ ಮೇಲೆ ಎಫ್ಐಆರ್ ದಾಖಲಿಸಲಾಗಿದೆ.
“ಮೆರವಣಿಗೆಯ ಸಮಯದಲ್ಲಿ ದಲಿತ ಸಮುದಾಯದ ವರ ಕುದುರೆಯ ಮೇಲೆ ಸವಾರಿ ಮಾಡಬಾರದು. ಕುಟುಂಬ ತನ್ನ ಯೋಜನೆಯನ್ನು ಕೈಬಿಡಬೇಕು ಎಂದು ಗ್ರಾಮದ ಸರಪಂಚ್ ಭರತ್ಸಿಂಹ ರಜಪೂತ್ ಸೇರಿದಂತೆ ಗ್ರಾಮದ ಹಲವಾರು ಸದಸ್ಯರು ಆಗ್ರಹಿಸಿದ್ದರು. ಕುದುರೆಯಲ್ಲಿ ಮೆರವಣಿಗೆ ಮಾಡಿದರೆ ಪರಿಣಾಮಗಳು ವ್ಯತಿರಿಕ್ತವಾಗುತ್ತವೆ ಎಂದು ಬೆದರಿಕೆ ಹಾಕಿದ್ದರು” ಎಂದು ಎಫ್ಐಆರ್ನಲ್ಲಿ ಹೇಳಲಾಗಿದೆ.
ಕುಟುಂಬವು ತಮ್ಮ ನಿರ್ಧಾರವನ್ನು ಬದಲಿಸಲಿಲ್ಲ. ಸರಪಂಚರು ಭಾನುವಾರ ಗ್ರಾಮಸ್ಥರ ಸಾರ್ವಜನಿಕ ಸಭೆಯನ್ನು ಕರೆದರು. ಅಲ್ಲಿ ಅವರು ಮತ್ತೊಮ್ಮೆ ಕುಟುಂಬಕ್ಕೆ ಬೆದರಿಕೆ ಹಾಕಿದರು. ದಲಿತ ಸಮುದಾಯದ ಸದಸ್ಯನು ಕುದುರೆ ಸವಾರಿ ಮಾಡಬಾರದು. ಏಕೆಂದರೆ ಅದು ಶತಮಾನಗಳ ಸಂಪ್ರದಾಯಕ್ಕೆ ವಿರುದ್ಧವಾಗಿದೆ ಎಂದು ವಾದಿಸಿದರು.
ಮದುವೆಯ ದಿನದಂದು ಘರ್ಷಣೆಯಾಗುವುದನ್ನು ತಪ್ಪಿಸಲು, ಮದುಮಗನನ್ನು ಕುದುರೆಯಲ್ಲಿ ಕರೆತರುವ ನಿರ್ಧಾರವನ್ನು ಕುಟುಂಬವು ಕೈಬಿಟ್ಟಿತು. ಮದುವೆಗೂ ಮುನ್ನ ದಲಿತ ಕುಟುಂಬ ಪೊಲೀಸರ ರಕ್ಷಣೆಯನ್ನೂ ಕೋರಿತ್ತು.
ಸೋಮವಾರ ಪೊಲೀಸ್ ಸಿಬ್ಬಂದಿಯ ಉಪಸ್ಥಿತಿಯ ನಡುವೆ ಮೆರವಣಿಗೆ ಪ್ರಾರಂಭವಾದಾಗ, ಮೆರವಣಿಗೆಯ ಸಮಯದಲ್ಲಿ ದಲಿತ ಸಮುದಾಯದ ಸದಸ್ಯರು ಸಫಾಗಳನ್ನು ಧರಿಸಿದ್ದನ್ನು ಸವರ್ಣೀಯರು ಆಕ್ಷೇಪಿಸಿದರು. ಜಾತಿ ನಿಂದನೆ ಪದಗಳನ್ನು ಬಳಸುವ ಮೂಲಕ ಕುಟುಂಬವನ್ನು ನಿಂದಿಸಿದರು.
ಎಫ್ಐಆರ್ ಪ್ರಕಾರ, ಕೆಲವು “ಅಪರಿಚಿತ” ವ್ಯಕ್ತಿಗಳು ಕಲ್ಲುಗಳಿಂದ ಹೊಡೆಯಲು ಪ್ರಾರಂಭಿಸಿದರು. ವರನ ಸಂಬಂಧಿಕರಲ್ಲಿ ಒಬ್ಬರು ಗಾಯಗೊಂಡಿದ್ದಾರೆ.
ಇದನ್ನೂ ಓದಿರಿ: ಹಿಜಾಬ್ ವಿವಾದ: ತಮಿಳುನಾಡು, ಕೇರಳ, ಆಂಧ್ರದ ಮಾಧ್ಯಮಗಳಲ್ಲಿ ರಾಜ್ಯಕ್ಕೆ ಛೀಮಾರಿ
